ဝၼ်းတီႈ 03/10/2014 သိုၵ်းမၢၼ်ႈလုၵ်ႉမိူင်းယႆ ဢွၵ်ႇမႃး တၢင်းဝၢၼ်ႈၽႅတ်ႈ လူတ်ႉၵႃး 5 လမ်း ပႃးတူဝ်ၽူႈၵွၼ်းၽႅၼ်ၵၢၼ်လၢႆးတိုၵ်း (ပိဝ်ႇႁႃႇ)။ မိူဝ်ႈၽႅဝ်တီႈလွႆၵိဝ်ႇၸီႉ တၢင်းၸၢၼ်းဝၢၼ်ႈၼႃးလီႈ (ၼႂ်းၵႄႈမိူင်းယႆ-ဝၢၼ်ႈပုင်ႇ) လႆႈပဵၼ်ပၢင်တိုၵ်းၵၼ် တင်း တပ်ႉသိုၵ်းၸိုင်ႈတႆး (SSPP/SSA) ။ ၵႃးသိုၵ်းမၢၼ်ႈ 1 လမ်း ၵွႆတီႈၼၼ်ႈ- ၼႆယဝ်ႉ။

ဝၢႆးပၢင်တိုၵ်းယဝ်ႉ သမ်ႉမီးၵူၼ်း 2 ၵေႃႉ ၶီႇလူတ်ႉၶိူင်ႈ 2 လမ်း၊ လူတ်ႉၶိူင်ႈသႅၼ် 125 ၼိုင်ႈလမ်း၊ x-1 ၼိုင်ႈလမ်း လုၵ်ႉဝၢၼ်ႈပုင်ႇ ဢၢင်ႈၵႂႃႇမိူင်းယႆ ပိူဝ်ႈတႃႇႁႃသိုဝ်ႉဝူဝ်း/ၵႂၢႆး၊ မႃးၸုၼ်ၽႃႇၺႃးသိုၵ်းမၢၼ်ႈ ၸုမ်းၼႆႉလႄႈ ထုၵ်ႇသိုၵ်းမၢၼ်ႈယိုဝ်းတၢႆပႅတ်ႈ တင်းသွင်ၵေႃႉ။ လူတ်ႉၶိူင်ႈသွင်လမ်းၼၼ်ႉၵေႃႈ သိုၵ်းမၢၼ်ႈၶဝ်ဢဝ်ၾႆးၽဝ်ပႅတ်ႈ- ၼႆယဝ်ႉ။

ၵူၼ်းမိူင်း 2 ၵေႃႉ ဢၼ်တၢႆၵႂႃႇၼႆႉ ၵေႃႉၼိုင်ႈၸိုဝ်ႈဝႃႈ လုင်းမူၼ်း ပဵၼ်ပူႇၵႄႇဝၢၼ်ႈၼမ်ႉပွင်ႈ ၸၢဝ်းၶိူဝ်းဝႃႉ။ ထႅင်ႈၵေႃႉၼိုင်ႈ ၸိုဝ်ႈၸၢႆးသူၺ်ႇ ယူႇဝၢၼ်ႈလွႆ မိူင်းပၢတ်ႇ၊ ၸႄႈဝဵင်းတၢင်ႉယၢၼ်း၊ ၸိုဝ်ႈမေး ၼၢင်းသိုဝ်ႉ မီးလုၵ်ႈလၢင်းႁူမ်ႈၵၼ် 2 ၵေႃႉ၊ ၸၢႆးၵေႃႉၼိုင်ႈ ယိင်းၵေႃႉၼိုင်ႈ။ ၸၢႆးသူၺ်ႇၼႆႉ ပဵၼ်သိုၵ်းၼႂ်းၸုမ်းပူဝ်ႇမူၼ်း ၸၼ်ႉၶုၼ်ႁၢၼ်- ၼႆယဝ်ႉ။

ဝၼ်းတီႈ 04/10/2014 သိုၵ်းမၢၼ်ႈတီႈတပ်ႉဝၢၼ်ႈၽႅတ်ႈ ၶဝ်ႈမိူဝ်းၼႂ်းဝၢၼ်ႈၽႅတ်ႈသေ မိူဝ်းႁၼ်ၸၢႆးမွင်ႇၼူႉ တီႈႁိူၼ်း၊ ဢမ်ႇထၢမ်ၵႂၢမ်းသင်သေ ဢဝ်ငုၵ်းၵွင်ႈသွင်ႉသႂ်ႇၸၢႆးမွင်ႇၼူႉ၊ မႄႈၸၢႆးမွင်ႇၼူႉ ၸိုဝ်ႈပႃႈယူင်ႇ ယွၼ်းၼွမ်း (တွင်းပၢၼ်ႇ)ၵေႃႈ ႁႅမ်ယူႇတိၵ်းတိၵ်း တေႃႇပႃႈယူင်ႇပေႃးပဵၼ်လိူတ်ႈၶိုၼ်ႈ သိုၵ်းမၢၼ်ႈ ၸင်ႇၵႂႃႇတီႈ တပ်ႉဝၢၼ်ႈၽႅတ်ႈၶိုၼ်း။ ၸၢႆးမွင်ႇၼူႉ ဢႃႇယု 18 ပီ၊ ၸိုဝ်ႈပေႃႈ လုင်းသူၺ်ႇ၊ ၸိုဝ်ႈမႄႈ ပႃႈယူင်ႇ၊ ယူႇဝၢၼ်ႈၽႅတ်ႈ။

ဝၼ်းတီႈ 04/10/2014 ၵၢင်ၼႂ်ယၢမ်း 7 မူင်း၊ သိုၵ်းမၢၼ်ႈတပ်ႉ 22 ဝၢၼ်ႈၽႅတ်ႈ ႁႅင်းၵူၼ်း 30 ၵေႃႉ ၵႂႃႇၶဝ်ႈဝၢၼ်ႈသဵဝ်ႈသူမ်ႈ၊ မိူဝ်းဝႅတ်ႉႁိူၼ်းလုင်းဢွၼ်ႇ (ဢႃႇယု 50 ပီ)သေ သွၵ်ႈတဝ်ဢဝ်ၶူဝ်းႁိူၼ်းၵႂႃႇ 1.ဢွမ်လူမ်း (Radio) သႅၼ်းယႂ်ႇ 1 လုၵ်ႈ။ 2.ဢွမ်လူမ်းသႅၼ်းလဵၵ်ႉ 1 လုၵ်ႈ။ ၶိူင်ႈၾူၼ်ႊ 1 လုၵ်ႈ။ ၶူဝ်းတႆး 1 ၸုမ်ႇ။ ၵႆႇဢၼ်မီးတီႈႁိူၼ်း ဢဝ်ၵႂႃႇမူတ်း- ၼႆယဝ်ႉ။

ဝၼ်းတီႈ 06/10/201 4 ယၢမ်း 15:30 မူင်း၊ သိုၵ်းမၢၼ်ႈဢၼ်မီးဝႆႉ ၾၢႆႇတူၵ်းဝၢၼ်ႈၼမ်ႉပုၵ်း တီႉၺွပ်းဢဝ်ၸၢႆးၼွတ်း ၽွင်းမၼ်းၵႂႃႇသိုဝ်ႉၶူဝ်းလူႇၶူဝ်းတၢၼ်း တီႈဝဵင်းၵေးသီး ပွၵ်ႈမႃးၸွမ်းတၢင်း  တီႈတၢင်းလူင်ၾၢႆႇတူၵ်းဝၢၼ်ႈၼမ်ႉပုၵ်း၊ သိုၵ်းမၢၼ်ႈႁွင်ႉၶဝ်ႈၵႂႃႇတီႈၼွင်ႁႅင်ႈ ဢၼ်မီးၾၢႆႇၸၢၼ်း တပ်ႉၵွင်းၸဝ်ႈမိူင်း ဝၢၼ်ႈဝၢပ်ႈ။ ၸၢႆးၼွတ်းၼႆႉ ဢႃႇယု 30 ပီ၊ ၸိုဝ်ႈပေႃႈလုင်းၵွၼ်း၊ ၸိုဝ်ႈမႄႈပႃႈၵူႇ၊ ယူႇဝၢၼ်ႈၼမ်ႉပုၵ်း၊ မီးပီႈၼွင်ႉႁူမ်ႈတွင်ႉ 6 ၵေႃႉ။

မိူဝ်ႈတိုၵ်ႉၵႂႃႇၸူးတီႈ ဝၢၼ်ႈၼွင်ႁႅင်ႈၼၼ်ႉ သိုၵ်းမၢၼ်ႈႁိမ်ဢဝ်ထူင်ပႃး ၸၢႆးၼွတ်းၵႂႃႇ၊ (လၵ်ႉဢဝ်မၢၵ်ႇၵွင်ႈ မၢၼ်ႈ သႂ်ႇဝႆႉၼႂ်းထူင်)သေ ၽိူဝ်ႇထိုင်တီႈၼွင်ႁႅင်ႈ သိုၵ်းမၢၼ်ႈႁဵတ်းၵႅင်ႈသွၵ်ႈထူင် ၸၢႆးၼွတ်းယဝ်ႉ ႁၼ်မၢၵ်ႇၵွင်ႈ (ပဵၼ်မၢၵ်ႇၵွင်ႈမၢၼ်ႈ)။ ထၢမ်ဝႃႈ မႂ်းပဵၼ်ၵူၼ်းသိုၵ်းႁႃႉ၊ ၸၢႆးၼွတ်း တွပ်ႇၵႄႈဝႃႈ ဢမ်ႇၸႂ်ႈ၊ ၵူၺ်းၵႃႈ သိုၵ်းမၢၼ်ႈဢဝ်မၢၵ်ႇၵွင်ႈဝႆႉၾၢႆႇၼႃႈ ၸၢႆးၼွတ်းသေ ထၢႆႇဢဝ်ၶႅပ်းႁၢင်ႈ ပွႆႇမိူဝ်းၶိုၼ်းမိူဝ်ႈယၢမ်း 16:00 မူင်း- ၼႆယဝ်ႉ။