လိူၼ်သိပ်းသွင်လပ်းသုတ်းသဵင်ႈ ဝၼ်းထိ 13 ယၢင်ႈၶဝ်ႈ 14 မိူဝ်ႈၽုၵ်ႈၼႆႉယၢင်ႈၸူး လိူၼ်ၸဵင်ႇမႂ်ႇ ဝၼ်းၼိုင်ႈ ပီတႆး 2107 ၼီႈ။ လၢၵ်ႇလၢၵ်ႇလၢႆးလၢႆး ၶၢဝ်ႇထီးဝီးထႆးၵမ်ႈၼမ် ပိုၼ်ၽၢဝ်ႇဝႃႈ လၢဝ်တေ ယွတ်ႇ လၢဝ်တေႁူင်ႈၶမ်ႈၼႆႉ တင်းၶိုၼ်းတေႃႇမိူင်းလႅင်း။ ၼိုင်ႈၸူဝ်ႈမူင်းတေတူၵ်း ယွတ်ႈထိုင်လႆႈ မွၵ်ႈ 120 လူင်။ ၵၢမ်ႇၸႃတႃ လီႁၢႆႉမိူင်းတႆး သမ်ႉမီးသင်။ တေတုမ်ႉယွၼ်ႈၸိူင်ႉႁိုဝ်ၼႆၼၼ်ႉ လႆႈတွင်ႈ ထၢမ်ၶူး (သြႃႇ) မိူင်းလီဝႆႉၼင်ႇၼႆဢေႃႈ။

ထၢမ်။ ။ ဝၼ်းႁပ်ႉတွၼ်ႈပီမႂ်ႇတႆးႁဝ်းၶႃႈၶမ်ႈၼႆႉ ငိၼ်းဝႃႈၾူၼ်လၢဝ်တေတူၵ်းၼႆ တေပဵၼ်ၽွၼ်း လီၽွၼ်းၸႃႉတီႈ ၵူၼ်းတႆး ဝၢၼ်ႈမိူင်းတႆးၼႂ်းပီတႆး 2107 ၼီႈၼႆႉၸိူင်ႉႁိုဝ်ၶႃႈ။

တွပ်ႇ။ ။ ပေႃးဢဝ်ပေႇတၢင်ႇဝႃႈတႄႉ တေလီတႃႇတႆး။ ၽၼမ်ႇၼႆႉပွင်ႇဝႃႈ တေမၢၵ်ႈမီးလီပဵၼ် ၶိုၼ်ႈယႂ်ႇမႂ်ႇသုင် ၵူၼ်းမိူင်း တႆးတေယူႇလီၵိၼ်ဝၢၼ်ၵတ်းယဵၼ်၊ ၵၢၼ်ၽုၵ်ႇသွမ်ႈပၢႆးမၢၵ်ႈမီးတေလီ ၶူဝ်းၶွင်ၼိူဝ်လိၼ်တႂ်ႈလိၼ် တေတိူဝ်းတွၼ်း။

ထၢမ်။ ။ ပီၼၵ်ႉၵႃးသုတ်းသဵင်ႈသေ သမ်ႉတေၶၢႆႉၸူးပီငူးၼၼ်ႉ တင်းၸိုဝ်ႈမိူင်းတႆး ၸိူဝ်ႉၶိူဝ်းတႆး သေ တေၶူပ်းငၢမ်ႇၽွၼ်း လီၽွၼ်းၸႃႉၸိူင်ႉႁိုဝ်ၶႃႈ။

တွပ်ႇ။ ။ ပီငူးၼႆႉ ပွင်ႇဝႃႈလီတႄႉတႄႉ ၼၢမ်ႇဝၼ်းၸၼ် (တၼၢင်းလႃႇ) ပဵၼ်ၼၢမ်ႇတႆးႁဝ်း။ ဢထုၼ်း ပွင်ႇဝႃႈ ဢွင်ႇမၢၼ်ႇ ပဵင်းဢူၵ်းပဵင်းၸႂ်လီၵူႈမဵဝ်း။ ၼၢမ်ႇတႆး တထၼ (တႆးထူဝ်ႇၼဝ်ႈ) ။ ၵူၺ်းၵႃႈၽွၼ်းႁၢႆႉသမ်ႉ ဢၼ် တီႈဢမ်ႇ ယၢမ်ႈမီး ဢမ်ႇယၢမ်ႈပဵၼ်ၼၼ်ႉ တေမီးလိူင်ႇ ၼမ်ႉၵေႃႈ တေထူမ်ႈၼမ်၊ တေမီးၽေးသၽႃႇဝၼမ်။ ၼၢမ်ႇသွၵ်ႈၵျႃႇ ပဵၼ်လွင်ႈတူၼ်ႈမႆႉ ထိူၼ်ႇပႃႇ ရူပမရၼ ပေႃးၸိူင်ႉၼၼ် ၼႂ်းမိူင်းတႆး တေၸၢင်ႈမီးၽေး သၽႃႇဝၼမ်မႃးတႄႉတႄႉ။ ပေႃးၶႂ်ႈပၼ်သတိၵူၼ်း မိူင်းတႄႉ ႁႂ်ႈယႃႇ ၽၼ်းတူၼ်ႈမႆႉယႂ်ႇမႆႉလူင်၊ ပေႃးၽၼ်းၼႆ ၽေးသၽႃႇဝ ၸိူဝ်းဢမ်ႇထၢင်ႇ ဢမ်ႇယၢမ်ႈပဵၼ်ၵေႃႈ တေမီးမႃး။ တူၼ်ႈမႆႉယႂ်ႇ ၸၢင်ႈလူမ်ႉသႂ်ႇႁိူၼ်း၊ လွႆၵူၼ်ႇၵွႆ၊ လိၼ်ယူတ်ႇ လိၼ်ပင်း ၸၢင်ႈတုမ်ႉတိူဝ်ႉ မူႇဝၢၼ်ႈၸိူဝ်းၼႆႉ။ ၽေးသိုၵ်းသိူဝ်တႄႉတေဢမ်ႇၵႃႈႁိုဝ်။

ထၢမ်။ ။ ၼၢမ်ႇၽူႈၼမ်းတႆးၶႃႈလူး တေပဵၼ်ႁိုဝ်ၶႃႈ။

တွပ်ႇ။ ။ ၼၢမ်ႇၶုၼ်ဝၢၼ်ႈၶုၼ်မိူင်းၵေႃႈ ပဵၼ်ၵၢၼ်လီ၊ ၵၢၼ်ဢုပ်ႇဢူဝ်းၵၼ်ၵေႃႈတေလီ။ ဢမ်ႇဝႃႈ ၾၢႆႇလႂ် ပေႃးၼႂ်းမိူင်း မၢၼ်ႈ တင်းသဵင်ႈၼႆႉ ၵူႈၸုမ်းၸုမ်းတေမီးလွင်ႈဢုပ်ႇၵၼ်တင်းပီယဝ်ႉ။ တေဢမ်ႇမီးလွင်ႈတိုၵ်ႉ တေႃးပဵၼ်လိူတ်ႈပဵၼ် ယၢင်တႄႉတႄႉဝႃႈဝႃႈ။ တေမီးလွင်ႈဢုပ်ႇၵၼ်သေ ပဵၼ်ပၢင်ၵုမ်ၵၼ်ၵႂႃႇမွၵ်ႈၼၼ်ႉၵူၺ်း။

ထၢမ်။ ။ ၶွင်ၾၢၵ်ႇပီမႂ်ႇ 2107 ၼီႈၼႆႉ ၶႂ်ႈလၢတ်ႈသင်ထႅင်ႈၶႃႈ။

တွပ်ႇ။ ။ ၶႂ်ႈႁႂ်ႈဢၢၼ်ႇလိၵ်ႈ ဢၢၼ်ႇလၢႆးၵၼ်ၼမ်ၼမ်။ တၢင်းႁူမီးၼႂ်းလိၵ်ႈ။ မိူဝ်ႈလဵဝ်လိၵ်ႈဢၼ်လီ ဢၢၼ်ႇၵေႃႈဢွၵ်ႇ မႃးၼမ်။ မိူၼ်ၼင်ႇ သင်ၶၸဝ်ႈ ၽူႈမီးပၺ်ႇၺႃႇၶဝ်ၸဝ်ႈတႅမ်ႈဢွၵ်ႇမႃးၵေႃႈၼမ်။ ႁႂ်ႈပီႈၼွင်ႉၵူၼ်း မိူင်းတႆးႁဝ်းဢၢၼ်ႇ လိၵ်ႈၼမ်ၼမ်၊ မိူၼ်ၼင်ႇၵႂၢမ်းၸဝ်ႈၵၢင်းသိူဝ်သွၼ်ဝႆႉဝႃႈ - "သွၼ်လိၵ်ႈသွၼ်တၢၼ်ႇ တၢၼ်ႇဢၢၼ်ႇလိၵ်ႈဢၢၼ်ႇၼမ် ၼမ်" ပေႃးဢၢၼ်ႇလိၵ်ႈၼမ်ၼမ်ၵေႃႈ တေတၼ်းလုမ်ႈၾႃႉ၊ တေႁူႉငဝ်းလၢႆး ဝၢၼ်ႈ မိူင်းလႅၵ်ႈလၢႆး၊ တေဝူၼ်ႉတၼ်း ႁဵတ်းတၼ်းလၢတ်ႈ တၼ်းပိူၼ်ႈယူႇ- ယိၼ်းၸူမ်းၶႃႈ။ မႂ်ႇသုင်ၶႃႈ။