ဝၢႆးသေႁူပ်ႉထူပ်းၵူၼ်းဝၢၼ်ႈၼႃးႁႆးလူင်လႄႈ ၾၢႆႇၶွမ်ႊပၼီႊမိူင်ႁႄႈ ၸိူဝ်းၶုတ်းၶမ်းယူႇၼႂ်းၵိင်ႇၸႄႈဝဵင်းတႃႈလိူဝ်ႇ ၸႄႈတွၼ်ႈတႃႈၶီႈလဵၵ်းသေ လႆႈၸီႉသင်ႇႁၢမ်ႈ သိုပ်ႇၶုတ်းမိူင်ၶမ်း တင်းသဵင်ႈ ၵႂႃႇမိူဝ်ႈၶမ်ႈဝၼ်းတီႈ 05/08/2014 ယဝ်ႉ ဝၼ်းတီႈ 06/08/2014 မိူဝ်ႈဝႃး မွၵ်ႈၽွင်းယၢမ်း 8.30 မူင်းၵၢင်ၼႂ် လႆႈဢွၼ်ဢဝ်ၸဝ်ႈၼႃႈတီႈ ၾၢႆႇၵဵဝ်ႇၶွင်ႈ လၢႆႁွင်ႈၵၢၼ် ၵႂႃႇတီႈၵိင်ႇၸႄႈဝဵင်းတႃႈလိူဝ်ႇ၊ ပိူဝ်ႈတႃႇၵူတ်ႇထတ်းတူၺ်း ပိုၼ်ႉတီႈဝၢၼ်ႈၼႃးႁႆးလူင် လႄႈႁိမ်းႁွမ်း ဢၼ်ထူပ်းတၢင်းယၢပ်ႇၽိုတ်ႇ ထုၵ်ႇၽေး ယွၼ်ႉၼမ်ႉမိုဝ်းၶွမ်ႊပၼီႊႁဵတ်းမိူင်ၶမ်း။

ၵူၺ်းၵႃႈ မိူဝ်ႈထိုင်ၵႂႃႇတီႈၼႂ်းၵိင်ႇၸႄႈဝဵင်းတႃႈလိူဝ်ယဝ်ႉ တေသိုပ်ႇၶဝ်ႈၵႂႃႇဝၢၼ်ႈၼႃးႁႆးလူင်ၼၼ်ႉ ၵွပ်ႈသဵၼ်ႈတၢင်း လူႉၵွႆၼမ်ပူၼ်ႉတီႈ၊ ႁူမ်ႈဝႃႈ ဢဝ်ရူတ်ႉ 4 ဝိလ်ႊၵႂႃႇၵေႃႈဢမ်ႇၶဝ်ႈလႆႈ လႄႈ လႆႈဢွၼ်ၵၼ်ၶိုၼ်းပွၵ်ႈထိုင် ၼႂ်းဝဵင်း တႃႈၶီႈလဵၵ်း မိူဝ်ႈၽွင်းယၢမ်းဝၢႆႇ 2.30 မူင်း။ ဢွၼ်တၢင်းပူၼ်ႉမႃး ၶွမ်ႊပၼီႊၸိူဝ်းၼႆႉဝႃႈ လႆႈႁဵတ်းတၢင်း/မႄးတၢင်း ပၼ်ယဝ်ႉဝႃႈၼႆ။ ပေႃးဢမ်ႇမႃးႁၼ်ၵပ်းတႃယင်းထၢင်ႇမိူၼ်သူပ်းမိူၼ်ၵႂၢမ်းၶဝ်ယူႇ။ ၽိူဝ်ႇမႃးႁၼ်တႄႉတႄႉ ဢမ်ႇပဵၼ်ၸိူင်ႉၼၼ်-  ၵူၼ်းၼႂ်းပိုၼ်ႉတီႈ တႃႈၶီႈလဵၵ်းၵေႃႉၼိုင်ႈ လၢတ်ႈၼႄၸုမ်းၶၢဝ်ႇၽူႈတွႆႇႁွၵ်ႈၼင်ႇၼႆ။

ၸိူင်ႉႁိုဝ်ၵေႃႈလီ ၵူၼ်းၼႂ်းပိုၼ်ႉတီႈ ယင်းသိုပ်ႇလၢတ်ႈဝႃႈ -ၽွင်းလူင်ၾၢႆႇမိူင်ႁႄႈလႄႈပႃႇမႆႉမိူင်းတႆး ၸၢႆးဢၢႆႈပဝ်း (ႁူဝ်ပဝ်ႈပႃႇတီႇသိူဝ်ၽိူၵ်ႇ SNDP) လႆႈၸီႉသင်ႇၶွမ်ႊပၼီႊၵူႈဢၼ် ႁၢမ်ႈသိုပ်ႇၶုတ်းမိူင်ၶမ်း ႁူမ်ႈတင်းရူတ်ႉမႅၵ်ႉၶရူဝ်ႊ၊ ရူတ်ႉထုၺ်ႇလိၼ်/ၶုတ်းလိၼ်ၵူႈသႅၼ်းၵေႃႈ ႁႂ်ႈဢဝ်ဢွၵ်ႇၼႂ်းပိုၼ်ႉတီႈသဵင်ႈသဵင်ႈ- ဝႃႈၼႆ။