လွင်ႈၸဝ်ႈၼႃႈတီႈမၢၼ်ႈၸွပ်ႇထတ်းထဵတ်ႈထၢမ်ၵူၼ်းပႅၵ်ႇ ၼႃႈ၊ ထၢမ်လွင်ႈၵူၼ်းၶွင်ႊသီႊဢဝ်ၶိုၼ်း ၸိုင်ႈတႆး (RCSS/SSA) မႃးၶဝ်ႈပွႆးလၢႆၵေႃႉၸိူဝ်းၼႆႉ ၸၢင်ႈပဵၼ်လွင်ႈ တၢင်းႁဵတ်းႁႂ်ႈပၢင်ပွႆးပီမႂ်ႇတႆး ၼမ်ႉၶမ်း ၶိုၼ်းထိသွင် ဝၢႆးၸဵမ် ၸဝ်ႉၸဵမ်ၸဵဝ်း။

ပွႆးပီမႂ်ႇတႆး ၶိုၼ်းဝၼ်းထိ 14/12/12 (ၶိုၼ်းထိ 2) တီႈဝဵင်းၼမ်ႉၶမ်း ၸိုင်ႈတႆးပွတ်းႁွင်ႇၼၼ်ႉ ယၢမ်းၵၢင်ၶိုၼ်းမွၵ်ႈ 23:00 မူင်းပၢႆပၢႆၵေႃႈ ၵူၼ်းႁႆႇတွႆႇတိုင်ႈၽဵင်းၵႂၢမ်းပၢၼ်မႂ်ႇလူင်းၶဵင်ႇႁွင်ႉၵႂၢမ်းၵႂႃႇ၊ ဝၢႆးၼၼ်ႉ ၽူႈၵႅဝ်ပၢင်ၶဝ်ဢဝ်ၽႅၼ်ႇၶႅပ်းၵႂၢမ်းမႃး ပိုတ်ႇၵူၺ်း၊ ပၢင်ပွႆးၵေႃႈဝၢႆးၵႂႃႇၸဵမ်ၸဝ်ႉၸဵမ်ၸဵဝ်း၊ ဢမ်ႇပိုၼ်ၽၢဝ်ႇသင်ဝႃႈယွၼ်ႉသင်။

တီႈတႄႉမၼ်း တီႈၸဝ်ႉၸဝ်ႉသုတ်း ပၢင်ပွႆးထုၵ်ႇလႆႈယဝ်ႉမွၵ်ႈတဵင်ႈၶိုၼ်းၸၢႆႉမွၵ်ႈ 1 မူင်းပၢႆ၊ လိုၵ်း သုတ်းသမ်ႉထုၵ်ႇလႆႈ ယဝ်ႉမွၵ်ႈ 4 မူင်း(ၵၢင်ၼႂ်)ပၢႆပၢႆ၊ ၼႆႉသမ်ႉ 11 မူင်းပၢႆၵူၺ်းယဝ်ႉၵႂႃႇပႅတ်ႈ။ လွင်ႈတၢင်းဢၼ် ပိၵ်ႉဢိုတ်းပၢင်ပွႆးပႅတ်ႈၸဵမ် ၸဝ်ႉၼႆႉ ၸၢင်ႈပဵၼ်ယွၼ်ႉ 1.ၶွၼ်ႉတဝ်ႉၾၢႆႇၸွပ်ႇ ၶၢဝ်ႇမၢၼ်ႈလႄႈတူဝ် MI, SB မႃးထၢမ် ၵူၼ်း (RCSS/SSA) မႃးပွႆး လၢႆၵေႃႉ၊ ပဵၼ်ၽႂ်။ ထၢမ်လွင်ႈၵူၼ်း ပႅၵ်ႇၼႃႈ ၵူၼ်းလၢၵ်ႇလၢႆး၊ ဢၼ်ဢမ်ႇယၢမ်ႈႁၼ်မီးၽႂ်-ၸိူဝ်းၼႆႉ။ ၼွၵ်ႈသေၼၼ်ႉ ၸၢင်ႈပဵၼ်ယွၼ်ႉ ၵူၼ်းတွႆႇတိုင်ႈလႄႈၸဝ်ႈပွႆး ဢမ်ႇၶဝ်ႈၵၼ်ႁိုဝ်- ၵူၼ်းၼုမ်ႇၼမ်ႉၶမ်း ဢၼ်ၶဝ်ႈႁူမ်ႈပၢင်ပွႆးၵေႃႉၼိုင်ႈ လၢတ်ႈၼင်ႇၼႆ။

ၵဵဝ်ႇၵပ်းလွင်ႈၼႆႉ ၸဝ်ႈပွႆးၵေႃႉၼိုင်ႈလၢတ်ႈဝႃႈ- လွင်ႈၼႆႉ ဢမ်ႇမီးလွင်ႈလၢၵ်ႇလၢႆးသင်၊ ဢမ်ႇမီးၽႂ် ႁွင်ႉၵႂၢမ်း လႄႈဝၢႆးၵႂႃႇ၊ ပၢင်ပွႆးၵေႃႈၵတ်းယဵၼ်ယဝ်ႉတူဝ်ႈၵႂႃႇလီငၢမ်းယူႇ။ ၵေႃပွင်ပဵၼ်ပၢင်ပွႆးၵေႃႉ ၼိုင်ႈၵေႃႈလၢတ်ႈဝႃႈ ဢမ်ႇမီးပၼ်ႁႃသင်- ၼႆယူႇ။

ၾၢႆႇၼိုင်ႈတၢင်းၼိုင်ႈ တီႈပွႆးပီမႂ်ႇတႆးတီႈမူႇၸႄႈ ဝၼ်းထိ 15/12/12 ယူႇတီႈၵေႃလိၵ်ႈလၢႆးလႄႈ ၾိင်ႈငႄႈတႆး မူႇၸႄႈ မွပ်ႈပၼ်ရၢင်းဝလ်း (သူး) ဢၼ်ၸႂ်ႉၸိုဝ်ႈဝႃႈ ရၢင်းဝလ်းၸဝ်ႈသိူဝ်ၶၢၼ်ႇၾႃႉ တီႈလုင်းၸၢႆးၾႃႈ၊ ယွင်ႈယေႃးဢဝ်ၵုၼ်းမုၼ် ၽူႈပိုၼ်ႉပွႆႇပုၼ်ႈလီသုၼ်ႇတူဝ် ႁိုဝ်ႉတေႃႇႁႅင်ႈ ဢႅဝ်ႇႁွၼ်ႈပူင်သွၼ်ပူၵ်းပွင် ၵူၼ်းၼုမ်ႇႁႂ်ႈမေႃႁၵ်ႉလိၵ်ႈလၢႆး ဝႃႈပဵၼ်ၽူႈ ၵတ်ႉၶႅၼ်ႇၾၢႆႇၶူးသွၼ်။ ရၢင်းဝလ်းၼႆႉ ၸတ်းမွပ်ႈပၼ် ၽူႈၵတ်ႉၶႅၼ်ႇ မႃးလၢႆလၢႆပီ။ ပီ 2000 ၸၢႆးမၢဝ်းၶမ်း၊ ၸဝ်ႈပၢႆးမေႃ ၾၢႆႇလင်ႇၵႃႇတႆး (မေႃလိၵ်ႈလူင်)။ ပီ 2001 လုင်းတၢင်းၵႄး၊ ၸဝ်ႈပၢႆးမေႃၾၢႆႇလိၵ်ႈလၢႆးပၢႆပေႇတႆး။ 2002 သြႃႇၸၢႆးဢွင်ႇ ထုၼ်း (ၸဝ်ႈပၢႆးပိုၼ်းတႆး)။ ပီ 2003 ၸၢႆးတႃႇဢေး ႁိုဝ် သိူဝ်ႁူမ်ႇမိူင်း၊ ၵႅမ်ႁူဝ်ပဝ်ႈႁူဝ်သိူဝ် - ၸိူဝ်းၼႆႉ။