လွင်ႈတိၼ်ႇဢွင်ႇမျိၼ်ႉဢူး (ၵႅမ်ၸွမ်ၸိုင်ႈ 1) ယွၼ်းၵိုတ်းလိုဝ်ႈၼႃႈၵၢၼ်ၼၼ်ႉ ယင်းပႆႇၼႄႉၼွၼ်း တႅတ်ႈတေႃး၊ တိုၵ်ႉပဵၼ်ၶၢဝ်ႇဝႆႉလၢႆလၢႆၵူၺ်း။

ၽွင်းတႅၼ်းသိူဝ်ၽိူၵ်ႇ ပွတ်းဢွၵ်ႇၶူင်းၵေႃႉၼိုင်ႈလၢတ်ႈဝႃႈ- လွင်ႈတိၼ်ႇဢွင်ႇမျိၼ်ႉဢူး ယွၼ်းၵိုတ်းလိုဝ်ႈ ၵၢၼ်ၼႆႉ လႆႈငိၼ်းၶၢဝ်ႇဝႆႉၸဵမ်မိူဝ်ႈႁဝ်းတိုၵ်ႉမီးၼႂ်းသၽႃး ပွၵ်ႈၵမ်းထိ 3 ။ ၵွပ်ႈပႆႇမီးလွင်ႈၼႄႉၼွၼ်း လႄႈဢမ်ႇပိုတ်ႇလၢတ်ႈ၊ တေႃႇမိူဝ်ႈလဵဝ်ၵေႃႈ လွင်ႈတေၵိုတ်းလိုဝ်ႈၵၢၼ်ၼႆႉ ယင်းပႆႇၼႄႉၼွၼ်းၼင်ႇၵဝ်ႇ၊ မီးၶၢဝ်ႇဢွၵ်ႇဝႆႉၸိူင်ႉၼႆၵူၺ်း။ ပေႃးမၼ်း ၸဝ်ႈတေၵိုတ်းလိုဝ်ႈၵၢၼ်/ဢွၵ်ႇၵၢၼ်တႄႉတႄႉ တေလႆႈႁဵတ်းပၢင်ၵုမ် သၽႃးသေပူတ်းထွၼ်ယူႇ၊ ၵွပ်ႈဝႃႈၼႂ်းသၽႃးတႅင်ႇ တင်ႈမႃး- ဝႃႈၼႆ။

ပၢင်ၵုမ်သၽႃးပွၵ်ႈၵမ်း 3 တႄႇမိူဝ်ႈဝၼ်းထိ 23/04/12 သေ ဝၼ်းထိ 02/05/12 ပိုတ်ႇႁပ်ႉၼၢင်းဢွင်ႇသၢၼ်းၸုၵျီႇၶဝ်ႈ သၽႃး ၵၢဝ်ႇၵိၼ်ႇၵဵဝ်ႇၵပ်းလွင်ႈၶဝ်ႈႁၢပ်ႇၵိုတ်ႉၼႃႈၵၢၼ်တၼ်းႁဵင်းသေပိတ်းႁပ်းၵႂႃႇ။

တိၼ်ႇဢွင်ႇမျိၼ်ႉဢူး လုၵ်ႉတီႈသိုၵ်းမႃးၼႆသေတႃႉ ဢမ်ႇၸႂ်ႈၽူႈတႅၼ်းသိုၵ်းတႅင်ႇတင်ႈ၊ ပဵၼ်ၵေႃႉဢၼ် လုၵ်ႉၼႂ်းၵၢၼ် လိူၵ်ႈတင်ႈသၽႃးတႂ်ႈမႃးသေ ၾၢႆႇသိုၵ်းၶဝ်လႆႈတႅင်ႇတင်ႈပဵၼ်ၵႅမ်ၸွမ်ၸိုင်ႈ 1 ၊ ၸွမ်ၸိုင်ႈ တဵင်းၸဵင်ႇ ပဵၼ်သၽႃးတႂ်ႈ၊ ၻွၵ်းတိူဝ်ႊၸၢႆးမွၵ်ႇၶမ်း ၵႅမ်ၸွမ်ၸိုင်ႈ 2 ပဵၼ်သၽႃးၼိူဝ်- ၽူႈလဵပ်ႈႁဵၼ်း ၸဝ်ႈၼိုင်ႈလၢတ်ႈၼႄၼင်ႇၼႆ။

VOA ဢွၵ်ႇၶၢဝ်ႇမိူဝ်ႈ 05/05/12 ၵၢင်ၶမ်ႈဝႃႈ- ပူၼ်ႉမႃးဢမ်ႇႁိုင်ၼႆႉ တိၼ်ႇဢွင်ႇမျိၼ်ႉဢူး ၵႂႃႇယႃတူဝ်တီႈ သိင်ႊၵပူဝ်ႊ၊ ပေႃးပွၵ်ႈမႃးၶိုၼ်းၵေႃႈ ယွၼ်းတၢင်ႇၵိုတ်းလိုဝ်ႈၵၢၼ် မိူဝ်ႈဝၼ်းထိ 03/04/12 ။ လွင်ႈတၢင်းယွၼ်း ၵိုတ်းလိုဝ်ႈၵၢၼ်ထႅင်ႈ ၼၼ်ႉ ယွၼ်ႉပိူဝ်ႈပၢႆးယူႇလီၼႆဢမ်ႇလၢတ်ႈပႃးသေတႃႉ မိူဝ်ႈလဵဝ်လႆႈငိၼ်းဝႃႈပၢႆးယူႇလီ ဢမ်ႇပေႃးၶႅမ်ႉ၊ တီႈလွတ်ႇၶေႃးဢွၵ်ႇ တုမ်ႇမိူၼ်ပဵၼ်ၶႅၼ်ႊသိူဝ်ႊဝႆႉ၊ ၸင်ႇလႆႈတၢင်ႇယွၼ်းၵိုတ်းလိုဝ်ႈ-ၸိူဝ်းၸမ် ၸႂ်လူင်ပွင်ၸိုင်ႈလၢတ်ႈၼင်ႇၼႆ။

တိၼ်ႇဢွင်ႇမျိၼ်ႉဢူး ဢႃႇယု 61 ပီ၊ ယဝ်ႉႁူင်းႁဵၼ်း DSA ၸုပ်ႈ 12 ၊ ယၢမ်ႈပဵၼ်ၽူႈၵွၼ်းတိူင်းသိုၵ်း ၸဵင်ႇႁွင်ႇဝၼ်းဢွၵ်ႇ(လႃႈသဵဝ်ႈ) မိူဝ်ႈပီ 1990 ။ ဝၢႆးမႃး ၶိုၼ်ႈၸၼ်ႉပဵၼ်ၽူႈၼမ်းၼႂ်းမၢႆ 1 ၼႂ်းၸုမ်းသိုၵ်း မၢၼ်ႈ။ ထိုင်မႃးပီ 2009 ၶဝ်ႈၼႂ်း ပႃႇတီႇသၢင်ႇသီႈ USDP သေ ဝၢႆးၵၢၼ်လိူၵ်ႈတင်ႈ 2010 ယဝ်ႉ လႆႈႁပ်ႉလိူၵ်ႈ ၸိုဝ်ႈတႅင်ႇတင်ႈပဵၼ်ၵႅမ်ၸွမ်ၸိုင်ႈၵေႃႉထိ 1 မႃး။ ပဵၼ်ၵူၼ်းၵေႃႉဢမ်ႇပေႃးႁၼ်လီၼိူဝ်ၵၢၼ်လႅၵ်ႈလၢႆႈ၊ ပဵၼ်ၵူၼ်းႁူဝ်ၶႅင်၊ ပဵၼ်ၵူၼ်းၵိၼ်ငိုၼ်းသေၸိုဝ်ႈယႂ်ႇမႃး။