ႁူဝ်ပဝ်ႈၶွင်ႊသီႊဢဝ်ၶိုၼ်းၸိုင်ႈတႆး (RCSS) တွပ်ႇလၢတ်ႈလွင်ႈ ၵေႃပွင်ၵၢၼ်ၽွမ်ႉႁူမ်ႈ ၸိုင်ႈတႆး (CSSU) ၵဵဝ်ႇၵပ်းလွင်ႈငဝ်းလၢႆး ဢၼ်ပဵၼ်ယူႇယၢမ်းလဵဝ် လႄႈ ဢၼ်တေတူင်ႉၼိုင်ၵႂႃႇ။ လွင်ႈၼႆႉ ၸုမ်းၶၢဝ်ႇၽူႈတွႆႇႁွၵ်ႈ လႆႈတွင်ႈထၢမ်မၼ်းၸဝ်ႈဝႆႉ ၼင်ႇၼႆ။

ၸဝ်ႈယွတ်ႈသိုၵ်း ႁူဝ်ႈပဝ်ႈၶွင်ႊသီႊဢဝ်ၶိုၼ်းၸိုင်ႈတႆး

ထၢမ်-ၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး CSSU တေမီးပၢင်ၵုမ် 25-26/02/2015 ၼႆႉ တေမီးလၢႆပႃႊတီႊ/ လၢႆၸုမ်း ၼႂ်းတႆးႁဝ်း ဢၼ်တေမႃးဢုပ်ႇဢူဝ်းၵၼ် ပွၵ်ႈတီႈ 3 ။ ပွၵ်ႈတီႈ 1 ၼႆႉ လႆႈၸႂ်ၵၼ်ၵေႃႇတင်ႈၶိုၼ်ႈမႃး CSSU ။ ပွၵ်ႈတီႈ 2 ၵေႃႈ လႆႈၸတ်းပၢင်ၵုမ်သေ မွပ်ႈမၢႆပၼ်ၼႃႈၵၢၼ်ၵၼ်။ ပွၵ်ႈတီႈ 3 ၼႆႉၵေႃႈ တေမႃးႁူပ်ႉၵၼ်။ ၶၢဝ်းတၢင်း 6 လိူၼ်ပူၼ်ႉမႃးၼႆႉ ပဵၼ်ၸိူင်ႉႁိုဝ်ၽွင်ႈ။ ပွၵ်ႈၼႆႉ သမ်ႉတေယုၵ်ႉၸၼ်ႉ/ ယုၵ်ႉမုၼ်း ၵႂႃႇၸိူင်ႉႁိုဝ် ႁႂ်ႈပေႃးၵၢဝ်ႉယၢင်ႈၵႂႃႇလႆႈ ၼႂ်းမိူင်းတႆးပတ်းပိုၼ်ႉၶႃႈ ? ။

တွပ်ႇ-ၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး (CSSU)ၼႆႉ ဢွၼ်တၢင်းမိူဝ်ႈတႄႇ ၵေႃႇတင်ႈမႃး ႁဝ်းယိူင်းဢၢၼ်းမီးယူႇ 3 လွင်ႈ- 1. ၶႂ်ႈႁႂ်ႈတႆးႁဝ်းၵူႈတီႈတီႈမႃးႁူမ်ႈၵၼ်။ ပွင်ႇဝႃႈၶႂ်ႈပဵၼ်သုၼ်ႁူမ်ႈ (ငဝ်ႈငုၼ်း) တႆးၵူၺ်းဢမ်ႇၵႃး ၶႂ်ႈႁႂ်ႈပဵၼ်သုၼ်ႁူမ်ႈၵူႈၸၢဝ်းၶိူဝ်း ၼႂ်းၸိုင်ႈတႆး။ 2.ပိူဝ်ႈတႃႇဢုပ်ႇဢူဝ်းၵၢၼ်မိူင်း။ ပိူဝ်ႈတႃႇဢုပ်ႇဢူဝ်း ၵၢၼ်မိူင်းၼႆႉ ၵူၼ်းမိူင်းၵေႃႈၶႂ်ႈႁႂ်ႈမီးသုၼ်ႇႁူမ်ႈ၊ ၵူႈၸုမ်းၸုမ်းၵေႃႈ ၶႂ်ႈႁႂ်ႈမႃးႁူမ်ႈၵၼ်သေဢုပ်ႇဢူဝ်းၵၢၼ်မိူင်း။ ပေႃးဢုပ်ႇဢူဝ်းၵၢၼ်မိူင်းၼႆ ၶႂ်ႈႁႂ်ႈဢဝ်ၵေႃပွင်ၵၢၼ်ၽွမ်ႉႁူမ်ႈၸိုင်ႈတႆးၼႆႉ ၼမ်းၼႃႈ။ 3.သင်ဝႃႈ ၵေႃပွင်ၵၢၼ်ၽွမ်ႉႁူမ်ႈၸိုင်ႈတႆးၼႆႉ ၵႂႃႇလႆႈလီငၢမ်းယူႇ၊ တေဢမ်ႇမီးပၼ်ႁႃ၊ လၢႆပႃႊတီႊ လၢႆတပ်ႉသိုၵ်းၵေႃႈ ၶေႃႈယိူင်းမၢႆႁဝ်း ႁဝ်းမႃးႁူမ်ႈၵၼ်တီႈၼႆႈ။ ၼႆႉပဵၼ်ၶေႃႈယိူင်းဢၢၼ်းႁဝ်း ဢၼ်ၵေႃႇတင်ႈ ၵေႃပွင်ၵၢၼ်ၽွမ်ႉႁူမ်ႈၸိုင်ႈတႆးၼႆႉ။

ၵူၺ်းၵႃႈ ဢၼ်ႁဝ်းမႃးဢုပ်ႇၵၼ် ပွၵ်ႈ 1 ပွၵ်ႈ 2 ၼႆႉ မၼ်းၸိူင်ႉၵၢတ်ႈႁိုင် တီႈပႃႊတီႊၵၢၼ်မိူင်း။ ပႃႊတီႊၵၢၼ်မိူင်းၶဝ်ၼႆႉ ပေႃးမႃးတူၺ်း မိူၼ်ၼင်ႇဝႃႈဢမ်ႇၶႂ်ႈႁူမ်ႈႁႃႉ ဢမ်ႇၸႂ်ႈ၊ သမ်ႉၶႂ်ႈႁူမ်ႈယူႇ။ ၶႂ်ႈႁူမ်ႈ သမ်ႉမီးဢီႈသင်ၶိုၵ်ႉၶၵ်ႉၶွင်ၶဝ်၊ ၶဝ်ဢမ်ႇတႅပ်းတတ်းလႆႈသေပွၵ်ႈ၊ လွင်ႈၼႆႉ ႁဵတ်းႁႂ်ႈမၼ်းၸိူင်ႉၵၢတ်ႈႁိုင်။ ၽိူဝ်ႇထိုင်ၽူႈၼမ်းၸၼ်ႉသုင် မႃးဢုပ်ႇၵၼ်တီႈၵုင်းထဵပ်ႈၼႆႉ ႁဝ်းၵေႃႈဝႃႈ CSSU ၼႆႉ သူၸဝ်ႈၸွင်ႇႁၼ်လီ၊ ႁဝ်းတေယႃႉၼႄႇ ႁဝ်းတေသိုပ်ႇႁဵတ်း။ ၶဝ်ၵူႈၸဝ်ႈၵေႃႈဝႃႈ ႁၼ်လီယူႇ၊ ႁဝ်းဢမ်ႇထုၵ်ႇလီ (လူဝ်ႇ)ယႃႉ၊ ႁဝ်းထုၵ်ႇလႆႈသိုပ်ႇႁဵတ်း။ ပေႃးသိုပ်ႇႁဵတ်းၵေႃႈ ႁဝ်းထုၵ်ႇလီဝၢင်းပိူင် (မူႇ) မၼ်း။ ႁဝ်းလႆႈမႃး ပိူင်ဢၼ်ႁဝ်းတေ ဢုပ်ႇၵၼ်ၵႂႃႇတၢင်းၼႃႈ၊ ပိူင်ၵၢၼ်မိူင်း။ လႆႈမႃး ပိူင်ငဝ်ႈငႃႇ (ဢၶေႇၶၢၼ်ႇမူႇ) မၼ်းၵူၺ်း။ ဢၶေႇၶၢၼ်ႇမူႇ မၼ်းၼႆႉၵေႃႈ မႃးတူၺ်းဢဝ်ပၵ်းပိူင်မၢႆမီႈၸိုင်ႈတႆး ဢၼ်တႅမ်ႈဝႆႉဢွၼ်တၢင်းၼႆႉသေႁဵတ်းမႃး၊ မႃးၽိူမ်ႉထႅမ်ထႅင်ႈ ဢိတ်းၼိုင်ႈၵူၺ်း။

ၸင်ႇဝႃႈပၢင်ၵုမ်ဢၼ်ႁဝ်း ႁဵတ်းထႅင်ႈပွၵ်ႈ 3 ၼႆႉ ႁဝ်းထုၵ်ႇလႆႈမႃးဢုပ်ႇၵၼ် မူႇပိူင်ပိူဝ်ႈတႃႇၵၢၼ်ၽွင်းငမ်း ၸိုင်ႈတႆး။ တေဢုပ်ႇၵၼ်လွင်ႈ ၵၢၼ်ၽွင်းငမ်းၸိုင်ႈတႆးလႄႈ တႃႇၶွတ်ႇၽွတ်ႈပၼ်ၵၢၼ်ၵၼ် ပိူဝ်ႈတႃႇဢုပ်ႇဢူဝ်းၵၢၼ်မိူင်း ၵႂႃႇၶၢဝ်းၼႃႈ။ ၵွပ်ႈဝႃႈ ဢွၼ်တၢင်းၼႆႉ ၽူႈၶဝ်ႈၸုမ်း (CSSU)  မီးပႃႊတီႊ 2 ပႃႊတီႊ၊ ဢၼ်ယႂ်ႇမၼ်း မီးတပ်ႉသိုၵ်း 2 တပ်ႉသိုၵ်း၊ သမ်ႉမႃးမီးထႅင်ႈ CBO ၊ ၸုမ်းၵူၼ်းၼုမ်ႇတႆးၶဝ်၊ ၸုမ်းၽူႈလူင်ႉလႅၼ်ႇ ၸဝ်ႈပၢႆးမေႃၶဝ်ၵေႃႈၶဝ်ႈႁူမ်ႈမႃးပႃး၊ လုၵ်ႈၸုမ်းၵေႃႈ မီးယူႇ 30-40 ။

ၽူႈၼမ်းၼႂ်း CSSU ၼႆႉ ၶွင်ႊသီႊဢဝ်ၶိုၼ်းၸိုင်ႈတႆး (RCSS) ဢဝ်ပုၼ်ႈၽွၼ်းဝႆႉ၊ ၵွပ်ႈပိူဝ်ႈ RCSS ဢဝ်ပုၼ်ႈၽွၼ်းဝႆႉသေ ၵၢၼ် RCSS သမ်ႉၼမ်ပူၼ်ႉလႄႈ မၼ်းၵေႃႈဢမ်ႇငၢႆႈ။ ႁဝ်းၵေႃႈဝႃႈ ပေႃးဢမ်ႇၼၼ် ႁဝ်းတေလႆႈႁႃႁူဝ်ပဝ်ႈမၼ်းၵေႃႉၼိုင်ႈ။ လွင်ႈႁူဝ်ပဝ်ႈၼႆႉ ၸၢႆးဢၢႆႈပဝ်း သမ်ႉဝႃႈ- ပေႃးဢဝ်ႁူဝ်ပဝ်ႈ ၸုမ်းလႂ်ၸုမ်းၼၼ်ႉၶိုၼ်ႈမႃး မၼ်းဢမ်ႇပဵၼ်ၵၢင်၊ ႁူဝ်ပဝ်ႈၼႆႉႁဝ်းဢမ်ႇဝႆႉ၊ ႁဝ်းဝႆႉ 4 ႁူဝ်ပဝ်ႈၶိုၼ်းၵူၺ်း ၵွၼ်ႇလႃႈ၊ တီႈၵုင်းထဵပ်ႈၵေႃႈႁၼ်လီၸွမ်းလွင်ႈၼႆႉ။


ပေႃးၸိူင်ႉၼၼ် ႁဝ်းတၢင်ႇလၢတ်ႈဝႃႈ- ပေႃးႁဝ်းဢမ်ႇဝႆႉႁူဝ်ပဝ်ႈၵေႃႈ ႁဝ်းထုၵ်ႇဝႆႉၽူႈပွင်ၵၢၼ်ၵူႈလွင်ႈလွင်ႈ။ လွင်ႈဝႆႉၽူႈပွင်ၵၢၼ်ၵူႈလွင်ႈလွင်ႈၼႆႉ ၶဝ်ႁၼ်လီ၊ ၵူၺ်းၵႃႈ ပႆႇမၵ်းမၼ်ႈ/ႁပ်ႉႁွင်း၊ ႁဝ်းတေမၵ်းမၼ်ႈ ၼႂ်းပၢင်ၵုမ်ပွၵ်ႈၼႆႉ။ ၽူႈပွင်ၵၢၼ်ၵူႈလွင်ႈလွင်ႈၼႆႉ လိူၵ်ႈဝႆႉၸဝ်ႈပိုၼ်ၶမ်း၊ ယိူင်းဢၢၼ်းဝႆႉဝႃႈ ႁႂ်ႈၸဝ်ႈပိုၼ်ၶမ်း ပဵၼ်ၽူႈပွင်ၵၢၼ်ၵူႈလွင်ႈလွင်ႈသေ 2 ပႃႊတီႊ 2 တပ်ႉသိုၵ်းၼၼ်ႉ ၶႂ်ႈႁႂ်ႈႁႃၵူၼ်းမႃးၸွႆႈပၼ်မၼ်းၸဝ်ႈ၊ ႁႂ်ႈၶဝ်လႆႈႁဵတ်းၵၢၼ်ၵႂႃႇ လွတ်ႈလွတ်ႈလႅဝ်းလႅဝ်းၶွင်ၶဝ်၊ ပၢင်ၵုမ်ပွၵ်ႈၼႆႉ ယိူင်းဢၢၼ်းႁႂ်ႈဢွၵ်ႇမႃးဢၼ်ၼႆႉ။

မိူဝ်ႈလဵဝ်ၼႆႉ မၼ်းမီးပၼ်ႁႃယူႇတီႈ မိူၼ်ၼင်ႇၸဝ်ႈၶုၼ်ထုၼ်းဢူး ၶဝ်သမ်ႉဝႃႈ ၶဝ်တေဢဝ် ၵေႃႁူမ်ႈသၢင်ႈၸိုင်ႈတႆး (SSJAC) မႃးသႂ်ႇ၊ ပေႃးဢဝ် SSJAC မႃးသႂ်ႇ မၼ်းတေပဵၼ် 3 ၸုမ်းၵူၺ်းယဝ်ႉ၊ မၼ်းတေလႆႈပဵၼ် 3 ႁူဝ်ပဝ်ႈၵူၺ်း၊ လွင်ႈၼႆႉတေလႆႈဢုပ်ႇၵၼ်။ ပေႃးပဵၼ် 3 ႁူဝ်ပဝ်ႈ ၸဝ်ႈပၢင်ႇသမ်ႉ တေဝႃႈႁိုဝ်၊ ဢၼ်ၼႆႉတေပဵၼ်ၶေႃႈထၢမ်။ မိူဝ်ႈလဵဝ် လၢႆၾၢႆႇၵေႃႈဢုပ်ႇမႃးဢၼ်ၼႆႉ၊ ၵူၺ်းၵႃႈ ၼႂ်းပၢင်ၵုမ်ၵေႃႈတေလၢတ်ႈယူႇ။ ၵွပ်ႈပိူဝ်ႈဝႃႈ ႁူဝ်သိူဝ် SNLD တင်း SSPP ၼႆႉပဵၼ်ဢၼ်လဵဝ်ၵၼ်ၵူၺ်း၊ ပႃးၵႂႃႇယဝ်ႉ။ ၸုမ်းသႅင်ၵႅဝ်ႉၼႆၵေႃႈ ၶဝ် 3 ၸုမ်း ၶဝ်ဝႃႈပဵၼ်ၸုမ်းလဵဝ်။ ပေႃးပဵၼ်ၸုမ်းလဵဝ်ၵၼ် ဢၼ်မႃးၶဝ်ႈၼႂ်းၼႆႉ ႁူဝ်ပဝ်ႈမၼ်းၵေႃႈ တေလႆႈပဵၼ်ၵေႃႉလဵဝ်ၵၼ်ၵူၺ်း၊ ပၼ်ႁႃမၼ်းမိူဝ်ႈလဵဝ်ၼႆႉ ပဵၼ်ၼႆ၊ လွင်ႈၼႆႉတေလႆႈဢုပ်ႇၵၼ်ယၢဝ်းဢိတ်းၼိုင်ႈ။

ပေႃးၶဝ်ႁပ်ႉဝႃႈ SSJAC ၼႆၵေႃႈ မၼ်းတေလႆႈပဵၼ်ၵေႃႉၼိုင်ႈၵူၺ်း။ ပေႃးႁပ်ႉဝႃႈ SSPP ၵေႃႈ တၢင်တူဝ် SSPP ၵူၺ်း၊ SNLD ၵေႃႈ တၢင်တူဝ် SNLD ၵူၺ်းၼႆၵေႃႈ တေငၢႆႈယူႇ။ ပေႃးဝႃႈတၢင်တူဝ် SSJAC ၼႆၵေႃႈ ၶဝ်သၢမ်ၸုမ်းၼၼ်ႉ ထုၵ်ႇလႆႈပဵၼ်ၸုမ်းၼိုင်ႈ ၵေႃႉၼိုင်ႈၵူၺ်း။ လွင်ႈၼႆႉ တေလႆႈဢုပ်ႇၵၼ်ၼွၵ်ႈမၼ်း ဢိတ်းၼိုင်ႈ၊ ၶဝ်တေဝႃႈႁိုဝ်။

(ၶႅၼ်းတေႃႈပႂ်ႉသိုပ်ႇဢၢၼ်ႇ ၸဝ်ႈယွတ်ႈသိုၵ်း တွပ်ႇလၢတ်ႈၵဵဝ်ႇၵပ်းလွင်ႈ ၵေႃလိၵ်ႈလၢႆးလႄႈၾိင်ႈငႄႈ)