ဢိင်ၼိူဝ်ၸုမ်းၶၢဝ်ႇၽူႈတွႆႇႁွၵ်ႈ တိတ်းတေႃႇတွင်ႈထၢမ် ၸၢႆးႁိၼ်ပဝ်း (ၸၢႆးၶိတ်ႉငူၺ်ႇ) ၽူႈလဵၼ်ႈႁႅင်း ၾၢႆႇတူဝ်ၶိင်း လဝ်း ၵၢမ်ႈၼိူဝ်ႉမၢၵ်ႈ ၽူၵ်ႉယႂ်ႇလီသေ မၼ်းၸၢႆးသင်ႇလၢတ်ႈတိုၵ်းသူၼ်းဝႃႈ- ၶႃႈႁဝ်း ၶႂ်ႈႁႂ်ႈၵူၼ်းၼုမ်ႇတႆးႁဝ်း ယႃႇပေ ယူႇလွၵ်ႇယူႇလၢႆ၊ ပေႃးမီးၶၢဝ်းယၢမ်းၵေႃႈ ႁႂ်ႈၾိုၵ်းမႃႇၾိုၵ်းႁႅင်း။ ပိူင်ၼိုင်ႈၵေႃႈ တိုၵ်းသူၼ်းႁႂ်ႈလူတ်းယွမ်းလွင်ႈ ၵိၼ် လဝ်ႈမဝ်းယႃႈဝႆႉ။

မိူဝ်ႈလဵဝ် လိၵ်ႈလၢႆးတႆးႁဝ်းၵေႃႈ ၶိုၼ်ႈသင်ႉၶိုၼ်ႈသုင်မႃးလွႆးလွႆးယဝ်ႉ၊ ၶႂ်ႈႁႂ်ႈဢွၼ်ၵၼ်ၸႂ်ႉတိုဝ်းၼမ်ၼမ်၊ ႁႂ်ႈလိၵ်ႈတႆး ၸၼ်ႉသုင်သေ ဢၼ်ပဵၼ်ယူႇမိူဝ်ႈလဵဝ်- ၸၢႆးႁိၼ်ပဝ်း ယင်းတိုၵ်းသူၼ်း ႁႂ်ႈတႆးၸႂ်ႉလိၵ်ႈတႆးထႅင်ႈ။

မၼ်းၸၢႆး လၢတ်ႈၼႄတၢင်းႁၼ်ထိုင်သုၼ်ႇတူဝ်ဝႃႈ-  ၵူၼ်းၸၢႆးမၢဝ်ႇတႆးႁဝ်းၼႆႉ ၵမ်ႈၼမ်ၵိၼ်လဝ်ႈ မဝ်းယႃႈ၊ ၵႂႃႇတီႈ လႂ်ၵေႃႈပႃးလဝ်ႈ၊ ပေႃးဢမ်ႇပႃးလဝ်ႈ ဢမ်ႇမူၼ်ႈ ပၢင်ဢမ်ႇမူၼ်း၊ သူင်လွင်ႈတၢင်းၵျေႃႇ တၢင်းမူၼ်ႈ၊ ၼၼ်ႉပဵၼ်လွင်ႈ ယူပ်ႈယွမ်းႁႅင်း။ လဝ်ႈၼႆႉ ဝႄႈလႆႈၼမ်ၵႃႈႁိုဝ်ၵေႃႈလီၵႃႈၼၼ်ႉ၊ ဢမ်ႇၵိၼ်လႃးလႃးတႄႉ ဢမ်ႇဝႃႈၼင်ႇၵဝ်ႇ- ဝႃႈၼႆ။

ၸၢႆးႁိၼ်ပဝ်း (ၸၢႆးၶျိတ်ႉငူၺ်ႇ)ၼႆႉ ပဵၼ်ၵူၼ်းလဵၼ်ႈႁႅင်း ၾၢႆႇၵၢမ်ႈၼိူဝ်ႉမၢၵ်ႈ (ၵႃႇယပလ)၊ ယၢမ်ႈၶဝ်ႈ ၶႄႉၶဵင်ႇတီႈ ဝဵင်းလိူဝ်ႇသေ လႆႈတီႈၼိုင်ႈ 3 ပီထပ်းၵၼ်၊ မိူဝ်ႈလဵဝ် ႁၢင်ႈႁႅၼ်းဝႆႉတႃႇတေၵႂႃႇၶႅင်ႇတီႈ မိူင်းၶၢင်ထႅင်ႈ- ၼႆယဝ်ႉ။

မၼ်းၸၢႆးၼႆႉ ပေႃႈၸိုဝ်ႈ ၸၢႆးၶျိၼ်ႉပဝ်း၊ မႄႈၸိုဝ်ႈၼၢင်းဢေယိင်း၊ တီႈယူႇဝဵင်းမိူင်းၵုတ်ႈ၊ ပဵၼ်ၵူၼ်းၶိူဝ်း မိူင်းဝၼ်း ၶိူဝ်းႁိူၼ်းႁိၼ်၊ ၼပ်ႉထိုဝ်ၵိူဝ်းလီ ပုတ်ႉထသႃသၼႃ၊ ၶဝ်ႈပၢင်ၶႄႉၶဵင်ႇ 30 ပွၵ်ႈပၢႆ၊  ဢွင်ႇပေႉ လႆႈသူး (ရၢင်းဝလ်း) ၼႂ်း 1-3 ၵူႈပၢင်။ တၢင်တူဝ် ၸၼ်ႉၸႄႈမိူင်း ၸၼ်ႉတိူင်းသေ ၶဝ်ႈၶႄႉၶဵင်ႇ။ ၵႃႈပူၼ်ႉမႃး  တၢင်တူဝ်မိူင်းတႆးပွတ်းႁွင်ႇသေ ၶဝ်ႈၶႄႉၶဵင်ႇၸၼ်ႉတိူင်း လႆႈသူးတီႈ 3 ။

ၼွၵ်ႈၼိူဝ်သေ ပဵၼ်ၵူၼ်းလဵၼ်ႈႁႅင်း ၾၢႆႇၵၢမ်ႈၼိူဝ်ႉမၢၵ်ႈ၊ ပဵၼ်ၶူးသွၼ်ၾၢႆႇလဵၼ်ႈႁႅင်းယဝ်ႉ ၸၢႆးႁိၼ်ပဝ်းၼႆႉ ပေႃးၶၢဝ်းမႆႈ ႁူင်းႁဵၼ်းလူင်ပွင်ၸိုင်ႈဢိုတ်းႁပ်းမႃးၸိုင် ၵႃႈပူၼ်ႉမႃးၼႆႉ ႁပ်ႉပဵၼ်ၶူးသွၼ်လိၵ်ႈတႆး မႁႃႈတူဝ်ထႅင်ႈ။