မိူဝ်ႈၼႆႉၵၢင်ၼႂ် 9:09 မူင်း ႁူဝ်ပဝ်ႈပႃႇတီႇႁူဝ်သိူဝ် ၸဝ်ႈၶုၼ်ထုၼ်းဢူး တင်း ႁူဝ်ပဝ်ႈ သၽႃးမိူင်းတႆး ၸၢႆးလူင်းသႅင် ၵႅတ်းမႆႇလၢႆ ပိုတ်ႇပၢင်ပွႆး ႁပ်ႉတွၼ်ႈပီမႂ်ႇတႆး 2107 ၼီႈ တီႈဝဵင်းၵဵင်းတုင် ၸိုင်ႈတႆး ပွတ်းဢွၵ်ႇၶူင်း။

"ၵူၼ်းၶဝ်ႈႁူမ်ႈၼမ်ၼႃႇၶႃႈ။ ပီႈၼွင်ႉတႆး ၶႅၵ်ႇတီႈၸမ်တီႈၵႆ ၶဝ်ႈႁူမ်ႈ ၼပ်ႉႁူဝ်ႁဵင်ဢေႃႈ။ ၶႃႈထၢင်ႇ ဢမ်ႇယွမ်းမိုၼ်ႇ။ ၽူႈၵွၼ်းတိူင်း သိုၵ်းမၢၼ်ႈၵေႃႈ ႁၼ်မႃး။ သိုၵ်းတင်း ပလိၵ်ႈၵေႃႈၸွမ်းမႃးႁူဝ်သိပ်း တႃႇဢဝ်ႁူမ်ႇလူမ်ႈ" ၵေႃပွင်ပဵၼ်ပၢင်ပွႆးၵေႃႉၼိုင်ႈလၢတ်ႈ။

ၻီႊသႅမ်ႊၿိူဝ် 12 ဝၼ်း ၵၢင်ၼႂ် 9:09 မူင်း တႄႇပိုတ်ႇပၢင်ပွႆး၊ ၽူႈယႂ်ၵူၼ်းလူင်တႆးၸိူဝ်းၶဝ်ႈႁူမ်ႈ ပၢင်ပွႆး ၶူးသွၼ်လူင် ၸၢႆးဢွင်ႇထုၼ်း၊ ၸၢႆးသၢင်ႇဢၢႆႈ၊  ၼၢင်းႁွမ်လဵၵ်း၊ ဢိၵ်ႇ ႁူဝ်ပဝ်ႈပႃႇတီႇႁူဝ်သိူဝ် ၸဝ်ႈၶုၼ်ထုၼ်းဢူး၊ ၵႅမ်ႁူဝ်ပဝ်ႈၸုမ်းမိူင်းလႃး ၸဝ်ႈၶုၼ်သၢင်ႇလူႇ၊ ႁူဝ်ပဝ်ႈသၽႃးမိူင်းတႆး ၸၢႆးလူင်းသႅင်၊ ႁူဝ်ၼႃႈၾၢႆႇသၢင်ႈလွင်ႈငမ်းယဵၼ် RCSS/SSA ၸဝ်ႈပွင်ၶိူဝ်း၊ ႁူဝ်ၼႃႈ ပီႇတုၸိတ်ႉ  သႅင်ၵႅဝ်ႉ ၸဝ်ႈၵၢႆႇၾႃႉ၊ ၸဝ်ႈၼႃႈတီႈၾၢႆႇလူင်ပွင်ၸိုင်ႈမၢၼ်ႈတႄႉ ၽူႈၵွၼ်းတိူင်းသိုၵ်းၵဵင်းတုင် ၸွမ်ႁၢၼ်တၢၼ်းထုၼ်းဢူး မွၵ်ႇလၢတ်ႈၶေႃႈ ၵႂၢမ်း ၵမ်ႉၸွႆႈငိုၼ်းၵွင်ၵၢင်ပၢင်ပွႆး ၼိုင်ႈလၢၼ်ႉပျႃး (သိပ်းသႅၼ်ၵျၢတ်ႉ)။

"ၵေႃပွင်ပဵၼ်ပၢင်ပွႆး တမ်းဝၢင်းႁႂ်ႈလၢတ်ႈၵႂၢမ်း ၼိုင်ႈၵေႃႉ မွၵ်ႈ 10 ၼႃႊထီႊၵူၺ်း၊ ၽူႈၵွၼ်းတိူင်း သိုၵ်းၵဵင်းတုင် လၢတ်ႈၵႂႃႇၶိုင်ႈၸူဝ်ႈ မူင်းပၢႆ၊ လွင်ႈဝႃႈဝၢၼ်ႈမိူင်းလႅၵ်ႈလၢႆႈ ႁႂ်ႈဢွၼ်ၵၼ်ပႅင်းမႅပ်ႇ ၾိင်ႈႁိတ်ႈႁွႆး၊ မိူင်းႁူမ်ႈတုမ်မၢၼ်ႈၵေႃႈမီးလၢႆ ၸၢဝ်းၶိူဝ်း --- လၢတ်ႈ ၵႂၢမ်းတႆးပႃး မႂ်သုင်ၶႃႈ တင်း ယိၼ်းၸူမ်းၶႃႈ ၼႆပႃးလႄႈ ၵူၼ်းၶဝ်ႈပွႆး တၢင်းလၢႆတူပ်းမိုဝ်းသူင်ႇသဵင်ႁႅင်းတႄႉ" - ၼႆ ၽူႈၶဝ်ႈႁူမ်ႈ ပၢင်ပွႆး ၸၢႆးသႅင်လၢတ်ႈ။

ပၢင်ပွႆးပီမႂ်ႇတႆး တီႈၵဵင်းတုင် ဝၼ်းမိူဝ်ႈၼႆႉ ၵၢင်ၼႂ် ပိူတ်ႇပၢင်ပွႆး တီႈ ပၢင်ႇလဵၼ်ႈႁႅင်း ႁိမ်းၸၼ်ႉ ၸွမ်ၵဵင်းတုင်( ၾၢႆႇတူၵ်းဝဵင်း - တၢင်းၵႂႃႇဝဵင်းတူၼ်ႈတီး)၊ ယၢမ်းဝၢႆးဝၼ်း မွၵ်ႈ ၼိုင်ႈမူင်းသမ်ႉ ႁဵတ်းပၢင်းပွႆး ဢုပ်ႇလၢတ်ႈလွင်ႈၸၢဝ်းၶိူဝ်းတီႈဝတ်ႉမိူင်းပဵင်း၊ ၶူးၸၢႆးဢွင်ႇထုၼ်း၊ Dr.ၸၢႆးသၢင်ႇဢၢႆႈ၊ ၶူးမႁႃမုင်ႉမိူင်းၸေႊ၊ Dr.ၸၢႆးသၢင်ႇၽေႇ ဢိၵ်ႇလၢႆၵေႃႉ --- ဢုပ်ႇလၢတ်ႈလွင်ႈပဵၼ်မႃးပိုၼ်း မိူင်းၵဵင်းတုင်၊ ၸၢဝ်းၶိူဝ်း လႄႈ လွင်ႈယူႇသဝ်းၵိၼ်သၢင်ႈ ၸၢဝ်းမိူင်းၵဵင်းတုင်။

ဝၼ်းထိ 13-14 တႄႉ ၽူႈလူင်ႉလႅၼ်ႈ 19 ၸဝ်ႈ တေဢုပ်ႇလၢတ်ႈၶူၼ်ႉၶႆႈ ပိုၼ်းတႆး ၶိူဝ်းတႆး တီႈႁူင်း ႁေႃ ဝတ်ႉထၼထမ်း တႆးလိုဝ်ႉ ႁိမ်းၼွင်ၶမ်း (တၢင်းၵႂႃႇၶူင်ႁိူဝ်းဝိၼ်) ဝဵင်းၵဵင်းတုင်။ တီႈဝတ်ႉႁူဝ် ၶူင်ႇ ႁိမ်းပၢင်ၶူင်ႇၵႂၢႆးၸူမ်း ၵၢင်ဝဵင်းၵဵင်းတုင်ၵေႃႈ တေမီးပၢင်ၵဵဝ်ႇ ၵပ်း သႃသၼႃၸဵမ်ၸိူဝ်းၼႆႉ။