ပိူဝ်ႈတႃႇႁပ်ႉတွၼ်ႈပီမႂ်ႇတႆး 2107 ၼီႈ ပီငူး ဢၼ်တေ တူၵ်းႁွတ်ႈထိုင်မႃး ဝၼ်းထိ 14  လိူၼ်ၼႆႉ ၼၼ်ႉ မေႃႁၢင်ႈလူၼ်ႉ ၸိုဝ်ႈယႂ်ႇလၢႆၵေႃႉ ႁူမ်ႈၵၼ်ႁပ်ႉပုၼ်ႈ ၽွၼ်း ၸတ်းႁဵင်းၶဵင်ႇၸၢတ်ႈ မူၼ်ႈၵျေႃႇ ပၢင်ပွႆးပီမႂ်ႇ တီႈဝဵင်းၵဵင်းတုင် ၸိုင်ႈတႆးပွတ်းဢွၵ်ႇၶူင်း။

ၸၢႆးႁၢၼ်လဵတ်း မေႃတႅမ်ႈႁၢင်ႈလူၼ်ႉၵိူဝ်ႉၼူဝ် တေႃႇၽူႈၼမ်းမိူင်းမၢၼ်ႈ လၢတ်ႈဝႃႈ - "ယၢမ်းလဵဝ် ႁဝ်းၶႃႈဢွၼ်ၵၼ်ႁဵတ်း ၶဵင်ႇမူၼ်ႈၵျေႃႇ ၼႆႉ 5 ၶဵင်ႈ။ မီးၶဵင်ႇႁွင်ႉၵႂၢမ်းပၢၼ်မႂ်ႇ၊ ၶဵင်ႇၸၢတ်ႈသႅင်းတႆး၊ သေႃး၊ သိူၼ် ၸိူဝ်းၼႆႉဢေႃႈ။ ၶႃႈလုၵ်ႉတူၼ်ႈတီး ၽႅဝ်မႃး တူၵ်းလိုၼ်းၵႂႃႇဢိတ်းၼိုင်ႈလႄႈ ႁဝ်းၶႃႈ လႆႈႁိပ်ႈၼႅတ်ႈဝႆႉၽွင်ႈယူႇၶႃႈ"

ပၢင်ပွႆးႁပ်ႉတွၼ်ႈ ပီမႂ်ႇ 2107 ၼီႈ တီႈဝဵင်းၵဵင်းတုင်ၼႆႉ ၵေႃလိၵ်ႈလၢႆးလႄႈၾိင်ႈငႄႈ ငဝ်ႈငုၼ်းပဵၼ် ၵဝ်ႉပဵၼ်ၵၢၼ်း ၵေႃလိၵ်ႈလၢႆးလႄႈ ၾိင်ႈငႄႈၵဵင်းတုင် တင်းတႃႈၵုင်ႈ ႁပ်ႉပုၼ်ႈၽွၼ်းၸတ်းၵၢၼ် ႁႃငိုၼ်းတွင်း၊ ၸိူဝ်းပဵၼ်မေႃတႅမ်ႈႁၢင်ႈ ၸၢႆးထုၼ်းလ၊ ၸၢႆးႁၢၼ်လဵတ်း (ကာတွန်း ဟန်လေး)လႄႈ ႁၢတ်ႈႁၢႆး ၶဝ်သၢမ်ၸဝ်ႈတႄႉ ဢဝ်ၼမ်ႉၵတ်ႉမေႃတိၼ်မေႃမိုဝ်း  သေ ႁၢင်ႈၶိူင်ႈ ၶဵင်ႇမူၼ်ႈၵျေႃႇ ဝႃႈၼႆ။

"ပီႈၼွင်ႉတႆးလႅင် ၶဝ်ၵေႃႈ ႁွတ်ႈမႃး မိူဝ်ႈဝႃး မွၵ်ႈ 40 ၵေႃႉဢေႃႈ၊ ၶဝ်ၸဝ်ႈၵေႃႈ ႁဵတ်းႁွင်ႈၼႄပိုၼ်း သေ ၼႄႁႂ်ႈပီႈၼွင်ႉတႆး တၢင်ႇတီႈ တၢင်ႇလႅၼ် ပေႃးႁူႉၸၵ်းၼၼ်ႉၶႃႈၼႃႇ။ ဢၼ်ႁဝ်းၶႃႈလႆႈ ႁူႉတႄႉ မေႃၵႂၢမ်း ၸၢႆးၵၢပ်ႇသႅင် ၼၢင်းၼုမ်ႇမၢဝ်းၶဝ် ဢိၵ်ႇလၢႆလၢႆ ၵေႃႉၵေႃႈထိုင်ယဝ်ႉၶႃႈ။ ပႃးၸဵမ်ၽူႈလူင်ႉလႅၼ်ႇပိုၼ်းလိၵ်ႈလၢႆးၶဝ်ၸဝ်ႈ ၸိူဝ်းတေမႃးႁေႃးလၢတ်ႈၸိူဝ်းၼၼ်ႉ ၵေႃႈထိုင်မႃး ၵမ်ႈၼမ်ယဝ်ႉ" - ၽူႈၸွႆႈၶပ်းၶိုင်ပၢင်ပွႆး ၸၢႆးသႅင်လၢတ်ႈ။

ၸၢႆးသႅင်ယင်းသိုပ်ႇလၢတ်ႈထႅင်ႈဝႃႈ - ႁွင်ႈၼႄပိုၼ်းတႄႉ ပိူင်လူင် ၼႄၶႅပ်းႁၢင်ႈၵဵဝ်ႇၵပ်း ဝဵင်းၵဵင်းတုင်၊ ႁၢင်ႈၸဝ်ႈၾႃႉ ႁၢင်ႈၼၢင်း ၾႃႉ၊ ႁၢင်ႈႁေႃ၊ ႁၢင်ႈၵူၼ်းဝၢၼ်ႈယူႇသဝ်းၵိၼ်သၢင်ႈ ႁိူၼ်းယေးလၢႆးမိုဝ်းၵူၼ်းၼႂ်းပိုၼ်ႉတီႈ ၸဵမ်ၸိူဝ်းၼႆႉၵေႃႈ ပႃး ဝႃႈၼႆ။

သင်ၶၸဝ်ႈ ၽူႈၵတ်ႉၶႅၼ်ႇလိၵ်ႈလၢႆး ၽူႈၵဵပ်းႁွမ်ၾိင်ႈႁိတ်ႈႁွႆး ၸိူဝ်းလႆႈႁပ်ႉယုၵ်ႉယွင်ႈၸိူဝ်း ၼၼ်ႉၵေႃႈ ၵမ်ၼမ်ႁွတ်ႈၽႅဝ် ၵဵင်းတုင်  ယဝ်ႉဝႃႈၼႆ။

ပီတႆး 2106 ၼီႈ ပီႈၼၵႃးတေသုတ်းသဵင်ႈ ပီမႂ်ႇ 2107 ၼီႈ ပီငူးတေႁွတ်ႈထိုင်မႃး။ ပွႆးႁပ်ႉတွၼ်ႈတႄႉ ၼွၵ်ႈသေ ပီႈၼွင်ႉတႆး ၼွၵ်ႈ မိူင်းၼႂ်းမိူင်း ႁူမ်ႈၵၼ်ၸတ်းႁဵတ်းတီႈၵဵင်းတုင် ၸိူဝ်းဢၼ်ဢမ်ႇမႃး ၵဵင်းတုင်လႆႈၵိုတ်းယူႇဝဵင်းၽႂ် မိူင်းမၼ်းၼၼ်ႉ ၵူႈၸေႊဝဵင်း ၼႂ်းၸိုင်ႈတႆး၊ ၼႂ်းမိူင်းၶၢင်၊ တႃႈၵုင်ႈ၊ ဝဵင်းလိူဝ်ႇ၊ ၼွၵ်ႈဝဵင်း မိူၼ်ၼင်ႇမိူင်းထႆးတႄႉ ၵဵင်းမႂ်ႇ၊ ၵဵင်းႁၢႆး၊ မိူင်းၵွၵ်ႇ တင်းပွတ်းလႅၼ်လိၼ် လၢႆလၢႆတီႈ။ လိူဝ်ၼၼ်ႉ မလေးသျိူဝ်း၊ ၸိင်ႊၵပူဝ်ႊ၊ ၵျပၼ်ႊ၊ ဢမေႊရိၵၼ်ႊ တင်း မိူင်းဢိင်ႊၵလဵတ်ႈ ၸိူဝ်းၼႆႉၵေႃႈ ၸတ်းႁဵတ်း သိုဝ်ႈ ၽႂ်တၼ်းမၼ်းမႃးၵူႈပီ။