ၶၢဝ်ႇႁၢႆးငၢၼ်းဝႃႈ- ၸုမ်းၸၢဝ်းၶိူဝ်း ၶွမ်ႊမတီႊၵပ်းသၢၼ် ၵၢၼ်ၵိုတ်းယိုဝ်းပတ်းပိုၼ်ႉၸိုင်ႈမိူင်း (NCCT) တင်း လူင်ပွင် ၸိုင်ႈၸုမ်းၶိုင်ပွင်လွင်ႈငမ်းယဵၼ် ၸၼ်ႉၸိုင်ႈမိူင်းႁူမ်ႈတုမ် (UPWC) တေတႄႇၸတ်းႁဵတ်းပၢင်ၵုမ်ႁၢင်ႈႁႅၼ်း ပိူဝ်ႈတႃႇ ၵိုတ်းယိုဝ်း ပတ်းပိုၼ်ႉတင်းၸိုင်ႈမိူင်း ၼႂ်းဝၼ်းတီႈ 22-26/09/2014 ၼႆႉ။

ၵဵဝ်ႇၵပ်းလွင်ႈၼႆႉ ၾၢႆႇလူင်ပွင်ၸိုင်ႈ UPWC ၶႂ်ႈလႆႈၵၢၼ်ဢုပ်ႇဢူဝ်း 5 ၾၢႆႇ ဢၼ်မီး 1.သၽႃး၊ 2.လူင်ပွင်ၸိုင်ႈ၊ 3.တပ်ႉသိုၵ်း၊ 4.ပႃႇတီႇၵၢၼ်မိူင်း၊ 5.ၸုမ်းယိပ်းၵွင်ႈၵၢင်ႇၸၢဝ်းၶိူဝ်း။ ၵူၺ်းၵႃႈ ၸၢဝ်းၶိူဝ်းၶႂ်ႈလႆႈ ပၢင်ဢုပ်ႇဢူဝ်း 3 ၾၢႆႇ- 1.လူင်ပွင်ၸိုင်ႈ၊ 2.ပႃႇတီႇၵၢၼ်မိူင်း၊ 3.ၸုမ်းယိပ်းၵွင်ႈၵၢင်ႇၸၢဝ်းၶိူဝ်း ၸိူဝ်းၼႆႉ။ လွင်ႈဢၼ် တိုၵ်ႉမီးပၼ်ႁႃ ပႆႇတူၵ်းလူင်းၵၼ်လႆႈၸိူဝ်းၼႆႉ တေသိုပ်ႇဢုပ်ႇၵၼ်ထႅင်ႈ- ၼႆယဝ်ႉ။

ၼႂ်းဝူင်ႈဝၢင်ႈၸူဝ်ႈပႆႇလႆႈဢုပ်ႇဢူဝ်းၵၼ်ၼႆႉ တေၶတ်းၸႂ်ဢုပ်ႇၵၼ်ၵႂႃႇ လွင်ႈၸုမ်းယိပ်းၵွင်ႈၵၢင်ႇၸၢဝ်းၶိူဝ်း ၵဵဝ်ႇၵပ်း လွင်ႈပၵ်းတပ်ႉ၊ ပိုၼ်ႉတီႈၼႃႈလိၼ်တူင်ႉၼိုင်၊ လွင်ႈၵဵပ်းသိုၵ်းမႂ်ႇ၊ လွင်ႈၵဵပ်းၶွၼ်ႇ ဢၼ်ပႆႇလႆႈၸႂ်ၵၼ်ၸိူဝ်းၼႆႉ- ၼၢႆႁူင်သႃ ႁူဝ်ၼႃႈၸုမ်းၸၢဝ်းၶိူဝ်း NCCT လၢတ်ႈၼႄၽူႈသိုဝ်ႇၶၢဝ်ႇ ၼင်ႇၼႆ။

ၾၢႆႇ NCCT ၼႆႉ ပေႃးဝႃႈၵိုတ်းယိုဝ်းပတ်းပိုၼ်ႉတင်းၸိုင်ႈမိူင်းယဝ်ႉ ၶႂ်ႈႁႂ်ႈပႃႇတီႇၵၢၼ်မိူင်း၊ လူင်ပွင်ၸိုင်ႈလႄႈ ၸုမ်းယိပ်းၵွင်ႈၵၢင်ႇၶဝ် မႃးၶွတ်ႇၽွတ်ႈပဵၼ်မူႇၸုမ်းဢၼ်ၼိုင်ႈ ပိူဝ်ႈတႃႇဢုပ်ႇဢူဝ်းၵၢၼ်မိူင်းလႄႈ ႁူမ်ႈၵၼ်ၸတ်းႁဵတ်း ပၢင်ဢုပ်ႇဢူဝ်းၵၢၼ်မိူင်းၵႂႃႇ။