ဝၼ်းထိ 11/12/2012 ၵူၼ်းမိူင်းပၼ်ႇၶဝ်ႁဵတ်းပၢင်ယွင်ႈ ယေႃးမေႃၵႂၢမ်းၸၢႆးမူး/ၶူးသွၼ် ႁူၺ်ႈၸွႆး ၵိုၵ်းၵပ်းပၢင်ပွႆးႁပ်ႉ တွၼ်ႈပီမႂ်ႇတႆး 2107 ၼီႈ တီႈဝတ်ႉၵျွင်းရႃႇၸႃႇ ၵၢင်ဝဵင်း မိူင်းပၼ်ႇ။

"ႁဝ်းၶႃႈတႄႇပၢင်ပွႆး ယွင်ႈယေႃးမေႃၵႂၢမ်းၸၢႆးမူး မိူဝ်ႈၶမ်ႈဝၼ်းထိ 11 ၊ ၶမ်းဝႃႈတႄႉ ပူတ်းပၢႆႉယွင်ႈ ယေႃး ၸၢႆးမူးလူင်းသေ သႂ်ႇပၢႆႉပွႆးပီမႂ်ႇ ႁပ်ႉတွၼ်ႈပီမႂ်ႇၼၼ်ႉၶႃႈၼႃႈ။ ပွႆးတႄႉၵိုၼ်း ၼင်ႇဢူၵ်း ၼင်ႇၸႂ် တင်းသွင်ဝၼ်းယဝ်ႉ။ ၶမ်ႈၼႆႉတေၶႅၼ်း ၵိုၼ်းဢေႃႈ" - ၸၢႆးၵျႃႉ ၵူၼ်းၼုမ်ႇမိူင်းပၼ် လၢတ်ႈ။

ဝၼ်းထိ 11/12/2012 ၽူႈႁၵ်ႉၸၢတ်ႈၵမ်ႈၽွင်ႈ ႁူမ်ႈၵၼ်ပဵၼ်ၵဝ်ႉၵၼ်း ၸတ်းပၢင်ယွင်ႈယေႃး မေႃၵႂၢမ်း ၸၢႆးမူး ႁိုဝ် ၶူးသွၼ်ႁူၺ်ႈၸွႆး ဢမ်ႇၼၼ် ၶူးမူး တီႈဝတ်ႉၵျွင်းရႃႇၸႃႇ ဝဵင်းမိူင်းပၼ်ႇ။ တေႇပၢင်တင်ႈတႄႇၶမ်ႈ ႁွင်ႉၽဵင်းၵႂၢမ်းၸၢႆးမူး လွၼ်ႉလွၼ်ႉ၊ ပိူဝ်ႈယွင်ႈယေႃးၵူၼ်းမိူင်းပၼ်ႇ ၵတ်ႉၶႅၼ်ႇၵိုၵ်းပိုၼ်း။

ၵဵဝ်ႇၵပ်းလွင်ႈၼႆႉသေ ၵူၼ်းၼုမ်ႇၵေႃႉၼိုင်ႈလၢတ်ႈထႅင်ႈဝႃႈ "ဢွၼ်တၢင်းသုတ်းတႄႉ ႁဝ်းၶႃႈ ယိူင်းဢၢၼ်းဝႃႈ ၸူၵ်းမၢႆ လိၵ်ႈသေ ၽႂ်ၺႃးၽဵင်းၵႂၢမ်းဢၼ်လႂ်ၵေႃႈ ႁႂ်ႈၶိုၼ်ႈႁွင်ႉၼိူဝ်ၶဵင်ႇ။ ၽႂ်ႁွင်ႉ ၶႅမ်ႉထိသုတ်း တေယွင်ႈယေႃးပၼ်ရၢင်ႊဝၼ်း(သူး)ၼႆဢေႃႈ။ ၵူၺ်းၵႃႈတၢင်းၼမ်ဢမ်ႇၽွမ်ႉ လႄႈ ဢမ်ႇပဵၼ်မႃး။ လိူဝ်သေ ပၢင်ႁွင်ႉၵႂၢမ်းၸၢႆးမူးသေ မူၼ်ၵျေႃႇ ဢမ်ႇမီးသင်လၢၵ်ႇလၢႆး" - ဝႃႈၼႆ။

ၸၢႆးမူး (မေႃသွၼ် ႁူၺ်ႈၸွႆး) ၵိူတ်ႇမိူင်းပၼ်ႇ မိူဝ်ႈပီ 1960 ၊ တႄႇႁဵတ်းၵၢၼ်လုၵ်ႉၽိုၼ်ႉ ၼႂ်းတပ်ႉ သိုၵ်း SURA ၶွင်ၸဝ်ႈၵွၼ်းၸိူင်း။ မိူဝ်ႈပႆႇလုၶွႆႈမၼ်းၸၢႆးႁပ်ႉပုၼ်ႈၽွၼ်းၶူးလႄႈ ပဵၼ်ၽူႈတႅမ်ႈ/ ႁွင်ႉၽဵင်းၵႂၢမ်းသူၼ်းတုမ်ပူၵ်းတိုၼ်ႇ လွင်ႈႁၵ်ႉၸၢတ်ႈ ၼႂ်းဝူင်းတွႆႇတိုင်ႈၸိူင်းလႅဝ်း။ တႅမ်ႈႁွင်ႉ ၵႂၢမ်းမၢၼ်ႈ-ၵႂၢမ်းတႆး ဢမ်ႇယွမ်း 500 ပုၵ်ႈ။ မၼ်းၸၢႆးသဵင်ႈၵမ်ႊ လုၶွႆႈမိူဝ်ႈ 26/12/1994 တီႈဝၢၼ်ႈလၵ်းတႅင်ႇ ပဵင်းလူင်မိူင်းထႆး။