သၽႃးၵူၼ်းမိူင်းလႄႈ သၽႃးၸိူဝ်ႉၸၢတ်ႈ တီႈၼေႇပျီႇတေႃႇၸုပ်ႈမႂ်ႇၼႆႉ  တေပိုတ်ႇပၢင်ၵုမ် ၽူႈတႅၼ်းသၽႃးၵူၼ်းမိူင်း လႄႈသၽႃးၸိူဝ်ႉၸၢတ်ႈ ပွၵ်ႈၵမ်းတီႈ 2 ။

ဝၼ်းတီႈ 01/02/2016  ဝၼ်းၸၼ်တေထိုင်ၼႆႉ သၽႃးၵူၼ်းမိူင်းလႄႈ သၽႃးၸိူဝ်ႉၸၢတ်ႈၸုပ်ႇမႂ်ႇ ပွၵ်ႈတီႈ 2 ၼႆႉၽူႈတႅၼ်းသၽႃးပီ 2015 တေလႆႈၶဝ်ႈပၢင်ၵုမ်သၽႃး ပဵၼ်ပွၵ်ႈတီႈ 2  မီးၽူႈတႅၼ်း တင်းမူတ်း 1000 ပၢႆ ။


ၸၢႆးသႅင်မိူင်း ၽူႈတႅၼ်းသၽႃး ၵူၼ်းမိူင်း ၸႄႈဝဵင်းမိူင်းၵိုင်ႇ လၢတ်ႈဝႃႈ  ပေႃးဝၼ်းတီႈ 1 ၼႆႉတေၶိုၼ်းတႄႇပၢင်ၵုမ်မႂ်ႇ တႃႇတေလိူၵ်ႈႁူဝ်ပဝ်ႈသၽႃးၵူၼ်းမိူင်းလႄႈ သၽႃးၸိူဝ်ႉၸၢတ်ႈ ။ တေလႆႈလိူၵ်ႈၽူႈၼင်ႈၸိုင်ႈဢွၼ်တင်း တေႃႈလဵဝ် ၽူႈၼင်ႈၸိုင်ႈမၼ်းဢမ်ႇမီးယဝ်ႉ ၵွပ်ႈၼၼ် တႃႇတေၶတ်းလိူၵ်ႈႁူဝ်ပဝ်ႈၽူႈၼင်ႈၸိုင်ႈဢွၼ်တၢင်းသေ ဝၢႆးၼၼ်ႉၵေႃႈၽူႈၼင်ႈၸိုင်ႈ တေပဵၼ်ၵေႃႉၸတ်းၵၢၼ်ၶပ်းၶိုင်သၽႃးၸုပ်ႈမႂ်ႇ ။


မိူဝ်ႈလဵဝ် ၽူႈတႅၼ်းသၽႃးၼႂ်းသၢႆတပ်ႉသိုၵ်း တင်းသွင်သၽႃး ပေႃးဢဝ်ပုၼ်ႈသူၼ်ႇမၼ်းဝႃႈၸိုင် တေမီး 25 ပုၼ်ႈ ၊ ပေႃးဢဝ်ႁူဝ်ၵူၼ်းဝႃႈၸိုင် သၽႃးၸိူဝ်ႉၸၢတ်ႈ တေမီးတပ်ႉသိုၵ်းယူႇ 56 ၵေႃႉ ၊ သၽႃးၵူၼ်းမိူင်း 110 ၵေႃႉ ။


တီႈၼင်ႈၼႂ်းသၽႃးမိူင်းႁူမ်ႈတုမ်ၼႆႉ သၽႃးၽူႈတႅၼ်းၵူၼ်းမိူင်း မီး 440 တီႈၼင်ႈ ၊ သၽႃးၽူႈတႅၼ်းၸိူဝ်ႉၸၢတ်ႈ 224 တီႈၼင်ႈ ၊ သၽႃးၽူႈတႅၼ်းၸႄႈဝဵင်းလႄႈ တိူင်းသမ်ႉ 662 တီႈၼင်ႈၼႂ်းသၽႃး တင်းမူတ်း 1326 တီႈၼင်ႈ ။ ၼႆႉပဵၼ်သၽႃး မိူင်းႁူမ်ႈတုမ်မျၢၼ်ႇမႃႇ ။


ပႃႊတီႊႁူဝ်သိူဝ် (SNLD) မီးၽူႈတႅၼ်းၼႂ်းသၽႃးၵူၼ်းမိူင်း 12 ၵေႃႉ ၊ ၽူႈတႅၼ်းသၽႃးၸိူဝ်ႉၸၢတ်ႈ 3 ၵေႃႉ ႁူမ်ႈၵၼ် 15 ၵေႃႉ ၼႆယဝ်ႉ ။


ၽူႈတႅၼ်းၵဝ်ႇၶွင်သၽႃးၵူၼ်းမိူင်း တင်းသၽႃးၸိူဝ်ႉၸၢတ်ႈ ၸုပ်ႈ ပီ 2010 ထိုင် 2015 ၼၼ်ႉ သုတ်းသဵင်ႈဢႃယု ဝၼ်းတီႈ 28/01/2016 ။ သၽႃးမိူင်းႁူမ်ႈတုမ်မျၢၼ်ႇမႃႇၵေႃႈ သုတ်းသဵင်ႈ ၼႂ်းဝၼ်းတီႈ 29/01/2016 ၼႆႉယဝ်ႉ ။