ၵူၼ်းတႃႈၶီႈလဵၵ်းၵေႃႉၼိုင်ႈ လၢတ်ႈဝႃႈ- ပေႃးၼႂ်းသိုဝ်ႇၶၢဝ်ႇ ဢၼ်ဢွၵ်ႇၵႂႃႇတႄႉ ၵူၼ်းမိူင်းဝဵင်းတႃႈၶီႈလဵၵ်း ထူပ်းၺႃး ၽေးၼမ်ႉထူမ်ႈၼႆႉ မီးၸဝ်ႈၼႃႈတီႈမၢၼ်ႈ ၾၢႆႇသိုၵ်း ၾၢႆႇပလိၵ်ႈၸိူဝ်းၼႆႉ ဢွၵ်ႇမႃးၸွႆႈထႅမ်ပၼ်၊ တီႈတႄႉမၼ်း ဢမ်ႇမႃးၸွႆႈထႅမ်ပၼ်သင်။ ၼမ်ႉထူမ်ႈၼႂ်းတႃႈၶီႈလဵၵ်း ၼႂ်းလိူၼ်သႅပ်ႊထႅမ်ႊၿိူဝ်ႊၼႆႉၵူၺ်း 2 ပွၵ်ႈယဝ်ႉ ဢၼ်တုမ်ႉ တိူဝ်ႉႁၢဝ်ႈႁႅင်း ပဵၼ်ဝၢၼ်ႈပုင်းထုၼ် တင်း တႃႈလေႃႉ။ ယွၼ်ႉပိူဝ်ႈၾၢႆႇၽွင်းငမ်းဢမ်ႇမႃးၸွႆႈသင်လႄႈ ၵူၼ်းမိူင်း ၼႂ်းပိုၼ်ႉတီႈ ၸိူဝ်းထူပ်းၽေးၼမ်ႉ တူၵ်းတၢင်းယၢပ်ႇၽိုတ်ႇ။ မိူၼ်ၼင်ႇ တီႈတႃႈလေႃႉၼႆႉ ပီႇတုၸိတ်ႉၶဝ်ၵေႃႈ မႃးၸွႆႈဢိတ်းဢွတ်းၵူၺ်း၊ ပေႃးၵူၼ်းမိူင်းၵႂႃႇယွၼ်းတၢင်းၸွႆႈထႅမ်သမ်ႉဝႃႈ ပျီႇတုၸိတ်ႉ ပဵၼ်ပႃႈတႂ်ႈတပ်ႉပိဝ်ႇႁႃႇ၊ ၵူၼ်းမိူင်းၶႂ်ႈၸႂ်ႉၸိူင်ႉႁိုဝ်ၸႂ်ႉဢမ်ႇလႆႈ- ဝႃႈၼႆ။

လွင်ႈၼႆႉ ၵူၼ်းမိူင်းၼႂ်းပွၵ်ႉၼႂ်းယွမ်ႇ ၵႂႃႇလဝ်ႈလၢတ်ႈထိုင်တီႈ ၾၢႆႇၽွင်းငမ်းၸႄႈမိူင်း၊ ႁႂ်ႈၸွႆႈလၢတ်ႈပၼ် ႁႂ်ႈပိဝ်ႇႁႃႇၶဝ် ပျီႇတုၸိတ်ႉၶဝ် မႃးၸွႆႈထႅမ်ပၼ်ၵူၼ်းမိူင်းၽွင်ႈ၊ ၵွပ်ႈၼမ်ႉထူမ်ႈလိူဝ်ႁႅင်း၊ ၶီႈၵူမ်ႇၶီႈပိူဝ်ႉ ၼမ်လပူၼ်ႉတီႈၸိူဝ်းၼႆႉၵေႃႈ ယၢမ်ႈၵႂႃႇလၢတ်ႈၼႄ။ ၵူၺ်းၵႃႈ ပိဝ်ႇႁႃႇ (ၽႅၼ်ၵၼ်လၢႆးတိုၵ်း) လိူဝ်သေဢမ်ႇပွႆႇမႃးယဝ်ႉ ပိဝ်ႇႁႃပၢႆဝႃႈ ပိဝ်ႇတုၸိတ်ႉ ၼႆႉ ပဵၼ်တႂ်ႈမိုဝ်းပိဝ်ႇႁႃႇ၊ ၾၢႆႇၽွင်းငမ်းၶဝ် ဢမ်ႇတၢပ်ႈမႃးလၢတ်ႈၸွမ်း- ဝႃႈၼႆ။

ၵပ်းၵၢႆႇလွင်ႈၼႆႉ ဢိင်ၼိူဝ်ၵူၼ်းမိူင်း လႆႈၵဵပ်းငိုၼ်းၵၼ်သႂ်ႇပၼ်ၵူႈလိူၼ်သေ ႁဵတ်းႁႂ်ႈၵူၼ်းမိူင်းဢမ်ႇႁၢၼ်ႉၸႂ်၊ ၵမ်ႈၽွင်ႈဝႃႈ ပေႃးငိုၼ်းသမ်ႉမႃးၵဵပ်းတီႈၵူၼ်းမိူင်းယူႇ၊ ပေႃးႁဝ်းၶႂ်ႈလႆႈတၢင်းၸွႆႈထႅမ်သမ်ႉ ဢမ်ႇမႃးၸွႆႈ၊ လူင်ပွင်ၸိုင်ႈ ဝႃႈ ၵူၼ်းမိူင်းပဵၼ်ပေႃႈပဵၼ်မႄႈ၊ ၵႂၢမ်းၶေႃႈၼႆႉ ပိဝ်ႇႁႃႇတႃႈၶီႈလဵၵ်း ဢမ်ႇယၢမ်ႈငိၼ်းႁႃႉ၊  ပေႃးသိုၵ်းသူထွမ်ႇၵႂၢမ်း ၵၼ်ယူႇၵေႃႈ သူင်ႇၵူၼ်းမႃးၸွႆႈထႅမ်ပၼ် ၵူၼ်းဝၢၼ်ႈၵူၼ်းမိူင်းၽွင်ႈ၊ ႁႂ်ႈႁၼ်ထိုင်ၵၢင်ၸႂ်ၵူၼ်းမိူင်းၽွင်ႈ- ဝႃႈၼႆ။

ပျီႇတုၸိတ်ႉၸိူဝ်းၼႆႉ လိူဝ်သေၶဝ်ဢမ်ႇမႃးၸွႆႈထႅမ်ပၼ်ၵူၼ်းမိူင်းယဝ်ႉ ယင်းဢဝ်လူတ်ႉၶိူင်ႈၶဝ်မႃး ႁဵတ်းလူတ်ႉႁပ်ႉ ၸၢင်ႈသ၊ မႃးပႂ်ႉႁပ်ႉၵူၼ်းၶႂ်ႈၶၢမ်ႈၼမ်ႉၶၢမ်ႈၵူမ်ႇၸိူဝ်းၼႆႉ၊ ပေႃးပိူၼ်ႈဢမ်ႇမီးလူတ်ႉ/ ၶၢမ်ႈယၢပ်ႇၼႆ ၵႂႃႇပႂ်ႉတေႃႉၵူၼ်း ၶၢမ်ႈၶီႈပိူဝ်ႉၶီႈၵူမ်ႇသေ ၵဵပ်းငိုၼ်းတီႈၵူၼ်းမိူင်းထႅင်ႈ- လွင်ႈၼႆႉ ႁဵတ်းႁႂ်ႈၵူၼ်းမိူင်း ဢမ်ႇႁၢၼ်ႉၸႂ်- ၼႂ်းပိုၼ်ႉတီႈၵေႃႉ ၼိုင်ႈ လၢတ်ႈၼင်ႇၼႆ။

လွင်ႈတၢင်းၼမ်ႉထူမ်ႈၼႆႉ ၵူၼ်းၼႂ်းပိုၼ်ႉတီႈၵမ်ႈၽွင်ႈဝႃႈ ၸၢင်ႈပဵၼ်ယွၼ်ႉပိူဝ်ႈလၢႆႇၼမ်ႉတၼ်၊ ၵွပ်ႈမီးၵူၼ်း မႃးႁဵတ်း ပႄးႁၢၼ်ႉသိုင်ႇ သုမ်ႉ သွင်း ၼိူဝ်ႁွင်ႈၼမ်ႉသေ ၶၢႆၶူဝ်းၶွင်ၼိူဝ်မၼ်း၊ ပေႃးဝႃႈယုၵ်းယၵ်း မႃးၶၢင်ႉၵေႃႈ ႁဵတ်းႁႂ်ႈ တပ်ႉတၢင်ၼမ်ႉလႆ၊ ၵွပ်ႈဢမ်ႇၸၢင်ႈၽဵဝ်ႈ ယွၼ်ႉပိူဝ်ႈမီးသုမ်ႉတၢင်းၶၢႆဝႆႉၼိူဝ်ပႄး၊ လွင်ႈၸိူဝ်းၼႆႉၵေႃႈ  ၶႂ်ႈႁႂ်ႈၾၢႆႇၽွင်း ငမ်း၊ ၾၢႆႇသိုၵ်းၶဝ် ၸွႆႈထႅမ်တူၺ်းလူလွမ်ပၼ် ၸတ်းၵၢၼ်ပၼ်ဢိတ်းၼိုင်ႈ- ၵူၼ်းမိူင်းတႃႈၶီႈလဵၵ်းၶဝ် တုၵ်းယွၼ်းၼင်ႇၼႆ။