ၵဵဝ်ႇၵပ်းလွင်ႈၼႆႉ ၽွင်းလူင်ၾၢႆႇႁူမ်ႇလူမ်ႈလႄႈလႅၼ်လိၼ် လူင်ပွင်ၸိုင်ႈမိူင်းတႆး ၸဝ်ႈသိုၵ်းလူင်ဢွင်ႇတူႇ တၢင်တူဝ် ၸွမ်ၽွင်းလူင်မိူင်းတႆး၊ လူင်းလၢႆးမိုဝ်းသေ တႅမ်ႈလိၵ်ႈထိုင် ၽူႈၼင်ႈလုမ်းတပ်ႉသိုၵ်းၸိုင်ႈတႆး (SSPP/SSA) ဝဵင်းလူင် တူၼ်ႈတီး ဝၼ်းတီႈ 09/10/2014 ၊ ႁႂ်ႈတပ်ႉသိုၵ်းၸိုင်ႈတႆး  ထွၼ်ဢွၵ်ႇတပ်ႉပၢင်သဝ်း လႄႈ ႁႅင်းသိုၵ်းဢၼ်တူင်ႉၼိုင် ၼႂ်းပိုၼ်ႉတီႈ တွၼ်ႈၾၢႆႇဢွၵ်ႇပၢင် ၼႂ်းၵုၼ်ပၢင်ၵုၼ်ၶူင်း။ တၢင်းပွတ်း ဢိူင်ႇမိူင်းၵၢဝ် ၸႄႈဝဵင်းတၢင်ႉယၢၼ်း ၸိုင်ႈတႆး ပွတ်းႁွင်ႇ၊ ပွတ်းတွၼ်ႈထုင်ႉလွႆလၢင်း ၼမ်ႉသီႇၸဵင်ႇၸိူဝ်းၼႆႉ တေဢမ်ႇလႆႈတူင်ႉၼိုင်၊ ႁႂ်ႈထွၼ်ဢွၵ်ႇၵႂႃႇယူႇ ၾၢႆႇတူၵ်း ပၢင်သဵင်ႈသဵင်ႈ- ဝႃႈၼႆ။

ၵုၼ်ပၢင်ၵုၼ်ၶူင်းၼႆႉ ပဵၼ်တွၼ်ႈၾၢႆႇတူၵ်းၶူင်း၊  တေႃႇၼႃႈ-ၼႃႈလိၼ်ဝႃႉ (UWSA) ၵုမ်းၵမ် ၾၢႆႇဢွၵ်ႇၶူင်း။

ၵဵဝ်ႇၵပ်းလွင်ႈၼႆႉ ၽူႈၵွၼ်းငႃးသိုၵ်း ဢၼ်ယူႇၼႃႈသိုၵ်း SSPP/SSA ၸဝ်ႈၼိုင်ႈလၢတ်ႈဝႃႈ- ႁႂ်ႈႁဝ်းၶႃႈထွၼ်ဢွၵ်ႇ ထုင်ႉလွႆလၢင်း လႄႈၼမ်ႉသီႇၸဵင်ႇ၊ လွင်ႈၼႆႉ မၼ်းဢမ်ႇၸႂ်ႈလွင်ႈလီ၊ မိူၼ်ၼင်ႇၶႅၵ်ႇမႃးလိုပ်ႈ ၸဝ်ႈႁိူၼ်း။ ဢၼ်ပူၼ်ႉ ပႅၼ်ၼႆႉပဵၼ်ၽႂ်၊ သိုၵ်းမၢၼ်ႈၼႆႉ ယႃႉပႅတ်ႈၶေႃႈၵိၼ်ၵႅၼ်ႇ 1947 သေ ဢၢင်ႈဢိင်ဝႃႈ တေတိုၵ်းတေႃးၶႄႇၽိူၵ်ႇၼႆသေ ၶိုၼ်ႈမႃးမိူင်းတႆးမိူဝ်ႈပီ 1952 ႁၢၼ်ႉတေႃႇထိုင်ယၢမ်းလဵဝ် ၶဝ်ဢမ်ႇပွၵ်ႈမိူဝ်းၶိုၼ်း။ ၵွပ်ႈၼၼ်လႄႈ ယၢမ်းလဵဝ်ၼႆႉ ပေႃးဝႃႈၶဝ်ၶဝ်ႈမႃး ၼႂ်းၼႃႈလိၼ်ဢၼ်ႁဝ်းယူႇသဝ်းၵုမ်းၵမ်ၼႆႉတႄႉ  ၵဝ်ၶႃႈတေဢမ်ႇပႂ်ႉၶေႃႈၸီႉသင်ႇပႃႈၼိူဝ်သင်၊ တေယိုဝ်းၵမ်းလဵဝ်- ဝႃႈၼႆ။

မၼ်းၸဝ်ႈသိုပ်ႇလၢတ်ႈထႅင်ႈဝႃႈ- သိုၵ်းမၢၼ်ႈၼႆႉ ၸီႉၼႄးတပ်ႉသိုၵ်းၸိုင်ႈတႆး ပူၼ်ႉပႅၼ်ၼႃႈလိၼ်သေ မႃးယူႇသဝ်း တီႈတပ်ႉတႃႈၽႃသွင်ႇ၊ ပဵၼ်ပၢင်တိုၵ်းၵၼ် တင်းတပ်ႉသိုၵ်းၸိုင်ႈတႆး ဢၼ်ပႂ်ႉႁူဝ်ၶူဝ် တႃႈၽႃသွင်ႇသေ သိုၵ်းမၢၼ်ႈ ဢဝ်မၢၵ်ႇလူင်ယိုဝ်းသႂ်ႇ ၼပ်ႉပၢၵ်ႇၼပ်ႉႁဵင်လုၵ်ႈ။ ၾၢႆႇတပ်ႉသိုၵ်းၸိုင်ႈတႆး ထွၼ်ပၼ်သေတႃႉၵေႃႈ တီႈၼႆႈသိုၵ်းမၢၼ်ႈ ၶဝ်သမ်ႉဝႃႈ သိုၵ်းတႆးပူၼ်ႉပႅၼ်မႃးပၵ်း တီႈတႃႈၽႃသွင်ႇ။ ၵူၺ်းၵႃႈ ဢၼ်ဢမ်ႇၶဝ်ႈပႃးၼႂ်းသဵၼ်ႈမၢႆပူၼ်ႉပႅၼ် မိူၼ်ၼင်ႇတပ်ႉၼမ်ႉပုၵ်း၊ တပ်ႉၵွင်းမၢၵ်ႇႁိၼ်တင်ႈ၊ ၵွင်းမႆႉၺွင်ႇ၊ တပ်ႉၵွင်းမၢၵ်ႇမူင်ႈလဝ်း၊ ၵွင်းၸဝ်ႈမိူင်း ၸိူဝ်းၼႆႉၵေႃႈ သိုၵ်းမၢၼ်ႈႁႅၼ်းသိုၵ်းသေလေႃႇတိုၵ်း တႄႉတႄႉဝႃႈဝႃႈ ၼင်ႇၵဝ်ႇ- ဝႃႈၼႆ။