ငဝ်းလၢႆးတီႈထုင်ႉတႃႈၽႃသွင်ႇ မိူဝ်ႈလဵဝ် တီႈဝၢၼ်ႈတႃႈၽႃသွင်ႇ (ၸၢၼ်း)ၼႆႉ သိုၵ်းမၢၼ်ႈတိုၵ်ႉဢဝ်တီႈယူႇ ႁိူၼ်းယေး ၵူၼ်းဝၢၼ်ႈ ႁဵတ်းၸိူင်ႉၼင်ႇတပ်ႉၶဝ်ဝႆႉ။ ၶုတ်းလုၵ်းထႅၼ်ႉလုၵ်းပဵမ်ႇ မၢင်တီႈလိုၵ်ႉပဵင်းဢိုၵ်း၊ မၢင်တီႈၶုတ်းႁွင်ႈ ယၢဝ်းယၢဝ်း ႁွပ်ႈသူၼ်လႅၼ်ဝၢၼ်ႈသေ ပၵ်းပႂ်ႉယူႇသဝ်းဝႆႉ၊ ဢမ်ႇပၼ်ၵူၼ်းဝၢၼ်ႈၶဝ်ႈဝၢၼ်ႈ။ မီးၵူၼ်းၵႂႃႇလူႇ ၵႂႃႇတၢၼ်းၵေႃႈ ဢမ်ႇပၼ်ၶဝ်ႈၼႂ်းဝၢၼ်ႈ/ လတ်းၽၢၼ်ႇဝၢၼ်ႈ၊ ၶူဝ်းႁိူၼ်းၵူၼ်းဝၢၼ်ႈ ဢၼ်ၸဝ်ႈၶွင်ပၢႆႈသေ ဢမ်ႇဢဝ် ၵႂႃႇလႆႈ မိူၼ်ၼင်ႇၽႃႇႁူမ်ႇၶူဝ်းၼွၼ်းၸိူဝ်းၼႆႉ သိုၵ်းမၢၼ်ႈဢဝ်သိူဝ်ႇၼွၼ်းႁူမ်ႇၼွၼ်း ႁဵတ်းမိူၼ်ၼင်ႇပဵၼ်ၶူဝ်းလဵင်း ၶဝ်၊ ႁိူၼ်းၵေႃႈ ယူႇမိူၼ်ႁိူၼ်းၶဝ်-ၼႆယဝ်ႉ။

ဝၢၼ်ႈတႃႈၽႃသွင်ႇ (ၸၢၼ်း) ၼႆႉ ယၢၼ်ၵၼ်တင်းတပ်ႉပၢင်သဝ်း တပ်ႉသိုၵ်းၸိုင်ႈတႆး (SSPP/SSA) တႃႈၽႃသွင်ႇ မွၵ်ႈ 80 ဝႃးၵူၺ်း၊ ၾၢႆႇသိုၵ်းမၢၼ်ႈၵေႃႈ ဢမ်ႇယိုဝ်းသိုၵ်းတႆး၊ ၾၢႆႇသိုၵ်းတႆးၵေႃႈဢမ်ႇယိုဝ်း သိုၵ်းမၢၼ်ႈ။ ၵူၺ်းၵႃႈ သိုၵ်းမၢၼ်ႈၼႆႉ ၶဝ်ယွၵ်ႇႁႂ်ႈသိုၵ်းတႆးယိုဝ်းၶဝ်တိၵ်းတိၵ်း၊ မိူၼ်ၸိူင်ႉၼင်ႇ ပေႃးသဵင်ၵွင်ႈတႅၵ်ႇမႃး ၶဝ်မီးၽႅၼ်ၵၢၼ် ၶႂ်ႈၽဝ်ဝၢၼ်ႈႁိုဝ်၊  ပေႃးဝႃႈၽဝ်ဝၢၼ်ႈၵေႃႈ ၶဝ်ၸၢင်ႈၼႄးဝႃႈပဵၼ် သိုၵ်းတႆးၽဝ်ႁိုဝ်- ၵူၼ်းၼႂ်းပိုၼ်ႉတီႈၵေႃႉၼိုင်ႈ လၢတ်ႈၼင်ႇၼႆ။

တီႈဝၢၼ်ႈတႃႈၽႃသွင်ႇ (ႁွင်ႇ) တႄႉ ပေႃးၵၢင်ဝၼ်း ၵူၼ်းဝၢၼ်ႈပွၵ်ႈမိူဝ်းတူၺ်းႁိူၼ်းယေး/ မူ/ ၵႆႇ /ဝူဝ်း ၵႂၢႆး လႆႈတေႃႇ ထိုင် 6 မူင်းၵၢင်ၶမ်ႈ၊ မီးလင်ႁိူၼ်းၵူၼ်းႁိမ်း 30 ။ ဝၢၼ်ႈတႃႈၽႃသွင်ႇၸၢၼ်း သမ်ႉမီးလင်ႁိူၼ်းၵူၼ်း 59 လင်၊ တင်းသွင်ဝၢၼ်ႈၼႆႉ မီးႁူဝ်ၵူၼ်းႁိမ်း 300 ။ တီႈဝၢၼ်ႈတႃႈၽႃသွင်ႇ (ႁွင်ႇ) လင် 6 မူင်းၵၢင်ၶမ်ႈ ဢမ်ႇလႆႈၶဝ်ႈဝၢၼ်ႈ။ တီႈဝၢၼ်ႈဝၢပ်ႈ လင် 6 မူင်းၵၢင်ၶမ်ႈ ဢမ်ႇလႆႈဢွၵ်ႇဝၢၼ်ႈ။

တီႈဝၢၼ်ႈဝၢပ်ႈ သိုၵ်းမၢၼ်ႈၵႂႃႇ ပၵ်းၼႂ်းႁူင်းႁဵၼ်း၊ တီႈဝတ်ႉမုၼ်ၸဝ်ႈ ၸိူဝ်းၼႆႉ၊ ပေႃးဝႃႈႁၼ်ၵူၼ်းပႅၵ်ႇၼႃႈ ၵႂႃႇမႃး တီႈဢေႇသုတ်းမၼ်း ႁွင်ႉဝႆႉဢမ်ႇယွမ်းမွၵ်ႈ 2-4 ၸူဝ်ႈမူင်း၊ မၢင်ၵေႃႉၵေႃႈမတ်ႉ၊ ပေႃးမီးၵူၼ်းဝၢၼ်ႈ ႁပ်ႉႁွင်းဝႃႈ ၼႆႉပဵၼ်ၵူၼ်းဝၢၼ်ႈႁဝ်း၊ ၼႆႉပဵၼ်ၵူၼ်းလုၵ်ႉတၢင်ႇတီႈမႃး ၸိူဝ်းၼႆႉၸင်ႇပွႆႇပၼ်၊ လွင်ႈၼႆႉ ႁဵတ်းႁႂ်ႈၵူၼ်းၵႂႃႇမႃး ႁဵတ်းႁႃ ၵိၼ်ၵၢၼ်ယၢပ်ႇ- ၼႆယဝ်ႉ။

မိူဝ်ႈလဵဝ် ထုင်ႉတႃႈၽႃသွင်ႇၼႆႉ သူၼ်ၶဝ်ႈၵၢပ်ႇ/ ထူဝ်ႇလိၼ်ၸိူဝ်းၼႆႉ ဢမ်ႇၸၢင်ႈဢဝ်။ ဢၼ်ၵူၼ်းဝၢၼ်ႈ လႆႈပုတ်းတိုၼ်းၶူဝ်းႁိူၵ်ႈၶူဝ်းသူၼ်ၵႂႃႇယၢမ်းလဵဝ် ၶဝ်ႈႁႆႈ ၶဝ်ႈၵၢပ်ႇ ထူဝ်ႇလိၼ် တင်းမူတ်းဢေႇၵႃႉမၼ်းမွၵ်ႈႁိမ်း 300 ၊ ထူဝ်ႇလိၼ်တႄႉၵႄႇယဝ်ႉ ဢမ်ႇၸၢင်ႈထူၺ်ႈယဝ်ႉ၊ ၶဝ်ႈၵၢပ်ႇတႄႉ ၶေးတေၸၢင်ႈလႆႈၽွင်ႈယူႇ။ ႁိုဝ်ႉၼႆႉ လႆႈမႃးယူႇ တီႈဝတ်ႉဝၢၼ်ႈဝၢပ်ႈသေ မီးပီႈၼွင်ႉမႃးၸွႆႈၵၼ်လႄႈ လႆႈဝႃႈၶဝ်ႈသၢၼ် ၼမ်ႉမီႇၼမ်ႉမၼ်း ၵုမ်ႇထူၼ်ႈယူႇ။ ၵူၺ်းၵႃႈ ၼႂ်းပီတေမႃးတႄႉ ၵွပ်ႈႁဝ်းဢမ်ႇလႆႈႁဵတ်းဝႆႉပီၼႆႉလႄႈ ဢွၼ်ၵၼ်မႆႈၸႂ်ဝႆႉတႃႇပီၼႃႈ- ၵူၼ်းၼႂ်းပိုၼ်ႉတီႈၵေႃႉၼိုင်ႈ လၢတ်ႈၼင်ႇၼႆ။

ဝၼ်းတီႈ 07/08/2014 (မိူဝ်ႈဝႃး) ပီႈၼွင်ႉၵူၼ်းမိူင်းတႆး တၢင်းတူၼ်ႈတီး ပႃးၸဵမ်ၸဝ်ႈတူၼ်ၶူး (ၸဝ်ႈသြႃႇ) ဝတ်ႉဝေႇလုဝၼ်ႇ ပၢင်လူင်၊ ၸဝ်ႈတူၼ်ၶူး (ၸဝ်ႈသြႃႇ) မိူင်းၵုတ်ႈ ၸိူဝ်းၼႆႉ ဢွၼ်ဢဝ်တၵ်ႉၵႃႇသတ်ႉထႃးသေ ၵႂႃႇႁူမ်ႈ ၸွႆႈထႅမ်ပၼ်ၶဝ်ႈၼမ်ႉတၢင်းၵိၼ် ၽႃႈႁူမ်ႇၶူဝ်းၼွၼ်း ပၼ်ၵူၼ်းပၢႆႈၽေးတီႈဝၢၼ်ႈဝၢပ်ႈ- ၼႆယဝ်ႉ။