ပူၼ်ႉမႃးမိူဝ်ႈဝၼ်းတီႈ 03/08/2014 ၼၼ်ႉ ၽူႈၵွၼ်းႁွင်ႈၵၢၼ်ၾၢႆႇႁူမ်ႇလူမ်ႈသိုၵ်း (ၸယၽ) မိူင်းသူႈ၊ ၸၼ်ႉၶုၼ်သိုၵ်း ၸိုဝ်ႈဢွင်ႇၸီႇဝူၺ်ႇ လႄႈတင်းလုၵ်ႈၼွင်ႉမၼ်း ဢွင်ႇမဵဝ်းၼၢႆႇ ႁွတ်ႈၽႅဝ်ၵႂႃႇတီႈဝၢၼ်ႈပၢင်ႇၸွႆး ဢၼ်တိတ်းၸပ်းမိူင်းသူႈ၊ တၢင်းဢွၵ်ႇၵႂႃႇၸူး ၵိင်ႇၸႄႈဝဵင်းမိူင်းၸၢင် (ၵႃလိ)။ ၵႂႃႇတီႈႁိူၼ်း လုင်းၵေႃးယၢင်း သေ လုင်းၵေႃးယၢင်းၵေႃႈ လဵင်ႉပၼ်ယႃႈမႃႉ ၽူႈၵွၼ်း ၸယၽ 2 မဵတ်ႉ၊ ပေႃးယဝ်ႉ တဵၵ်းၸႂ်ႉၵႂႃႇသိုဝ်ႉထႅင်ႈ၊ လုင်းၵေႃးယၢင်းလၢတ်ႈဝႃႈ ဢမ်ႇမီးငိုၼ်းယဝ်ႉ ဢမ်ႇၸၢင်ႈႁဵတ်းႁိုဝ်။ ၽူႈၵွၼ်း ၸယၽ သမ်ႉၸႂ်ႉသိုဝ်ႉပၼ် တိၵ်းတိၵ်းလႄႈ လႆႈထဵင်မေႃးၵၼ်၊ လုင်းၵေႃးယၢင်းၵေႃႈလၢၵ်ႈၽႃႉပၼ်ႁူဝ် ၽူႈၵွၼ်း ၸယၽ၊ ဝုၵ်းသၢႆႉဝုၵ်းၶႂႃ တိူဝ်ႉၵႂႃႇ 3 ႁွႆး၊ လႆႈယဵပ်ႉ 32 ၶဵမ်။ ၽူႈၵွၼ်း ၸယၽ တင်းလုၵ်ႈၼွင်ႉမၼ်းၵေႃႈ လၢၵ်ႈၵွင်ႈပွတ်း ယိုတ်းႁၢတ်ႇသႂ်ႇ လုင်းၵေႃးယၢင်း 3 ၵမ်း၊ လုင်းၵေႃးယၢင်းၵေႃႈ လႅၼ်ႈပၢႆႈပူၼ်ႉၵေႃႈ တိူဝ်ႉဝၢတ်ႇၸဵပ်းၽွင်ႈ- ၼႆယဝ်ႉ။

ၵဵဝ်ႇၵပ်းလွင်ႈၼႆႉ ၽူႈဢၼ်ႁူႉႁၼ်ၸွမ်းၵေႃႉၼိုင်ႈ လၢတ်ႈဝႃႈ- လုင်းၵေႃးယၢင်းလၢတ်ႈဝႃႈ- တီႈၶႃႈၼႆႉ  မီး 2 မဵတ်ႉၵူၺ်း၊ ပေႃးဝႃႈပူဝ်ႇလူင်ၶႂ်ႈၵိၼ်ထႅင်ႈၵေႃႈ ပၼ်ငိုၼ်းၶႃႈလႄႈ ၶႃႈတေၵႂႃႇသိုဝ်ႉပၼ်။ တႄႇၼၼ်ႉ ထဵင်မေႃးၵၼ်သေ ထုၵ်ႇလုင်းၵေႃးယၢင်း ဢဝ်ၽႃႉဝုၵ်းသႂ်ႇ။ ၵူၺ်းၵႃႈ တူဝ်လုင်းၵေႃးယၢင်း လႅၼ်ႈပၢႆႈပူၼ်ႉၵႂႃႇ၊ ၺႃးၵွင်ႈယိုဝ်း 3 ၵမ်းလႄႈ တိူဝ်ႉဝၢတ်ႇၸဵပ်း 3 ႁွႆး- ဝႃႈၼႆ။

ၽူႈၵွၼ်း ၸယၽ ဢွင်ႇၸီႇဝူၺ်ႇၼႆႉ ၵႂႃႇၶဝ်ႈႁူင်းယႃတီႈဝဵင်းမိူင်းသူႈသေ သိုပ်ႇသူင်ႇၵႂႃႇတီႈႁူင်းယႃသိုၵ်း တီႈၼမ်ႉၸၢင်ယဝ်ႉ- ဝႃႈၼႆ။

ၵူၼ်းၸမ်ၸႂ်တပ်ႉသိုၵ်းမၢၼ်ႈ ၵေႃႉၼိုင်ႈၵေႃႈလၢတ်ႈဝႃႈ- တူဝ်ပူဝ်ႇဢွင်ႇၸီႇဝူၺ်ႇ ၵေႃႈလၢတ်ႈဝႃႈ မၼ်းလႆႈၵိၼ်သူႇယႃႈမႃႉ 2 မဵတ်ႉတႄႉ၊ မၼ်းၵႂႃႇၽဵဝ်ႈယႃႈမႃႉလႄႈ လႆႈပဵၼ်ပၼ်ႁႃမႃးၸိူင်ႉၼႆ။ တေႃႇထိုင်တီႈႁူင်းယႃဝဵင်းမိူင်းသူႈၼႆႉ လၢတ်ႈၵႂၢမ်းလႆႈယူႇ၊ ၵူၺ်းၵႃႈမၼ်းၵႂင်ဝႆႉ၊ မၼ်းထုၵ်ႇၽၼ်းလႄႈ ႁိုဝ် ဢမ်ႇၼၼ် မၼ်းမဝ်းယႃႈမႃႉႁိုဝ်ၵေႃႈဢမ်ႇႁူႉ- ဝႃႈၼႆ။

ၵဵဝ်ႇၵပ်းလွင်ႈၼႆႉ ၽူႈၵွၼ်းငဝ်ႈငုၼ်းၵုမ်းၵၼ်ၽႅၼ်ၵၢၼ်သိုၵ်း (ၸၵၶ) 2 မိူင်းၼွင်ၵေႃႈ ၵႂႃႇႁွင်ႉဢဝ် ႁူဝ်ပဝ်ႈဝၢၼ်ႈ ပၢင်ႇၸွႆး လုင်းၸေႃးလူင်သေလၢတ်ႈဝႃႈ- ပေႃးဢမ်ႇတီႉပၼ်ၵူၼ်းဝၢၼ်ႈၵေႃႉၼႆႉလႆႈ တေတီႉဢဝ်ႁူဝ်ပဝ်ႈဝၢၼ်ႈ ပၢင်ႇၸွႆး  သႂ်ႇၶွၵ်ႈ၊ လိူဝ်ၼၼ်ႉ ၵူၼ်းၸိူဝ်းမီးပုၼ်ႈၽွၼ်းၼႂ်းဝၢၼ်ႈၼႂ်းသူၼ် တင်းသဵင်ႈ တေလႆႈၺႃးတူတ်ႈ(တၢမ်ႇ)ၶွၵ်ႈ- ဝႃႈၼႆ။

လုင်းၸေႃးလူင် လၢတ်ႈဝႃႈ-  မိူဝ်ႈဢၼ် ၸယၽ မႃးတီႈဝၢၼ်ႈသေ မႃးသၢင်ႈပၼ်ႁႃၼႆႉ မၼ်းဝႃႈတေတီႉ ၺွပ်းၵူၼ်းသူႇ/ၵိၼ်/ သမ်း ယႃႈမႃႉၼႆသေတႃႉ ဢမ်ႇႁွင်ႉတပ်ႉပလိၵ်ႈမႃး၊ ဢမ်ႇၸႅင်ႈၶၢဝ်ႇတီႈၽူႈမီး ပုၼ်ႈၽွၼ်းဝၢၼ်ႈဢိူင်ႇလႄႈ ၽိူဝ်ႇမီးပၼ်ႁႃမႃး သမ်ႉဝႃႈတေတီႉမတ်ႉၸိူင်ႉၼႆ ဢမ်ႇတူၵ်းထုၵ်ႇ- ဝႃႈၼႆ။

ၵူၺ်းၵႃႈ မိူဝ်ႈဝၼ်းတီႈ 04/08/2014 ၾၢႆႇသိုၵ်းမၢၼ်ႈ မႃးတီႉဢဝ်မေးလုင်းၵေႃးယၢင်း ပႃႈၼၢင်းသႅင်ၶမ်း ၵႂႃႇၵုမ်းၶင်သႂ်ႇၶွၵ်ႈဝႆႉတီႈတပ်ႉပလိၵ်ႈ ဝဵင်းမိူင်းသူႈ ႁၢၼ်ႉတေႃႇထိုင်မိူဝ်ႈလဵဝ် ပႆႇပွႆႇၶိုၼ်း၊ ႁႂ်ႈဢဝ်တူဝ်လုင်း ၵေႃးယၢင်း မႃးလႅၵ်ႈဢဝ် ၸင်ႇၵွႆႈပွႆႇပၼ်မေးမၼ်းၶိုၼ်း- ဝႃႈၼႆ။

လုင်းၵေႃးယၢင်းၼႆႉ ပဵၼ်ၵူၼ်းၽၵ်းၵႃႇဝၢၼ်ႈပၢင်ႇၸွႆး။ ပူဝ်ႇဢွင်ႇၸီႇဝူၺ်ႇၼႆႉ ပေႃးဢဝ်ၵူၼ်းဝၢၼ်ႈ ၵူၼ်းသူၼ်လႄႈ ၾၢႆႇတပ်ႉသိုၵ်းမၢၼ်ႈဝႃႈ မၼ်းၵႆႉၵႂႃႇတီႈႁိူၼ်းလုင်းၵေႃးယၢင်း၊ မၼ်းဢမ်ႇၸႂ်ႈၵႂႃႇတီႉၺွပ်း ၵူၼ်းၵိၼ်ယႃႈ၊ မၼ်းၵႂႃႇ ၵိၼ်ယႃႈတီႈၼၼ်ႈတႃႇသေႇ၊ လုင်းၵေႃးယၢင်းၵေႃႈ လႆႈႁႃပၼ်မၼ်းတႃႇသေႇ၊ ထိုင်မႃးၵမ်းၼႆႉ ၸင်ႇၵိူတ်ႇပဵၼ်ပၼ်ႁႃယႂ်ႇၶိုၼ်ႈၸိူင်ႉၼႆ။ ၵူၺ်းၵႃႈ မိူဝ်ႈလဵဝ် လုင်းၵေႃးယၢင်းၼႆႉ ပၢႆႈၵႂႃႇမီးတီႈလႂ်ဢမ်ႇႁူႉ- ဝႃႈၼႆ။