တႄႇၽွင်းႁၢင်လိူၼ်သႅပ်ႊထႅမ်ႊၿိူဝ်ႊ (2014) မႃး ႁၢၼ်ႉတေႃႇမိူဝ်ႈလဵဝ် ပႃႇတီႇသၢင်ႇသီႈ (USDP) မိူင်းၼုင်း ၸႄႈဝဵင်း မိူင်းၶၢၵ်ႇ ၸိုင်ႈတႆးပွတ်းဢွၵ်ႇ၊ လူင်းၼႂ်းပိုၼ်ႉတီႈ ၼႂ်းဢိူင်ႇမိူင်းၼုင်း  တင်းမူတ်း 7 ဝၢၼ်ႈသေ ၶိုၼ်ႈႁိူၼ်းလူင်းႁိူၼ်း လၢတ်ႈဝႃႈ- ပေႃးပၢင်လိူၵ်ႈတင်ႈပီ 2015 ၼႆႉမႃး ႁႂ်ႈတွတ်ႈၶႅပ်းၵၢင်ၸႂ်ပၼ် ပႃႇတီႇသၢင်ႇသီႈ။

လုင်းၼၢၼ်လူင် ၵူၼ်းမိူင်းၼုင်းလၢတ်ႈဝႃႈ- ၸုမ်းပႃႇတီႇသၢင်ႇသီႈ ဢၼ်လူင်းပိုၼ်ႉတီႈၼႆႉ မီးႁႃႈႁူၵ်းၵေႃႉ၊ ၵေႃႉဢၼ် ၶိုၼ်ႈႁိူၼ်းလူင်းႁိူၼ်းသေ လၢတ်ႈတီႈတၢင်းပွတ်းႁဝ်းၶႃႈၼႆႉ ပဵၼ်လုင်းဢၢႆႈတီ တင်း လုင်းဢွင်ႇတၢၼ်း၊ ၶဝ်ယူႇပွၵ်ႉ ၼွင်မူဝ် ဝဵင်းမိူင်းၶၢၵ်ႇ၊ ၶိုၼ်ႈႁိူၼ်းလူင်းႁိူၼ်းသေလၢတ်ႈ၊ ၶိုၼ်ႈႁိူၼ်းမႃးယဝ်ႉၵေႃႈလၢတ်ႈဝႃႈ - သူတေတွတ်ႈၶႅပ်းၵၢင် ၸႂ်ပၼ်ႁဝ်းၼႄႇ ဢမ်ႇပၼ်၊ ဢၼ်သူထုၵ်ႇလႆႈႁူႉၼႆႉ ပဵၼ်ပႃႇတီႇၸၢဝ်းၶိူဝ်းတႆးသူၵေႃႈ ပေႃးသူတူၵ်းတၢင်းယၢပ်ႇၽိုတ်ႇ မႃး ၶဝ်ဢမ်ႇၸၢင်ႈႁဵတ်းသင်ပၼ်သူလႆႈ။ ဢၼ်တေၸွႆႈထႅမ်ပၼ်သူၵူၼ်းမိူင်းလႆႈၼၼ်ႉတႄႉ တေမီးပႃႇတီႇသၢင်ႇသီႈ ပျီႇၶၢႆႇၽျူဝ်း ႁဝ်းၼႆႉၵူၺ်း။ ၵွပ်ႈၼႆ တေတွတ်ႈၶႅပ်းၵၢင်ၸႂ်ပၼ်ႁဝ်းၼႆ တႅပ်းတတ်းၸႂ်လႃႈ - ဝႃႈၼႆ။

ၽူႈၶဝ်ႈၸုမ်းပႃႇတီႇသၢင်ႇသီႈမိူင်းၶၢၵ်ႇ ဢမ်ႇၶႂ်ႈဢွၵ်ႇၸိုဝ်ႈၵေႃႉၼိုင်ႈ လၢတ်ႈၼႄၸုမ်းၶၢဝ်ႇၽူႈတွႆႇႁွၵ်ႈဝႃႈ- လႆႈႁပ်ႉ ၶေႃႈၸီႉသင်ႇ ပႃႈၼိူဝ်လူင်းမႃး ႁႂ်ႈၵဵပ်းၵၢင်ၸႂ်ၵူၼ်းမိူင်းၼႂ်းပိုၼ်ႉတီႈ။ မိူဝ်ႈလဵဝ်ၼႆႉ ၵူၼ်းတေပၼ်ႁႅင်း ပႃႇတီႇသၢင်ႇသီႈ တေမီးၵႃႈႁိုဝ်ၼႆ ၶႂ်ႈႁူႉလႄႈ လူင်းၵဵပ်းတူၺ်းၵူၺ်း-  ဝႃႈၼႆ။

ၶုၼ်ၸၢႆးၶမ်း ၵူၼ်းမိူင်းၼုင်း ၵေႃႉႁွတ်ႈထိုင်တီႈ ဝဵင်းတႃႈၶီႈလဵၵ်းၵေႃႈလၢတ်ႈဝႃႈ- ပႃႇတီႇသၢင်ႇသီႈၶဝ် ပၢႆမႃးလွၵ်ႇငိုတ်ႈ ဝႃႈ ပေႃးသူဢမ်ႇတွတ်ႈၶႅပ်းလိူၵ်ႈပႃႇတီႇသၢင်ႇသီႈႁဝ်းတႄႉ တေႁူႉၼမ်ႉသူ။ ပၢင်လိူၵ်ႈတင်ႈၼႆႉ ၶၢဝ်းယၢမ်းမၼ်း တိုၵ်ႉ ၵႆယူႇ၊ တေတွတ်ႈၶႅပ်းပၼ်ပႃႇတီႇလႂ်ၼႆ ပႆႇၸၢင်ႈတႅပ်းတတ်း၊ ပေႃးၸမ်ပၢင်လိူၵ်ႈတင်ႈ မႃးၵွၼ်ႇ ၸင်ႇၵွႆႈတႅပ်းတတ်း၊ ၼႆႉပဵၼ်သုၼ်ႇလႆႈႁဝ်းၵူၺ်း၊ ႁဝ်းၶႂ်ႈလိူၵ်ႈပႃႇတီႇလႂ်ၵေႃႈ ႁဝ်းတေလိူၵ်ႈ- ဝႃႈၼႆ။