ၸုမ်း UN-SRCAC ပိုၼ်ၽၢဝ်ႇဝႃႈ တပ်ႉသိုၵ်းမၢၼ်ႈ တင်း သိုၵ်းၸၢဝ်းၶိူဝ်း 7 ၸုမ်း မီးသိုၵ်းလုၵ်ႈဢွၼ်ႇ။ RCSS/SSA ဢမ်ႇမီးပေႃႇလသီႇ ၵဵပ်းသိုၵ်းလုၵ်ႈဢွၼ်ႇ၊ ဢၼ်မီးၼၼ်ႉ ပဵၼ်ၸိူဝ်းပေႃႈမႄႈမႃးၾၢၵ်ႇဝႆႉ တႃႇၶဝ်ႈႁူင်းႁဵၼ်း- ၽူႈၶၢၼ်ပၢၵ်ႇ RCSS/SSA လၢတ်ႈ။

မိူဝ်ႈဝၼ်းတီႈ 16/07/2015 (မိူဝ်ႈဝႃး)ၼႆႉ တူဝ်တႅၼ်းၶိုၵ်ႉတွၼ်း ႁွင်ႈၵၢၼ်လူင် ၽူႈၼမ်းၼႂ်း ၸၢတ်ႈၸိုင်ႈလုမ်ႈၾႃႉ ၾၢႆႇၵႅတ်ႇၵင်ႈသုၼ်ႇလႆႈလုၵ်ႈဢွၼ်ႇ လႄႈ ပၼ်ႁႃလွင်ႈၸုမ်းယိပ်းၵွင်ႈၵၢင်ႇ (UN-SRCAC) ပိုၼ်ၽၢဝ်ႇဝႃႈ- တပ်ႉသိုၵ်းမၢၼ်ႈလႄႈ ၸုမ်းယိပ်းၵွင်ႈၵၢင်ႇၸၢဝ်းၶိူဝ်း 7 ၸုမ်း ၸႂ်ႉၵိၼ်ႁႅင်းသိုၵ်းလုၵ်ႈဢွၼ်ႇ။

ၵဵဝ်ႇၵပ်းလွင်ႈၼႆႉ တူဝ်တႅၼ်းၶိုၵ်ႉတွၼ်း Miss Leila Zerrougui ပိုၼ်ၽၢဝ်ႇဝႃႈ- သိုၵ်းမၢၼ်ႈ ပႃးၸဵမ်ၸုမ်း ယိပ်းၵွင်ႈၵၢင်ႇၸၢဝ်းၶိူဝ်း မိူၼ်ၼင်ႇ DKBA (တပ်ႉသိုၵ်းယၢင်းပုတ်ႉထ)၊ KIA (တပ်ႉသိုၵ်းၶၢင်လွတ်ႈလႅဝ်း)၊ KNLA (တပ်ႉသိုၵ်းပူတ်းပွႆႇ ၸိူဝ်ႉၸၢတ်ႈယၢင်းၽိူၵ်ႇ)၊ KNPC (တပ်ႉသိုၵ်းယၢင်းလႅင်) ၊ တပ်ႉသိုၵ်းၸိုင်ႈတႆး ပွတ်းၸၢၼ်း (SSA-S) ၊ တပ်ႉသိုၵ်းမိူင်းဝႃႉၽွမ်ႉႁူမ်ႈ (UWSA) ၶဝ်ၸိူဝ်းၼႆႉ မီးသိုၵ်းလုၵ်ႈဢွၼ်ႇ- ၼႆယဝ်ႉ။

ၼၢင်း Miss Leila Zerrougui ၼႆႉ မႃးဢႅဝ်ႇယဵမ်ႈမိူင်းမၢၼ်ႈ ၶၢဝ်းတၢင်း 5 ဝၼ်း၊ မိူဝ်ႈဝႃး ဝၼ်းတီႈ 16/07/2015 ၼႆႉ ပဵၼ်ဝၼ်းလိုၼ်းသုတ်းသေ ၸတ်းပၢင်သပ်းၸႅင်ႈၶၢဝ်ႇ တီႈဝဵင်းတႃႈၵုင်ႈ၊ ဢွၵ်ႇလိၵ်ႈပိုၼ်ၽၢဝ်ႇဝႃႈ - သိုၵ်းမၢၼ်ႈလႄႈ ၸုမ်းယိပ်းၵွင်ႈၵၢင်ႇၸၢဝ်းၶိူဝ်း 7 ၸုမ်း ၸႂ်ႉၵိၼ်ႁႅင်းသိုၵ်း လုၵ်ႈဢွၼ်ႇ။ ပိူဝ်ႈတႃႇၵႅတ်ႇၶႄႁႄႉၵင်ႈ သုၼ်ႇလႆႈလုၵ်ႈဢွၼ်ႇ၊ ပိူဝ်ႈတႃႇႁဵတ်းသၢင်ႈၽွၼ်းလီ ပၼ်လုၵ်ႈဢွၼ်ႇၼၼ်ႉ ဢၼ်ဢဝ်လုၵ်ႈဢွၼ်ႇဢႃယု ပႆႇတဵမ် 18 ႁဵတ်းသိုၵ်းၸိူဝ်းၼႆႉ ၸုမ်းယိပ်းၵွင်ႈၵၢင်ႇ ၵူႈမူႇၵူႈၸုမ်း တၵ်းလႆႈၶဝ်ႈပႃးသၢၼ်မိုဝ်းၵၼ် ၸွမ်းၼင်ႇၽႅၼ်ၵၢၼ် ၵိုတ်းပႅတ်ႈၵၢၼ်ၸႂ်ႉႁႅင်းသိုၵ်းလုၵ်ႈဢွၼ်ႇ။ ၸုမ်းယိပ်းၵွင်ႈၵၢင်ႇၶဝ်ၸိူဝ်းၼႆႉ ထုၵ်ႇလီႁူမ်ႈမိုဝ်း ၼႂ်းၽႅၼ်ၵၢၼ်ၼႆႉ- ၼႆယဝ်ႉ။

ဢိင်ၼိူဝ်ၾၢႆႇ UN ဝႃႈ- တပ်ႉသိုၵ်းၸိုင်ႈတႆး မီးသိုၵ်းလုၵ်ႈဢွၼ်ႇၼၼ်ႉသေ ၽူႈၶၢၼ်ပၢၵ်ႇ ၶွင်ႊသီႊဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) ၸဝ်ႈသိုၵ်းလူင်ၸၢႆးလႃႉ လၢတ်ႈဝႃႈ- ၼႂ်းႁဝ်းၶႃႈၼႆႉ မီးလုၵ်ႈဢွၼ်ႇဢႃယု ပႆႇတဵမ် 18 ယူႇ၊ ၵူၺ်းၵႃႈ ၶဝ်ၸိူဝ်းၼႆႉ ႁဝ်းၶႃႈဢမ်ႇလႆႈတီႉၺွပ်းဢဝ်မႃး၊ ပေႃႈမႄႈၶဝ်ဢဝ်မႃးၾၢၵ်ႇ။ ၾၢႆႇၼိုင်ႈၵေႃႈ ၶဝ်ဢမ်ႇၸႂ်ႈသိုၵ်း၊ ၶဝ်ၸိူဝ်းၼႆႉ ပဵၼ်လုၵ်ႈႁဵၼ်းမႃးႁဵၼ်းလိၵ်ႈ တေႃႇပေႃးဢႃယု 18 ။ လွင်ႈၸိူဝ်းၼႆႉ မၼ်းပဵၼ်လွင်ႈမၢပ်ႇၽၢမ်း ၸီႉၼႄးၵၼ်ၵူၺ်း။ ၵွပ်ႈၼၼ် ၽူႈမီးပုၼ်ႈၽွၼ်းၶဝ် ထုၵ်ႇလီမႃးဢႅဝ်ႇယဵမ်ႈတူၺ်း တီႈငဝ်ႈငုၼ်းလွႆတႆးလႅင်းယူႇ၊ လွင်ႈဝႃႈ ဢမ်ႇမီးသိုၵ်းလုၵ်ႈဢွၼ်ႇ - ဝႃႈၼႆ။

ၸဝ်ႈသိုၵ်းလူင်ၸၢႆးလႃႉ ယင်းသိုပ်ႇလၢတ်ႈထႅင်ႈဝႃႈ-  RCSS/SSA ၼႆႉ ဢမ်ႇမီးပေႃႇလသီႇ တႃႇတေ ၵဵပ်းသိုၵ်းလုၵ်ႈဢွၼ်ႇ။ ၵူၺ်းၵႃႈ ၵူၼ်းမိူင်းတႆး ဢႃယု 18 တေႃႇထိုင် 45 ၼႆႉ တၵ်းလႆႈႁၢပ်ႇၵၢၼ်သိုၵ်း ၵူႈၵေႃႉ ၼႆၼၼ်ႉမီးပေႃႇလသီႇယူႇ၊ ၼႂ်းၼၼ်ႉ ၶႂ်ႈႁၢပ်ႇၵၢၼ်သိုၵ်း 2 ပီ၊ 3 ပီ၊ 5 ပီ၊ ဢမ်ႇၼၼ် တေႃႇၸူဝ်ႈၵေႃႈလႆႈ၊ မီးပိူင်ၸိူင်ႉၼၼ်ယူႇ- ဝႃႈၼႆ။

ၵေႃႉပဵၼ်တူဝ်တႅၼ်းၶိုၵ်ႉတွၼ်း UN-SRCAC ၼႆႉ ဢွၵ်ႇၶၢဝ်းမႃးဢႅဝ်ႇၸိုင်ႈမိူင်းႁူမ်ႈတုမ် ၶၢဝ်းတၢင်း 5 ဝၼ်း တင်ႈတႄႇဝၼ်းတီႈ 12-16/07/2015 ။ လိုၼ်းသုတ်း ဝၼ်းတီႈ 16 ၼႆႉ ၸတ်းပၢင်သပ်းၸႅင်ႈၶၢဝ်ႇ ဢွၵ်ႇလိၵ်ႈပိုၼ်ၽၢဝ်ႇ သေဢွၵ်ႇမိူင်း ပွၵ်ႈမိူဝ်းၵႂႃႇ။