ၵႅမ်ၸွမ်ၸိုင်ႈ မၢႆ 1 မၢၼ်ႈ တိၼ်ႇဢွင်ႇမျိၼ်ႉဢူး ယွၼ်းၵိုတ်း လိုဝ်ႈၵၢၼ်၊ ဝၢႆးပွၵ်ႈယႃတူဝ်မိူင်းသိင်ႊၵပူဝ်ႊ၊ လၢႆၾၢႆႇဝႃႈ ၸၢင်ႈပဵၼ်ယွၼ်ႉၸပ်းတၢင်းပဵၼ်မၢၵ်ႇႁဵင်း/ ၶႅၼ်ႊသိူဝ်ႊ။

VOA ဢွၵ်ႇၶၢဝ်ႇမိူဝ်ႈဝၼ်းသဝ်ထိ 05/05/12 ၵၢင်ၶမ်ႈဝႃႈ- ၸွမ်းၼင်ႇလႆႈတွင်ႈထၢမ်ၼၼ်ႉလႆႈႁူႉဝႃႈ ပူၼ်ႉမႃးဢမ်ႇႁိုင်ၼႆႉ တိၼ်ႇဢွင်ႇမျိၼ်ႉဢူး (ၵႅမ်ထိ 1 ၶွင်ၸွမ်ၸိုင်ႈတဵင်းၸဵင်ႇ) ၵႂႃႇယႃတူဝ်တီႈသိင်ႊၵပူဝ်ႊ၊ ပေႃးပွၵ်ႈမႃးၶိုၼ်းၵေႃႈ ယွၼ်းတၢင်ႇ ၵိုတ်းလိုဝ်ႈၵၢၼ် မိူဝ်ႈဝၼ်းထိ 03/05/12 ။
ဢၼ်လႆႈႁူႉၸွမ်းလွင်ႈတၢင်းယွၼ်းၵိုတ်းလိုဝ်ႈၵၢၼ်ထႅင်ႈၼၼ်ႉ ယွၼ်ႉပိူဝ်ႈပၢႆးယူႇလီၼႆ ဢမ်ႇလႆႈလၢတ်ႈပႃး၊ ဢမ်ႇလၢတ်ႈ ပႃးသေတႃႉ မိူဝ်ႈလဵဝ် လႆႈငိၼ်းဝႃႈပၢႆးယူႇလီဢမ်ႇပေႃးၶႅမ်ႉ၊ တီႈလွတ်ႇၶေႃးဢွၵ်ႇတုမ်ႇ မိူၼ်ပဵၼ်ၶႅၼ်ႊသိူဝ်ႊဝႆႉ၊ ယွၼ်ႉၼၼ် ၸင်ႇလႆႈတၢင်ႇယွၼ်းၵိုတ်းလိုဝ်ႈ-ၸိူဝ်းၸမ်ၸႂ်လူင်ပွင်ၸိုင်ႈလၢတ်ႈ။

ဢၼ်တိၼ်ႇဢွင်ႇမျိၼ်ႉဢူးတၢင်ႇယွၼ်းၵိုတ်းလိုဝ်ႈၵၢၼ်ၼႆႉ တေႁပ်ႉဢမ်ႇႁပ်ႉၼၼ်ႉ မီးတီႈၸွမ်ၸိုင်ႈ တဵင်းၸဵင်ႇ၊ မိူဝ်ႈလဵဝ် မၼ်းၸဝ်ႈမီးယူႇတီႈဝတ်ႉတီႈၼိုင်ႈတီႈမေႃႇပီႇသေ ယွၼ်းၼုင်ႈသၢင်ႇၵၢၼ်းဝႆႉ- ၵူၼ်းဝႃႈၸိူင်ႉၼႆၵေႃႈမီး။

ၸွမ်းၼင်ႇ VOA လႆႈတွင်ႈထၢမ်တီႈၵူဝ်ႇၵူဝ်ႇလၢႆႇ (ၼႂ်းၽူႈၵိူဝ်းၵုမ် 9 ၵေႃႉ) ၶွင်ၸွမ်ၸိုင်ႈ တွပ်ႇလၢတ်ႈဝႃႈ မၼ်းၸဝ်ႈယင်း ပႆႇႁူႉလွင်ႈၼႆႉ- ဝႃႈၼႆ။

ဝၼ်းၸၼ်ထိ 07/05/12 (မိူဝ်ႈၼႆႉ) တေမီးၵၢၼ်ၸတ်းပၢင်ၵုမ်၊ ၸၢင်ႈလႆႈဢွၵ်ႇလိၵ်ႈပိုၼ်ၽၢဝ်ႇၵဵဝ်ႇၵပ်း လွင်ႈၼႆႉ-လႅင်ႇၶၢဝ်ႇဢၼ်ၸမ်ၸႂ်လုမ်းၸွမ်ၸိုင်ႈလၢတ်ႈၼႄ VOA ၵႂႃႇၼင်ႇၼႆ။

ဢွင်ႇလိၼ်းထုတ်ႉ ၵေႃႉဢၼ်ပၢႆႈၽေးယူႇတီႈမိူင်းဢိင်းၵလဵတ်ႈ (ဢၼ်ယၢမ်ႈႁူႉၸၵ်းတိၼ်ႇဢွင်ႇမျိၼ်ႉဢူး) လၢတ်ႈဝႃႈ- တိၼ်ႇဢွင်ႇမျိၼ်ႉဢူးၼႆႉ ၼႂ်းၸုမ်းႁူဝ်ၶႅင်မၼ်းပဵၼ်ၵေႃႉထိၼိုင်ႈ၊ ၸဵမ်မိူဝ်ႈယူႇၼႂ်းတပ်ႉသိုၵ်းၵေႃႈ တိုၼ်းပဵၼ်ၵူၼ်းႁူဝ်ၶႅင်၊ လၢတ်ႈၵႂၢမ်းၵေႃႈၶႅင်၊ မိူဝ်ႈလဵဝ် လႆႈငိၼ်းဝႃႈပဵၼ်တၢင်းပဵၼ်ၶႅၼ်ႊသိူဝ်ႊ။ ၵဵဝ်ႇၵပ်း လွင်ႈတိၺွပ်းဢွင်ႇသၢၼ်းၸုၵျီႇလႄႈသင်၊ တိၺွပ်းၸၢႆးယဵတ်ႉထေႃး (ၵေႃႉလုၺ်းၼမ်ႉၶဝ်ႈႁႅမ်းလိုဝ်ႈ တီႈႁိူၼ်းဢွင်ႇသၢၼ်းၸုၵျီႇ) လႄႈသင်၊ လွင်ႈတေပွႆႇဢမ်ႇပွႆႇဢွင်ႇ သၢၼ်းၸုၵျီႇလႄႈသင်၊ ဢၼ်ပွႆႇဢွင်ႇသၢၼ်း ၸုၵျီႇ ဝၢႆးၵၢၼ်လိူၵ်ႈတင်ႈၸိူဝ်ႈၼႆႉလႄႈသင်၊ ဢၼ်ၸွႆႈတႅပ်းတတ်းပႃးမၼ်း ၵေႃႉၼိုင်ႈ- ဝႃႈၼႆ။

တိၼ်ႇဢွင်ႇမျိၼ်ႉဢူး ပဵၼ်ၵူၼ်းၵေႃႉဢၼ်ဢမ်ႇပေႃးႁၼ်လီၼိူဝ်ၵၢၼ်လႅၵ်ႈလၢႆႈ၊ ပဵၼ်ၵူၼ်းႁူဝ်ၶႅင်၊ ပဵၼ်ၵူၼ်းၵိၼ်ငိုၼ်း သေ ၸိုဝ်ႈယႂ်ႇမႃး- ၶၢဝ်ႇၼႂ်းဝူင်းၵၢၼ်ၽွင်းတၢင်ၵေႃႈႁူဝ်ႈဢွၵ်ႇမႃးၼင်ႇၼႆ။

တိၼ်ႇဢွင်ႇမျိၼ်ႉဢူး ဢႃႇယု 61 ပီ၊ ယဝ်ႉႁူင်းႁဵၼ်း DSA ၸုပ်ႈ 12 ၊ ယၢမ်ႈပဵၼ်ၽူႈၵွၼ်းတိူင်းသိုၵ်း ၸဵင်ႇႁွင်ႇဝၼ်းဢွၵ်ႇ(လႃႈသဵဝ်ႈ) မိူဝ်ႈပီ 1990 ။ ဝၢႆးမႃး ၶိုၼ်ႈၸၼ်ႉပဵၼ်ၽူႈၼမ်းၼႂ်းမၢႆ 1 ၼႂ်းၸုမ်းသိုၵ်း မၢၼ်ႈ။ ထိုင်မႃးပီ 2009 ၶဝ်ႈၼႂ်းပႃႇတီႇ သၢင်ႇသီႈ USDP သေ ဝၢႆးၵၢၼ်လိူၵ်ႈတင်ႈ 2010 ယဝ်ႉ လႆႈႁပ်ႉလိူၵ်ႈၸိုဝ်ႈ တႅင်ႇတင်ႈပဵၼ်ၵႅမ်ၸွမ်ၸိုင်ႈၵေႃႉထိ 1 မႃး။