ပူၼ်ႉမႃးမိူဝ်ႈဝၼ်းတီႈ 2-4/10/2014 ၽူႈၼမ်းတႆး 5 မူႇၸုမ်း လုၵ်ႉၼႂ်းမိူင်း မႃးႁဵတ်းပၢင်ၵုမ် တီႈမိူင်းၵွၵ်ႇ ၸိုင်ႈထႆး၊ ဢုပ်ႇဢူဝ်းပိူဝ်ႈတႃႇသၢၼ်မိုဝ်းႁူမ်ႈၵၼ် ႁဵတ်းသၢင်ႈၼႃႈၵၢၼ် တႃႇၸိူဝ်ႉၸၢတ်ႈမိူဝ်းၼႃႈ။ ၼႂ်းၼၼ်ႉ မီးပႃႇတီႇႁူဝ်သိူဝ် ႁူဝ်ပဝ်ႈၸဝ်ႈၶုၼ်ထုၼ်းဢူး ၼမ်းၼႃႈ။ ပႃႇသိူဝ်ၽိူၵ်ႇ (SNDP) လုင်းၸၢႆးဢၢႆႈပဝ်း ၼမ်းၼႃႈ။ ၶွင်ႊသီႊဢဝ်ၶိုၼ်းၸိုင်ႈတႆး (RCSS) ၸွမ်သိုၵ်းယွတ်ႈသိုၵ်း ၼမ်းၼႃႈ။ ပႃႇတီႇမႂ်ႇသုင်ၸိုင်ႈတႆး (SSPP) ၸွမ်ႁၢၼ်သိူဝ်ထႅၼ်ႈ ဢွၼ်ႁူဝ်ၼမ်းၼႃႈ။ ၸုမ်းသိုၵ်းၵူၼ်းမိူင်း သႅင်ၵႅဝ်ႉ ၸဝ်ႈၵၢႆႇၾႃႉ ၼမ်းၼႃႈ။

ပၢင်ၵုမ်ၶၢဝ်းတၢင်း 2-3 ဝၼ်းၼႆႉ ဢွၵ်ႇမႃးၶေႃႈလႆႈၸႂ်တင်းမူတ်း 12 ၶေႃႈ။

1.တေလွၵ်းတိုဝ်းလွၵ်းပိူင်ၽွင်းငမ်း ဢၼ်ငဝ်ႈငုၼ်းၸၵ်းၽႄ ပၼ်ဢႃႇၼႃႇ ၾၢႆႇတႂ်ႈ။ 2.ဢႃႇၼႃႇၸိၵ်းၸွမ် တင်းသဵင်ႈ ၼႂ်းၸိုင်ႈတႆး တေလႆႈလုၵ်ႉတီႈၵူၼ်းမိူင်းၸိုင်ႈတႆးမႃး။ 3.တေဢဝ်လၢႆးၵၢၼ်မိူင်းသေ ၵႄႈလိတ်ႈ ပၼ်ႁႃၵၢၼ်မိူင်း။ 4.ၸၢဝ်းၶိူဝ်းၼႂ်းမိူင်းတႆး တေလႆႈမီးသုၼ်ႇလႆႈၽဵင်ႇပဵင်းၵၼ်လႄႈ တေလႆႈမီးလွင်ႈၵႅတ်ႇၶႄ ႁႄႉၵင်ႈ သုၼ်ႇလႆႈၵူၼ်း ၸုမ်းၸိူဝ်းဢၼ်လဵၵ်ႉၵေႇဢေႇမၢင်။ 5.ႁႂ်ႈမီးသုၼ်ႇလႆႈၵူၼ်းလႄႈ သုၼ်ႇလႆႈ ၼၢင်းယိင်း။ 6.တေၸႂ်ႉတိုဝ်းလွၵ်းပိူင် ၻီႊမူဝ်ႊၶရေႊၸီႊ လၢႆပႃႇတီႇ။ 7.တေၸႂ်ႉတိုဝ်းလွၵ်းပိူင် ဢၼ်ဢမ်ႇ ပိုင်ႈဢိင်ၸုၵ်းမၼ်ႈၼိူဝ် သႃသၼႃ။ 8.ႁႂ်ႈလႆႈမီးသုၼ်ႇလႆႈႁႄႉၵင်ႈ လွင်ႈႁူမ်ႇလူမ်ႈဝၢၼ်ႈမိူင်း။ 9.ႁႂ်ႈမီးလွၵ်းပိူင် တႅပ်းတြႃးဢၼ်လွတ်ႈလႅဝ်း။ 10.ႁႂ်ႈမီးသုၼ်ႇလႆႈတႅပ်းတတ်းႁင်းတူဝ်ၵဝ်ႇ ၵဵဝ်ႇလူၺ်ႈငိုၼ်းတွင်း။ 11.ၵူၼ်းမိူင်းတႆးၵူႈၸၢဝ်းၶိူဝ်း ၸႃႉႁူမ်ႈၶီ-လီႁူမ်ႈၸၢမ်ႇ ႁႂ်ႈလႆႈယူႇၸွမ်းၵၼ်ၵႂႃႇ တေႃႇၸူဝ်ႈသုတ်းပၢၼ်။ 12.ၵူၼ်းမိူင်းတႆး ၵူႈၸၢဝ်းၶိူဝ်း ပဵၼ်ၸဝ်ႈၶွင်ဝၢၼ်ႈမိူင်း လႄႈ ၶူဝ်းၶွင်သၽႃဝတင်းသဵင်ႈ ဢၼ်ယူႇၼိူဝ်လိၼ် တႂ်ႈလိၼ် ၼိူဝ်ၼမ်ႉတႂ်ႈၼမ်ႉလႄႈ ၼႂ်းလူမ်းၵၢင်ႁၢဝ်တင်းသဵင်ႈ ၼႂ်းၸိုင်ႈတႆး- ၸိူဝ်းၼႆႉ။

ၼွၵ်ႈသေၼၼ်ႉ လႆႈၸႂ်ၵၼ်ဝႃႈ- တေၸႂ်ႉတိုဝ်းလၢႆးမိူင်းႁူမ်ႈတုမ်ၾႅတ်ႊၻရႄႊလ် သေ ႁဵတ်းသၢင်ႈ ၵၢၼ်ငၢၼ်းၵႂႃႇ ၸွမ်းတၢင်ႇၸႄႈမိူင်း။ ၵၢၼ်ၽွမ်ႉႁူမ်ႈ သွင်ပႃႇတီႇၼၼ်ႉ တေသိုပ်ႇဢုပ်ႇဢူဝ်းၵၼ်ၵႂႃႇထႅင်ႈ ၶၢဝ်းၼႃႈ။ တေၸတ်းပၢင်ၵုမ် ၵေႃပွင်ၵၢၼ်ၽွမ်ႉႁူမ်ႈထႅင်ႈ ၼႂ်းႁူဝ်ပီ 2015 ။ ၸူဝ်ႈပႆႇထိုင် ပၢင်ၵုမ်ၼၼ်ႉ ၸဝ်ႈပိုၼ်ၶမ်း ႁပ်ႉပုၼ်ႈၽွၼ်း ၶဵၼ်ႇတႅမ်ႈပၵ်းပိူင်ၵေႃပွင်ၵၢၼ် ပိူဝ်ႈတႃႇတၢင်ႇထိုင်တီႈၼႂ်းပၢင်ၵုမ် ဢၼ်တေၸတ်းၼႂ်းႁူဝ်ပီၼႃႈ- ၼႆယဝ်ႉ။

ၼႂ်းပၢင်ဢုပ်ႇဢူဝ်းၼၼ်ႉ ဢၼ်ၵူၼ်းမိူင်းတိုၵ်းသူၼ်းမႃး ႁႂ်ႈ 2 ပႃႇတီႇတႆး ၽွမ်ႉႁူမ်ႈ ပဵၼ်ဢၼ်ၼိုင်ႈ ဢၼ်လဵဝ်ၵၼ်ၼၼ်ႉ တင်းသွင်ပႃႇတီႇ ႁၼ်ဝႃႈ- တႃႇတေၽွမ်ႉၵၼ်ၼၼ်ႉ တေသိုပ်ႇဢုပ်ႇဢူဝ်းၵၼ်ၵႂႃႇ၊ တႃႇတေပဵၼ်ၼႂ်းၼိုင်ႈပီၼႆႉ မၼ်းပဵၼ်ယၢပ်ႇ၊ ၵွပ်ႈဝႃႈၵၢၼ်လိူၵ်ႈတင်ႈပီ 2015 ၼႆႉ ၵိုတ်းပီလဵဝ်ၵူၺ်း။ ပိူဝ်ႈတႃႇၽွမ်ႉႁူမ်ႈၵၼ်ၼႆႉ  တေလႆႈၸႂ်ႉၶၢဝ်းယၢမ်းသေ ဢုပ်ႇဢူဝ်းၵၼ်ၵႂႃႇ၊ တေလႆႈႁၢင်ႈႁႅၼ်းပၵ်းပိူင် ဢၼ်ဢမ်ႇမိူၼ်ၵၼ် ႁႂ်ႈမိူၼ်ၵၼ်မႃး ၸိူဝ်းၼႆႉ။