မိူဝ်ႈဝၼ်းတီႈ 20/08/2014 ၼႆႉ ၵေႃပွင်ပဵၼ်ပွႆးပီမႂ်ႇတႆးႁူမ်ႈသၢင်ႈ ဢၼ်ၶွတ်ႇၽွတ်ႈလူၺ်ႈ ၵေႃလိၵ်ႈလၢႆးလႄႈ ၾိင်ႈငႄႈတႆး(ငဝ်ႈငုၼ်း) ႁူမ်ႈတင်းၵေႃလိၵ်ႈလၢႆးလႄႈၾိင်ႈငႄႈတႆး ဝဵင်းလူင်တူၼ်ႈတီးၼၼ်ႉ လႆႈၸတ်းႁဵတ်း ပၢင်ၵုမ်ဢုပ်ႇဢူဝ်းတႃႇႁၢင်ႈႁႅၼ်းပၢင်ပွႆးပီမႂ်ႇတႆးႁူမ်ႈ သၢင်ႈၵမ်းထူၼ်ႈ (2) ပီတႆး 2109 (လၵ်းၼီႈလပ်းမူတ်ႉ- ပီပႄႉ) ၼႂ်းႁူင်းႁေႃးၵေႃလိၵ်ႈလၢႆး လႄႈၾိင်ႈတႆး ဝဵင်းလူင်တူၼ်ႈတီးလႄႈ ၵေႃလိၵ်ႈလၢႆးလႄႈၾိင်ႈငႄႈတႆး လၢႆလၢႆၸႄႈဝဵင်း၊ ၽူႈတၢင်တူဝ်မုၵ်ႉၸုမ်းလွႆတႆးလႅင်း၊ မုၵ်ႉၸုမ်းဝၢၼ်ႈႁႆး၊ ၸုမ်းပျီႇတူႉၸိတ်ႉသႅင်ၵႅဝ်ႉ၊ ၵႃႇလိ၊ မၢၵ်ႇၵႅင်း၊ ဢႅသ်းသၢမ်တူဝ်၊ မုၵ်ႉၸုမ်းၵူၼ်းၼုမ်ႇတင်းၽူႈႁူႉၼႃႈႁၼ်လင်လႄႈ ပေႃႈဝၢၼ်ႈမႄႈမိူင်း ၸိူဝ်းႁၵ်ႉ ၾိင်ႈငႄႈလိၵ်ႈလၢႆးတင်းလၢႆ မႃးၶဝ်ႈႁူမ်ႈပၼ်တၢင်းႁၼ်ထိုင်ၵၼ်မီး 112 ၵေႃႉ။

ပီမႂ်ႇတႆး ပီ 2109 ဢၼ်တေထိုင်မႃးၼႂ်းလိူၼ်ၼူဝ်ႊဝႅမ်ႊပိူဝ်းပီၶသ 2014 ၼႆႉတႆးလူင် တႆးမၢဝ်း ႁွင်ႉ ပီလပ်းမူတ်ႉ(ပီပႄႉ)၊ ပီႈၼွင်ႉတႆးတၢင်းဢွၵ်ႇၶူင်းၸိူင်ႉၼင်ႇတႆးၶိုၼ်၊ တႆးလိုဝ်ႉ၊ တႆးလႅမ်း၊ တႆးၼိူဝ်၊ တႆးလမ် (ၼႂ်းမိူင်းၵႅဝ်)၊ လၢဝ်းလႄႈထႆးႁွင်ႉပီလပ်းမဵတ်ႉ(ပီပႄႉ)၊ ၼႂ်းတီႈ ၼႆႈၼႆႉမူတ်ႉတၢင်းတူၵ်းလႄႈ မဵတ်ႉတၢင်းဢွၵ်ႇ ၶူင်း ပွင်ႇၵႂၢမ်းတႆးဝႃႈ- ပီပႄႉၼႆၼင်ႇၵၼ်၊ ၸႂ်ႉ ထွႆးၵႂၢမ်းၶေႃႈလႂ်ၵေႃႈလႆႈ။
ၼႂ်းပၢင်ၵုမ်ၼႆႉ ၸၢႆးထုၼ်းမျႃႉ ဝဵင်းလူင်တူၼ်ႈတီး ႁူဝ်ပဝ်ႈၵေႃပွင်ပဵၼ်ပွႆးပီမႂ်ႇတႆး ပဵၼ်ၽူႈၼင်ႈၸိုင်ႈပၢင်ၵုမ်၊ ၶူးသွၼ်ယိင်းၼၢင်းဢေးမီႇ ပဵၼ်ၽူႈၵႅဝ်ပၢင်သေ ၽူႈၼမ်းၼႂ်း ၸၢႆးၸေႃႇၸေႃႇလႄႈၵႅမ်ၽူႈၼမ်းၼႂ်း ၸၢႆးၶမ်း ၼုတ်း လႆႈပိၼ်ႇၵၼ်သပ်းလႅင်းၼႄၵေႃၽႄ၊ ၽူႈဢဝ်ပုၼ်ႈၽွၼ်းၵေႃၽႄ၊ လႄႈၼႃႈၵၢၼ်ပုၼ်ႈၽွၼ်းၵေႃၽႄ ၶဝ်ၵႂႃႇၵႂၢင်ႈၵႂၢင်ႈၶႂၢင်ၶႂၢင်၊ ဝၢႆးၼၼ်ႉ ပီႈၼွင်ႉၸိူဝ်းမႃးၶဝ်ႈႁူမ်ႈပၢင်ၵုမ်တင်းသဵင်ႈ ဢွၼ်ၵၼ်ထွၼ်ထႅမ်ၽိူမ်ႉ လႅၵ်ႈလၢႆႈ ၵူၼ်းလႄႈၼႃႈၵၢၼ်ၼႂ်းၵေႃၽႄႁႂ်ႈသၢင်ႇထုၵ်ႇတင်းၵူၼ်းလႄႈၼႃႈၵၢၼ်။

တႃႇႁၢင်ႈႁႅၼ်းပၢင်ပွႆးပီမႂ်ႇတႆးႁူမ်ႈသၢင်ႈ ၵမ်းထူၼ်ႈ (2) ၼႆႉလႆႈၶွတ်ႇၽွတ်ႈဝႆႉၵေႃၽႄ (35) ၸုမ်းၸိူင်ႉၼင်ႇ- (1)ၸုမ်းႁၢင်ႈႁႅၼ်းပိုတ်ႇ/ႁပ်းပၢင်ပွႆး၊ (2)ၸုမ်းၵုမ်းၵမ်ငိုၼ်းတွင်း၊ (3)ၸုမ်းၸႂ်ႉၸၢႆႇငိုၼ်းတွင်း၊ (4)ၸုမ်းႁႃႁွမ် ငိုၼ်းတွင်း၊ (5)ၸုမ်းဢဝ်ႁူမ်ႇလူမ်ႈပၢင်ပွႆး၊ (6)ၸုမ်းၾၢႆႇဝွၵ်ႇၸိူၼ်း/သိုဝ်ႇသၢၼ်လႄႈတႅမ်ႈမၢႆတွင်း (7)ၸုမ်းၾၢႆႇ ယူႇလီ၊ (8)ၸုမ်းႁပ်ႉတွၼ်ႈလႄႈတမ်းဝၢင်းတီယူႇ (ပုၼ်ႈတႃႇၶႅၵ်ႇတီႈၵႆ)၊ (9)ၸုမ်းႁပ်ႉတွၼ်ႈၶႅၵ်ႈၶိုၵ်ႉတွၼ်း (10)ၸုမ်းလဵၼ်ႈမူၼ်ႈတူၼ်ႈၸႂ်ၵဵဝ်ႇတင်းၾိင်ႈငႄႈ၊ (11)ၸုမ်းႁၢင်ႈႁႅၼ်းပၢင်သႅမ်ႊမီႊၼိူဝ်ႊလိၵ်ႈလၢႆးၾိင်ႈငႄႈ လႄႈပိုၼ်းၸၢဝ်းၶိူဝ်းတႆး၊ (12)ၸုမ်းႁၢင်ႈႁႅၼ်းပၢင်ၶႄႉၶႅင်ႇလိၵ်ႈလၢႆးလႄႈၶႄႉၶႅင်ႇၼမ်ႉၵႂၢမ်း၊ (13)ၸုမ်းႁၢင်ႈ ႁႅၼ်းပၢင်ၶႄႉၶႅင်ႇၼၢင်းလဝ်းတႆး၊(14)ၸုမ်းႁၢင်ႈႁႅၼ်းပၢင်ၶႄႉၶႅင်ႇလွင်ႈၶႅၵ်းမၢၵ်ႇမႆႉလႄႈမွၵ်ႇႁၢင်ႈလီ၊ (15)ၸုမ်း လဵင်ႉလူၶဝ်ႈၽၵ်းတၢင်းၵိၼ်၊ (16)ၸုမ်းမိုဝ်ႉၵႅင်ႁုင်တူမ်ႈ (17)ၸုမ်းတေႃႉသူင်ႇလူတ်ႉၵႃး (18)ၸုမ်းႁၢင်ႈႁႅၼ်း ပၢင်ၵႅဝ်ႈ၊ (19)ၸုမ်းႁၢင်ႈႁႅၼ်းၸတ်းထႅဝ် တႃႇႁႄႇတူၼ်ႈၶူဝ်းတၢၼ်း(ပတေႇသႃႇ) (20)ၸုမ်းႁၢင်ႈႁႅၼ်း တူၼ်ႈၶူဝ်းတၢၼ်း(ပတေႇသႃႇ)၊ (21)ၸုမ်းႁၢင်ႈႁႅင်းပၼ်သူးရၢင်းဝလ်း (22)ၸုမ်းၶႄႉၶႅင်ႈတၢင်းလဵၼ်ႈႁႅင်း ၵၢၼ်ၵီႊလႃး၊ (23)ၸုမ်းၼိမၼ်တၼသင်ၶၸဝ်ႈလႄႈလဵင်ႉတၢၼ်း(ၵၢပ်ႈ)ၶဝ်ႈသွမ်းလူႇတၢၼ်း၊ (24)ၸုမ်းႁၢင်ႈ ႁႅၼ်းပၼ်တီႈၶၢႆၶူဝ်းလႄႈ တီႈၵိုတ်းၸွတ်ႇရူတ်ႈ(ရထ) /ရူတ်ႉၶိူင်ႈ/ရူတ်ႉထိပ်ႇ၊ (25)ၸုမ်းႁၢင်ႈႁႅၼ်းႁပ်ႉပီမႂ်ႇ၊ (26)ၸုမ်းႁၢင်ႈႁႅၼ်းႁွင်ႈၼႄပိုၼ်း၊ (27)ၸုမ်းႁၢင်ႈႁႅၼ်းၾႆးလႅင်းႁိူဝ်ႈသွင်ႇ၊ (28)ၸုမ်းႁၢင်ႈႁႅၼ်းၶႄႉၶႅင်ႇ ၵွပ်ႉၾ်၊ (29)ၸုမ်းထတ်းသဵၼ်ႈသၢႆမၢႆငိုၼ်းတွင်း၊ (30)ၸုမ်းႁဵတ်းၵၢၼ်လိူမ်ႈလႆႇမူတ်းသႂ်၊ (31)ၸုမ်းႁဵတ်းၶၢႆၶူဝ်း ၾၢၵ်ႇတီႈမၢႆတွင်းပွႆး၊ (32)ၸုမ်းႁၢင်ႈႁႅၼ်းပွႆးၶႄႉၶႅင်ႇႁူင်းၾႆးဝိၼ်၊ (33)ၸုမ်းၶႄႉၶႅင်ႈလုၵ်ႈပွလ်း (34)ၸုမ်းႁၢင်ႈ ႁႅၼ်း ႁၢၼ်ႉၵႃႈဝႅၼ် (35)ၸုမ်းႁၢင်ႈႁႅၼ်းပၢင်ၶႄႉၶႅင်ႇတၢင်းၵႃႈ ၼူၵ်း/တူဝ်း- ၸိူင်ႉၼႆ။

ၶေႃႈမၵ်ႉမၼ်ႈပၢင်ၵုမ်ၵေႃပွင်ပဵၼ်ပွႆးပီမႂ်ႇ မီး (10) ၶေႃႈၸိူင်ႉၼႆ-  1)ၼႂ်းၽွင်းပွႆးပီမႂ်ႇ တေႁဵတ်းပၢင်ယုၵ်ႉယွင်ႈ ၸဝ်ႈၶူးမေႃတႆးၸွမ်း၊  2)ၵူၼ်းၸၢႆးတေၼုင်ႈၶူဝ်းသီၶွၼ်ႇလႄႈ ၶဵၼ်းႁူဝ်ၸွမ်းၵူႈၵေႃႉ 3)ၼၢင်းယိင်း(သင်ပဵၼ် လႆႈ)၊ ႁႂ်ႈၼုင်ႈၶူဝ်းသီလိူင်ၼႂ်းဝၼ်းတီႈ 21/11/2014 ၼုင်ႈၶူဝ်းသီၶဵဝ်ၼႂ်းဝၼ်းတီႈ 22/11/2014 လႄႈၼုင်ႈ ၶူဝ်းသီလႅင်ၼႂ်းဝၼ်း တီႈ 23/11/2014 ၊ ၶဵၼ်းႁူဝ်ၸွမ်းၵူႈဝၼ်းဝၼ်း(သင်ပဵၼ်လႆႈၶဵၼ်ႁူဝ်ႁႂ်ႈၶၢၼ်ႇသီလမ်) 4)ပၢင်ၶႄႉၶႅင်ႇလိၵ်ႈလၢႆး တေမီးပၢင်လၢတ်ႈၼႄပိုၼ်းဝဵင်းလႂ်ဝဵင်းၼၼ်ႉၸွမ်း၊ 5)တေၸိူၼ်းဝွၵ်ႇမေႃႁေႃးလိၵ်ႈ လူင်(ၸရေး)ၼႂ်းၸၢဝ်းၶိူဝ်းတႆး မႃးႁေႃးလိၵ်ႈလူင်လင်ႇၵႃႇၸွမ်းလမ်ႇသဵင်ပွတ်းလႂ်ပွတ်းၼၼ်ႉ၊ 6)ၵူႈၸႄႈဝဵင်း ႁႂ်ႈသူင်ႇၽူႈတၢင်တူဝ်မႃးႁူမ်ႈႁပ်ႉတွၼ်ႈပီမႂ်ႇတႆး တီႈဝဵင်းလူင်တူၼ်ႈတီး၊ 7)ၼႂ်းၵေႃၽူႈၼမ်းၼႃႈ ႁႂ်ႈမီးၸဝ်ႈ သင်ၶၸွမ်း၊ 8)တေၸႅၵ်ႇႁေႃႇၶဝ်ႈၽၵ်းမိူဝ်ႈဝၼ်းႁႄႇတူၼ်ႈၶူဝ်းတၢၼ်း(ပတေႇသႃႇ)သွင်တႃႇၶဝ်ႈ 9)တူၵ်းလူင်း တေယိမ်ႁၢၼ်ႉၵႃႈဝႅၼ်လႄႈၾႆးၾႃႉ တၢင်းပီႈၼွင်ႉဝဵင်းလၢင်းၶိူဝ်း၊ 10)လွင်ႈၸတ်ႈတႆး ႁႂ်ႈလုင်းဢွင်ႇတၢၼ်း ဢဝ်ပုၼ်ႈၽွၼ်းၵပ်းသိုပ်ႇ၊ 11)လွင်ႈတေႁပ်ႉတူင်းငိုၼ်းပီမႂ်ႇတီႈၵဵင်းတုင်မႃးဝဵင်းလူင်တူၼ်ႈတီးၼၼ်ႉ တေႁႃ မိုဝ်ႉဝၼ်းသေၶပ်းၶိုင်ႁဵတ်းသၢင်ႈၵႂႃႇ၊ 12)ဝႂ်တိုတ်ႉတႃႇႁပ်ႉငိုၼ်းၵမ်ႉၸွႆႈထႅမ်ပွႆးပီမႂ်ႇၼၼ်ႉ တေၶပ်းၶိုင်သူင်ႇ ပၼ်ၵူႈၸႄႈဝဵင်းဝႆးဝႆး။