သိုၵ်းမၢၼ်ႈ တပ်ႉ 248 ဢၼ်ပၵ်းတပ်ႉမႂ်ႇ တီႈဝၢၼ်ႈ ပၢင်ႇၸေႈ  ဢၢင်ႈၶိုင်ၵၼ်ႉၸၼ် ၶူးမေႃသွၼ် ႁူင်းႁဵၼ်းပၢင်ႇၸေႈ။ မိူဝ်ႈလဵဝ် သိုၵ်းမၢၼ်ႈၵေႃႉ ဢၢၼ်းၶိုင်ႁၢႆႉၼၼ်ႉ ႁၢႆတူဝ်ဝႆႉယူႇ။

ပူၼ်ႉမႃးမိူဝ်ႈဝၼ်းတီႈ 15/09/2014 သိုၵ်းမၢၼ်ႈၵေႃႉၼိုင်ႈ ၸိုဝ်ႈၺီႇၺီႇသူၺ်ႇ ၼႂ်းတပ်ႉၶလယ 248 ဢၼ်မႃး ပၵ်းတပ်ႉမႂ်ႇတီႈပၢင်ၸေႈ (လွႆယွႆး) ၸႄႈဝဵင်းၵေးသီး ၸိုင်ႈတႆးပွတ်းၸၢၼ်း၊ ၵႂႃႇၶိုင်ဢၢင်ႈတေၵၼ်ႉၸၼ် ၶူးမေႃသွၼ် ယိင်း ၸၢဝ်းမၢၼ်ႈ ဢၼ်မႃးႁဵတ်းၶူးသွၼ်ၸၼ်ႉငဝ်ႈ တီႈႁူင်းႁဵၼ်းပၢင်ႇၸေႈ ၸႄႈဝဵင်းၵေးသီး။

ၶူးမေႃသွၼ်ၼၢင်းယိင်း ဢၼ်သိုၵ်းမၢၼ်ႈ ၺီႇၺီႇသူၺ်ႇ ဢၢင်ႈၵႂႃႇၵၼ်ႉၸၼ်ၼႆႉ ၸိုဝ်ႈဝႃႈ တေႃႇၶျူဝ်ႇၶျူဝ်ႇၶႅင်ႇ တင်း တေႃႇၸူးမုၼ်ႇ၊ ၸၢဝ်းမၢၼ်ႈ၊ ပဵၼ်ၶူးသွၼ်ၸၼ်ႉငဝ်ႈ ၼႂ်းဢိူင်ႇပၢင်ၸေႈ၊ ၵူၺ်းၵႃႈ ၶူးသွၼ်သမ်ႉၼွၼ်းၸွမ်းၵၼ် 2 သွင်ၵေႃႉလႄႈ ႁွင်ႉသႅၼ်ႇယွၼ်းတၢင်းၸွႆႈထႅမ်၊ ၵူၼ်းဝၢၼ်ႈၶဝ်ၵေႃႈမႃး ထိုင်တီႈႁိူၼ်း(ႁိူၼ်းၸမ်ႁူင်းႁဵၼ်း)သိုၵ်းမၢၼ်ႈ ၼၼ်ႉၵေႃႈ ၼႅတ်ႈသွင်ႉပၢႆႈပႅတ်ႈ- ၵူၼ်းၼႂ်းပိုၼ်ႉတီႈ ၵေႃႉၼိုင်ႈ လၢတ်ႈ။

ၵဵဝ်ႇၵပ်းလွင်ႈၼႆႉ ၵူၼ်းဝၢၼ်ႈၵေႃႈၵႂႃႇတၢင်ႇလၢတ်ႈတီႈ ၽူႈၵွၼ်းတပ်ႉၶဝ်၊ တူဝ်ၽူႈၵွၼ်းတပ်ႉလၢတ်ႈဝႃႈ- ၸိုဝ်ႈသိုၵ်း မၢၼ်ႈၵေႃႉဢၼ်သူမႃးတၢင်ႇလၢတ်ႈၼႆႉ ဢမ်ႇမီး- ဝႃႈၼႆ။

မိူဝ်ႈလဵဝ် သိုၵ်းမၢၼ်ႈၵေႃႉၼႆႉ ႁၢႆလၢႆဝႆႉ၊ ပၢႆႈတပ်ႉႁိုဝ်၊ ဢမ်ႇၼၼ် ထုၵ်ႇပူတ်းၶၢႆႉၵႂႃႇတၢင်ႇတီႈႁိုဝ် ဢမ်ႇႁူႉ၊ ၵူၼ်းဝၢၼ်ႈ ၶဝ်ၵေႃႈပႆႇၸၢင်ႈ ဢဝ်တၢင်းၽိတ်းမၼ်း- ၵူၼ်းၼႂ်းပိုၼ်ႉတီႈသိုပ်ႇလၢတ်ႈ။

တပ်ႉၶလယ 248 ၼႆႉ ပဵၼ်တပ်ႉမိူင်းၼၢႆး၊ ယူႇတႂ်ႈငဝ်ႈငုၼ်းၵုမ်းၵမ်ၽႅၼ်ၵၢၼ်သိုၵ်း (ၸၵၶ) 2 မိူင်းၼွင်။ မႃးပၵ်းတပ်ႉမႂ်ႇတီႈ ပၢင်ၸေႈ(လွႆယွႆး) ၸႄႈဝဵင်းၵေးသီး ၽွင်းသိုၵ်းမၢၼ်ႈ မႃးၽိူမ်ႉထႅမ်ႁႅင်းသိုၵ်း ပွတ်းတႃႈၽႃသွင်ႇ။