မၢၵ်ႇတႅၵ်ႇႁိမ်းၾၢႆႇလင်တပ်ႉမၢၼ်ႈ 513 ဝဵင်းပၢင်လူင်၊ တိူဝ်ႉသႂ်ႇၸၢဝ်းပဢူဝ်းသွင်ၵေႃႉပူႇဢွၵ်ႇၽူဝ်မေး ဢၼ်ၵႂႃႇ သိုဝ်ႉတီႈလိၼ်တီႈၼၼ်ႈသေ ၵိူင်ၶုတ်းလိၼ်တေ ႁဵတ်းႁိူၼ်း၊ ၵေႃႉၽူဝ်ၺႃးၸၢၵ်ႇတၢႆထင်တီႈ။

မိူဝ်ႈဝၼ်းထိ 01/05/12 ယၢမ်းဝၢႆးဝၼ်း 1 မူင်းၼၼ်ႉ မၢၵ်ႇတႅၵ်ႇတီႈဝၢၼ်ႈမႂ်ႇ (ဝၢၼ်ႈပူၵ်းပွင်တူဝ်ယၢင်ႇ)၊ ဢၼ်မီးၾၢႆႇလင် တပ်ႉမၢၼ်ႈ ၶမယ 513 ပၢင်လူင်၊  ၾၢႆႇႁွင်ႇဝတ်ႉ/ၵျွင်းမုၼ်ၸဝ်ႈ (ၵိင်ႇၸႄႈဝဵင်းပၢင်လူင်)။ တိူဝ်ႉသႂ်ႇၸၢဝ်းပဢူဝ်းသွင်ၵေႃႉ ပူႇဢွၵ်ႇၽူဝ်မေး (ဢၼ်လုၵ်ႉတၢင်းဢိူင်ႇႁၢႆးၼၢင်း မႃးသိုဝ်ႉတီႈလိၼ် ပွတ်းၼၼ်ႉ) ၽွင်းသွင်ၶႃတိုၵ်ႉၵိူင်လိၼ် ၶုတ်းလိၼ်ယူႇၼႂ်းသူၼ် ပိူဝ်ႈတႃႇႁဵတ်းႁိူၼ်း။
ၵဵဝ်ႇၵပ်းလွင်ႈၼႆႉ ၽူႈၸမ်ၸႂ်ၾၢႆႇပၢႆးယူႇလီၵေႃႉၼိုင်ႈလၢတ်ႈဝႃႈ-ၸၢဝ်းပဢူဝ်းသွင်ၵေႃႉပူႇဢွၵ်ႇၽူဝ်မေးၼႆႉ ဢႃႇယုမွၵ်ႈ 30 ၼင်ႇၵၼ်၊ ယွၼ်ႉမၢၵ်ႇတႅၵ်ႇတိူဝ်ႉၺႃးသေ ၵေႃႉပဵၼ်ၽူဝ်တၢႆထင်တီႈ၊ ၵေႃႉပဵၼ်မေးတႄႉ ယင်းတိုၵ်ႉၶဝ်ႈႁူင်းယႃပၢင်လူင် ယူႇႁၢၼ်ႉတေႃႇမိူဝ်ႈလဵဝ်။ ဢွင်ႈတီႈလိၼ်ဢၼ်မၢၵ်ႇတႅၵ်ႇၼႆႉ ပဵၼ်တီႈလိၼ် ဢၼ်ႁူဝ်ပဝ်ႈဝၢၼ်ႈႁၢႆးၼၢင်းယိုတ်းဢဝ်ၶွင် ၵူၼ်းဝၢၼ်ႈသေတတ်းႁဵတ်းလွၵ်းၶၢႆတေႃႇၵူၼ်းဝၢၼ်ႈၶိုၼ်း- ဝႃႈၼႆ။

ၵူၼ်းပၢင်လူင်ဢၼ်ၵႆႉၶဝ်ႈဢွၵ်ႇၼႂ်းတပ်ႉသိုၵ်းၵေႃႉၼိုင်ႈလၢတ်ႈဝႃႈ- မၢၵ်ႇဢၼ်တႅၵ်ႇၼႆႉ ၵဝ်ၶႃႈဝူၼ်ႉဝႃႈ ပဵၼ်သိုၵ်းမၢၼ်ႈ ၶမယ 513 ၶဝ်ႁၢင်ႈၵၢင်ဝႆႉသေလိုမ်းၵဵပ်းၵူႈၶိုၼ်း၊ ၵွပ်ႈဝႃႈ တၢင်းလင်တပ်ႉ ပွတ်းမၢၵ်ႇတႅၵ်ႇၼႆႉ ၶဝ်ပႂ်ႉယၢမ်း/ဢဝ်ႁူမ်ႇလူမ်ႈ ယူႇၵေႃႈ ၶဝ်ဢမ်ႇဝႆႉဝၢင်းၸႂ်လွင်ႈႁူမ်ႇလူမ်ႈ။ ၵွပ်ႈဝႃႈ မိူဝ်ႈပူၼ်ႉမႃးၽွင်းၸုမ်း ယိပ်းၵွင်ႈၵၢင်ႇၸၢဝ်းၶိူဝ်းပႆႇဢုပ်ႇဢူဝ်းတူၵ်း လူင်းၵိုတ်းယိုဝ်းၼၼ်ႉ တၢင်းပွတ်းတွၼ်ႈၼၼ်ႉ ၵူၼ်းယိပ်းၵွင်ႈ ၶဝ်ၵႆႉလတ်းၵႂႃႇလတ်းမႃးသေႇ၊ မၢၵ်ႇဢၼ်တႅၵ်ႇၵႂႃႇၼႆႉၵေႃႈ ႁၢင်ႈၵၢင်ဝႆႉမိူဝ်ႈလႂ် ဢမ်ႇႁူႉ-ဝႃႈၼႆ။

ပွတ်းတွၼ်ႈၼႆႉ ဢွၼ်တၢင်းမီးၸုမ်းယိပ်းၵွင်ႈၵၢင်ႇပဢူဝ်း ဢၼ်လႅၵ်ႈလၢႆႈႁဵတ်းပီႇတုၸိတ်ႉ တင်း တပ်ႉသိုၵ်း ၸိုင်ႈတႆး (လွႆတႆးလႅင်း) ၶဝ်တူင်ႉၼိုင်လတ်းၽၢၼ်ႇၵႂႃႇမႃး- ၵူၼ်းပၢင်လူင်ၶဝ်လၢတ်ႈၼႄၼင်ႇၼႆ။