ၵၼ် 33

 ၽူႈႁူႉၸႂ်ပိူၼ်ႈ ပဵၼ်ၽူႈလၵ်းလႅမ်
    ၽူႈႁူႉၸႂ်တူဝ်ၵဝ်ႇ ပဵၼ်ၽူႈႁၼ်ၸႅင်ႈ။

 ၽူႈဢွင်ႇပေႉပိူၼ်ႈ ပဵၼ်ၽူႈမီးဢဵၼ်ႁႅင်း
    ၽူႈဢွင်ႇပေႉတူဝ်ၵဝ်ႇ ပဵၼ်ၽူႈၵႅၼ်ႇၶႅင်။

 ၽူႈႁူႉၸၵ်းပဵင်းပေႃး ပဵၼ်ၽူႈမင်ႈမီး (မၢၵ်ႈမီး)
    ၽူႈသိုပ်ႇၶိုၼ်ႈၼႃႈၵႂႃႇ ပဵၼ်ၽူႈမီးႁႅင်းၸႂ်။

 ဢွမ်ပႅင်းဝႆႉ တၢင်းလီတူဝ်ၵဝ်ႇ တေလႆႈယူႇႁိုင်
    တၢႆယဝ်ႉဢမ်ႇႁူင်ႈႁၢႆ တေဢႃႇယုယိုၼ်း။

ၶေႃႈမၢႆတွင်း
တၢႆယဝ်ႉဢမ်ႇႁူင်ႈႁၢႆ ပွင်ႇဝႃႈတၢႆယဝ်ႉ ယင်းမီးၽူႈၼပ်ႉထိုဝ်ယူႇ။

ၵၼ် 34

တဝ်ယိင်ႈယႂ်ႇ လိူၼ်ႈလႆၵႂႃႇၸွတ်ႇတူဝ်ႈ တင်းသၢႆႉလႄႈၶႂႃ။

 သၢႆၸႂ်ၵူႈသမ်ႇသႅၼ်ပိူင် ပိုင်ႈဢိင်မၼ်း
    ဢမ်ႇၸၢင်ႈၽၢတ်ႇယၢၼ်မၼ်း
    မၼ်းပွင်သၢင်ႈပၼ် ဢမ်ႇဢဝ်ၸိုဝ်ႈဢဝ်သဵင်
    မၼ်းလဵင်ႉလူၼုင်ႈႁူမ်ႇၵူႈသမ်ႇသိင်ႇ
    ဢမ်ႇယုၵ်ႉတူဝ်ၵဝ်ႇ ပဵၼ်ၸဝ်ႈၶွင်ၽႂ်။

 ဢမ်ႇတုၵ်းယွၼ်းႁႂ်ႈလႆႈသင်သင်
    ပေႃးၵိုင်ႇႁဵၵ်ႈဝႃႈ “ၵေႃႉလဵၵ်ႉ”
    ၵူႈသမ်ႇသႅၼ်ပိူင် ပွၵ်ႈဝၢႆႇၸူးမၼ်း
    ၵူၺ်းမၼ်းဢမ်ႇယွၼ်းပဵၼ်ၸဝ်ႈၼိူဝ်ၽႂ်။

 ၽူႈႁူႉလူင်ႉ ဢမ်ႇယုၵ်ႉတူဝ်ၵဝ်ႇပဵၼ်ယႂ်ႇ
    ၸင်ႇဝႃႈ ႁဵတ်းလႆႈၵၢၼ်ငၢၼ်း ဢၼ်ယိင်ႈယႂ်ႇ။

ၶေႃႈမၢႆတွင်း
ႁူဝ်ယိုတ်ႈ လိုၼ်းသုတ်းၼႆႉ ၵမ်ႈၽွင်ႈဢမ်ႇပိၼ်ႇဝႃႈ ၽူႈႁူႉလူင်ႉ (Sage) ၊
ၶဝ်ပိၼ်ႇဝႃႈ “တဝ်” ၵူၺ်း။ ၸင်ႇတႅမ်ႈဝႃႈ
“တဝ်ဢမ်ႇယုၵ်ႉတူဝ်ၵဝ်ႇပဵၼ်ယႂ်ႇ
ၸင်ႇဝႃႈႁဵတ်းလႆႈ ၵၢၼ်ငၢၼ်းဢၼ်ယိင်ႈယႂ်ႇ” ။

ၵၼ် 35

 တိုဝ်းၵမ် တဝ်ဢၼ်ယိင်ႈယႂ်ႇ
    ၵူၼ်းတင်းသဵင်ႈ တႂ်ႈၾႃႉတေမႃးၼွမ်း
    မႃးယဝ်ႉ ဢမ်ႇမီးၶဵၼ် ယူႇၵတ်းယဵၼ်သိူဝ်း။

 သဵင်ႁႆႇတိုင်ႈ လႄႈ တၢင်းၵိၼ် ၸၢင်ႈႁဵတ်းႁႂ်ႈၵူၼ်းၵႂႃႇပႆ
    ၵူၺ်းၵႃႈ သဵင်ၵႂၢမ်းတဝ် မၼ်းၵႅၼ်ႇၵိုတ်းသဝ်း ၸိုတ်ႇၸၢင်။

 တူၺ်း    ဢမ်ႇႁၼ်ႁၢင်ႈ
    ထွမ်ႇ        ဢမ်ႇငိၼ်းသဵင်
    ၸႂ်ႉ        ဢမ်ႇမီးတီႈမူတ်းသဵင်ႈ။

ၶေႃႈမၢႆတွင်း  
ႁူဝ်ယိုတ်ႈ (paragraph) ႁႅၵ်ႈ ၼႆႉ ၵမ်ႈၽွင်ႈပိၼ်ႇဝႃႈ
ၵမ်ဝႆႉၸၢင်ႉတူဝ်ယႂ်ႇ
ဢၼ်မီးငဝ်းယႂ်ႇ
လုမ်ႈၾႃႉၸၢင်ႈတူင်ႉ
တူင်ႉၵႂႃႇသိူဝ်းယဵၼ်
လူင်ႉလွတ်ႈၶႄႈ ႁၢမ်းၶဵၼ်” ။