ပိူဝ်ႈတႃႇ ႁဵတ်းႁူင်းႁႅမ်းတင်းၼမ် တီႈဝဵင်း မူႇၸႄႈၼၼ်ႉ ၸဝ်ႈၶွင်တီႈလိၼ် တိုၼ်းဢမ်ႇၶၢႆတီႈလိၼ်ပၼ် ၶွမ်ႊပၼီႊၼမ်ႉၶမ်းၽွင် လႆႈ၊ ၸဝ်ႈၶွင်တီႈလိၼ်ၶဝ် လႆႈတၢင်ႇလိၵ်ႈတီႈ ၸွမ်ၽွင်းလူင်ၸႄႈမိူင်းတႆး ၼင်ႇၼႆ။

ၵၢၼ်မၢၵ်ႈမီး ဢၼ်တိုၵ်ႉၵေႃႇသၢင်ႈတီႈဝဵင်းမူႇၸႄႈ (Photo:HL/SHAN)

ၵဵဝ်ႇၵပ်းလွင်ႈၼႆႉ မိူဝ်ႈလဵဝ် တီႈဝဵင်းမူႇၸႄႈ ၸိုင်ႈတႆးပွတ်းႁွင်ႇၼႆႉ ၶွမ်ႊပၼီႊၼမ်ႉၶမ်းၽွင် တေႁဵတ်းသၢင်ႈ ႁူင်းႁႅမ်းတင်းၼမ် ဢၼ်တေၵေႃႇသၢင်ႈႁူင်းႁႅမ်းလူင်ပဵၼ်တႅဝ်း၊ တေၸႂ်ႉၼႃႈလိၼ်တၢင်းၵႂၢင်ႈ 98 ဢေႊၵႃႉ။ ယူႇတီႈ ၶွမ်ႊပၼီႊၼမ်ႉၶမ်းၽွင်ၵေႃႈ ယွၼ်းဢၼုၺၢတ်ႈ ဝႆႉတီႈလူင်ပွင်ၸိုင်ႈမိူင်းတႆးယဝ်ႉ။ ၵူၺ်းၵႃႈ ၸဝ်ႈႁႆႈၸဝ်ႈၼႃးၶဝ် ၸိူဝ်းပဵၼ်ၸဝ်ႈၶွင်တီႈလိၼ်သမ်ႉဝႃႈ တိုၼ်းဢမ်ႇၶၢႆတီႈလိၼ်လႆႈၼႆ- ယူႇတီႈၸဝ်ႈႁႆႈ ၸဝ်ႈၼႃးၶဝ် လႆႈတၢင်ႇလိၵ်ႈတီႈ ၸွမ်ၽွင်းလူင်ၸႄႈမိူင်းတႆး ၸဝ်ႈဢွင်ႇမျၢတ်ႈ- ၼႆယဝ်ႉ။

မိူဝ်ႈပီ 2012 ၼၼ်ႉၵေႃႈ ၶွမ်ႊပၼီႊ ၼိဝ်ႊသၻႃႊလၢႆႊတ် (New star light) သိုဝ်ႉဢဝ်လိၼ်ႁႆႈ ၼႃး တီႈၵူၼ်းဝၢၼ်ႈ 100 ဢေႊၵႃႉပၢႆ၊ ပိူဝ်ႈတႃႇႁဵတ်း ၼႃႈလိၼ်ၵၢၼ်မၢၵ်ႈမီး ၸွမ်းၼင်ႇၽႅၼ်ၵၢၼ်လူင်ပွင်ၸိုင်ႈ။

ၸဝ်ႈၶွင်တီႈလိၼ် ၵေႃႉၼိုင်ႈလၢတ်ႈဝႃႈ- မိူဝ်ႈ ၼိဝ်ႊသၻႃႊလၢႆႊတ် မႃးသိုဝ်ႉတီႈလိၼ်တီႈၼႃး ၸိူဝ်းၼႆႉၵေႃႈ ၶဝ်ဢမ်ႇပၼ်ၵႃႈမၼ်းတဵမ် ၸွမ်းၼင်ႇၶၼ်သိုဝ်ႉၶၢႆမိူဝ်ႈၼၼ်ႉ၊ ၶဝ်ပၼ်ယွမ်း။ မိူဝ်ႈၼၼ်ႉၵေႃႈ ၸဝ်ႈႁႆႈ ၸဝ်ႈၼႃးၶဝ် လႆႈသုမ်းမႃးပွၵ်ႈၼိုင်ႈယဝ်ႉ။ မိူဝ်ႈလဵဝ် ၶွမ်ႊပၼီႊၼမ်ႉၶမ်းၽွင် သမ်ႉတေမႃးသိုဝ်ႉ လိၼ်ႁႆႈၼႃး ထႅင်ႈၼႆႉပေႃးႁဝ်းၶၢႆပၼ်ၵေႃႈ ႁဝ်းတေဢမ်ႇမီးတီႈလိၼ် တႃႇၽုၵ်ႇသွမ်ႈယဝ်ႉ၊ ၵွပ်ႈၼႆ ႁဝ်းတိုၼ်းဢမ်ႇၶၢႆလႆႈ။ လွင်ႈတၢင်းဢၼ် ႁဝ်းဢမ်ႇၶၢႆလႆႈၼႆႉၵေႃႈ လႆႈတၢင်ႇလိၵ်ႈထိုင် ၸွမ်ၽွင်းလူင်ၸဝ်ႈဢွင်ႇမျၢတ်ႈ မီးမွၵ်ႈၼိုင်ႈဝူင်ႈယဝ်ႉ- ဝႃႈၼႆ။

ၶွမ်ႊပၼီႊၼမ်ႉၶမ်းၽွင်ၼႆႉ ၶိုင်ႁဵတ်းႁူင်းႁႅမ်း (Hotel Zone) တီႈ ပွၵ်ႉႁူဝ်သွင်၊ ၽူၺ်းႁုင်း၊ တေႃႇယွတ်ႈ ၸိူဝ်းၼႆႉ။ ၼႂ်းပွၵ်ႉၼႆႉ မီးတီႈလိၼ် ႁႆႈ ၼႃးၵူၼ်းမိူင်း တၢင်းၵႂၢင်ႈမွၵ်ႈ 98 ဢေႇၵႃႉ။ မိူၼ်ၼင်ႇ ယိူင်းဢၢၼ်းသၢင်ႈႁူင်းႁႅမ်း၊ ၵၢတ်ႇၶိုၵ်ႉတွၼ်း (Super market) ၊ မူႇဝၢၼ်ႈၸတ်းသၼ် ၸိူဝ်းၼႆႉ။ လွင်ႈၼႆႉ ၶွမ်ႊပၼီႊၼမ်ႉၶမ်းၽွင် လႆႈတၢင်ႇယွၼ်းဝႆႉတီႈ လူင်ပွင်ၸိုင်ႈၸႄႈမိူင်းတႆး- ၵူၼ်းၸမ်ၸႂ်ၶွမ်ႊပၼီႊ ၵေႃႉၼိုင်ႈလၢတ်ႈ။

ၵူၼ်းၸမ်ၸႂ် ၶွမ်ႊပၼီႊ သိုပ်ႇလၢတ်ႈဝႃႈ- မိူဝ်ႈၶွမ်ႊပၼီႊ ၵႂႃႇတၢင်ႇယွၼ်းတီႈ လူင်ပွင်ၸိုင်ႈၸႄႈမိူင်းတႆးၼၼ်ႉ လူင်ပွင်ၸိုင်ႈၸႄႈမိူင်းတႆး ႁပ်ႉၸွမ်းလၵ်းၵၢၼ် (မူႇဢယ) မၼ်းၵူၺ်း၊ လၢတ်ႈဝႃႈ သူတေလႆႈၵႂႃႇဢုပ်ႇဢူဝ်း ၵိူဝ်းၵုမ် တင်းၸဝ်ႈႁႆႈၸဝ်ႈၼႃး၊ ပေႃးဝႃႈ ၵူၼ်းဝၢၼ်ႈၵူၼ်းမိူင်း ၸဝ်ႈႁႆႈၸဝ်ႈၼႃးၶဝ် ၶၢႆပၼ်တီႈလိၼ် ၸင်ႇႁဵတ်း၊ ပေႃးဢမ်ႇၶၢႆပၼ် ယႃႇပေႁဵတ်း၊ လူင်ပွင်ၸိုင်ႈမိူင်းတႆး သင်ႇလၢတ်ႈမႃးၼင်ႇၼႆ။ ၵူၺ်းၵႃႈ ၶွမ်ႊပၼီႊၼမ်ႉၶမ်းၽွင် သမ်ႉမႃးလၢတ်ႈတီႈၽူႈၵွၼ်းဝၢၼ်ႈဢိူင်ႇ/ ၽူႈၵွၼ်းၸႄႈတွၼ်ႈဝႃႈ-  လူင်ပွင်ၸိုင်ႈ ၸႄႈမိူင်းတႆး ဢၼုၺၢတ်ႈပၼ်ႁဝ်းယဝ်ႉ၊ ႁဝ်းတေမႃးႁဵတ်း- ဝႃႈၼႆ။

ၵူၼ်းၼုမ်ႇမူႇၸႄႈ ၸၢႆးဢွင်ႇ လၢတ်ႈဝႃႈ- ယွၼ်ႉၶွမ်ႊပၼီႊၼမ်ႉၶမ်းၽွင်ၼႆႉ မႃးလႅၼ်ၵူၼ်းမိူင်းလႄႈ ၵူၼ်းမိူင်းၵေႃႈမႆႈၸႂ်ဝႃႈ ပိူၼ်ႈတေမႃးသိုဝ်ႉလိၼ် ႁႆႈၼႃးႁဝ်းထႅင်ႈယဝ်ႉ၊ ၶဝ်ၵေႃႈမႆႈၸႂ်ယူႇ- ဝႃႈၼႆ။

ၾၢႆႇၼိုင်ႈတၢင်းၼိုင်ႈ ဢၼ်ၶွမ်ႊပၼီႊ ၼိဝ်ႊသၻႃႊလၢႆႊတ် ႁဵတ်း ၼႃႈလိၼ်ၵၢၼ်မၢၵ်ႈမီးယူႇၼၼ်ႉ ၶဝ်ယိူင်းဢၢၼ်း ႁႂ်ႈယဝ်ႉတူဝ်ႈၼႂ်းပီ 2015 ၊ တင်းမူတ်းမီးတႅဝ်း (Zone) 1,2,3 ။ ၵူၺ်းၵႃႈ တေႃႇထိုင်မိူဝ်ႈလဵဝ် တႅဝ်းတီႈ 1 ၵေႃႈႁဵတ်းပႆႇယဝ်ႉ- ၼႆယူႇ။