တင်ႈတႄႇႁူဝ်လိူၼ်ဢွၵ်ႊထူဝ်ႊၿိူဝ်ႊ တေႃႇထိုင် ႁၢင်လိူၼ်၊ ဢၼ်သိုၵ်းမၢၼ်ႈ ႁၢင်ႈႁႅၼ်းသိုၵ်းလေႃႇတိုၵ်း တပ်ႉသိုၵ်း ၸိုင်ႈတႆး (SSPP/SSA)ၼၼ်ႉ သွင်ၾၢႆႇ လႆႈပဵၼ်ပၢင် တိုၵ်းၵၼ် 41 ပွၵ်ႈ။ တႆး လႆႈထွၼ်ပၼ်တပ်ႉ 2 တပ်ႉ။

တပ်ႉသိုၵ်းၸိုင်ႈတႆး (SSPP/SSA)

ပၢင်တိုၵ်း တင်ႈတႄႇဝၼ်းတီႈ 2-30/10/2014 ၼၼ်ႉ ၼႂ်းဝၼ်းတီႈ 02/10/2014 ပဵၼ်ပၢင်တိုၵ်း 7 ပွၵ်ႈ။ ၵွင်းမုင်ႈမိူင်း၊ တႃႈၽႃသွင်ႇ၊ ၵွင်းမႆႉၺွင်ႇ၊ ၵွင်းမႆႉႁုင်း၊ ၵွင်းမၢၵ်ႇႁိၼ်တင်ႈ၊ ၶၢႆးၼွင်မူၼ်ႇ၊ ပႃႇႁဵဝ်ႈတႃႈၽႃသွင် ၼႂ်းၸႄႈဝဵင်းၵေးသီး။

ဝၼ်းတီႈ 03/10/2014 ၼႂ်းၸႄႈဝဵင်းၵေးသီး တင်းမိူင်းယႆ။ ၼႂ်းၸႄႈဝဵင်းမိူင်းယႆ ႁိမ်းႁွမ်းတူင်ႇတၢင်ႇၶူဝ်လွင်း 3 ပွၵ်ႈ၊ ပွတ်းႁူဝ်ယႃႉ (ၼႂ်းၵႄႈႁူဝ်ယႃႉတင်းၼွင်မွၼ်) 4 ပွၵ်ႈ၊ ၼႂ်းၵႄႈမိူင်းၼွင် တင်းၵေးသီး ၸႄႈဝဵင်းၵေးသီး 5 ပွၵ်ႈ။

ဝၼ်းတီႈ 4/10/2014 ပဵၼ်ထႅင်ႈပွတ်းၶူဝ်လွင်း ၼႂ်းၸႄႈဝဵင်းမိူင်းယႆ။ ၼႂ်းဝၼ်းတီႈ 4 ၼႆႉ ၼႂ်းၸႄႈဝဵင်းၵေးသီးၵူၺ်း ပဵၼ် 18 ပွၵ်ႈ၊ ၵွင်းမုင်ႈမိူင်း၊ ၵုင်းမိူတ်ႇ၊ ၼမ်ႉပုၵ်း၊ ၵွင်းၸဝ်ႈမိူင်း ၸိူဝ်းၼႆႉ။

ဝၼ်းတီႈ 05/10/2014 ပဵၼ် 5 ပွၵ်ႈ၊ ပဵၼ်တီႈတိၼ်လွႆႁႃႈ၊ ၼွင်ဢိူၵ်ႇၵႂၢႆး ၼႂ်းၵႄႈသီႇပေႃႉ-ၼမ်ႉလၼ်ႈ။ ၼႂ်းၸႄႈဝဵင်းၵေးသီး ၾၢႆႇႁွင်ႇလွႆယွႆး၊ ပၢင်ႇၸေႈ လွႆယွႆး၊ ၾၢႆႇၸဵင်ႇႁွင်ႇဝၼ်းဢွၵ်ႇ သႅင်ၵႅဝ်ႉ ၸိူဝ်းၼႆႉ။

ၼႂ်းဝၼ်းတီႈ 06/10/2014 ပဵၼ်ပၢင်တိုၵ်း 3 ပွၵ်ႈ၊ ၾၢႆႇႁွင်ႇဝၢၼ်ႈၽိူင်း ၼႂ်းဝူင်ႈၵၢင်ၵေးသီး- မိူင်းၼွင်၊ ၾၢႆႇၸၢၼ်းၼွင်သွမ်း၊ ၾၢႆႇၸၢၼ်းပၢင်ႇဝူဝ်း ၼႂ်းဝူင်ႈၵၢင်ဝၢၼ်ႈႁႆး တင်းပၢင်ႇဝူဝ်း ၸိူဝ်းၼႆႉ။

ဝၼ်းတီႈ 10/10/2014 ပဵၼ်ၼႂ်းၸႄႈဝဵင်းသီႇပေႃႉ ႁိမ်းဝၢၼ်ႈၼွင်ၶဵဝ်။ ဝၼ်းတီႈ 11 ၾၢႆႇတူၵ်းၼွင်ၶဵဝ် တၢင်းဝၢၼ်ႈၽျၢတ်ႈ ၸႄႈဝဵင်းသီႇပေႃႉ။ ဝၼ်းတီႈ 13 ၾၢႆႇဢွၵ်ႇႁူင်းႁဵၼ်း ၵုၼ်ႁုင်း မိူင်းလႃ ၸႄႈဝဵင်းသီႇပေႃႉ။ ဝၼ်းတီႈ 14 ႁိမ်းဝတ်ႉ/ ၵျွင်းပၢင်ႇၸေႈ။ ဝၼ်းတီႈ 28 တၢင်းဝၢၼ်ႈငူးလိူမ် ၼမ်ႉလိပ်ႇ။ ဝၼ်းတီႈ 30 ၼမ်ႉမေႃႇသၢႆး ၸိူဝ်းၼႆႉ၊ ႁူမ်ႈတင်းမူတ်း ပဵၼ်ပၢင်တိုၵ်း 41 ပွၵ်ႈ- ၼႆယဝ်ႉ။

ၼႂ်းပၢင်တိုၵ်း 41 ပွၵ်ႈၼႆႉ ၵူၼ်းမိူင်းလႆႈတၢႆယွၼ်ႉပၢင်တိုၵ်း 4 ၵေႃႉ။ လုင်းဢူႉ ဝၢၼ်ႈမၢၵ်ႇႁူႈ၊ မၢၵ်ႇလူင်သိုၵ်းမၢၼ်ႈ တူၵ်းတိူဝ်ႉသႂ်ႇၽွင်းယူႇၼႂ်းသူၼ်။ လုင်းဝႃႇလိင်ႇလူႇ မၢၵ်ႇလူင်သိုၵ်းမၢၼ်ႈ တူၵ်းတိူဝ်ႉသႂ်ႇ ၽွင်းႁဵတ်းၶဝ်ႈႁဵတ်းၽၵ်း ၼႂ်းသွင်ႇၾႆး တၢႆထင်တီႈ။ ၼွၵ်ႈသေၼၼ်ႉ ၵူၼ်းဝၢၼ်ႈ (ၸုမ်းပီႇတုၸိတ်ႉ ပူဝ်ႇမူၼ်း) 2 ၵေႃႉ ၶီႇလူတ်ႉၶိူင်ႈ ႁႃသိုဝ်ႉဝူဝ်း ၼႂ်းထုင်ႉဝၢၼ်ႈႁႆး ပွၵ်ႈမိူဝ်း ထုၵ်ႇသိုၵ်းမၢၼ်ႈၶႃႈတၢႆ ၸွမ်းတၢင်း ၸိူဝ်းၼႆႉ။

ၾၢႆႇတပ်ႉသိုၵ်းၸိုင်ႈတႆး (SSPP/SSA) လၢတ်ႈဝႃႈ- သိုၵ်းတႆးတူၵ်းသုမ်း 2 ၵေႃႉ၊ သိုၵ်းမၢၼ်ႈတၢႆ 5 ၵေႃႉ။ ၵူၺ်းၵႃႈ ၸွမ်းၼင်ႇ ၸုမ်းၶၢဝ်ႇၽူႈတွႆႇႁွၵ်ႈယိုၼ်ႈၶိုတ်းလႆႈၼၼ်ႉ လႆႈႁူႉဝႃႈ သိုၵ်းမၢၼ်ႈတၢႆတင်းမူတ်း 16 ၵေႃႉ၊ ၾၢႆႇသိုၵ်းတႆးတူၵ်းသုမ်း 3 ၵေႃႉ။ ၾၢႆႇတပ်ႉသိုၵ်းၸိုင်ႈတႆး လႆႈထွၼ်တပ်ႉပၼ်သိုၵ်းမၢၼ်ႈ ပဵၼ်တပ်ႉ တႃႈၽႃသွင်ႇ တင်း တပ်ႉၵွင်းမုင်ႈမိူင်း (ဢၼ်ဢွၵ်ႇၵႂႃႇဢွၼ်ၼႃႈၼႆႉဝႃႈ ၵွင်းၸဝ်ႈမိူင်း ၼႆၼၼ်ႉဢမ်ႇၸႂ်ႈ၊ လိုၼ်းသုတ်း လႆႈႁူႉဝႃႈပဵၼ်ၵွင်းမုင်ႈမိူင်း)- ၼႆယဝ်ႉ။