သိုၵ်းမၢၼ်ႈထၢၵ်ႈ ၶုၼ်သိုၵ်းလူင်ဢွင်ႇၸေႃႇမိၼ်ႉ ဢိင်ႇငဝ်း ပိဝ်ႇႁႃႇပိုၼ်ႉတီႈသေ ပေႃႉထုပ်ႉၵူၼ်း ၼုမ်ႇၸၢဝ်းပလွင်ႈ ၸဵပ်းလိူဝ်ႁႅင်း။

ဝၼ်းထိ 11 ယၢမ်းဝၢႆးဝၼ်း 2 မူင်း သိုၵ်းမၢၼ်ႈထၢၵ်ႈ ဢွင်ႇၸေႃႇမိၼ်ႉ ၶီႇလူတ်ႉၶိူင်ႈမႃး ၵူၼ်းၼုမ်ႇ ၸၢဝ်းတဢၢင်း ပလွင်ႈ သွင်ၵေႃႉ ၵေႃႈ ၶီႈလူတ်ႉၶိူင်ႈ၊ လူတ်ႉၶိူင်ႈၼင်ႇၵၼ်ၽႃႇၺႃးၵၼ်။ ဢမ်ႇႁၢၼ်ႉ ၸႂ်ထဵင်ႈမေႃး ႁိုတ်းႁၢတ်ႇသေ ပေႃႉထုပ်ႉ ၸၢႆးၼုမ်ႇသွင်ၵေႃႉ ၼၼ်ႉ - ၸၢဝ်းတဢၢင်း ႁွတ်ႈၵၢတ်ႇ မိူင်းဝီးလၢတ်ႈ။

"ၵူၼ်းၼုမ်ႇသွင်ၵေႃႉၼၼ်ႉဝႃႈ ႁႃးၶႃႈဢမ်ႇၽိတ်း လုင်းႁဝ်းဢိူဝ်ႈၽိတ်း ၼႆၵေႃႈ ပူဝ်ႈမၢၼ်ႈထၢၵ်ႈ ၼၼ်ႉ ႁုၵ်ႉၶေႃးသိူဝ်ႈ တႃႇမိုဝ်းသမ်း တိၼ်ပိတ်ႉၵမ်းလဵဝ်။ ၵူၼ်းၼုမ်ႇသွင်ၵေႃႉၼၼ်ႉ တႃႇၵေႃႉ ၼိုင်ႈၸဵပ်းႁႅင်းလႄႈ ဢမ်ႇတၼ်းႁႅၼ်းတူဝ်။ ၶိင်းမၢၼ်ႈ ၼၼ်ႉပၢႆဝႃႈ ၶိူဝ်ဢမ်ႇႁၢၼ်ႉၸႂ် ၶႂ်ႈတၢင်ႇ လၢတ်ႈတီႈပိဝ်ႇႁႃႈၵေႃႈၵႂႃႇလႃႈ ဝႃႈၼႆလူးၵွၼ်ႇ" -ၵူၼ်းယူႇႁိမ်းၵၢတ်ႇ မိူင်းဝီးၵေႃႉၼိုင်ႈလၢတ်ႈ။

ဝၼ်းၼၼ်ႉ တီႈမိူင်းဝီး ၵူၼ်းၼမ် ပဵၼ်ဝၼ်းၵၢတ်ႇ၊ လုၵ်ႈဢွၼ်ၸၢဝ်းတဢၢင်းသွင်(ပလွင်ႈ) သွင်ၵေႃႉ လုၵ်ႉတၢင်းၼမ်ႉ ၶမ်းမႃး၊ ပူဝ်ႈမၢၼ်ႈထၢၵ်ႈ သမ်ႉၶီႇလူတ်ႉၶိူင်ႈၵႂႃႇ ၶၢင်ငၢင်ၵႂႃႇၸွမ်းတၢင်း ႁိမ်းၵၢတ်ႇလႄႈ၊ ထၢင်ႇတေဝႄႈ တၢင်းၼိုင်ႈသမ်ႉ ၵိူင်းတၢင်းၼိုင်ႈ လႄႈ လႆႈၽႃႇၺႃးၵၼ်။

ယွၼ်ႉလူတ်ႉၶိူင်ႈၽႃႇၺႃးၵၼ်သေ ၵူၼ်းၼုမ်ႇသွင်ၵေႃႉ ဢမ်ႇထိုင်တီႈမႆႈၸႂ် ႁၵ်းၵႅင်ႉသေတႃႉ ယွၼ်ႉပူဝ်ႇမၢၼ်ႈထၢၵ်ႈ ဢႃႇၵႃႇ ၽႅၼ်သုင်လႄႈ ႁဵတ်းႁႂ်ႈၵူၼ်းႁူပ်ႉႁၼ်သိုဝ်ႈၼႃႈတၼ်းတႃၶဝ် ဢမ်ႇႁၢၼ်ႉၸႂ်ၸွမ်း - ဝႃႈၼႆ။

ပူဝ်ႇမၢၼ်ႈထၢၵ်ႈၵေႃႉၼႆႉ ဝၢႆးဢွၵ်ႇသိုၵ်း လိုဝ်ႈၵၢၼ်ယဝ်ႉ ၵႃႉၶၢႆၶဝ်ႈသၢၼ် တီႈမိူင်းဝီး၊ ယွၼ်ႉၶႃႇၵႄႇ လၢတ်ႈၵႂၢမ်းႁုၵ်းႁၢႆႉ လႄႈ ၵူၼ်းယူႇႁိမ်းၵိၼ်ၸမ်ၵေႃႈ ဢမ်ႇပေႃးၶႂ်ႈၵပ်းၵၢႆႇၶဝ်ႈဢွၵ်ႇ - ၵူၼ်းယူႇႁိမ်း ၵၢတ်ႇ မိူင်းဝီးလၢတ်ႈ။

ဢိူင်ႇမိူင်းဝီးၼႆႉ ယၢၼ်ဝဵင်းၼမ်ႉၶမ်း ၸဵင်ႇၸၢၼ်းဝၼ်းတူၵ်း မွၵ်ႈ 30 လၵ်းပၢႆ၊ ၶဝ်ႈပႃးၼႂ်းၸႄႈဝဵင်း ၼမ်ႉၶမ်း ၸိုင်ႈတႆး ပွတ်းႁွင်ႇ။