ၵဵဝ်ႇၵပ်းလွင်ႈၼႆႉ ယိူင်းဢၢၼ်းပိူဝ်ႈတႃႇၶဵင်ႇတႃႉ / ႁႄႉၵင်ႈၽေး ယႃႈမဝ်းၵမ် ဢၼ်ၵူၼ်းၼုမ်ႇလႆႈထူပ်းပၼ်ႁႃယူႇ ဝၼ်းမိူဝ်ႈၼႆႉသေ ၸုမ်းၵူၼ်းၼုမ်ႇ ၼႂ်းဢိူင်ႇမိူင်းယေႃ ၸႄႈဝဵင်းလႃႈသဵဝ်ႈ တင်း ၸုမ်းၵူၼ်းၼုမ်ႇတႆး (Tai Youth Network- TYN) လႆႈၸတ်းႁဵတ်းပၢင်ဢုပ်ႇၵုမ် ၵႂႃႇမိူဝ်ႈဝၼ်းတီႈ 20/09/2014 တီႈ ဝတ်ႉ/ၵျွင်းမူၺ်ႇတေႃႇ ဝၢၼ်ႈၸၢၼ်း။

ၵူၼ်းၼုမ်ႇၸိူဝ်းမႃးၶဝ်ႈႁူမ်ႈပၢင်ႁူပ်ႉထူပ်းဢုပ်ႇဢူဝ်း မီးၵူၼ်းၼုမ်ႇၼႂ်းဢိူင်ႇမိူင်းယေႃ၊ ဢိူင်ႇမိူင်းယၢင်း၊ ဢိူင်ႇမိူင်းႁႅတ်ႈ၊ ဝၢၼ်ႈပၢင်ႇထူဝ်ႇလိၼ်၊ ဝၢၼ်ႈၵုၼ်ၽိဝ် ၸိူဝ်းၼႆႉ တင်းမူတ်းမွၵ်ႈ 450 ပၢႆ။ လႆႈၸႂ်ႁူမ်ႈၵၼ် ၶွတ်ႇၽွတ်ႈမူႇၸုမ်း ၵူၼ်းၼုမ်ႇ ပိူဝ်ႈတႃႇႁႄႉၵင်ႈၽေး ယႃႈမဝ်းၵမ်။

ၸၢႆးဝၼ်းလႅင်း ၸုမ်းၵူၼ်းၼုမ်ႇ (TYN) ၵေႃႉၵႂႃႇၸွႆႈၵၢၼ် တီႈပၢင်ႁူပ်ႉထူပ်းဢုပ်ႇၵုမ် လၢတ်ႈၼႄၸုမ်းၶၢဝ်ႇ ၽူႈတွႆႇႁွၵ်ႈဝႃႈ- တႃႇတေၵႄႈလိတ်ႈပၼ်ႁႃယႃႈမဝ်းၵမ် ဢၼ်ၵူၼ်းၼုမ်ႇၶဝ် လႆႈႁူပ်ႉထူပ်းမႃးယူႇၸိူဝ်းၼႆႉလႄႈသင်၊ တႃႇတေပူၵ်းပွင်/ယုၵ်ႉမုၼ်း ၼမ်ႉၵတ်ႉၵူၼ်းၼုမ်ႇၸိူဝ်းၼႆႉလႄႈသင်၊ ႁဝ်းၶႃႈလႆႈမႃးၶွတ်ႇၽွတ်ႈၸုမ်းၵူၼ်းၼုမ်ႇ တီႈမိူင်းယေႃၼႆႉ။ ႁဝ်းၶႃႈလႆႈၵဵပ်းၵၢင်ၸႂ်ဢဝ်သဵင်ဢၼ်ၵူၼ်းၼုမ်ႇၶဝ် ပၼ်တၢင်းႁၼ်ထိုင်မႃးၸိူဝ်းၼၼ်ႉ ၶွတ်ႇၽွတ်ႈ ၸုမ်းၵူၼ်းၼုမ်ႇမႃး၊ ၸုမ်းပွင်ၵၢၼ် မီးၵူၼ်းၼုမ်ႇ 27 ၵေႃႉ- ဝႃႈၼႆ။

ၸုမ်းၵေႃလိၵ်ႈလၢႆးလႄႈၾိင်ႈငႄႈတႆး ၼႂ်းပိုၼ်ႉတီႈ၊ ၸုမ်းဝူင်းမဵတ်ႉတႃႇလႄႈ ၸုမ်းမေႃသွၼ်လိၵ်ႈလၢႆးတႆး တီႈႁူင်း ႁဵၼ်းတႆး မိူင်းယေႃ ၸိူဝ်းၼႆႉႁူမ်ႈၵၼ်ၶွတ်ႇၽွတ်ႈၶွမ်ႊမတီႊသေလႆႈၸတ်းႁဵတ်းပၢင်ႁူပ်ႉထူပ်းၵူၼ်းၼုမ်ႇ ၼႂ်းမိူင်းယေႃ ပွၵ်ႈၼႆႉ။

ၸၢႆးဝၼ်းလႅင်း သိုပ်ႇလၢတ်ႈဝႃႈ- ဝၼ်းမိူဝ်ႈၼႆႉ ယႃႈမဝ်းၵမ်ၽႄႈလိူင်ႇၼမ်ပူၼ်ႉတီႈ၊ ၵူၼ်းၼုမ်ႇၼႂ်းဢိူင်ႇ မိူင်းယေႃၼႆႉ ၶဝ်လႆႈႁူပ်ႉထူပ်းပၼ်ႁႃ တူၵ်းပဵၼ်ယိူဝ်ႇ ယႃႈမဝ်းၵမ်တင်းၼမ်တင်းလၢႆ။ ထႅင်ႈၾၢႆႇၼိုင်ႈၵေႃႈ ယွၼ်ႉပိူဝ်ႈသဵၼ်ႈတႃႈ သၢႆတၢင်းၵပ်းသိုပ်ႇတိတ်းတေႃႇၵၼ်ၼႆႉ တိုၵ်ႉယၢပ်ႇလႄႈ ၾၢႆႇပၢႆးပၺ်ၺႃၵေႃႈလႆႈယူပ်ႈယွမ်း။ ၵဵဝ်ႇၵပ်းလွင်ႈၼပ်ႉယမ် ၵိူဝ်းလီ ၶွင်ၵူၼ်းဝၢၼ်ႈၵူၼ်းမိူင်း ၸွမ်းလၢႆးၾိင်ႈပၢၼ်ၵဝ်ႇ (ၵိူဝ်းလီၽီ လႄႈတၢင်ႇပိူင်) ၵေႃႈတိုၵ်ႉမီးယူႇ။ ထႅင်ႈပိူင်ၼိုင်ႈ ၵဵဝ်ႇၵပ်းပၢင်ပွႆးၸွမ်းၾိင်ႈထုင်းသႃသၼႃၵေႃႈ မီးၼမ်၊ ပေႃးဝႃႈမီးပၢင်ပွႆးၵေႃႈ မီးပၢင်တေႃႇလွင်းၼမ်မႃး၊ ၵၢၼ်ၸႂ်ႉတိုဝ်း ယႃႈမဝ်းၵမ်ၵေႃႈၼမ်မႃး။ ပိူဝ်ႈတႃႇ ၵႄႈလိတ်ႈပၼ်ႁႃၸိူဝ်းၼႆႉ ၵူၼ်းၼုမ်ႇထုၵ်ႇလီႁူပ်ႉထူပ်းၵၼ် ႁူမ်ႈမိုဝ်းၵၼ် ၵႄႈလိတ်ႈ၊ ပႃးၸဵမ်ပၢႆးပိူင်ၵူၼ်း ၸိူဝ်းၼႆႉ။ ယွၼ်ႉၼႆ ၸင်ႇလႆႈၶတ်းၸႂ်ၶွတ်ႇၽွတ်ႈ မူႇၸုမ် ၵူၼ်းၼုမ်ႇမႃး- ဝႃႈၼႆ။

ၵူၼ်းၼုမ်ႇပွတ်းမိူင်းယေႃ ၵေႃႉၼိုင်ႈလၢတ်ႈၼႄဝႃႈ-  တီႈၼႂ်းထုင်ႉႁဝ်းၶႃႈၼႆႉ ပၢင်ႁူပ်ႉထူပ်းၵူၼ်းၼုမ်ႇ ၼမ်ၼမ် ၸိူင်ႉၼႆ ဢမ်ႇယၢမ်ႈမီးမႃးသေပွၵ်ႈ။ တီႈႁဝ်းၶႃႈလႆႈမႃးၶဝ်ႈႁူမ်ႈပၢင်ႁူပ်ႉထူပ်းၼႆႉၵေႃႈ လႆႈဝႃႈၸူမ်းသိူဝ်းတႄႉတႄႉ။ ႁဝ်းၶႃႈယုမ်ႇယမ်ဝႃႈ ယူႇတီႈဢဵၼ်ႁႅင်းၵူၼ်းၼုမ်ႇၼႆႉသေ တေၵႄႈလိတ်ႈပၼ်ႁႃယႃႈမဝ်းၵမ်ၵႂႃႇလႆႈယူႇ၊ တေၸၢင်ႈ ႁူပ်ႉထူပ်းဢုပ်ႇၵုမ်ၵၼ်သေ ၵႄႈလိတ်ႈၵႂႃႇလႆႈယူႇ၊ ယုမ်ႇယမ်ဝႆႉၸိူင်ႉၼႆၶႃႈ- ဝႃႈၼႆ။