ဝၼ်းတီႈ 05/08/2014 (မိူဝ်ႈဝႃး) ယၢမ်းဝၢႆးဝၼ်း 3 မူင်းၶိုင်ႈ၊ ၽွင်းလူင်ၾၢႆႇမိူင်ႁႄႈလႄႈပႃႇမႆႉမိူင်းတႆး ၸၢႆးဢၢႆႈပဝ်း (ႁူဝ်ပဝ်ႈပႃႇတီႇသိူဝ်ၽိူၵ်ႇ SNDP) လႄႈ ၸဝ်ႈၼႃႈတီႈၾၢႆႇၽွင်းငမ်း ၵူႈႁွင်ႈၵၢၼ် ၼႂ်းၸႄႈတွၼ်ႈ တႃႈၶီႈလဵၵ်း၊ ၽွင်းတႅၼ်းၵမ်ႈၽွင်ႈ၊ ၶွမ်ႊပၼီႊၶုတ်းႁႄႈၶုတ်းၶမ်း တင်း ၵူၼ်းဝၢၼ်ႈၵူၼ်းသူၼ် ၼႃးႁႆးလူင် ႁူပ်ႉထူပ်းဢုပ်ႇဢူဝ်းၵၼ် တီႈႁွင်ႈလုမ်းၾၢႆႇၽွင်းငမ်း ဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇ။

တီႈပၢင်ႁူပ်ႉထူပ်းဢုပ်ႇဢူဝ်းၵၼ်ၼၼ်ႉ လုင်းၸၢႆးဢၢႆႈပဝ်း ၸီႉသင်ႇဝႃႈ- ၵၢၼ်ၶုတ်းႁႄႈၶုတ်းၶမ်းတင်းသဵင်ႈၼႆႉ ႁႂ်ႈၵိုတ်းယင်ႉ၊ ႁႂ်ႈမႄးပၼ်တီႈလိၼ်ၶိုၼ်းမိူၼ်ပၵ်းၵဝ်ႇပိူင်ၵဝ်ႇ၊ ႁႂ်ႈသၢႆႈတႅၼ်းပၼ် ၵႃႈတီႈလိၼ် ဢၼ်လႆႈလူႉ သုမ်းယွၼ်ႉမေႃႇႁႄႈမေႃႇၶမ်း တင်းသဵင်ႈ။

ဢိင်ၼိူဝ်လွင်ႈၼႆႉသေ ႁူဝ်ၼႃႈၸဝ်ႈႁႆႈၸဝ်ႈသူၼ် ဢၼ်လႆႈလူႉသုမ်းတီႈလိၼ် ဝၢၼ်ႈၼႃးႁႆးလူင် မေႃယႃ (သြႃႇမ) ၼၢင်းလႃႈ လၢတ်ႈဝႃႈ- တင်ႈတႄႇဝၼ်းတီႈ 06/08/2014 မိူဝ်ႈၼႆႉၵႂႃႇ တေႃႇထိုင်ဝၼ်းတီႈ 15 ၼႆႉ ႁႂ်ႈၾၢႆႇၵူတ်ႇထတ်းၶဝ် မႃးထတ်းပၼ်ပိုၼ်ႉတီႈၼႃႈလိၼ် တူင်ႈႁႆႈတူင်ႈၼႃး ဢၼ်လႆႈလူႉသုမ်းၸွမ်း မေႃႇႁႄႈမိူင်ၶမ်းၼႆႉ မွၵ်ႈၵႃႈႁိုဝ်၊ ဝၼ်းတီႈ 15 ၼႆႉ ႁႂ်ႈၶွမ်ႊပၼီႊၶဝ် ဝႆႉပဵၼ်ဝၼ်းလိုၼ်းသုတ်းသေ သၢႆႈတႅၼ်း ၵၼ်ၵႃႈတီႈလိၼ် တူင်ႈႁႆႈတူင်ႈၼႃး ဢၼ်လႆႈလူႉသုမ်းၵႂႃႇၸွမ်းမေႃႇၶမ်းၼၼ်ႉ 1 ဢေႇၵႃႉ 650,000 ။ တီႈဢၼ်ဢမ်ႇလူႉသုမ်း သမ်ႉဢမ်ႇၽုၵ်ႇသွမ်ႈလႆႈၸိူဝ်းၼၼ်ႉၵေႃႈ ႁႂ်ႈသၢႆႈတႅၼ်းပၼ် ၵိုင်ႇၵႃႈၵိုင်ႇႁူဝ်။ တီႈလိၼ်ဢၼ်လႆႈလူႉၵွႆၵႂႃႇၸိူဝ်းၼၼ်ႉၵေႃႈ ႁႂ်ႈၵိူင် (ထႆ) ပၼ်ၶိုၼ်း ႁႂ်ႈမိူၼ်ပၵ်းၵဝ်ႇပိူင်ၵဝ်ႇ- ဝႃႈၼႆ။

လိူဝ်ႈသေၼၼ်ႉ ၶွမ်ႊပၼီႊၶဝ် တေလႆႈႁဵတ်းပၼ်ၵူၼ်းဝၢၼ်ႈ 3 လွင်ႈ- 1.တေလႆႈၽဵဝ်ႈပႅတ်ႈ ၶီႈၾုၼ်ႇၶီႈငႂ်ႈ သၢႆး တီႈလိၼ် ဢၼ်ထူမ်တူင်ႈႁႆႈတူင်ႈၼႃး။ 2.ႁႂ်ႈသၢႆႈတႅၼ်းပၼ်ၵႃႈတီႈလိၼ် 1 ဢေႇၵႃႉ 660,000 ၵျၢတ်ႈ။ တီႈဢၼ်ဢမ်ႇၽုၵ်ႇသွမ်ႈလႆႈၸိူဝ်းၼၼ်ႉၵေႃႈ ႁႂ်ႈၽုၵ်ႇသွမ်ႈလႆႈၶိုၼ်း၊ ႁႂ်ႈမႄးပၼ်တီႈလိၼ် ႁႂ်ႈမိူၼ်ၶိုၼ်း ပၵ်းၵဝ်ႇပိူင်ၵဝ်ႇသေ သၢႆႈတႅၼ်းပၼ်ငိုၼ်း ၵႃႈလူႉသုမ်း။ 3.ၵၢၼ်ဢၼ်ၶုတ်းႁႄႈၶုတ်းၶမ်း ဝႆႉၸိူဝ်းၼၼ်ႉ ႁႂ်ႈၵိုတ်းၵမ်းလဵဝ်- ၼႆယဝ်ႉ။

တီႈပၢင်ဢုပ်ႇဢူဝ်းၼၼ်ႉ ၾၢႆႇၶွမ်ႊပၼီႊလွႆၶမ်းလူင် ၽူႈၸတ်းၵၢၼ် ဢူးတဵင်းၵူဝ်ႇဝိၼ်း လၢတ်ႈဝႃႈ- ယူႇတီႈၶွမ်ႊပၼီႊလွႆၶမ်းလူင်သေ မီးမိူင်ႁႄႈၶုတ်းၶမ်း 4 လွၵ်း၊ ၼႂ်း 4 လွၵ်းၼၼ်ႉ လႆႈသႂ်ႇ/သႂၢင်းပၼ်ၶမ်း ထိုင်တီႈလူင်ပွင်ၸိုင်ႈမိူင်းတႆး မီးယူႇ 4 ၸွႆႉပၢႆ 5 ၶၼ်။ ဢၼ်လႆႈပူၵ်းပွင်ပၼ်ၵူၼ်းဝၢၼ်ႈၵူၼ်းသူၼ်ၵေႃႈ ငိုၼ်းမၢၼ်ႈတင်းၼမ်သႅၼ်မၼ်း 13,000 ယဝ်ႉ၊ ၵွပ်ႈၼၼ် ၶွမ်ႊပၼီႊၶုတ်းၶမ်းၵေႃႈ ႁဵတ်းၽွၼ်းလီ ပၼ်တႃႇဝၢၼ်ႈမိူင်း- ဝႃႈၼႆ။

ၸိူင်ႉႁိုဝ်ၵေႃႈယဝ်ႉ လုင်းၸၢႆးဢၢႆႈပဝ်း ၵေႃႈဝႃႈ- လွင်ႈမိူင်ႁႄႈမိူင်ၶမ်းၼႆႉ တႄႇႁဵတ်းမႃးၸဵမ်မိူဝ်ႈပီ 2007 ၊ ႁဵတ်းႁႂ်ႈၵူၼ်းဝၢၼ်ႈၵူၼ်းမိူင်း တုၵ်ႉယၢၵ်ႈမႃးၸွမ်းလၢႆပီယဝ်ႉလႄႈ ၵိုင်ႇလီလႆႈၵိုတ်းယဝ်ႉ ၼႆသေၸီႉသင်ႇ ႁႂ်ႈၵိုတ်း၊ တေဢမ်ႇလႆႈသိုပ်ႇႁဵတ်းထႅင်ႈယဝ်ႉ- ဝႃႈၼႆ။

ၵူၼ်းဝၢၼ်ႈၵူၼ်းသူၼ်ၼႆႉ ပိူဝ်ႈတႃႇတေလႆႈၶိုၼ်းသုၼ်ႇလႆႈသုၼ်ႇပဵၼ် သူၼ်ႁႆႈသူၼ်ၼႃးၸဝ်ႈၵဝ်ႇၼၼ်ႉ မိူဝ်ႈၵၢင်လိူၼ်ၵျူႊလၢႆႊ (16/07/2014)ၼၼ်ႉ မေႃယႃၼၢင်းလႃႈ ၵေႃႉဢွၼ်ႁူဝ် ၶိုၼ်ႈထိုင်ဝဵင်းလူင် တူၼ်ႈတီးသေ ႁဵတ်းပၢင်သပ်းၸႅင်ႈၶၢဝ်ႇ၊ ၵႂႃႇႁွတ်ႈထိုင်ႁွင်ႈလုမ်း ၸၢႆးဢၢႆႈပဝ်းသေ တုၵ်းယွၼ်းမႃး သုၼ်ႇလႆႈ ၸိူဝ်းၼႆႉ၊ ၵွပ်ႈၼၼ် ၸၢႆးဢၢႆႈပဝ်းၵေႃႈ ၸင်ႇလႆႈမႃးႁူပ်ႉၵမ်းတီႈ 2 တီႈဝဵင်းတႃႈၶီႈလဵၵ်းသေ ၵႄႈလိတ်ႈပၼ်-ပၼ်ႁႃၸိူဝ်းၵူၼ်းဝၢၼ်ႈၼႃးႁႆးလူင် ႁူပ်ႉထူပ်းယူႇ။