ဝၼ်းဢွၵ်ႇဝႃႇသႃ လိူၼ် 11 မူၼ်းၼႆႉ ၸုမ်း IT တႆး လူင်းၾွၼ်ႊယူႊၼီႊၶူတ်ႊ ပၼ်ပီႈၼွင်ႉတႆး ၸိူဝ်းၶဝ်ႈ ဝတ်ႉ/ ၵျွင်း တီႈဝတ်ႉၵူႇတဝ်ႈ ဢိူင်ႇသီၽုမ်း ဝဵင်းၵဵင်းမႆႇ၊ ၼႂ်းၶိူင်ႈၾူၼ်ႊ/မိုဝ်းထိုဝ် တင်းၶိူင်ႈၶွမ်ႊၼူတ်ႊၿုၵ်ႊ။

ဢွၼ်ၼႃႈၼႆႉ ပူၼ်ႉမႃးမိူဝ်ႈဝၼ်းတီႈ 21/09/2014  ၵေႃလိၵ်ႈလၢႆးၾိင်ႈငႄႈတႆး ၵဵင်းမႆႇ လႆႈၸတ်းႁဵတ်း ပၢင်ဢုပ်ႇၵုမ်လွင်ႈ IT တီႈႁွင်ႈၵၢၼ် ၵေႃလိၵ်ႈလၢႆးၾိင်ႈငႄႈတႆး ၵဵင်းမႆႇ၊ လႆႈဢုပ်ႇ ထိုင်ၵၢၼ်တႃႇသိုပ်ႇ ပူၵ်းပွင်/ယုၵ်ႉမုၼ်း လိၵ်ႈလၢႆးတႆး ႁႂ်ႈပီႈၼွင်ႉတႆး ၸႂ်ႉလိၵ်ႈတႆးငၢႆႈလူမ်လႄႈ ပွင်ႇပိုင်ႈလူင်ႉလႅင်းၵၼ်။ ပၢင်ၵုမ် ဢုပ်ႇဢူဝ်းလႆႈၸႂ်ၵၼ်လၢႆၶေႃႈ။


ၶိူင်ႈမိုဝ်းလႄႈၵႃႈၸႂ်ႉၸၢႆႇၵူႈလွင်ႈ တၢင်းၵေႃလိၵ်ႈလၢႆးၾိင်ႈငႄႈတႆး ၵဵင်းမႆႇ ပဵၼ်ၾၢႆႇၵမ်ႉၸွႆႈ၊ ပိူဝ်ႈတႃႇ ပီႈၼွင်ႉႁဝ်းၶဝ် ၸိူဝ်းဢဝ်ၶွမ်ႊ(Notebook) ႁိုဝ် ၾူၼ်ႊမိုဝ်းထိုဝ် မႃးလူင်းၼၼ်ႉ ယူႇတီႈၼမ်ႉၸႂ် မီးၸေႇတၼႃႇ ၶႂ်ႈႁွမ်းၸွႆႈပၼ် တႃႇငိုၼ်းၵွင်ၵၢင် ႁႂ်ႈပဵၼ်တိုၼ်းၶူဝ်းၶွင်သိုဝ်ႉၶိူင်ႈမႆႉၶိူင်ႈမိုဝ်းၵႂႃႇမိူဝ်းၼႃႈ တႃႇ IT တႆး ၵႃႈႁိုဝ်ၵေႃႈဢမ်ႇပဵၼ်သင်။ တွၼ်ႈတႃႇၸုမ်း IT တႆးႁဝ်းၶဝ် ဢိၵ်ႇတင်းၵေႃလိၵ်ႈလၢႆးၾိင်ႈငႄႈတႆး တေဢမ်ႇၵဵပ်းၵႃႈၸႂ်ႉၸၢႆႇသင်- ၼႆယဝ်ႉ။
ပိူဝ်ႈတႃႇၵၢၼ်ပူၵ်းပွင်/ယုၵ်ႉမုၼ်း လွင်ႈၵၢၼ် IT တႆးၼႆႉ ၵေႃလိၵ်ႈလၢႆးၾိင်ႈငႄႈတႆး ၵဵင်းမႆႇ လႆႈၶတ်းၸႂ် တုမ်ၶွၼ်ႈႁွၼ်ႈႁႅင်းၽူႈမီးပၢႆးႁူႉလွင်ႈ IT  တႆး၊ လႆႈၸတ်းႁဵတ်းပၢင်ဢုပ်ႇၵုမ် (သႅမ်ႊမီႊၼႃႊ) ၽႃသႃ လိၵ်ႈလၢႆး ၵႂၢမ်းလၢတ်ႈ လႄႈၵဵဝ်ႇလွင်ႈ IT ပိူင်လူင်မၼ်း လွင်ႈ Unicode ၾွၼ်ႉတႆး တင်ႈတႄႇဝၼ်းတီႈ 18-19 လိူၼ် ၵျႅၼ်ႊၼိဝ်ႊရီႊ ႁူဝ်ပီ 2014 မႃး။ ဝၢႆးမႃး 4 လိူၼ်ၵေႃႈ သိုပ်ႇႁဵတ်းပၢင်ဢုပ်ႇၵုမ်ၵၼ်မႃးၵူႈလိူၼ် တေႃႇႁၢၼ်ႉၼႆႉ၊ ပိူဝ်ႈတႃႇႁႂ်ႈလိၵ်ႈတႆးပေႃးမီးၸၼ်ႉ မီးလၵ်းၸဵင် ၵၢဝ်ႉယၢင်ႈၶိုတ်းတၼ်းၵၢပ်ႈပၢၼ် IT ၵႂႃႇမိူၼ်ပိူၼ်ႈ- ၼႆယဝ်ႉ။