သင်ၶၸဝ်ႈ၊ ပေႃႈမႄႈပီႈၼွင်ႉတၵ်ႉၵႃႇသတ်ႉထႃး တင်းၼမ်လၢႆ ႁူမ်ႈၵၼ် ပႂ်ႉႁပ်ႉတွၼ်ႈ ၸဝ်ႈသိလ် ထမ်းဝုၼ်းၸုမ်ႉ တႃႇမႃးမဵတ်ႉတႃႇထမ်း ပၼ်ပီႈၼွင်ႉၵူၼ်းမိူင်း ၼႂ်းဢိူင်ႇမိူင်းပူးလူင် ပဵၼ်ပွၵ်ႈၵမ်းႁႅၵ်ႈ ဝႃႈၼႆ။

ဝၼ်းတီႈ 21/03/2017 ယၢမ်းႁူဝ်ၶမ်ႈ 17:00 မူင်းပၢႆ သင်ၶၸဝ်ႈ၊ ပီႈၼွင်ႉတၵ်ႉၵႃႇသတ်ႉထႃး ပီႈၼွင်ႉတႆး၊ တဢၢင်းလႄႈ လႃးႁူႇ ႁူမ်ႈၵၼ်ပႂ်ႉႁပ်ႉတွၼ်ႈၸဝ်ႈသိလ်ထမ်းဝုၼ်းၸုမ်ႉ တီႈဝၢၼ်ႈ ၵဵင်းႁိၼ် ဢိူင်ႇမိူင်းပူးလူင် ၸႄႈဝဵင်းမိူင်းပဵင်း ၸႄႈတွၼ်ႈၵဵင်းတုင် ၸိုင်ႈတႆး ပွတ်းဢွၵ်ႇၶူင်း။ ၸဝ်ႈသိၼ်ထမ်းဝုၼ်းၸုမ်ႉ ယေႃးတူဝ်မႃးမိူင်းပူးလူင်ပွၵ်ႈၼႆႉ တႃႇမႃး ႁေႃးတြႃး သူင်ႇမဵတ်ႉတႃႇပၼ် ၽီသၢင်သတ်းၵူၼ်းလႄႈ တိုဝ်းၵမ်/ၵျၢင်ႉၵမ် တႃႇၶၢဝ်းတၢင်း 4 ၶိုၼ်း ဝႃႈၼႆ။

ၸၢႆးဢွင်ႇပႃႉ ၵူၼ်းမိူင်းပိုၼ်ႉတီႈ ဢိူင်ႇမိူင်းပူးလူင် လၢတ်ႈဝႃႈ “ ၼ်ႂ်းထုင်ႉမိူင်းပူးလူင်ၼႆႉ မီးလွႆလွမ်ႉ ႁွပ်ႈဝႆႉသေ ၵဵဝ်ႇၵပ်းလွင်ႈသႃသၼႃ မိူၼ်ၼင်ႇ ဝတ်ႉဝႃးၽႃသိူဝ်ႇၵဝ်ႇၵႄႇ၊ ၵွင်းမူးၵဝ်ႇၵႄႇလႄႈ ထမ်ႈ ၸွမ်းလွႆၸိူဝ်းၼႆႉ မီးဝႆႉတင်းၼမ်။ ယွၼ်ႉၼၼ် ၽူႈမီးပၺ်ၺႃ ဢိၵ်ႇတင်းၸဝ်ႈၽူႈႁေႃးတြႃး တႆးႁဝ်း ၵေႃႈ ၽႂ်ပႆႇႁွတ်ႈၽႅဝ်လႆႈသေပွၵ်ႈ။ ၵူၺ်းၵႃႈ ဢိင်ၼိူဝ် ၶေႃႈမဵတ်ႉတႃႇတြႃးၸဝ်ႈၶူး ဝႃးဝုၼ်းၸုမ်ႉ ႁဝ်း သေ ၸင်ႇယေႃးၶိင်းမႃးႁေႃးတြႃးပၼ် ပေႃႈမႄႈပီႈၼွင်ႉတၵႃႇသတ်ႉထႃး” ဝႃႈၼႆ။

ၶပ်ႉမၢႆ ၸဝ်ႈသိလ်ထမ်းဝုၼ်းၸုမ်ႉ ဢွၵ်ႇၶၢဝ်းတၢင်းယေႃးၶိင်း မႃးတၢင်းဢိူင်ႇမိူင်းပူးလူင်သမ်ႉ ၼႂ်းဝၼ်းတီႈ 21/03/2017 သူင်ႇမဵတ်ႉတႃႇတြႃး ပွၼ်ႈထမ်းပၼ်ၽီသၢင်သတ်းၵူၼ်း တီႈသူၼ်မႆႉႁွမ် ဝၢၼ်ႈပဵင်းသၢင်း။ ဝၼ်းတီႈ 22-25/03/2017 သမ်ႉ ၸဝ်ႈသိလ်ထမ်းဝုၼ်းၸုမ်ႉ ဢတိတ်ႉထၢၼ်ႇ ၶဝ်ႈထမ်ႈ တိုဝ်းၵမ်တြႃး ဢမ်ႇလၢတ်ႈၵႂၢမ်း၊ ဢမ်ႇၵိၼ်ၶဝ်ႈ တႃႇ3 ဝၼ်း 3 ၶိုၼ်း တီႈထမ်ႈႁူဝ်ၼမ်ႉ ဢိူင်ႇမိူင်းပူးလူင် ဝႃႈၼႆ။

ၼႂ်းဝၼ်းတီႈ 25 ယၢမ်းဝၢႆးဝၼ်း15:00 မူင်းပၢႆ ၸင်ႇယေႃးတူဝ်ပွၵ်ႈၶိုၼ်း  တၢင်းမိူင်းပဵင်း မီးၽူႈယႂ်ႇ ၵူၼ်းလူင် လႄႈ သင်ၶၸဝ်ႈလႄႈ ပီႈၼွင်ႉတၵ်ႉၵႃႇသတ်းထႃး ၸွမ်းသူင်ႇၸဝ်ႈသိလ်ထမ်း ဝုၼ်း ၸုမ်ႉ တင်းၼမ်လၢႆ၊ လူတ်ႉၵႃး ၸွမ်းသူင်ႇ 12 လမ်း ဝႃႈၼႆ။

ဢိူင်ႇမိူင်းပူးလူင်ၼႆႉ မီးဝၢၼ်ႈတႆး 13 ဝၢၼ်ႈ မိူၼ်ၼင်ႇ ဝၢၼ်ႈၵဵင်းႁိၼ်၊ ဝၢၼ်ႈၵုၼ်ၵွၵ်ႇ၊ ဝၢၼ်ႈတူင်ႈ၊ ဝဵင်းၵဝ်ႇ၊ ဝဵင်းႁွင်ႇ၊ ဝဵင်းၸၢၼ်း၊ ၸွမ်တွင်း၊ ပဵင်းသၢင်း၊ ၼႃးလေး၊ လွၼ်းၵႅဝ်ႇ၊ ဝၢၼ်ႈၶုမ်ႉ၊ တႃႈပူး ဝၢၼ်ႈပီႈၼွင်ႉလွႆ၊ လႃးႁူႇ ၸိူဝ်းၼႆႉၵေႃႈမီး ဝႃႈၼႆ။

ၸုမ်းၶၢဝ်ႇၽူႈတွႆႇႁွၵ်ႈ/ ၸၢႆးယွတ်ႈၶမ်း