သိုၵ်းမၢၼ်ႈသွၵ်ႈတဝ်ထိူၼ်ႇပဵၼ်ပၢင်တိုၵ်း ၵၼ်တင်း သိုၵ်းတႆး
သိုၵ်းမၢၼ်ႈသွၵ်ႈတဝ်ၼႂ်းထိူၼ်ႇ ၼႂ်းဢိူင်ႇ ဝၢၼ်ႈၽုၺ်းလႄႈ
လႆႈပဵၼ်ပၢင်တိုၵ်းၵၼ်တင်းသိုၵ်းတႆး၊ ၵူၼ်းဝၢၼ်ႈလႆႈပၢႆႈ
ယူႇတီႈဝတ်ႉဝၢၼ်ႈပိင်ႈ ပၢၵ်ႇပၢႆ။
 |
| တပ်ႉသိုၵ်းၸိုင်ႈတႆး (SSPP/SSA) |
ပူၼ်ႉမႃးမိူဝ်ႈဝၼ်းတီႈ 08/08/2014
သၢႆသိုၵ်းတပ်ႉသိုၵ်းမၢၼ်ႈ တပ်ႉၵွင် (ၶလယ) 287 ဢဵၼ်ႁႅင်း 83 ၵေႃႉ
လုၵ်ႉတၢင်းပၢင်ႇပူၵ်ႇ (လွႆယွႆး)သေ တဝ်ထိူၼ်ႇၵႂႃႇတၢင်းႁွင်ႇ ၽႃႇၺႃး
တပ်ႉသိုၵ်းၸိုင်ႈတႆး (SSPP/SSA) တပ်ႉၵွင် 641 တီႈပၢင်ႇၼွင်ၵႅင်၊
ၼႂ်းၵႄႈဝၢၼ်ႈၽုၺ်းလႄႈ ၶၢႆးငူဝ်ႉ၊ သွင်ၾၢႆႇလႆႈပဵၼ်ပၢင်တိုၵ်းၵၼ် တင်ႈတႄႇ
ယၢမ်း 15:00 တေႃႇထိုင် ယၢမ်း15:20 မူင်း၊ ၾၢႆႇသိုၵ်းမၢၼ်ႈဝၢတ်ႇၸဵပ်း 3
ၵေႃႉ။
ထိုင်မႃးယၢမ်း 18:00 မူင်း
တေႃႇထိုင်ယၢမ်း 18:40 မူင်း သၢႆသိုၵ်းတပ်ႉသိုၵ်းမၢၼ်ႈ တပ်ႉၶလယ 248
ယိုဝ်းတပ်ႉသိုၵ်း ၸိုင်ႈတႆး တီႈႁူဝ်ၼမ်ႉၶၢႆးႁၢတ်ႇယၢဝ်၊ ၾၢႆႇတူၵ်းတၢင်းလူင်၊
ၾၢႆႇၸၢၼ်းၶၢႆးငူဝ်ႉ၊ ႁၢၼ်ႉတေႃႇ ယၢမ်းလဵဝ် သိုၵ်းမၢၼ်ႈ
တိုၵ်ႉပၵ်းယူႇၼႂ်းပိုၼ်ႉတီႈ ဢၼ်ပဵၼ်ပၢင်တိုၵ်း။
ဝၢၼ်ႈၶၢႆးငူဝ်ႉၼႆႉ
ယူႇၼႂ်းဢိူင်ႇဝၢၼ်ႈၽုၺ်း ၸႄႈဝဵင်းၵေးသီး ၸိုင်ႈတႆးပွတ်းၸၢၼ်း။ ဢိင်ၼိူဝ်
သိုၵ်းမၢၼ်ႈ တင်းသိုၵ်း တႆး ပဵၼ်ပၢင်တိုၵ်းၵၼ်သေ ဝၢၼ်ႈၵူၼ်း 2 ဝၢၼ်ႈ
(ဝၢၼ်ႈၶၢႆးငူဝ်ႉတင်းဝၢၼ်ႈၼမ်ႉၵတ်း) လင်ႁိူၼ်းမီးမွၵ်ႈ 20-30 ၼင်ႇၵၼ်၊
ႁူဝ်ၵူၼ်းမွၵ်ႈ 100 ပၢႆ လႆႈပၢႆႈၽေးသိုၵ်း ၵႂႃႇယူႇသဝ်းပိုင်ႈဢိင်ဝႆႉ
တီႈဝတ်ႉဝၢၼ်ႈပိင်ႈ (ဝတ်ႉဝၢၼ်ႈၽုၺ်း)။ ၾၢႆႇၼိုင်ႈတၢင်းၼိုင်ႈ
ၽူႈၵွၼ်းတပ်ႉမၢၼ်ႈ တီႈတႃႈၽႃသွင်ႇၵေႃႈ လၢတ်ႈၵူၼ်းဝၢၼ်ႈ
ၸိူဝ်းတိုၵ်ႉၵိုတ်းယူႇၼႂ်းဝၢၼ်ႈ ႁႂ်ႈငိူင်ႉဢွၵ်ႇဝၢၼ်ႈတႃႈၽႃသွင်ႇ
တႃႇၶၢဝ်းတၢင်း 5 ဝၼ်း။
Tags: Military, News
