ပႃႊတီႊသိူဝ်ၽိူၵ်ႇ တေဢဝ်လိူင်ႈႁႂ်ႈထိုင်တီႈ လွင်ႈဢၼ်တပ်ႉပလိၵ်ႈ တီႈတူၼ်ႈတီး၊ ၵႂႃႇႁႃတီႉၺွပ်း လုၵ်ႈၸုမ်း ပႃႊတီႊသိူဝ်ၽိူၵ်ႇ တီႈဢိူင်ႇမိူင်းပဵင်း ၸႄႈဝဵင်းႁူဝ်ပူင်းသေ ထုၵ်ႇယိုဝ်းတၢႆ။ တေတေႃႇသူႈၵႂႃႇ ႁႂ်ႈမီးလွင်ႈ ထုၵ်ႇမႅၼ်ႈၽဵင်ႇပဵင်း။

ၸၢႆးမွင်ႇတိၼ်ႇ ၽွင်းတႅၼ်း သၽႃးၵူၼ်းမိူင်း ၸႄႈဝဵင်းလၢႆးၶႃႈ

ၵဵဝ်ႇၵပ်းလွင်ႈၼႆႉ ယူႇတီႈၻီႊမူဝ်ႊၶရႅတ်ႊတိၵ်ႊပႃႇတီႇ ၸၢဝ်းၶိူဝ်းတႆး ႁိုဝ် ပႃႇတီႇသိူဝ်ၽိူၵ်ႇ (SNDP) လၢတ်ႈဝႃႈ- ၸုမ်းပႃႇတီႇသိူဝ်ၽိူၵ်ႇ တေဢဝ်လိူင်ႈႁႂ်ႈထိုင်တီႈ လွင်ႈဢၼ်လုင်းသူၺ်ႇ ဢၼ်ပဵၼ်ၵႅမ်ႁူဝ်ပဝ်ႈ ပႃႇတီႇသိူဝ်ၽိူၵ်ႇ တီႈဢိူင်ႇမိူင်းပဵင်း ၸႄႈဝဵင်းႁူဝ်ပူင်း လႆႈထုၵ်ႇပလိၵ်ႈဝဵင်းတူၼ်ႈတီး ယိုဝ်းတၢႆပူၼ်ႉမႃးမိူဝ်ႈ 2 လိူၼ်ပၢႆၼၼ်ႉ- ၼႆယဝ်ႉ။

လုင်းသူၺ်ႇၼႆႉယွၼ်ႉထုၵ်ႇထၢင်ႇထိူမ်ဝႃႈ ပဵၼ်ၵူၼ်းၶႃႈႁႅမ်တၢႆ ၸၢႆးၸၢမ်ႇထုၼ်း ၵေႃႉပဵၼ်ၵႅမ်ႁူဝ်ပဝ်ႈ ပႃႊတီႊ ၼူၵ်ႉယုင်း (NLD) ဝဵင်းႁူဝ်ပူင်းသေ ဝၼ်းတီႈ 12/09/2014 ပလိၵ်ႈတူၼ်ႈတီး ၶဝ်ႈၵႂႃႇၼႂ်းဝၢၼ်ႈသေ ႁႃတီႉၺွပ်း။ ၵူၺ်းၵႃႈ လုင်းသူၺ်ႇ လႅၼ်ႈပၢႆႈၶဝ်ႈၵႂႃႇၼႂ်းသူၼ်ၶဝ်ႈၵၢပ်ႇလႄႈပလိၵ်ႈၶဝ်လမ်းၸွမ်းလႄႈ ဢဝ်ၵွင်ႈယိုဝ်း၊ တိူဝ်ႉၸပ်းမၢၵ်ႇၵွင်ႈ 2 လုၵ်ႈ၊ ယွၼ်ႉလိူတ်ႈဢွၵ်ႇၼမ်သေ လႆႈတၢႆၵႂႃႇၸွမ်းတၢင်း ၽွင်းဢဝ်မႃး ယူတ်းယႃ တီႈႁူင်းယႃၸဝ်ႈၸၢမ်ႇထုၼ်း ဝဵင်းတူၼ်ႈတီး။

လွင်ႈၼႆႉ ပူၼ်ႉမႃးမိူဝ်ႈဝၼ်းတီႈ 16/10/2014 ၼၼ်ႉ ပႃႊတီႊသိူဝ်ၽိူၵ်ႇ လႆႈတၢင်ႇလိၵ်ႈၸူး ၸုမ်းလူင်ပွင် ၸိုင်ႈ ၸႄႈမိူင်းမိူင်းတႆး၊ ၸွမ်ၽွင်းလူင်မိူင်းတႆး ဝႃႈ- ၶႂ်ႈႁႂ်ႈဢဝ်လိူင်ႈ ၵဵဝ်ႇၵပ်းလွင်ႈ ဢၼ်ပလိၵ်ႈ ၵႂႃႇႁႃတီႉ လုင်းသူၺ်ႇသေ ယိုဝ်းတၢႆ။ ၵူၺ်းၵႃႈ တေႃႇထိုင်မိူဝ်ႈလဵဝ်ၼႆႉ ပႆႇဢဝ်လိူင်ႈပၼ်- ၸၢႆးမွင်ႇတိၼ်ႇ  ၽွင်းတႅၼ်း သၽႃးၵူၼ်းမိူင်း ၸႄႈဝဵင်းလၢႆးၶႃႈ ပႃႊတီႊသိူဝ်ၽိူၵ်ႇလၢတ်ႈ။

ၼၢင်းတၢၼ်းတၢၼ်းသူၺ်ႇ ႁူဝ်ပဝ်ႈပႃႇတီႇသိူဝ်ၽိူၵ်ႇ ၸႄႈဝဵင်းႁူဝ်ပူင်းၵေႃႈလၢတ်ႈဝႃႈ- ပလိၵ်ႈၶဝ် ထၢင်ႇထိူမ် ဝႃႈ ၵူၼ်းၵေႃႉၼႆႉ မီးတၢင်းၽိတ်းၼႆလႄႈယိုဝ်းတၢႆ၊ လွင်ႈယိုဝ်းတၢႆၵူၼ်းၼႆႉ ပလိၵ်ႈၶဝ်လႆႈ ဢၼုၺၢတ်ႈယိုဝ်း ယူႇႁႃႉ။ ယွၼ်ႉပိူဝ်ႈလုင်းသူၺ်ႇၼႆႉ မၼ်းပဵၼ်ၵႅမ်ႁူဝ်ပဝ်ႈပႃႊတီႊသိူဝ်ၽိူၵ်ႇ ၼႂ်းဢိူင်ႇမိူင်းပဵင်းလႄႈ ႁဝ်းတေဢဝ်လိူင်ႈၼႆႉ တၢင်ႇထိုင်တီႈၶွမ်ႊမသျိၼ်ႊၵၢၼ်လိူၵ်ႈတင်ႈ ၸိုင်ႈမိူင်းႁူမ်ႈတုမ်၊ တေတၢင်ႇထိုင်ပႃႊတီႊ ႁူဝ်ပဝ်ႈၵၢၼ်ၽွင်းငမ်း ၼႃႈလိၼ်ၽွင်းငမ်းတူဝ်ၵဝ်ႇပဢူဝ်း။ ၵွပ်ႈပႃႊတီႊသိူဝ်ၽိူၵ်ႇ တိုၼ်းဢမ်ႇႁၢၼ်ႉၸႂ်- ဝႃႈၼႆ။

ၸၢႆးမွင်ႇတိၼ်ႇ လၢတ်ႈထႅင်ႈဝႃႈ- ပလိၵ်ႈဢၼ်ဝႃႈၼႆႉ ပဵၼ်ၵူၼ်းပႂ်ႉပႃးပၵ်းပိူင်မၢႆမီႈ၊ တေယူႇၾၢႆႇၵူၼ်းမိူင်းသေ ၵႅတ်ႇၶႄႁႄႉၵင်ႈပၼ်ၵူၼ်းမိူင်း၊ ၵူၺ်းၵႃႈ သမ်ႉမႃးယိုဝ်းၵူၼ်းမိူင်းတၢႆၼႆႉ ဢမ်ႇထုၵ်ႇလီပဵၼ်။ ၾၢႆႇႁဝ်းၶႃႈတႄႉ လွင်ႈၼႆႉ ဢမ်ႇယွမ်းလႆႈလႃးလႃး။ ၵူၼ်းႁဝ်းၵူႈၵေႃႉၼႆႉ တိုၼ်းတေလႆႈယူႇတႂ်ႈပၵ်းပိူင်မၢႆမီႈၽွင်းငမ်း၊ ၽိတ်း ၵေႃႈယဝ်ႉ ထုၵ်ႇၵေႃႈယဝ်ႉ တေလႆႈၶိုၼ်ႈလုမ်းတြႃး တႅပ်းတတ်းလွင်ႈၽိတ်းလွင်ႈထုၵ်ႇ။ ပႆႇထိုင်လုမ်းတြႃးသေ ယူႇတီႈပလိၵ်ႈသေယိုဝ်းတၢႆၼႆႉ မၼ်းၼႄဝႃႈ ၵူၼ်းမိူင်းၼိုင်ႈၵေႃႉ ဢၼ်ယူႇသဝ်းၼႂ်းဝၢၼ်ႈမိူင်းၼႆႉ ဢမ်ႇမီး လွင်ႈႁူမ်ႇလူမ်ႈ- ဝႃႈၼႆ။

ပႃႊတီႊသိူဝ်ၽိူၵ်ႇ ႁဵတ်းပၢင်သပ်းၸႅင်ႈၶၢဝ်ႇ မိူဝ်ႈဝၼ်းတီႈ 07/11/2014

မိူဝ်ႈဝၼ်းတီႈ 07/11/2014 ၼႆႉၵေႃႈ ပႃႊတီႊသိူဝ်ၽိူၵ်ႇ လႆႈႁဵတ်းပၢင်သပ်းၸႅင်ႈၶၢဝ်ႇ ၵဵဝ်ႇၵပ်းလွင်ႈၼႆႉ။ လႆႈသပ်းၸႅင်ႈၵႂႃႇဝႃႈ- ယွၼ်ႉပိူဝ်ႈပလိၵ်ႈၶဝ်လူမဝ်၊ ဢမ်ႇဝႆႉၼၵ်းၼိူဝ်ပၵ်းပိူင်မၢႆမီႈ ၸိုင်ႈမိူင်းလႄႈ ၸင်ႇလႆႈ ၵိူတ်ႇၶိုၼ်ႈမႃး ပၼ်ႁႃၸိူင်ႉၼႆ။ ပေႃးပဵၼ်မႃးၸိူင်ႉၼႆ ၸၢင်ႈသၢင်ႈပၼ်ႁႃတေႃႇထိုင် ၵႂႃႇယႃႉလူႉလႅဝ် လွင်ႈငမ်းယဵၼ် ၼိမ်သဝ်းၸိုင်ႈမိူင်း။ ၵူၼ်းႁဝ်းၵူႈၵေႃႉ ဢၼ်ယူႇၼႂ်းဝၢၼ်ႈၼႂ်းမိူင်းၼႆႉ ၽႂ်ၵေႃႈၶႂ်ႈဢဝ် ပၵ်းပိူင် မၢႆမီႈ မႃးပဵၼ်ဢၼ်ႁႄႉၵင်ႈတူဝ်ၸဝ်ႈၵဝ်ႇ၊ ၶႂ်ႈယူႇၵႂႃႇၵတ်းၵတ်းယဵၼ်ယဵၼ် တႂ်ႈပၵ်းပိူင်မၢႆမီႈ၊ ၶႂ်ႈႁဵတ်းၵိၼ်ၵၢၼ် ၵႂႃႇ ၵတ်းၵတ်းယဵၼ်ယဵၼ်ၵူၺ်း- ၼႆယဝ်ႉ။

ၵပ်းၵၢႆႇလွင်ႈၼႆႉ ပူၼ်ႉမႃးမိူဝ်ႈဝၼ်းတီႈ 23/09/2014 ၼၼ်ႉ ၸုမ်းၶၢဝ်ႇၽူႈတွႆႇႁွၵ်ႈသေ လႆႈတွင်ႈထၢမ်တီႈ ၽူႈၵွၼ်းၾၢႆႇၽွင်းငမ်း ၸႄႈဝဵင်းႁူဝ်ပူင်း။ လၢတ်ႈဝႃႈ- ႁဝ်းၶႃႈမီးလွင်ႈထၢင်ႇထိူမ် ဝႆႉဝႃႈ လုင်းသူၺ်ႇ ပဵၼ်ၵူၼ်း မီးတၢင်းၽိတ်း။ ႁဝ်းဢမ်ႇတၢပ်ႈဢဝ် လိၵ်ႈဢၼုၺၢတ်ႈ (ယွၼ်းၶႂၢင်ႉ) တႃႇတေတီႉၺွပ်းၼႆႉတီႈလႂ်။  ႁဝ်းၶႃႈ ၶႂ်ႈတွင်ႈထၢမ်/ၵူတ်ႇထတ်းၼႆ ႁဝ်းၶႃႈၵႆႉၵႆႉႁွင်ႉမၼ်းမႃးတီႈလုမ်း၊ လုင်းသူၺ်ႇဢမ်ႇယွမ်းမႃး။ ၾၢႆႇႁဝ်းၶႃႈၼႆႉ မီးၵူၼ်းႁူႉႁၼ်ၸွမ်း လၵ်းထၢၼ် (သၢၵ်ႈသေႇ)မၼ်းတဵမ်ထူၼ်ႈ။ ၸဵမ်မိူဝ်ႈလိူၼ်ၵျူၼ်ႊပူၼ်ႉမႃး ၵႂႃႇႁွင်ႉၵေႃႈ ဢမ်ႇမႃး၊ ပေႃးႁွင်ႉဢမ်ႇမႃးၵေႃႈ ၸဝ်ႈၼႃႈတီႈပလိၵ်ႈၵႂႃႇႁွင်ႉ၊ ဝၼ်းၵႂႃႇႁွင်ႉမႃးၼၼ်ႉ မၼ်းသမ်ႉလႅၼ်ႈပၢႆႈ၊ တပ်ႉပလိၵ်ႈသမ်ႉ လႆႈလမ်းၸွမ်းသေ ၵႂႃႇၶီႈလိုတ်းမၢၵ်ႇႁိၼ်ယဝ်ႉၵေႃႈဢဝ်ၵွင်ႈလၼ်ႇလုတ်ႈ သေၵႂႃႇတိူဝ်ႉ - ဝႃႈၼႆ။

လၢတ်ႈထႅင်ႈဝႃႈ- သင်ၸိူဝ်ႉဝႃႈ မိူဝ်ႈပလိၵ်ႈၵႂႃႇတီႉၺွပ်းၼၼ်ႉ မၼ်းမႃးၸွမ်းပလိၵ်ႈလီလီၼႆတႄႉ ဢမ်ႇၵိုင်ႇလီလႆႈထိုင်တီႈတၢႆ၊ မၼ်းတၢႆၵႂႃႇၸိူင်ႉၼႆၵေႃႈ ႁဝ်းလႆႈပိုတ်ႇၶၻီး (ဢမု) ဝႆႉထႅင်ႈ ၵဵဝ်ႇၵပ်းလွင်ႈပဵၼ် လွင်ႈတၢႆထႅင်ႈ- ဝႃႈၼႆ။

ၵေႃႉပဵၼ်လုၵ်ႈၸၢႆးလုင်းသူၺ်ႇ ၵေႃႈလၢတ်ႈဝႃႈ- ယူႇလၢႆလၢႆၵေႃႉပဵၼ်ပေႃႈႁဝ်း ထုၵ်ႇယိုဝ်းတၢႆၼႆႉ ႁဝ်းဢမ်ႇ ႁၢၼ်ႉၸႂ်သေဢိတ်း။ ၵွပ်ႈၼၼ် ႁဝ်းတေၶိုၼ်ႈလုမ်းတြႃး တေတေႃႇသူႈၵႂႃႇ ႁႂ်ႈပဵၼ်မႃးလွင်ႈ ဢၼ်ထုၵ်ႇမႅၼ်ႈ၊ ပႃႊတီႊသိူဝ်ၽိူၵ်ႇၵေႃႈ တေၸွႆႈထႅမ်ငိုၼ်းတွင်း တႃႇတေၵႂႃႇတေႃႇသူႈတီႈလုမ်းတြႃး ႁႂ်ႈမၼ်းပဵၼ်မႃးလွင်ႈ ထုၵ်ႇမႅၼ်ႈ ၽဵင်ႇပဵင်း- ဝႃႈၼႆ။