ၼႂ်းပီ 2015 သိုၵ်းမၢၼ်ႈ ႁႅၼ်းသိုၵ်းလေႃႇတိုၵ်း ပႃႇတီႇမႂ်ႇသုင်ၸိုင်ႈတႆး တပ်ႉသိုၵ်းၸိုင်ႈတႆး SSPP/SSA လႄႈသွင်ၾၢႆႇလႆႈပဵၼ်ပၢင်တိုၵ်းၵၼ် 101 ပွၵ်ႈ၊ သွင်ၾၢႆႇလႆႈတိူဝ်ႉဝၢတ်ႇ/တၢႆ ႁိမ်း 400 ၵေႃႉ။

တပ်ႉသိုၵ်းလူင်ပွင်ၸိုင်ႈမၢၼ်ႈ လႄႈ တပ်ႉသိုၵ်းၸိုင်ႈတႆး SSPP/SSA

ၽူႈမီးပုၼ်ႈၽွၼ်း ႁွင်ႈၵၢၼ်ငဝ်ႈလုမ်း ၸဝ်ႈၼိုင်ႈလၢတ်ႈဝႃႈ - “ၼႂ်းပၢင်တိုၵ်း 101 ပွၵ်ႈၼႆႉ ၽူႈႁတ်းႁၢၼ် ၾၢႆႇ SSPP/SSA လႆႈမွပ်ႈတၢၼ်းသၢႆၸႂ်ပၼ်ဝၢၼ်ႈမိူင်း 30 ၵေႃႉ ၊ ဝၢတ်ႇၸဵပ်း 60 ပၢႆ ၊ ၾၢႆႇတပ်ႉသိုၵ်း လူင်ပွင်ၸိုင်ႈမၢၼ်ႈ သမ်ႉ ၸွမ်းၼင်ႇလႆႈႁပ်ႉႁူႉ သၢႆမၢႆတပ်ႉလႂ် တပ်ႉၼၼ်ႉ ႁူမ်ႈတင်းမူတ်း တၢႆဝၢတ်ႇ 300  ပၢႆပၢႆ”  ဝႃႈၼႆ ။
ပၢင်တိုၵ်း ဢၼ်လႆႈပဵၼ် ၼႂ်းပီ 2015 တင်းမူတ်း ဢၼ်သိပ်ႉထီႇသုတ်း ပဵၼ်ၼႂ်းလိူၼ် ဢွၵ်ႊထူဝ်ႊၿိူဝ်ႊ တင်း ၼူဝ်ႊဝႅမ်ႊပိူဝ်ႊ။ သိုၵ်းမၢၼ်ႈၸႂ်ႉၶိူင်ႈဝိၼ် ယိုဝ်းသိုၵ်းသႅၼ်း MIG 29  တင်း MI 35 လၢႆလၢႆလမ်းသေ လေႃႇတိုၵ်း ႁူမ်ႈဝၼ်း 8 ဝၼ်း၊ လေႃႇတိုၵ်း 10 ၵမ်းပၢႆ-ဝႃႈၼႆ။

ၾၢႆႇတပ်ႉသိုၵ်းၸိုင်ႈတႆး လႆႈထွၼ်ပၼ် တပ်ႉတႃႈသၢမ်ပူး လႄႈ တပ်ႉ ဢွၼ်ႇတပ်ႉဢိတ်းၵမ်ႈၽွင်ႈ ၼႆသေတႃႉ ၸွမ်းၼင်ႇ ၶေႃႈတူၵ်းလူင်း သိုၵ်းမၢၼ်ႈ တင်း သိုၵ်းတႆး တၵ်းတေလႆႈထွၼ်ဢွၵ်ႇ ၼႂ်းပိုၼ်ႉတီႈပၢင်တိုၵ်း တွၼ်ႈၾၢႆႇ ၸၢၼ်းတၢင်းၵႃး မိူင်းၼွင် - မိူင်းသူႈ တင်းသွင်ၾၢႆႇ။

ယွၼ်ႉပၢင်တိုၵ်းသေ ၵူၼ်းဝၢၼ်ႈၵူၼ်းမိူင်း ၼႂ်းတူင်ႇဝဵင်း မိူင်းၼွင်၊ မိူင်းၸၢင်၊ မိူင်းသူႈ၊ ၵေးသီး ႁူဝ်ၵူၼ်းႁိမ်းသႅၼ် ဢိုပ်းႁၢမ်းသုၼ်ႇလႆႈတွတ်ႈၶႅပ်းၵၢင်ၸႂ်။ ၵူၼ်းမိူင်းမိုၼ်ႇပၢႆလႆႈပၢႆႈ ယၢၼ်ႁိူၼ်းယေးတီႈယူႇ။ ယၢမ်းလဵဝ် ၵူၼ်းပၢႆႈၽေးသိုၵ်း ၸိူဝ်းမီးယူႇတီႈႁၢႆးပႃ၊ မိူင်းသူႈ၊ ဝၢၼ်ႈဝႃႉ တင်းမူတ်း ႁိမ်းသွင်ႁဵင်ၵေႃႉ ယင်းပႆႇ ၸၢင်ႈပွၵ်ႈယူႇၶိုၼ်းတီႈဝၢၼ်ႈၵိူတ်ႇမိူင်းၼွၼ်း ၸဝ်ႈၵဝ်ႇၶိုၼ်း။

ဢၼ်လႆႈပဵၼ်ပၢင်တိုၵ်းၵၼ်ၼႆႉ ၵမ်ႈၽွင်ႈထတ်းသၢင်ဝႃႈ- ယွၼ်ႉ SSPP/SSA ဢမ်ႇပႆႇၽွမ်ႉလူင်းလၢႆးမိုဝ်း ၵၢၼ်ၵိုတ်းယိုဝ်းတူဝ်ႈမိူင်း (NCA) ၊ ၵမ်ႈၽွင်ႈဝႃႈ ယွၼ်ႉပိူဝ်ႈပိုၼ်ႉတီႈ လမ်ႇလွင်ႈတႃႇၵၢၼ်သိုၵ်း၊ ၵမ်ႈၽွင်ႈဝႃႈ ၶိုင်ယႃႉပၢင်လိူၵ်ႈ တင်ႈ။

ၽူႈၶၢၼ်ပၢၵ်ႇပႃႇတီႇႁူဝ်သိူဝ် (SNLD) ၸၢႆးလဵၵ်ႉတႄႉ လၢတ်ႈဝႃႈ ပဵၼ်ၵွပ်ႈသိုၵ်းမၢၼ်ႈ ၶႂ်ႈသိုပ်ႇၵုမ်းၵမ် ဢမ်းၼၢၸ်ႈ (ဢႃႇၼႃႇၸၢၵ်ႈ) ဝၢၼ်ႈမိူင်းၵူၺ်း- ဝႃႈၼႆ။