ဝၼ်းတီႈ 26/08/2014 မိူဝ်ႈၼႆႉ ယၢမ်းၵၢင်ၼႂ် 9 မူင်း၊ ငဝ်ႈငုၼ်းၻီႊမူဝ်ႊၶရေႊၸီႊ ၸိူဝ်ႉၶိူဝ်းတႆး ႁိုဝ် ပႃႇတီႇႁူဝ်သိူဝ် (SNLD) ပိုတ်ႇလုမ်းတီႈ ဢိူင်ႇဝၢၼ်ႈၸၢမ် (မိူင်းမု) ၸႄႈဝဵင်းၼမ်ႉတူႈ ၸိုင်ႈတႆးပွတ်းႁွင်ႇ။ ႁူဝ်ပဝ်ႈၸဝ်ႈၶုၼ်ထုၼ်းဢူး လႄႈ ၽူႈၶဝ်ႈၵေႃငဝ်ႈငုၼ်း၊ ၽူႈၶဝ်ၵေႃၸႄႈဝဵင်း၊ ၽူႈမီးပုၼ်ႈၽွၼ်း ၼႂ်းပႃႇတီႇ၊ ၽူႈမီးပုၼ်ႈၽွၼ်းၵူႈႁွင်ႈၵၢၼ် ဢၼ်ယူႇတီႈဝဵင်းၼမ်ႉတူႈ ဢိၵ်ႇ ပႃႇတီႇၵၢၼ်မိူင်းလၢႆပႃႇတီႇ ၼႂ်းဝဵင်းၼမ်ႉတူႈ၊ ၽူႈၸိူဝ်းလႆႈႁွင်ႉဝွၵ်ႇၸိူၼ်းထိုင်ၶဝ်  ၶဝ်ႈႁူမ်ႈမွၵ်ႈႁိမ်းႁဵင်- ဝႃႈၼႆ။

ၵူၼ်းၵႂႃႇၶဝ်ႈႁူမ်ႈပၢင်ပိုတ်ႇလုမ်း ၵေႃႉၼိုင်ႈလၢတ်ႈဝႃႈ- ၸဝ်ႈၶုၼ်ထုၼ်းဢူးၼႆႉ ဢဝ်မႆႉသပေႇၽႅတ်း ၼမ်ႉမၢၵ်ႇႁၼ် (မၢၵ်ႇၶွၼ်)၊ ၵူၼ်းဝၢၼ်ႈၵူၼ်းမိူင်းဢဝ်ၵွင်ဢဝ်မွင်းမႃးႁႆႇႁပ်ႉတွၼ်ႈပၢင် ၸၼ်ပၢႆႉၽႃႈပိုတ်ႇလုမ်း၊ တေလႆႈဝႃႈ ၵူၼ်းၵိုၼ်းၶွၼ်ႈၼမ်တႄႉတႄႉ။ ယူႇတီႈပေႃႈမႄႈၵူၼ်းမိူင်းသေ လုင်းၸၢႆးလႅင်း မိူင်းယဵၼ် ၸႄႈဝဵင်းၼမ်ႉတူႈ ၵၢဝ်ႇလၢတ်ႈၶေႃႈၵႂၢမ်း- ဝႃႈၼႆ။

ဝၢႆးၼၼ်ႉ ၸဝ်ႈၶုၼ်ထုၼ်းဢူး ပိုတ်ႇလၢတ်ႈၶေႃႈၵႂၢမ်းဝႃႈ ပႃႇတီႇႁူဝ်သိူဝ်ၼႆႉ ဢမ်ႇၸႂ်ႈပႃႇတီႇႁဵတ်းၵၢၼ်ပၢႆးမၢၵ်ႈမီး၊ ဢမ်ႇၸႂ်ႈႁႃၼမ်ႉတွၼ်းၽွၼ်းလီတႃႇပႃႇတီႇ၊ ပိူဝ်ႈတႃႇသၢၼ်မိုဝ်းတၢင်ႇပႃႇတီႇ တၢင်ႇမူႇတၢင်ႇၸုမ်း သေ ပူၵ်းပွင်ဝၢၼ်ႈ မိူင်းႁႂ်ႈပေႃးၶိုၼ်ႈယႂ်ႇမႂ်ႇသုင်။ ၸွမ်းၼင်ႇၵၢင်ၸႂ်ပေႃႈမႄႈၵူၼ်းမိူင်းမီးၼၼ်ႉ တေႁူမ်ႈသၢၼ်မိုဝ်းတၢင်ႇမူႇတၢင်ႇၸုမ်းသေ ၵေႃႇသၢင်ႈလွင်ႈၽွမ်ႉႁူၼိႈလႄႈသိုပ်ႇႁဵတ်းသၢင်ႈၼႃႈၵၢၼ်တႃငၢၼ်းၸိူဝ်ႉၸၢတ်ႈဝၢၼ်ႈမိူင်း။ ၵဵဝ်ႇၵပ်းလွင်ႈၽွမ်ႉႁူမ်ႈ ၵေႃႈ ၸုမ်းၼိုင်ႈလႄႈၸုမ်းၼိုင်ႈ ၼင်ႇႁိုဝ်တေမီးလွင်ႈယုမ်ႇယမ်ၵၼ်ၼၼ်ႉ တိုၵ်ႉၶတ်းၸႂ်ႁဵတ်းသၢင်ႈၵႂႃႇယူႇ- ၵူၼ်းၵႂႃႇ ၶဝ်ႈႁူမ်ႈပၢင်ပွႆးလၢတ်ႈ။

ၵဵဝ်ႇၵပ်းလွင်ႈၼႆႉ ႁူဝ်ပဝ်ႈပႃႇတီႇႁူဝ်သိူဝ် ၸႄႈဝဵင်းၼမ်ႉတူႈ ၼၢင်းသူၺ်ႇၺုၼ်ႉ ၵေႃႈ ၵၢဝ်ႇလၢတ်ႈၶေႃႈၵႂၢမ်းဝႃႈ- ပႃႇတီႇႁူဝ်သိူဝ်ၼႆႉ တေႁဵတ်းၵႂႃႇၸွမ်းၼင်ႇ ၵၢင်ၸႂ်ပေႃႈမႄႈၵူၼ်းမိူင်း၊ တေထွမ်ႇသဵင်တၢင်းၶႂ်ႈလႆႈၶႂ်ပဵၼ် ပေႃႈမႄႈ ၵူၼ်းမိူင်း ဢိၵ်ႇတင်း ပေႃႈမႄႈၵူၼ်းမိူင်းၵေႃႈ မႃးဢုပ်ႇဢူဝ်းၵိူဝ်းၵုမ် ပႃႇတီႇႁူဝ်သိူဝ်လႆႈတႃႇသေႇ။ သင်ၸိူဝ်ႉဝႃႈ မီးပၼ်ႁႃ ၵႄႈလိတ်ႈၸၼ်ႉၸႄႈဝဵင်း ဢမ်ႇလႆႈၵေႃႈ တေၵႄႈၵႂႃႇပဵၼ်ၶၵ်ႉပဵၼ်တွၼ်ႈ ထိုင်ၸၼ်ႉတၢင်းၼိူဝ်၊ တေသၢၼ်မိုဝ်းႁူမ်ႈၵၼ်တင်း တၢင်ႇမူႇတၢင်ႇၸုမ်းသေ ႁဵတ်းသၢင်ႈၵႂႃႇ- ဝႃႈၼႆ။

ၽူႈၶဝ်ၵေႃငဝ်ႈငုၼ်း ပႃႇတီႇႁူဝ်သိူဝ် ၸၢႆးဢႅၵ်ႉၵ ၵေႃႈပိုတ်ႇလၢတ်ႈၶေႃႈၵႂၢမ်းဝႃႈ- မိူဝ်ႈလဵဝ် ဢၼ်ပိုတ်ႇလုမ်း ၼႂ်းမိူင်းတႆးၼႆႉ မီး 30 ပၢႆယဝ်ႉ၊ ၼႂ်းဝူင်ႈဝၢင်ႈၼႆႉ တေၶတ်းပိုတ်ႇလုမ်းၵႂႃႇ ႁႂ်ႈမီးတူဝ်ႈထိုင် 41 ၸႄႈဝဵင်း။ ၵၢၼ်မိူင်း ဢၼ်ဝႃႈၼႆႉ ဢမ်ႇၸႂ်ႈလွင်ႈလီၵူဝ်၊ မိူဝ်ႈလဵဝ် ဢမ်ႇၸႂ်ႈၵၢပ်ႈလီၵူဝ်ယဝ်ႉ။ ၵွပ်ႈၼၼ် ပေႃႈမႄႈၵူၼ်းမိူင်း ထုၵ်ႇလီ လႆႈမီးတၢင်းႁူႉတၢင်းႁၼ် ၵၢၼ်ဝၢၼ်ႈၵၢၼ်မိူင်းသေ တူင်ႉတိုၼ်ႇၼႂ်းၵၢၼ်ဝၢၼ်ႈၵၢၼ်မိူင်းယဝ်ႉ- ဝႃႈၼႆ။