သိုၵ်းတႆး RCSS တင်းသိုၵ်းမၢၼ်ႈ ပဵၼ်ပၢင်တိုၵ်းၵၼ် ပွတ်းသၼဵၼ်း ၼႂ်းၸႄႈဝဵင်းပၢင်လူင်။ ၾၢႆႇသိုၵ်းတႆးဝႃႈ ပဵၼ်ပိုၼ်ႉတီႈၼႃႈလိၼ် RCSS/SSA တူင်ႉၼိုင်၊ ယွၼ်ႉသိုၵ်းမၢၼ်ႈဢမ်ႇပွင်ႇလၢတ်ႈလူင်ႈၼႃႈသေ ၶဝ်ႈမႃးလႄႈ လႆႈႁိုၵ်ႉၽႃႇၺႃးၵၼ် ပဵၼ်ပၢင်တိုၵ်း။

ဝၼ်းတီႈ 05/04/2017 (မိူဝ်ႈၼႆႉ) တင်ႈတႄႇယၢမ်း 12:30-13:00 မူင်း၊ ၶၢဝ်းတၢင်း 30 မိၼိတ်ႊ၊ ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) ပဵၼ်ပၢင်တိုၵ်းၵၼ် တီႈႁိမ်းဝၢၼ်ႈၼမ်ႉသၢႆး ဢိူင်ႇတၢတ်ႇဢေ ၼႂ်းၸႄႈဝဵင်းပၢင်လူင် ၸိုင်ႈတႆးပွတ်းၸၢၼ်း။ ၾၢႆႇသိုၵ်းမၢၼ်ႈပဵၼ်တပ်ႉၶလယ 246 ႁႅင်းသိုၵ်းမီးမွၵ်ႈ 60 ၵေႃႉ [ပႃႈတႂ်ႈတိူင်းသိုၵ်းဝၼ်းဢွၵ်ႇၵၢင် ယလၶ (ၶူဝ်လမ်)] ။ ၾၢႆႇသိုၵ်းတႆး ပဵၼ်သၢႆသိုၵ်း ဢၼ်တူင်ႉၼိုင်ၼႂ်းပိုၼ်ႉတီႈ ပွတ်းတွၼ်ႈၼႃႈလိၼ် ပၢင်လူင်၊ လွင်ႈလူႉသုမ်းတင်းသွင်ၾၢႆႇၼၼ်ႉ ယင်းပႆႇလႆႈႁူႉ- ၼႆယဝ်ႉ။

ၽူႈၶၢၼ်ပၢၵ်ႇ RCSS/SSA ၸဝ်ႈသိုၵ်းၸၢႆးငိုၼ်း လၢတ်ႈဝႃႈ -"ပၢင်တိုၵ်းပွၵ်ႈၼႆႉ ပဵၼ်ၾၢႆႇႁွင်ႇပၢင်လူင် ၵႄႈၵၢင်ဝၢၼ်ႈၼမ်ႉသၢႆး-ၵုင်းႁီး၊ ယၢၼ်ဝဵင်းပၢင်လူင်မွၵ်ႈ 10 လၵ်းပၢႆ၊ ပဵၼ်ၼႂ်းၼႃႈတီႈႁဝ်း၊ ဢမ်ႇပေႃးၵႆဝၢၼ်ႈၵူၼ်း။ လွင်ႈတၢင်းဢၼ်ပဵၼ်ပၢင်တိုၵ်းၼႆႉ ၾၢႆႇတပ်ႉသိုၵ်းမၢၼ်ႈၶဝ်ဢမ်ႇပွင်ႇလူင်ႈၼႃႈသေ ၶဝ်ႈမႃး၊ လႆႈမႃးၽႃႇႁိုၵ်ႉၺႃးၵၼ်သေ လႆႈပဵၼ်ပၢင်တိုၵ်း 30 မိၼိတ်ႊ။ ပေႃးဢဝ်ပိူင်မၼ်းဝႃႈ ပေႃးယိပ်းၵွင်ႈၵၢင်ႇ သေၶဝ်ႈမႃး ၶဝ်တေလႆႈပွင်ႇလၢတ်ႈ။ ၵူၺ်းၵႃႈ ဢမ်ႇၸႂ်ႈဝႃႈၾၢႆႇသိုၵ်းမၢၼ်ႈၶဝ်မီးၽႅၼ်သေမႃးၼင်ႇၵဝ်ႇ၊ မိူဝ်ႈလဵဝ် ၾၢႆႇသိုၵ်းမၢၼ်ႈၶဝ်ၶိုၼ်းထွႆထွၼ် ၵႂႃႇမီးဝႆႉၼႂ်းဝၢၼ်ႈၼမ်ႉသၢႆး"- ဝႃႈၼႆ။

ၵဵဝ်ႇၵပ်းလွင်ႈၼႆႉ တၢင်း RCSS/SSA ၵေႃႈလႆႈပွင်ႇလၢတ်ႈၵႂႃႇတီႈ JMC (ၶွမ်ႊမတီႊလူလွမ်ၵုမ်းတူၺ်း ၵၢၼ်ၵိုတ်းတိုၵ်း)၊ ၵွပ်ႈသင်လႄႈ ၾၢႆႇတပ်ႉသိုၵ်းမၢၼ်ႈၶဝ်ဢမ်ႇပွင်ႇမႃး၊ ႁႂ်ႈၸွႆႈၵႄႈလိတ်ႈပၼ်။ ပေႃးဢဝ်ပိူင် NCA ဝႃႈ တေလႆႈပွင်ႇၵၼ်၊ ဢမ်ႇပွင်ႇလၢတ်ႈၵၼ်သေပႃးၵွင်ႈၵၢင်ႇမႃးၼႂ်းၼႃႈတီႈႁဝ်းၼႆႉ လႆႈဝႃႈၶဝ်ပူၼ်ႉပႅၼ်- ၸဝ်ႈသိုၵ်းၸၢႆးငိုၼ်း သိုပ်ႇလၢတ်ႈ။

ၶွင်ႊသီႊဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA)ၼႆႉ ပႃးၼႂ်းၸုမ်းၸၢဝ်းၶိူဝ်း ဢၼ်လူင်းလၢႆးမိုဝ်း ၵၢၼ်ၵိုတ်းယိုဝ်းတူဝ်ႈမိူင်း (NCA) ဝႆႉ ၸွမ်းလူင်ပွင်ၸိုင်ႈမၢၼ်ႈ။ ဝၢႆးလင်လူင်းလၢႆးမိုဝ်းမႃးယဝ်ႉ တပ်ႉပၢင်သဝ်း RCSS/SSA မိူၼ်ၼင်ႇပွတ်းတူင်ႇလၢဝ်း မိူင်းၵိုင်ၸိူဝ်းၼႆႉၵေႃႈ ထုၵ်ႇသိုၵ်းလူင်ပွင်ၸိုင်ႈမၢၼ်ႈ ၶဝ်ႈယိုဝ်း။

 

ပူၼ်ႉမႃးမိူဝ်ႈၽွင်းႁူဝ်လိူၼ်မၢတ်ႊၶျ်ၼၼ်ႉၵေႃႈ ၾၢႆႇသိုၵ်းမၢၼ်ႈတပ်ႉပႃႈတႂ်ႈၶမယ 504 ၊ ဢၼ်ပဵၼ်တပ်ႉ တူင်ႉၼိုင်ၼႂ်းၸႄႈဝဵင်းသီႇပေႃႉ ၶဝ်ႈလေႃႇတိုၵ်းယိုဝ်း တပ်ႉပၢင်သဝ်း RCSS/SSA ဢၼ်မီးတီႈဢိူင်ႇဢုမ်မူႉ ၸႄႈဝဵင်းသီႇပေႃႉ ၸိုင်ႈတႆးပွတ်းႁွင်ႇ၊ ဢၼ်မီးၾၢႆႇႁွင်ႇဝဵင်းသီႇပေႃႉမွၵ်ႈ 7 လၵ်း ၸိူဝ်းၼႆႉ။ ၾၢႆႇတပ်ႉသိုၵ်းမၢၼ်ႈ ဢိင်ဢၢင်ႈဝႃႈပဵၼ် ၶၵ်ႉၵၢၼ်ၵႂၢတ်ႇလၢင်ႉၼႃႈလိၼ်- ၼႆယဝ်ႉ။