ၵူၼ်းမိူင်းတႆး လၢႆလၢႆၸႄႈဝဵင်း၊ ၸိုင်ႈတႆးပွတ်းၸၢၼ်း ပွတ်းႁွင်ႇ ပွတ်းဢွၵ်ႇ တေဢွၼ်ၵၼ်ၵႂႃႇၶဝ်ႈႁူမ်ႈ ပၢင်ပွႆးပီမႂ်ႇတႆး ဢၼ်ၸတ်းတီႈဝဵင်းတူၼ်ႈတီး ၸိုင်ႈတႆးပွတ်းၸၢၼ်း။ တေဢမ်ႇၸတ်းတီႈဝဵင်းၽႂ်မၼ်း။

ၵူၼ်းၼုမ်ႇမိူင်းပၼ်ႇ ႁၢင်ႈႁႅၼ်းတၢင်းၵႃႈ ပိူဝ်ႈတႃႇၵႂႃႇၶေႉၶႅင်ႇ တီႈပွႆးပီမႂ်ႇတႆး ဝဵင်းတူၼ်ႈတီး

ၸၢႆးသိူဝ် ၵူၼ်းၼုမ်ႇဝဵင်းၼမ်ႉၶမ်း လၢတ်ႈဝႃႈ- ပီၼႆႉ ႁဝ်းၶႃႈတေလႆႈၵႂႃႇၶဝ်ႈႁူမ်ႈ ၸွႆႈထႅမ်ပၢင်ပွႆးပီမႂ်ႇတႆး တီႈဝဵင်းတူၼ်ႈတီးလႄႈ တီႈၼမ်ႉၶမ်းၼႆႉတႄႉ တေဢမ်ႇႁဵတ်းပၢင်ပွႆးႁပ်ႉတွၼ်ႈပီမႂ်ႇ ယႂ်ႇလူင် ၵႂၢင်ႈၶႂၢင်။ ၵူၺ်းၵႃႈ တီႈၼမ်ႉၶမ်းၼႆႉ ၶမ်ႈၶိုၼ်းဝၼ်းတီႈ 21/11/2014 ၊ တေၸတ်းႁဵတ်းပၢင်ပွႆးယုၵ်ႉယွင်ႈ ၵူၼ်းၸိူဝ်းၵတ်ႉၶႅၼ်ႇ ဢွင်ႇ/ပူၼ်ႉၸၼ်ႉသိပ်းၸိူဝ်းၼႆႉတီႈ ၵေႃလိၵ်ႈလၢႆးလႄႈၾိင်ႈငႄႈတႆး ဝဵင်းၼမ်ႉၶမ်း။ တေမီးပၢင်မွပ်ႈပၼ်ရၢင်းဝလ်း (သူး) ၵူၼ်းမႃးၶဝ်ႈႁူမ်ႈပၢင်ၶေႉၶႅင်ႇ တႅမ်ႈပွင်ႈၵႂၢမ်း ဢၼ်ၸတ်းႁဵတ်းၵႂႃႇ မိူဝ်ႈဝၼ်းတီႈ 09/11/2014 - ဝႃႈၼႆ။

ပိူဝ်ႈတႃႇတေ ၵႂႃႇၼႄၾၢင်ႁၢင်ႈတၢင်းႁၢင်ႈလီ၊ ၶေႉၶႅင်ႇတၢင်းၵႃႈႁၢင်ႈလီ တီႈပၢင်ပွႆးႁပ်ႉတွၼ်ႈပီမႂ်ႇတႆး 2109 ၼီႈ၊ သူင်ႇသင်ႇပီၵဝ်ႇ 2018 ၼီႈၼၼ်ႉ ၵူႈၸႄႈဝဵင်း မိူၼ်ၼင်ႇဝဵင်းၼမ်ႉၶမ်း၊ မိူင်းပၼ်ႇ၊ ဝဵင်းၵဵင်းတုင် ဢိၵ်ႇၵူႈၵူႈတီႈတီႈၵေႃႈ ၵူၼ်းၼုမ်ႇၶဝ်ဢွၼ်ၵၼ်ၾိုၵ်းၵႃႈဝႅၼ်ဝႆႉ။

ၵဵင်ၵဵင် လုၵ်ႈႁဵၼ်းၸၼ်ႉၸွမ် တီႈဝဵင်းတႃႈလိူဝ်ႇ (မၼ်းတလေး) ၵေႃႈလၢတ်ႈဝႃႈ- ႁဝ်းၶႃႈၸုမ်းၵေႃလိၵ်ႈလၢႆး လႄႈၾိင်ႈငႄႈတႆး လုၵ်ႈႁဵၼ်းဝဵင်းလိူဝ်ႇၵေႃႈ တေၵႂႃႇၶဝ်ႈၵႃႈၶေႉၶႅင်ႇတီႈ ပၢင်ပွႆးပီမႂ်ႇတႆး တီႈဝဵင်းတူၼ်ႈတီး၊ ၵူၼ်းၸိူဝ်းတေၵႂႃႇၼႆႉ ပႃးတင်းၶူးသွၼ်ၶဝ် တေမီးမွၵ်ႈၵူၼ်း 40 ပၢႆ၊ ၵမ်ႈၼမ် ပဵၼ်ၵူၼ်းလုၵ်ႉတၢင်း ထုင်ႉမၢဝ်းမႃး- ဝႃႈၼႆ။

ပၢင်ၶေႉၶႅင်ႇတႅမ်ႈပွင်ႈၵႂၢမ်း တီႈလုမ်းၵေႃလိၵ်ႈ လၢႆးလႄႈ ၾိင်ႈငႄႈတႆး တီႈဝဵင်းၼမ်ႉၶမ်း

ပူၼ်ႉမႃးမိူဝ်ႈဝၼ်းတီႈ 09/11/2014 မီးၵၢၼ်ၸတ်းႁဵတ်းပၢင်ၶေႉၶႅင်ႇ တႅမ်ႈပွင်ႈၵႂၢမ်း တီႈလုမ်းၵေႃလိၵ်ႈ လၢႆးလႄႈ ၾိင်ႈငႄႈတႆး တီႈဝဵင်းၼမ်ႉၶမ်း။ မိူဝ်ႈၼၼ်ႉ ၶူးသွၼ်လိၵ်ႈလၢႆးတႆးမွၵ်ႈ 30 ပၢႆ ၶဝ်ႈႁူမ်ႈၶေႉၶႅင်ႇ တႅမ်ႈတွပ်ႇပွင်ႈၵႂၢမ်း။ ၵေႃလိၵ်ႈလၢႆးလႄႈၾိင်ႈငႄတႆး ဢိၵ်ႇ ၶွမ်ႊမတီႊပွင်ပဵၼ် ၸတ်းပၢင်ၶေႉၶႅင်ႇ ဢွၼ်ႁူဝ် ၼမ်းၼႃႈၸတ်းႁဵတ်း။ ၸိုဝ်ႈႁူဝ်ၶေႃႈ ဢၼ်ၶေႉၶႅင်ႇၵႂႃႇၼၼ်ႉ “လိၵ်ႈၽႂ်ႁိူင်းၵေႃႈ မိူင်းမၼ်းသုင်” -ၼႆယဝ်ႉ။

ပၢင်ပွႆးပီမႂ်ႇတႆး တီႈဝဵင်းတူၼ်ႈတီး ဢၼ်ၵေႃလိၵ်ႈလၢႆးလႄႈၾိင်ႈငႄႈတႆး ၵူႈၸႄႈဝဵင်း တေႁူမ်ႈမိုဝ်းၵၼ် ၸတ်းၼႆႉ တေၸတ်းႁဵတ်းၵႂႃႇ တင်ႈတႄႇဝၼ်းတီႈ 18-24/11/2014 (ၶၢဝ်းတၢင်း 7 ဝၼ်း)။ ၵေႃလိၵ်ႈလၢႆး လႄႈၾိင်ႈငႄႈတႆး တၢင်းထုင်ႉမၢဝ်း၊ ၼမ်ႉၶမ်း၊ ၵဵင်းတုင် ၵူႈတီႈတီႈ ၵူႈဝဵင်းဝဵင်း ပတ်းပိုၼ်ႉမိူင်းတႆး၊ ပတ်ႉပိုၼ်ႉၸိုင်ႈမိူင်းႁူမ်ႈတုမ်မၢၼ်ႈ တေဢွၼ်ၵၼ်မႃး ၶဝ်ႈႁူမ်ႈ- လႆႈႁူႉဝႆႉၼင်ႇၼႆ။