တင်ႈတႄႇဝၼ်းထိ 8 မႃး သိုၵ်းမၢၼ်ႈ ယူႇႁၢင်ႇလၢႆႊၸႃႊ ဢမ်ႇပေႃးၵႆပေႃးၸမ်သေ ဢဝ်ၵွင်ႈလူင် ယိုဝ်းသႂ်ႇငဝ်ႈ ငုၼ်း KIO ၊ ၾၢႆႇၶၢင် KIO ၵေႃႈ ယိုဝ်းၵွင်ႈလူင်တုမ်ႉ တွပ်ႇၶိုၼ်းသွင်ၾၢႆႇၶဵင်ႇယိုဝ်း ၵွင်ႈလူင်တေႃႇၵၼ် ဢမ်ႇထၢတ်ႇ။

တင်ႈတႄႇဝၼ်းထိ 8 ယၢမ်းဝၢႆးဝၼ်း 15.30 မူင်း သိုၵ်းမၢၼ်ႈ ယူႇပွတ်းဝၢၼ်ႈၶမ်းၵၢႆႇ ၵိင်ႇၸေႊဝဵင်းတူင်ၽူင်းယၢၼ်ႇ ႁၢင်ႇငဝ်ႈငုၼ်း ၶၢင် KIO (လၢႆႊၸႃႊ) ယၢၼ်မွၵ်ႈ 6 လၵ်း ဢဝ်ၵွင်ႈလူင် သႅၼ်း 120 mm ယိုဝ်းသႂ်ႇ ဝဵင်းလၢႆႊၸႃႊ၊ ၾၢႆႇသိုၵ်းၶၢင် KIO/KIA တုမ်ႉ တွပ်ႇသိုၵ်းမၢၼ်ႈၶိုၼ်း သွင်ၾၢႆႇပဵၼ်ပၢင်တိုၵ်းၵၼ်ႁၢဝ်ႈႁႅင်း၊ ၾၢႆႇသိုၵ်းမၢၼ်ႈတပ်ႉလႅၼ်ႈ ၼႃႈတႄႉ ဢမ်ႇၸၢင်ႈၶိုၼ်ႈၸူး လၢႆႊၸႃႊ - ၽူႈမီးပုၼ်ႈၽွၼ်း ၼႂ်း KIO ၵေႃႉၼိုင်ႈလၢတ်ႈ။

ၽူႈမီးၸၼ်ႉတပ်ႉသိုၵ်းလုၵ်ႈႁဵၼ်း ABSDF ၵေႃႉၼိုင်ႈလၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ မၢၵ်ႇလူင်သိုၵ်းမၢၼ်ႈယိုဝ်းတူၵ်း သႂ်ႇ ၾၢႆႇလင် ဝဵင်းလၢႆႊၸႃႊ ဢမ်ႇတိူဝ်ႉသင်။ KIA သမ်ႉယူႇတီႈၵွင်း တီႈမုင်ႈလီတုမ်ႉတွပ်ႇယိုဝ်းသႂ်ႇပွတ်းဝၢၼ်ႈၶမ်းၵၢႆႇ လႄႈတီႈ တပ်ႉၵွင်ႈလူင်မၢၼ်ႈပၵ်း - ၾႆးလုၵ်ႉမႆႈ လၢႆတီႈ၊ ၾၢႆႇသိုၵ်းမၢၼ်ႈၵေႃႈ လႅပ်ႈတၢႆၼမ်ဝႃႈၼႆ။

သိုၵ်းမၢၼ်ႈ ၶလယ 40 တႂ်ႈ ၸၵၶ (ၵုမ်းၵမ်ယၼ်သိုၵ်း) မၢႆ 3  ဢဵၼ်ႁႅင်းမွၵ်ႈ 200 ဢိူမ်ႈၸမ်လၢႆႊ ၸႃႊသေ ပိုတ်းယိုဝ်း ႁၢဝ်ႈႁႅင်း။ ယၢမ်းလဵဝ် သိုၵ်းမၢၼ်ႈၸႂ်ႉႁႅင်းသိုၵ်း 100 တပ်ႉၵွင်ပၢႆ ႁွၼ်ႈထဝ်ႇတူင်ႉၼိုင် ၼႂ်းၼႃႈလိၼ် KIA ၵုမ်းၵမ်ဝႆႉလႄႈ ပဵၼ်ပၢင်တိုၵ်းၵၼ် ၶိူဝ်းယႂ်းမႃး - ၽူႈမီးၸၼ်ႉ ၼႂ်း KIA လၢတ်ႈ။

သိုၵ်းမၢၼ်ႈ တၢင်းပွတ်း မၢၼ်ႈမေႃႇ ပႃးၶိူင်ႈလူင် လၢႆလၢႆသႅၼ်း ဢဵၼ်ႁႅင်း မွၵ်ႈ 250 ၵေႃႈ ဢိူမ်ႈၸူးငဝ်ႈငုၼ်း KIA  ထႅင်ႈလႄႈ ပၢင်တိုၵ်းၸၢင်ႈယႂ်ႇႁႅင်းလိူဝ်တၢင်ႇဝၼ်းလူးၵွၼ်ႇ ဝႃႈၼႆ။