ၵူၼ်းဝၢၼ်ႈလူင်ၵဵင် ဢၼ်ယူႇၼႂ်းၸႄႈဝဵင်းမၢႆ 9 ၶွင် တပ်ႉသိုၵ်းၸိုင်ႈတႆး (SSPP/SSA) ၵိၼ်ၺႃး ယႃႈၶႃႈယိူဝ်ႈ/မူင်ႈမႅင်းသေ  လႆႈလူႉသဵင်ႈသၢႆၸႂ်ၵႂႃႇ ၸွမ်းတၢင်း ၽွင်းဢဝ်ၵႂႃႇႁူင်းယႃမိူင်းယႆ။

ပူၼ်ႉမႃးမိူဝ်ႈဝၼ်းတီႈ 29/07/2014 ယၢမ်းပွတ်းၼႂ်၊ ၸၢႆးၵျီႇ ဢႃႇယု 21 ပီ၊ ၵူၼ်းဝၢၼ်ႈလူင်ၵဵင် ဢိူင်ႇသႅင်ၵႅဝ်ႉ ၸႄႈဝဵင်းသီႇပေႃႉ၊ ၵႂႃႇသိတ်းယႃႈၶႃႈယိူဝ်ႈယႃႈၼႂ်းသူၼ်ႁႆႈ၊ ယွၼ်ႉယိူဝ်ႈယႃႈၼႂ်းႁႆႈၼမ်။ ၽွင်းသိတ်းယႃႈ ၶႃႈယိူဝ်ႈယူႇၼၼ်ႉ မုၼ်ႈသမ်ႉၶမ်ၼႂ်းလွတ်ႇသိတ်းယႃႈ၊ မၼ်းၵေႃႈဢူမ်တိုင်ႈ ဢူမ်တိုင်ႈသေ ဢဝ်ယႃႈၶႃႈယိူဝ်ႈ တူၵ်းၶေႃးၵႂႃႇ၊ ၵူၺ်းၵႃႈ ဝၼ်းၼၼ်ႉ သိုပ်ႇႁဵတ်းၵၢၼ်လႆႈတင်းဝၼ်းယူႇ။

ၽိူဝ်ႇၵၢင်ၶမ်ႈမႃး မိူဝ်းလိုဝ်ႈၼွၼ်းယဝ်ႉ ဢမ်ႇယူႇလီသေ ဢဝ်လူမ်းမႆႈၶိုၼ်ႈ၊ ပေႃႈမႄႈၵေႃႈ ၼွၵ်းယႃႈယႃတႆး တိုၵ်းလဵင်ႉပၼ်၊ ၵူၺ်းၵႃႈ ဢမ်ႇၶႅၼ်းဢမ်ႇႁၢႆ၊ လူမ်းၼၢဝ်မၼ်းၵေႃႈဢမ်ႇလူင်း။ မၼ်းၸၢႆးၵေႃႈ လၢတ်ႈၼႄမႄႈမၼ်း လွင်ႈဢၼ်ယႃႈၶႃႈယိူဝ်ႈ လႆႈလူင်းၶေႃးမၼ်းၵႂႃႇ ၽွင်းမၼ်းၵႂႃႇသိတ်းယႃႈၶႃႈယိူဝ်ႈၼၼ်ႉ- ဝႃႈၼႆ။

ထိုင်မႃးဝၼ်းတီႈ 30/07/2014 မွၵ်ႈၶၢဝ်းယၢမ်းတဵင်ႈဝၼ်း ပီႈၼွင်ႉတၢင်းႁိူၼ်း ဢဝ်မၼ်းၵႂႃႇႁူင်းယႃမိူင်းယႆ၊ ၵူၺ်းၵႃႈ ဢမ်ႇတၼ်းထိုင်မိူင်းယႆ၊ မၼ်းၸၢႆးၵႂႃႇလူႉသဵင်ႈတၢႆပႅတ်ႈ တီႈဝၢၼ်ႈလုၵ်းၶႆႉ ၾၢႆႇတူၵ်းမိူင်းယႆ 4 လၵ်း- ၼႆယဝ်ႉ။

ဝၢၼ်ႈလူင်ၵဵင်ၼႆႉ ယၢၼ်ၾၢႆႇၸဵင်ႇႁွင်ႇဝၼ်းဢွၵ်ႇ သႅင်ၵႅဝ်ႉ 4 လၵ်း။ ယႃႈၶႃႈယိူဝ်ႈၼႆႉ မႃးမိူင်းၶႄႇ၊ ပဵၼ်ထူင် ၼမ်ႉၼၵ်းၼိုင်ႈထူင်မွၵ်ႈ 75 ၵျၢပ်ႈ၊ လႆႈမႃးဢဝ်ၼွၵ်းလေႃးၼမ်ႉသေသိတ်း။ ၸၢႆးၵျီႇၼႆႉ ပီႈၼွင်ႉတၢင်းႁိူၼ်း ႁႅၼ်းသွမ်းပၼ်မၼ်းၵႂႃႇ မိူဝ်ႈဝၼ်းတီႈ 05/08/2014 - ၼႆယဝ်ႉ။

ယႃႈၶႃႈယိူဝ်ႈၼႆႉ ဢမ်ႇဝႃႈဢၼ်လုၵ်ႉမႃးမိူင်းထႆး မိူင်းၶႄႇ၊ မၼ်းပဵၼ်ၽေးဢၼ်ႇတရႄႇတေႃႇၵူၼ်းဝၢၼ်ႈ ၵူၼ်းမိူင်းၼင်ႇၵၼ်။ ၵွပ်ႈဝႃႈဢမ်ႇမီးၵူၼ်းမႃးပၼ်တၢင်းႁူႉတၢင်းႁၼ် ၵဵဝ်ႇၵပ်းလွင်ႈယႃႈၶႃႈယိူဝ်ႈလႄႈ ၵူၼ်းဝၢၼ်ႈၵူၼ်းမိူင်းႁဝ်းၼႆႉ ဢမ်ႇလႆႈႁူႉလွင်ႈ ၽွၼ်းလီၽွၼ်းၸႃႉမၼ်း- ၵူၼ်းပွတ်းမိူင်းယႆၵေႃႉၼိုင်ႈ လၢတ်ႈၼႄၼင်ႇၼႆ။

ၵဵဝ်ႇၵပ်းလွင်ႈယႃႈၶႃႈယိူဝ်ႈ/မူင်ႈမႅင်းၼႆႉ ၵူၼ်းဝၢၼ်ႈၶွပ်ႇဝဵင်းမိူင်းယေႃ ၸႄႈဝဵင်းလႃႈသဵဝ်ႈၵေႃႈ ယၢမ်ႈထူပ်း ၽေးမႃး။

ပိူင်ပဵၼ်မိူဝ်ႈၼၼ်ႉ ၽွင်းၼႂ်းၶၢဝ်းၾူၼ် ပီ 2012 ၊ ယွၼ်ႉၶွမ်ႊပၼီႊၶဝ်ႁဵတ်းသူၼ်တၢင်းႁူဝ်ၼမ်ႉ ႁိမ်းၾင်ႇၼမ်ႉသေ သိတ်းယႃႈၶႃႈယိူဝ်ႈ။ ၾူၼ်သမ်ႉတူၵ်းသေ ဢဝ်ၼမ်ႉၵွင်ႉယႃႈၶႃႈယိူဝ်ႈတူၵ်းလွင်ႈ လူင်းၵႂႃႇၸွမ်းၼမ်ႉ၊ ၵူၼ်းဝၢၼ်ႈတၢင်းတႂ်ႈႁူဝ်ၼမ်ႉသမ်ႉ တဵၵ်းၵိၼ်တဵၵ်းၸႂ်ႉၼမ်ႉၼၼ်ႉ၊ ႁဵတ်းႁႂ်ႈၵူၼ်းဝၢၼ်ႈ တင်းၼမ် ပဵၼ်တွင်ႉၵႃႇတွင်ႉႁႄႈၵၼ်သေ လႆႈၵႂႃႇၶိုၼ်ႈႁူင်းယႃ၊ ၸိူဝ်းဢမ်ႇတၼ်းယူတ်းယႃလႆႈၵေႃႈ လႆႈတၢႆၵၼ်တင်းၼမ်။ ပေႃးၶႂ်ႈမူၺ်ႉတင်းဝၢၼ်ႈ- ၵူၼ်းၼႂ်းပိုၼ်ႉတီႈလႄႈ မေႃယႃၼႂ်းပိုၼ်ႉတီႈလၢတ်ႈၼင်ႇၼႆ။

ပူၼ်ႉမႃးမိူဝ်ႈလၢႆပီၼႆႉၵေႃႈ မီးပီႈၼွင်ႉမိူင်းတႆးၵေႃႉၼိုင်ႈ ဢၼ်ၶဝ်ႈႁဵတ်းၵၢၼ်မိူင်းထႆး ႁဵတ်းသူၼ်ဢႃႇလူး တၢင်းမႄႈႁွင်ႈသွၼ်။ ၵႂႃႇသိတ်းယႃႈၶႃႈယိူဝ်ႈ  ပွၵ်ႈၶိုၼ်းယဝ်ႉသမ်ႉလိုမ်းသုၵ်ႈမိုဝ်းသေ ပၼ်ႈၶဝ်ႈၼဵဝ်ၵိၼ်၊ ၼၼ်ႉၵေႃႈတၢႆၼင်ႇၵဝ်ႇ- ပီႈၼွင်ႉတႆးၵေႃႉၼိုင်ႈ ဢၼ်ႁဵတ်းၵၢၼ်တၢင်းမႄႈႁွင်ႈသွၼ် ယၢမ်ႈလၢတ်ႈၼႄ ၼင်ႇၼႆ။