ပႃႊတီႊႁူဝ်သိူဝ် လူင်းႁုပ်ႉထူပ်းႁႃသဵင်ၵၼႅၼ်း ၵူၼ်းမိူင်း ၼႂ်းပိုၼ်ႉတီႈ တၢင်းဝၢၼ်ႈဝဵင်းလၢၼ်း ဢိူင်ႇမိူင်းလဵၼ်း ၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇ လူင်းသပ်းလႅင်းၼႄ ပေႃႇလသီႇပႃႊတီႊ လႄႈ လွင်ႈတွတ်ႈၶႅပ်းၵၢင်ၸႂ် ၵၢၼ်လိူၵ်ႈတင်ႈ ။

\ဝၼ်းတီႈ 16/07/2015 ၶၢဝ်းယၢမ်း 09:00 မူင်းထိုင် 12:00 မူင်း ပႃႊတီႊႁူဝ်သိူဝ် လူင်းႁူပ်ႉထူပ်းၵူၼ်းပိုၼ်ႉတီႈ ဝၢၼ်ႈဝဵင်းလၢၼ်း ဢိူင်ႇမိူင်းလဵၼ်း ၸႄႈဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇ ႁူဝ်ပဝ်ႈပႃႊတီႊႁူဝ်သိူဝ် ဝဵင်းတႃႈၶီႈလဵၵ်း ဢွၼ်ႁူဝ်ၼမ်းၼႃႈသေလူင်းသူၼ်းတုမ် ႁႃသဵင်။ ၼင်ႇႁိုဝ် ၵူၼ်းမိူင်းၼႂ်းပိုၼ်ႉတီႈ ပေႃးတေႁူႉလွင်ႈ တွတ်ႈၶႅပ်းၵၢင်ၸႂ်လိူၵ်ႈၽူႈတႅၼ်း တေလႆႈႁဵတ်းႁိုဝ်၊ လွင်ႈ 2 ပႃႊတီႊတႆးဢမ်ႇႁူမ်ႈၵၼ်ၵွပ်ႈသင်၊ ၵပ်းၵၢႆႇလူၺ်ႈလွင်ႈသဵၼ်သၢႆမၢႆၸိုဝ်ႈသဵင် ၵူၼ်းမိူင်းမီးၸိုဝ်ႈၼႂ်းသဵၼ်ႈသၢႆမၢႆႁူဝ်ႁိူၼ်းယူႇ ၵူၺ်းၵႃႈ သမ်ႉဢမ်ႇမီးၸိုဝ်ႈ ၼႂ်းသဵၼ်ႈသၢႆမၢႆတႃႇတွတ်ႈၶႅပ်းၵၢင်ၸႂ် လိူၵ်ႈၽူႈတႅၼ်းၸိုင် ထုၵ်ႇလႆႈၵႂႃႇလၢတ်ႈၼႄယိုၼ်ႈလဝ်ႈဝႂ်ၾွမ်ႊ တီႈၽူႈၵွၼ်းဢိူင်ႇ/ပွၵ်ႉ ၼွၵ်ႈလိူဝ်သေၼၼ်ႉၵေႃႈ လၢတ်ႈၼႄလွင်ႈပၵ်းပိူင်ၸဝ်ႈႁႆႈ ၸဝ်ႈၼႃး ၸိူဝ်းၼႆႉ။


ၸၢႆးၼုမ်ႇတုၺ်ႈ ၽူႈၼမ်းၼႂ်းဝဵင်းတႃႈၶီႈလဵၵ်းလၢတ်ႈဝႃႈ မိူဝ်ႈၼႆႉၸိူဝ်းႁဝ်း တေဢၢၼ်းၵႂႃႇပိုတ်ႇလုမ်းတီႈ ဝၢၼ်ႈၼမ်ႉၶိုမ်း ဢိူင်ႇၵဵင်းလၢပ်ႈ။ ယွၼ်ႉဝႃႈ ဢမ်ႇလႆႈပွင်ႇၶၢဝ်ႇပၼ်တီႈၾၢႆႇၵွမ်ႊမသျိၼ်ႊၵၢၼ်လိူၵ်ႈတင်ႈ လႄႈႁဝ်းၶႃႈဢမ်ႇပဵၼ်ၵႂႃႇ။ သင်ဝႃႈ ဝၢႆးပၢင်ၵုမ် ဝၼ်းတီႈ 18 ယဝ်ႉ တေၵႂႃႇပိုတ်ႇလုမ်းၶိုၼ်ႈပၢႆႉ လႄႈပူၵ်းတုင်းပႃႊတီႊယူႇ ဝႃႈၼႆ။

ၸၢႆးဢေး ၾၢႆႇသူၼ်းတုမ် ဝဵင်းတႃႈၶီႈလဵၵ်းလၢတ်ႈဝႃႈ ပႃႊတီႊႁူဝ်သိူဝ်ဝဵင်းတႃႈၶီႈလဵၵ်း လူင်းႁူပ်ႉထူပ်းႁႃသဵင်တီႈၵူၼ်းမိူင်း ဝၼ်းတီႈ 16 ၼႆႉ မီးၽူႈပွင်ၵၢၼ်ၼႂ်းပႃႊတီႊ  ၵႅမ်ႁူဝ်ပဝ်ႈ လုင်းၶုၼ်မျႅတ်ႈ၊ ၽူႈၼမ်းၼႂ်း ၸၢႆးၼုမ်ႇတုၺ်ႈ၊ ၾႃႇသူၼ်းတုမ် ပွတ်းဢွၵ်ႇၶူင်း လုင်းၸၢႆးၺုၼ်ႉ၊ ၾၢႆသူၼ်းတုမ် ဝဵင်းတႃႈၶီႈလဵၵ်း ၸၢႆးဢေးလႄႈ ၵေႃၵမ်ၵၢၼ်ထႅင်ႈလၢႆလၢႆၵေႃႉ ဝႃႈၼႆ။


ပႃႊတီႊႁူဝ်သိူဝ်လႆႈလူင်းသူၼ်းတုမ်ႁႃသဵင် ၵမ်းၼႆႉ မီးၵူၼ်းမိူင်းၼႂ်းပိုၼ်ႉတီႈမႃးၶဝ်ႈႁူမ်ႈထွမ်ႇ တင်းမူတ်းတေမီးမွၵ်ႈ 200 ၵေႃႉပၢႆ ၼႆယဝ်ႉ။

ပႃႊတီႊႁူဝ်သိူဝ် လႆႈပိုတ်ႇလုမ်းၵႂႃႇတၢင်းပွတ်းဢွၵ်ႇၶူင်း မီး 9 ၸႄႈဝဵင်း၊ ၽူႈၶဝ်ႈပဵၼ်လုၵ်ႈၸုမ်းပႃႊတီႊ မီးၸမ်ၸမ် 20,000 ၵေႃႉ ၼႆယဝ်ႉ။

ပႃႊတီႊႁူဝ်သိူဝ် တႅပ်းတတ်းတေလူင်းၶႄႉၶႅင်ႇလိူၵ်ႈၽူႈတႅၼ်းၼႂ်း ပၢင်လိူၵ်ႈတင်ႈ ပီ 2015 ၼႆႉတင်းမူတ်း 158 ၵေႃႉ။