ပူၼ်ႉမႃးမိူဝ်ႈဝူင်ႈပူၼ်ႉ မေႃတႅမ်ႈႁၢင်ႈလူၼ်ႉ (ၵႃႊတုၼ်ႊ) ၸၢႆးႁၢၼ်လဵတ်း တင်းၵူၼ်းဝၢၼ်ႈၵူၼ်းမိူင်း ဝဵင်းပၢင်လူင် (ပွၵ်ႉ 4) ႁူမ်ႈၵၼ်ၵႂႃႇၸွႆႈထႅမ်ၵူၼ်းပၢႆႈၽေးသိုၵ်းၼပ်ႉႁူဝ်ပၢၵ်ႇ ၸိူဝ်းတိုၵ်ႉယူႇသဝ်းဝႆႉတီႈ ဝတ်ႉဝၢၼ်ႈဝၢပ်ႈ ၸႄႈဝဵင်း ၵေးသီး။ ၵႂႃႇၸွႆႈထႅမ်ပၼ် ၶဝ်ႈၼမ်ႉတၢင်းၵိၼ် ၽႃႈႁူမ်ႇၶူဝ်းၼွၼ်းၸိူဝ်းၼႆႉ။

ၵဵဝ်ႇၵပ်းလွင်ႈၼႆႉ ၸၢႆးႁၢၼ်လဵတ်း  ပိုတ်ႇလၢတ်ႈႄၼၸုမ်းၶၢဝ်ႇၽူႈတွႆႇႁွၵ်ႈဝႃႈ- ၽူႈမီးပုၼ်ႈၽွၼ်းပူၵ်းပွင် ၵူၼ်းမိူင်းၶဝ် ဢမ်ႇႁဵတ်းၼႃႈတီႈၶဝ်ႈလႄႈ ႁဵတ်းႁႂ်ႈၵူၼ်းဝၢၼ်ႈၵူၼ်းမိူင်း လႆႈပၢႆႈၽေးသိုၵ်းသိူဝ်။ ၵွပ်ႈၼၼ် ၵိုင်ႇလီဝႆႉၼၵ်းသေ ၵႄႈလိတ်ႈပၼ်ႁႃလွင်ႈၼႆႉ ၵူၼ်းမိူင်းၸင်ႇတေလႆႈယူႇၵတ်းယူႇယဵၼ် - ဝႃႈၼႆ။

တင်ႈတႄႇႁူဝ်လိူၼ်ၵျူၼ်ႊ (2014) မႃးတေႃႇထိုင်မိူဝ်ႈလဵဝ် ယွၼ်ႉသိုၵ်းမၢၼ်ႈၵႂႃႇၶဝ်ႈပၵ်း ၼႂ်းထုင်ႉတႃႈၽႃသွင်ႇ ပႆႇယွမ်းထွၼ်ဢွၵ်ႇႄလႈ ႁဵတ်းႁႂ်ႈၵူၼ်းဝၢၼ်ႈၵူၼ်းမိူင်းၼႂ်းထုင်ႉၼၼ်ႉ ႁူဝ်ၵူၼ်းမွၵ်ႈ 300 ႁူပ်ႉထူပ်းတၢင်းယၢပ်ႇၽိုတ်ႇ။

ၵပ်းၵၢႆႇလွင်ႈၼႆႉ ၵူၼ်းပၢႆႈၽေးမႄႈလုၵ်ႈဢွၼ်ႇ ၵေႃႉၼိုင်ႈလၢတ်ႈဝႃႈ- ႁဝ်းၶႃႈၼႆႉ ပဵၼ်ၵူၼ်းဝၢၼ်ႈ ၵူၼ်းသူၼ်ၵူၺ်း၊ ပေႃးဝႃႈ ႁၼ်သိုၵ်းမၢၼ်ႈၶဝ်ႈမႃးၼႂ်းဝၢၼ်ႈၼႂ်းသူၼ်ႁဝ်းၵေႃႈႁဝ်းပေႃးၵူဝႅယဝ်ႉ ၼႆႉသမ်ႉ ၶိုၼ်ႈမႃးၼိူဝ်ႁိူၼ်းၼိူဝ်ယေး ႁဝ်းသေ  ဢမ်ႇထွတ်ႇသွၵ်းတိၼ်ထႅင်ႈၵေႃႈ ၸႂ်ပေႃးသၼ်ႇၵႂႃႇသဵင်ႈယဝ်ႉ။ ၵွပ်ႈဝႃႈသိုၵ်းမၢၼ်ႈၶဝ်ၼႆႉ လိူဝ်သေ ၾၢင်ႁၢင်ႈၶဝ် ဢမ်ႇဢွၵ်ႇၾၢင်ႁၢင်ႈသိုၵ်း ဢၼ်ၵႅတ်ႇၶႄပၼ်ၵူၼ်းမိူင်း ႁိုဝ် ပဵၼ်သိုၵ်းလူင်ပွင်ၸိုင်ႈ ယင်းမိူၼ်ၾၢင်ႁၢင်ႈ ၵူၼ်းႁၢႆႉႄလႈၽႂ်ႁၼ်ၵေႃႈၵူဝ်ၶဝ်ယဝ်ႉ။ ၾၢႆႇၼိုင်ႈၵေႃႈ ပေႃးဝႃႈမႃးလိုဝ်ႈမႃးၼွၼ်းယဝ်ႉၵေႃႈ လွင်ႈပိုတ်းယိုဝ်းႁႅမ်ၵိၼ်ၵႆႇ ၵိၼ်မူၵူၼ်းူဝၢၼ်ႈၸိူဝ်းၼႆႉၵေႃႈ မီးမႃးၸွမ်းၵမ်းလဵဝ်။ ၶူဝ်းသူၼ်ၶူဝ်းႁိူၵ်ႈ မၢၵ်ႇၽိတ်ႉၽၵ်းယိူဝ်ႈၼၢင်းၶဵဝ်ၵူႈုသမ်ႇ သႅၼ်ပိူင် ၶႅၼ်းႁႃတီႈလၢတ်ႈဢမ်ႇမီးယဝ်ႉ၊ ၵွပ်ႈၼၼ် ၸိူဝ်းႁဝ်းပဵၼ်ၵူၼ်းဝၢၼ်ႈၵူၼ်းသူၼ် ၵူၼ်းမိူင်းၵူၼ်းၽၵ်းၵႃႇၼႆႉ ပေႃးဝႃႈလႆႈႁၼ်သိုၵ်းမၢၼ်ႈၼႆ ႁဝ်းၶႃႈၵူဝ်တႄႉၵူဝ်ဝႃႈၼၼ်ႉၶႃႈယဝ်ႉ၊ ၵွပ်ႈၼႆ ၸင်ႇလႆႈပၢႆႈမႃးယူႇတီႈၼႆႈ- ဝႃႈၼႆ။

ၵူၼ်းပၢႆႈၽေး ထႅင်ႈၵေႃႉၼိုင်ႈၵေႃႈလၢတ်ႈဝႃႈ- မႃးယူႇတီႈဝတ်ႉဝၢၼ်ႈဝၢပ်ႈၼႆႉ ဢမ်ႇလႆႈမႆႈၸႂ်ယဝ်ႉ၊ ၵူၺ်းၵႃႈပီၼႆႉ ၶၢဝ်းၼႆႉ ပဵၼ်ၶၢဝ်းၽုၵ်ႇသွမ်ႈ သမ်ႉဢမ်ႇလႆႈၽုၵ်ႇသွမ်ႈလႄႈ ပေႃးပီတေမႃး ႁဝ်းၶႃႈတေဢဝ်ဢီႈသင်ၵိၼ်ဢမ်ႇႁူႉ၊ တေႁဵတ်းႁိုဝ်ႁဵတ်းသူၼ်ႁႆႈၼႃးႁဝ်းၶႃႈၵေႃႈဢမ်ႇႁူႉယဝ်ႉ- ဝႃႈၼႆ။

ႁၢၼ်ႉတေႃႇထိုင်ယၢမ်းလဵဝ် တီႈတႃႈၽႃသွင်ႇၼႆႉ ဝၢၼ်ႈတႃႈၽႃသွင်ႇ (ၸၢၼ်း) သိုၵ်းမၢၼ်ႈတိုၵ်ႉဢဝ်ႁိူၼ်းယေး ၵူၼ်းဝၢၼ်ႈ ႁဵတ်းၸိူင်ႉၼင်ႇတပ်ႉၶဝ်ဝႆႉ။ ၶုတ်းလုၵ်းထႅၼ်ႉလုၵ်းပဵမ်ႇ မၢင်တီႈလိုၵ်ႉပဵင်းဢိုၵ်း၊ မၢင်တီႈၶုတ်းႁွင်ႈ ယၢဝ်းႁွပ်ႈသူၼ်လႅၼ်ဝၢၼ်ႈသေ ပၵ်းပႂ်ႉယူႇသဝ်းဝႆႉ၊ ဢမ်ႇပၼ်ၵူၼ်းဝၢၼ်ႈၶဝ်ႈဝၢၼ်ႈ။ ၶူဝ်းႁိူၼ်းၵူၼ်းဝၢၼ်ႈ ဢၼ်ၸဝ်ႈ ၶွင်ပၢႆႈႄလႈဢမ်ႇတၼ်းဢဝ်ၵႂႃႇလႆႈ မိူၼ်ၼင်ႇ ၽႃႇႁူမ်ႇၶူဝ်းၼွၼ်းၸိူဝ်းၼႆႉ သိုၵ်းမၢၼ်ႈဢဝ်သိူဝ်ႇဢဝ်ႁူမ်ႇၼွၼ်း ႁဵတ်းမိူၼ်ၼင်ႇပဵၼ်ၶူဝ်းၶဝ်၊ ႁိူၼ်းၵေႃႈ ယူႇမိူၼ်ႁိူၼ်းၶဝ်။

ဝၢၼ်ႈတႃႈၽႃသွင်ႇ (ၸၢၼ်း) မီးလင်ႁိူၼ်းၵူၼ်း 59 လင်၊ ယၢၼ်ၵၼ်တင်းတပ်ႉပၢင်သဝ်း တပ်ႉသိုၵ်းၸိုင်ႈတႆး (SSPP/SSA) တႃႈၽႃသွင်ႇ မွၵ်ႈ 80 ဝႃး။ ဝၢၼ်ႈတႃႈၽႃသွင်ႇ (ႁွင်ႇ)တႄႉ ပေႃးၵၢင်ဝၼ်း ၵူၼ်းဝၢၼ်ႈပွၵ်ႈမိူဝ်း တူၺ်းႁိူၼ်းယေး/ မူ/ ၵႆႇ /ဝူဝ်း ၵႂၢႆး လႆႈတေႃႇထိုင် 6 မူင်းၵၢင်ၶမ်ႈ၊ မီးလင်ႁိူၼ်းၵူၼ်းႁိမ်း 30 ။  (တင်းသွင်ဝၢၼ်ႈ မီးႁူဝ်ၵူၼ်းႁိမ်း 300) ။ တီႈဝၢၼ်ႈတႃႈၽႃသွင်ႇ (ႁွင်ႇ) လင် 6 မူင်းၵၢင်ၶမ်ႈ ဢမ်ႇလႆႈၶဝ်ႈဝၢၼ်ႈ။ တီႈဝၢၼ်ႈဝၢပ်ႈ လင် 6 မူင်းၵၢင်ၶမ်ႈ ဢမ်ႇလႆႈဢွၵ်ႇဝၢၼ်ႈ။