သမႃးၶူမ်းပၢႆးပၺ်ၺႃလႄႈၾိင်ႈငႄႈတႆး တေႁပ်ႉ ၽူႈၶဝ်ႈၸုမ်းဢၼ်ယိပ်းဝႂ်ၵပ်းတူဝ် ၵူၼ်းၵိုၵ်းမိူင်း (ၸႃႇတိ) ၸိုင်ႈထႆး ဢိၵ်ႇတင်း တေၶိုၼ်းမႄးပိူင်ၶေႃႈတိုဝ်းၵမ် ႁႂ်ႈပေႃးၸၢင်ႈႁပ်ႉ လုၵ်ႈၸုမ်းယိပ်းဝႂ် သႅၼ်းဢၼ်တၢင်းၵၢၼ် (လူင်ပွင်ၸိုင်ႈ) ထႆး ဢွၵ်ႇပၼ် ၸိူင်ႉၼင်ႇ ဝႂ်ပိုၼ်ႉတီႈသုင်၊ ဝႂ်ၶဵဝ်ၶွပ်ႇလႅင်၊ ဝႂ်ႁူဝ်သုၼ်၊ ဝႂ်ပၢသ်းပွတ်ႇၵူၼ်းတၢင်ႇၻၢဝ်ႈ လၢႆလၢႆသႅၼ်း။

သမႃးၶူမ်းပၢႆးပၺ်ၺႃလႄႈၾိင်ႈငႄႈတႆး ႁဵတ်းပၢင်ၵုမ်ႁွပ်ႈၵၢင်ပီ

ဝၼ်းတီႈ 07/08/2014 ၼႆႉ သမႃးၶူမ်းပၢႆးပၺ်ၺႃလႄႈၾိင်ႈငႄႈတႆး လႆႈႁဵတ်းပၢင်ၵုမ်ႁွပ်ႈၵၢင်ပီသေႁၢႆးငၢၼ်း ၼႃႈၵၢၼ် တႃငၢၼ်း ဢၼ်လႆႈတူင်ႉၼိုင်ႁဵတ်းသၢင်ႈမႃးတင်းၵေႃလိၵ်ႈလၢႆးၾိင်ႈငႄႈတႆး ၵဵင်းမႆႇ ဢိၵ်ႇတင်း ၵၢၼ်ဢၼ် တၵ်းတေလႆႈႁဵတ်းသၢင်ႈၵႂႃႇမိူဝ်းၼႃႈ ၸိူင်ႉၼင်ႇ လွင်ႈၾိင်ႈငႄႈၵေႃႈလီ၊ ၵၢၼ်တူင်ႇဝူင်းၵူၼ်း ႁိုဝ် ၵၢၼ်လိၵ်ႈလၢႆးပၢႆး ပၺ်ၺႃၸိူဝ်းၼႆႉ လႆႈဢုပ်ႇၵၼ်ၵႂႃႇၵႂၢင်ႈၶႂၢင်။ လိူဝ်ၼၼ်ႉ ၸွမ်သိုၵ်းလူင်ပလိၵ်ႈ သူၼ်ထယႃး ၶမ်းမူင်းၶူလ်း လႆႈ လဝ်ႈတၢင်ႇၼႂ်းပၢင်ၵုမ် လူၺ်ႈလွင်ႈပၵ်းပိူင်ၶေႃႈတိုဝ်းၵမ်ႁဝ်းၵိတ်ႇၵဵပ်ႈပူၼ်ႉတီႈ၊ ၵွပ်ႈၼၼ် ၶႂ်ႈၶိုၼ်းယွၼ်းၵႄႈပၵ်းပိူင် ၶေႃႈတိုဝ်းၵမ်ထႅင်ႈမႂ်ႇ ပိူဝ်ႈတႃႇၵူၼ်းတႆးၵူႈၵေႃႉ ၸိူဝ်းယိပ်းဝႂ်ဢၼ် တၢင်းလူင်ပွင်ၸိုင်ႈ ဢွၵ်ႇပၼ်ပဵၼ်တၢင်းၵၢၼ် ၸိူင်ႉၼင်ႇ ဝႂ်ပိုၼ်ႉတီႈသုင်၊ ဝႂ်ၶဵဝ်ၶွပ်ႇလႅင်၊ ဝႂ်ႁူဝ်သုၼ်၊ ဝႂ်ပၢသ်းပွတ်ႇၵူၼ်းတၢင်ႇၻၢဝ်ႈ လၢႆလၢႆသႅၼ်းၸိူဝ်းၼႆႉ ၶဝ်ႈမႃးပဵၼ်လုၵ်ႈၸုမ်းသမႃးၶူမ်းလႆႈ - ဝႃႈၼႆ။