မႄႈလဵင်ႉၵူၼ်းထႆး ၸဝ်ႈၶွင်ရီႊသွတ်ႊ ပွတ်းလွႆသၵဵတ်း ၵေႃႉၺႃးလုၵ်ႉလဵင်ႉၵူၼ်းတႆးၶႃႈႁႅမ်ၼၼ်ႉ မိူဝ်ႈလဵဝ် ဢဝ်ၶၢပ်ႈတူဝ်ႁဵတ်းတၢင်းလီပၼ် တီႈဝတ်ႉၽြႃႉသိင် ၵဵင်းမႆႇ။ ယွၼ်းႁွင်ႉမွၵ်ႇပီႈၼွင်ႉတႆး ၶဝ်ႈႁူမ်ႈႁွမ်းတၢၼ်း ၸွမ်း။

ၸွမ်းၼင်ႇၶၢဝ်ႇႁူင်းပွႆႇႁၢင်ႈသဵင် (TV) ထႆး ဢွၵ်ႇၵႂႃႇဝၼ်းထိ 14/12/12 (မိူဝ်ႈဝႃး)ၼၼ်ႉ ၸဝ်ႈၼႃႈ တီႈထႆး တိၺွပ်းၵူၼ်းတႆး သွင်ၵေႃႉၽူဝ်မေး ဢၼ်ၶႃႈတၢႆမႄႈလဵင်ႉၵူၼ်းထႆး ၼၢင်းၶျၼူၵ်းသုၻႃး ဢမၢတ်ႉတယၵုလ်း၊ ၸဝ်ႈၶွင်ရီႊသွတ်ႊ သိလႃးဝႃးရီးလွတ်ႉ တီႈႁိူၼ်းမၢႆ 131 မူႇ 5 ဝၢၼ်ႈပၢင်ၾႅၼ်း ၸႄႈဝဵင်းလွႆသၵဵတ်း ၵဵင်းမႆႇ လႆႈယဝ်ႉ။ ၸဝ်ႈၼႃႈတီႈထႆး ဢဝ်မႃးႁဵတ်းၼႄၾၢင်ႁၢင်ႈပိူင်ပဵၼ် ၽွင်းၶႃႈတၢႆလႄႈ ပိူင်ပဵၼ်ဢၼ် ၶူၼ်ႉသွၵ်ႈတဝ်ဢဝ်ၶူဝ်းၶွင်ၼႂ်းႁိူၼ်း (ရီႊသွတ်ႊ)ၸိူဝ်းၼႆႉ။

လႆႈႁူႉပႃးဝႃႈ ၸၢဝ်းတႆးသွင်ၵေႃႉၽူဝ်မေးၼႆႉ ၵေႃႉၽူဝ်ၸိုဝ်ႈဝႃႈ ၸၢႆးတႃႉ (ၵူၼ်းပွတ်းလၢင်းၶိူဝ်း)၊ ၵေႃႉမေးၸိုဝ်ႈဝႃႈၼၢင်းလီ (ၵူၼ်းပွတ်းလၢႆးၶႃႈ)။ ပေႃးဝႃႈၶႃႈတၢႆမႄႈလဵင်ႉတူဝ်ၵဝ်ႇယဝ်ႉၵေႃႈ ၶူၼ်ႉသွၵ်ႈဢဝ် ၶူဝ်းၶွင်ငိုၼ်းၶမ်းၼႂ်းႁိူၼ်းယေး/ရီႊသွတ်ႊသေ ဢဝ်ပႃးလူတ်ႉၵႃးမႄႈလဵင်ႉလမ်း ၼိုင်ႈ ႁေႃႈဢွၵ်ႇပၢႆႈပႅတ်ႈ၊ ၵူၺ်းၵႃႈ လူတ်ႉၵႃးလမ်းၼႆႉသမ်ႉ ႁေႃႈၽႃႇပိၼ်ႈပႅတ်ႈၸွမ်းတၢင်း၊ ၾၢင်ႁၢင်ႈၶဝ်ၼႆႉဢွၵ်ႇၼႂ်းၵွင်ႈထၢႆႇၵမ်းသိုဝ်ႈ (CCTV) ၸင်ႇတိလႆႈၶဝ်- ၼႆယူႇ။

မႄႈလဵင်ႉၵူၼ်းထႆးၵေႃႉသဵင်ႈမုၼ်ၵႂႃႇၼႆႉ ပဵၼ်ပီႈၼၢင်းၸၢႆးသူမ်ၽွၼ်း ၵေႃႉပဵၼ်ၽူႈၸွႆႈၵၢၼ် ၶွင်ႊသီႊဢဝ်ၶိုၼ်းၸိုင်ႈတႆး (RCSS) မႃးပီယၢဝ်းၶၢဝ်းႁိုင်တေႃႇဝၼ်းမိူဝ်ႈလဵဝ်။

ၸွမ်းၼင်ႇမီးၵၢၼ်ႁႅၼ်းတၢၼ်းပၼ်တီႈ ဝတ်ႉၽြႃႉသိင် သဵၼ်ႈတၢင်းသၢမ်လၢၼ်ႉ ဢိူင်ႇၽြႃႉသိင် ဝဵင်းၵဵင်းမႆႇသေ ဝၼ်းထိ 15/12/12 ယၢမ်း 19:30 မူင်းၵၢင်ၶမ်ႈ တေမီးၵၢၼ်ႁေႃး/တေသၼႃဢၽိ ထမ်း။ ဝၼ်းထိ 16/12/12 တေပူၼ်ႉၶၢပ်ႈတူဝ် ႁွပ်ႇႁူဝ်ၶဝ်ႈႁဵဝ်ႈ တီႈပႃႇႁဵဝ်ႈႁၢႆယႃး ဢိူင်ႇႁၢႆယႃး ၵဵင်းမႆႇ။ ဢိင်ၼိူဝ်ဝၼ်းထိ 16 ပဵၼ်ဝၼ်းလိုဝ်ႈၵၢၼ်လႄႈ သင်ဝႃႈတၼ်းၵၼ် ၶႂ်ႈယွၼ်းႁွင်ႉမွၵ်ႇပီႈ ၼွင်ႉတႆး ၵႂႃႇၶဝ်ႈႁူမ်ႈႁွမ်းတၢၼ်းသေၵမ်း။

ၵပ်းၵၢႆႇလွင်ႈၼႆႉ  ပူၼ်ႉမႃးမိူဝ်ႈဝၼ်းထိ 12/12/12 ၼႆႉ ဢိင်ၼိူဝ်မီးၵူၼ်းၸႅင်ႈဝႃႈ ထူပ်းႁၼ်တူဝ် တၢႆၼၢင်း ၶျၼူၵ်းသုၻႃး ဢမၢတ်ႉတယၵုလ်း ဢႃႇယု 64 ပီသေ ယၢမ်းၵၢင်ၶမ်ႈ ၸဝ်ႈၼႃႈတီႈပလိၵ်ႈ ထႆးလႆႈၵႂႃႇ ၵူတ်ႇထတ်းႁၼ်၊ ၸွမ်းတူဝ်ၶိင်းမၼ်းၼၢင်း လႆႈႁၼ်ႁွႆးသၢႆၶေႊၿိူလ်ႊထီႊဝီႊႁတ်ႉၶေႃး သေတၢႆ၊ တၢႆမႃးလႅပ်ႈ ဢမ်ႇယွမ်းမွၵ်ႈ 3 ဝၼ်း။ ၼွၵ်ႈသေၼၼ်ႉ လႆႈႁၼ်ႁွႆးၵူၼ်းႁၢႆႉၶူၼ်ႉ သွၵ်ႈတဝ်ဢဝ်ပႃးၶူဝ်းၶွင်ငိုၼ်းၶမ်း ၵႂႃႇၸွမ်းထႅင်ႈ။

တၢင်းၸဝ်ႈၼႃႈတီႈထႆး လွႆသၵဵတ်း လၢတ်ႈၼႄပႃးၼႂ်းသိုဝ်ႇထႆးဝႃႈ- ပူၼ်ႉမႃးမိူဝ်ႈဝၼ်းထိ 07/12/12 လႆႈၵပ်းသၢၼ်ၵၼ်တင်းပလိၵ်ႈ သၼ်သၢႆး ၵဵင်းမႆႇသေ လႆႈႁူႉဝႃႈမီးၵူၼ်းမိူင်းမၢၼ်ႈ ႁေႃႈလူတ်ႉၵႃး လမ်းဢၼ်  ၼၢင်းၶျၼူၵ်းသုၻႃး ဢမႃးတယၵုလ်း ပဵၼ်ၸဝ်ႈၶွင် ၼႆႉ ႁေႃႈၵႂႃႇၽႃႇပိၼ်ႈပႅတ်ႈၸွမ်း တၢင်း၊ တၢင်းၸဝ်ႈၼႃႈတီႈ ထႆးၸင်ႇၶႆႈၸွမ်းသူၼ်ႈႁွႆးမႃးထိုင် ဢွင်ႈတီႈဢၼ်ၵိူတ်ႇပိူင်ပဵၼ်ၵၢၼ်ၶႃႈ ႁႅမ်ၼႆႉ- ၼႆယဝ်ႉ။ (လွင်ႈၼႆႉ တေၺႃးတူတ်ႈတၢမ်ႇၸွမ်းၼင်ႇမၢႆမီႈဝၢၼ်ႈမိူင်းထႆး)။

ၵပ်းၵၢႆႇလွင်ႈၼႆႉ ၸဝ်ႈယွတ်ႈသိုၵ်းၵေႃႈ မွၵ်ႇလၢတ်ႈၵႂၢမ်းၾၢင်ႉတိူၼ်ပီႈၼွင်ႉတႆး ၼႂ်းဝၼ်းယႂ်ႇဝၼ်း လူင် မိူင်းၸိုင်ႈထႆး (05/12/12) ဢၼ် RCSS ၸတ်းပၢင်ပွႆးႁပ်ႉတွၼ်ႈပီမႂ်ႇတႆး 2107 ၼီႈ၊ တီႈဝတ်ႉ ၻွၼ်းၸၼ်ႇ ဢိူင်ႇတႃႈသႃလႃး မိူင်းၵဵင်းမႆႇဝႃႈ- ပီႈၼွင်ႉတႆး ၵူႈၵေႃႉၸိူဝ်းမႃးတူၵ်းမိူင်းထႆး ႁႂ်ႈမီး သၸ်ႉၸႃႇ၊ သတိ၊ ဝိရိယ။ တွၼ်ႈဝိရိယၼၼ်ႉ မၼ်းၸဝ်ႈလၢတ်ႈဝႃႈ တေႁဵတ်းသင်တေလၢတ်ႈ သင်ၸိူဝ်းၼႆႉ ႁႂ်ႈမီးသတိမေႃၾၢင်ႉၵႅမ်း၊ ယႃႇႁဵတ်းၵၢၼ်ၽိတ်းမၢႆမီႈထႆး၊ ယႃႇပေၵႃႉယႃႈမဝ်းၵမ်၊ ယႃႇလွၵ်ႇႁဵတ်းဝႂ်ပွမ်ပၼ်ၵၼ်၊ ယႃႇပေၵႃႉၵူၼ်း- ၸိူဝ်းၼႆႉ။