ၵူၼ်းမဝ်းယႃႈမႃႉၵေႃႉၼိုင်ႈ တီႈဝဵင်းမူႇၸႄႈ ၸိုင်ႈတႆးပွတ်းႁွင်ႇ၊ ဢဝ်ၾႆးၽဝ်ႁိူၼ်းတူဝ်ၸဝ်ႈၵဝ်ႇ၊ မႆႈပႃးႁိူၼ်း ပီႈၼွင်ႉႁိမ်းႁွမ်း ။

မိူဝ်ႈၾႆးတိုၵ်ႉမႆႈ

ဝၼ်းတီႈ 11/11/2014 (မိူဝ်ႈဝႃး) ယၢမ်းဝၢႆးဝၼ်း 2 မူင်း၊ တီႈဝဵင်းမူႇၸႄႈ ၸိုင်ႈတႆးပွတ်းႁွင်ႇၼၼ်ႉ ၸၢႆးတၢၼ်းမွင်ႇ ဢႃႇယု 40 ပၢႆ၊ ဢဝ်ၾႆးၽဝ်ႁိူၼ်းတူဝ်ၸဝ်ႈၵဝ်ႇ။ ႁိူၼ်းၸၢႆးတၢၼ်းမွင်ႇၼႆႉ ယူႇပွၵ်ႉဝၢၼ်ႈဝဵင်း၊ ႁိမ်းဝတ်ႉ(ၵျွင်း)မုၼ်ၸဝ်ႈမၢၼ်ႈဝဵင်း၊ တီႈဝဵင်းမူႇၸႄႈ၊ ဢိင်ၼိူဝ်ၾႆးမႆႈႁႅင်လႄႈ လၢမ်းမႆႈၵႂႃႇပႃးႁိူၼ်းႁိမ်းႁွမ်း ဢၼ်ယူႇၶၢင်ႈႁိူၼ်းၼၼ်ႉ လူႉၵွႆၵႂႃႇမွၵ်ႈၶိုင်ႈလင်။

ၸၢႆးၶမ်း ၵူၼ်းယူႇပွၵ်ႉၸွၼ်ၸေႃႇ လၢတ်ႈဝႃႈ- ၸၢႆးတၢၼ်းမွင်ႇၼႆႉ မဝ်းယႃႈမႃႉသေ ၽဝ်ႁိူၼ်းမၼ်း၊ တီႈႁိူၼ်း မၼ်းၵေႃႈ မၼ်းယူႇၵေႃႉလဵဝ်ၵူၺ်း။ မိူဝ်ႈလဵဝ် ပလိၵ်ႈၶဝ်မႃးတီႉၺွပ်းမၼ်းၵႂႃႇယဝ်ႉ၊ ၾႆးႁုပ်ႇႁုမ်းပႃးႁိူၼ်း ၶၢင်ႈၶၢင်ႈၼၼ်ႉ ၶႂ်ႈၵႂႃႇမွၵ်ႈၶိုင်ႈၼႆႉ - ဝႃႈၼႆ။

လွင်ႈလူႉၵွႆဝၢႆးၾႆးမႆႈ

 ၸၢႆးတၢၼ်းမွင်ႇၼႆႉ မိူဝ်ႈပူၼ်ႉမႃးမွၵ်ႈ 3-4 ပီၵေႃႈ ပေႃႉလုၵ်ႈပေႃႉမေး လိုပ်ႈပႅတ်ႈလုၵ်ႈမေးမၼ်း၊ ထိုင်တီႈ လုၵ်ႈမေးမၼ်း ဢမ်ႇယူႇၸွမ်းမၼ်းလႆႈသေ ပၢႆႈၵႂႃႇယူႇတၢင်ႇတီႈ။ မီးလုၵ်ႈလၢင်း ႁူမ်ႈၵၼ်တင်း ၼၢင်းမေး 2 ၵေႃႉ၊ ၵူၺ်းၵႃႈ ၵႂႃႇယူႇၸွမ်းၵေႃႉပဵၼ်မႄႈၼင်ႇၵၼ်၊ ၵွပ်ႈၼႆ တီႈႁိူၼ်းၼၼ်ႉ မၼ်းၸၢႆးယူႇၵေႃႉလဵဝ်ၵူၺ်း- ၼႆယဝ်ႉ။

မၢၼ်ႈဝဵင်းၼႆႉ ပဵၼ်ပွၵ်ႉဢွၼ်ႇ မီးတၢင်းၼွၵ်ႈဝဵင်းမူႇၸႄႈ၊ မီးၼိူဝ်သဵၼ်ႈတၢင်းမူႇၸႄႈ- ၼမ်ႉၶမ်း၊ တေႃႇၼႃႈ ၵၼ်တင်း ဝဵင်းၸႄႈၵဝ်ႇ မိူင်းၶႄႇ။