ဢိင်ၼိူဝ် ၾၢႆႇတပ်ႉသိုၵ်းမၢၼ်ႈ ပႆႇပွႆႇပၼ်ၶိုၼ်း ၵူၼ်းၸုမ်းဝႃႉ ဢၼ်ပဵၼ်ၸၢဝ်းၶႄႇ 6 ၵေႃႉလႄႈ ၾၢႆႇသိုၵ်းဝႃႉ ဢမ်ႇႁၢၼ်ႉၸႂ်။ သွင်ၾၢႆႇၶဵင်ႈၶႅင် ၵၢၼ်သိုၵ်းတေႃႇၵၼ်ၶိုၼ်း ၼႂ်းၸႄႈဝဵင်း မိူင်းတူၼ်။ ဢိုတ်းပိၵ်ႉသဵၼ်ႈတၢင်း မိူင်းတူၼ်တေႃႇထိုင် BP1 ။

ယွၼ်ႉပိူဝ်ႈသွင်ၾၢႆႇ ၶဵင်ႈၶႅင်ၵၢၼ်သိုၵ်းတေႃႇၵၼ်ၼႆႉလႄႈ  တင်ႈတႄႇမိူင်းႁၢင်၊ ပုင်ႇပႃႇၶႅမ် လူင်းထိုင် BP1 (လႅၼ်လိၼ်ထႆး) ၸိူဝ်းၼႆႉ သိုၵ်းဝႃႉဢဝ်တီႈယူႇပၵ်းပႂ်ႉဝႆႉမူတ်း။ ၾၢႆႇဢွၵ်ႇပုင်ႇပႃႇၶႅမ် တေႃႇထိုင်ဝၢၼ်ႈမႂ်ႇ၊ သၼ်လွႆၾၢႆႇတူၵ်း ၾၢႆႇႁွင်ႇပုင်ႇပႃႇၶႅမ် တေႃႇပေႃးထိုင်မိူင်းႁၢင်ၸိူဝ်းၼႆႉ သိုၵ်းဝႃႉဢဝ်တီႈယူႇဝႆႉတင်းမူတ်း။ လိူဝ်သေၼၼ်ႉ လုၵ်ႉဢဝ်ၼႃးၵွင်းမူး ၵႂႃႇမိူင်းၵျွတ်ႈ သဵၼ်ႈတၢင်းလူင်တွၼ်ႈတၢင်းၸၢၼ်းၵေႃႈ ပဵၼ်တပ်ႉဝႃႉပၵ်းပႂ်ႉတူင်ႉၼိုင်။

တင်ႈတႄႇဢဝ်မိူင်းတူၼ် ဢွၵ်ႇမႃးတေႃႇပေႃးထိုင်မိူင်းႁၢင် သမ်ႉပဵၼ်သိုၵ်းမၢၼ်ႈပၵ်းပႂ်ႉဝႆႉ။ သဵၼ်ႈတၢင်းလူင် တွၼ်ႈတၢင်းႁွင်ႇ ပဵၼ်တပ်ႉပႂ်ႉလႅၼ်လိၼ် (လႃးႁူႇ) တင်း တပ်ႉသိုၵ်းမၢၼ်ႈ တူင်ႉၼိုင်ပၵ်းပႂ်ႉဝႆႉ။ ၸွမ်းတၢင်း လုၵ်ႉမိူင်းတူၼ် တေႃႇထိုင်ၼႃးၵွင်းမူး- ပုင်ႇပႃႇၶႅမ်ၸိူဝ်းၼႆႉ သွင်ၾၢႆႇ (သိုၵ်းမၢၼ်ႈတင်းသိုၵ်းဝႃႉ) ၵူတ်ႇထတ်းၵူၼ်းၵႂႃႇမႃး ရူတ်ႉၵႃးၼင်ႇၵၼ်။ ၾၢႆႇၼိုင်ႈၵေႃႈ တိုၵ်ႉထႅမ်ႁႅင်းသိုၵ်းထႅင်ႈ ၼင်ႇၵၼ်။ မိူဝ်ႈလဵဝ်ၼႆႉ ႁဵတ်းႁႂ်ႈၵူၼ်းဝၢၼ်ႈၵူၼ်းမိူင်း ၼႂ်းပိုၼ်ႉတီႈမႆႈၸႂ် ၵူဝ်ပဵၼ်ပၢင်တိုၵ်းၵၼ်- ၼႆယူႇ။

ဢိင်ၼိူဝ်လွင်ႈတၢင်းၸိူဝ်းၼႆႉသေ ၽွင်းတႅၼ်းမိူင်းတူၼ် ၸၢႆးဝိၼ်းမျၢတ်ႉဢူး ၵေႃႈလၢတ်ႈဝႃႈ- သွင်ၾၢႆႇၼႆႉ ဢမ်ႇပၼ်ၵူၼ်းဝၢၼ်ႈၵူၼ်းမိူင်းၵႂႃႇမႃးယဝ်ႉ၊ ၶမ်ႈဝႃးၼႆႉ ရူတ်ႉတီႈႁိူၼ်းႁဝ်းၶႃႈ ယင်းလႆႈပွၵ်ႈၶိုၼ်းမိူင်းတူၼ်။ ပေႃးပဵၼ်ပၢင်တိုၵ်းၵၼ်တႄႉ ဢၼ်ၺႃးၸၢၵ်ႇမၼ်း ပဵၼ်ၵူၼ်းဝၢၼ်ႈၵူၼ်းမိူင်းယဝ်ႉ၊ ၶၢဝ်းၼႆႉ ပဵၼ်ၶၢဝ်းဢၼ်  တေလႆႈဢဝ်ၽၵ်းမီႇၽိူၵ်ႇၶၢႆ။ ၵူၺ်းၵႃႈ ဢၼ်ပဵၼ်ပၼ်ႁႃယူႇယၢမ်းလဵဝ်ၼႆႉ မၼ်းပဵၼ်ၵၼ် တင်းဝႃႉလႄႈ ၶႅၼ်းၸႂ်ဢိတ်းၼိုင်ႈ၊ ပေႃးပဵၼ်ၵၼ်တင်း RCSS တႄႉ ၵူၼ်းမိူင်းၼႆႉ ႁူႉတၵ်းဢမ်ႇလႆႈ ၶႅၼ်းၸႂ်ယဝ်ႉ။ ဢၼ်သွင်ၾၢႆႇၶဵင်ႈၶႅင်ၵၼ်သေ ပိတ်းဢိုတ်းသဵၼ်ႈတၢင်းၸိူင်ႉၼႆ မၼ်းတေတုမ်ႉယွၼ်ႉ ၵၢၼ်ၵႃႉၶၢႆၵူၼ်းမိူင်းၵူၺ်းပႆႇပေႃး၊ ၵၢၼ်ၵိၼ်ၵၢၼ်ယႅမ်ႉၵေႃႈ တေတုမ်ႉတိူဝ်ႉပႃး။ ယွၼ်ႉပိူဝ်ႈၵူၼ်းဝၢၼ်ႈ ၵူၼ်းမိူင်းပွတ်းတွၼ်ႈၼႆႉ လိူဝ်သေႁဵတ်းသူၼ်ၽၵ်းမီႇသေ တေႃႉတၢင်ႇၶၢႆၼႆႉ ဢမ်ႇမီးၵၢၼ်မၢၵ်ႈမီးဢီႈသင်- ဝႃႈၼႆ။

ပူၼ်ႉမႃးၽွင်းႁူဝ်လိူၼ်ၵျုၼ်ႊၼႆႉၾၢႆႇတပ်ႉသိုၵ်းမၢၼ်ႈ တင်းတပ်ႉပလိၵ်ႈမၢၼ်ႈ ၶဝ်ႈၵႂႃႇၵူတ်ႇထတ်းပႃႇမႆႉ လူင်ပွင်ၸိုင်ႈၵုမ်းၵမ်ဝႆႉ ပွတ်းမိူင်းၶိတ်ႈ၊ တီႉၺွပ်းလႆႈၵူၼ်းၸုမ်းဝႃႉ 16 ၵေႃႉ၊ ၼႂ်းၼၼ်ႉ ၾၢႆႇမၢၼ်ႈဢိင်ဢၢင်ႈဝႃႈ ပဵၼ်ၸၢဝ်းၶႄႇ 6 ၵေႃႉ။ ႁုပ်ႈယိုတ်းဢဝ်ပႃးမႆႉ ဢၼ်ၸုမ်းဝႃႉလိူဝ်ႈတႅပ်းဝႆႉ ၸိူဝ်းၼၼ်ႉတင်းမူတ်း။ သွင်ၾၢႆႇႁူပ်ႉထူပ်းဢုပ်ႇဢူဝ်းၵၼ် တီႈပုင်ႇပႃႇၶႅမ်ယဝ်ႉသေ လႆႈၸႂ်ၵၼ်ထွၼ်သိုၵ်း၊ ပွႆႇပၼ်ၶိုၼ်းၵူၼ်း ၸိူဝ်းတီႉၺွပ်းဝႆႉယဝ်ႉၵေႃႈ ၸၢဝ်းၶႄႇ 6 ၵေႃႉၼၼ်ႉ ၾၢႆႇမၢၼ်ႈယင်းပႆႇပွႆႇပၼ်ၶိုၼ်း။

ဢၼ်ၾၢႆႇသိုၵ်းမၢၼ်ႈၸီႉၼႄးၵၢဝ်ႇႁႃဝႃႈ သိုၵ်းဝႃႉ ပူၼ်ႉပႅၼ်ၶဝ်ႈၼႂ်းပႃႇမႆႉလူင်ပွင်ၸိုင်ႈသေ တႅပ်းမႆႉၶၢႆ၊  ႁုပ်ႈယိုတ်းဢဝ်ပႃးမႆႉဝႃႉၸိူဝ်းၼၼ်ႉ တႃႇမႆႉၸိူဝ်းၼၼ်ႉတႄႉ ဝႃႉယွမ်းပၼ်မၢၼ်ႈဢဝ်ၵႂႃႇယဝ်ႉ။ ၵူၺ်းၵႃႈ မႆႉၸိူဝ်းၼၼ်ႉ ၽိူဝ်ႇမႃးတမ်းၵႃၶၼ်သိုဝ်ႉၶၢႆ ပိူဝ်ႈတႃႇတေႃႉတၢင်ႇ သူင်ႇဢွၵ်ႇၶၢႆတေႃႇၼွၵ်ႈမိူင်းၼၼ်ႉ ၾၢႆႇလူင်ပွင်ၸိုင်ႈမၢၼ်ႈသမ်ႉ ဢမ်ႇပၼ်ၵူၼ်းၸုမ်းဝႃႉႁပ်ႉသိုဝ်ႉ တေႃႉတၢင်ႇဢွၵ်ႇၶၢႆ၊ သမ်ႉပၼ်တၢင်ႇၸုမ်း တၢင်ႇၶွမ်ႊပၼီႊၶဝ်ႁပ်ႉသိုဝ်ႉၵေႃႈပိူင်ၼိုင်ႈ၊ ၵူၼ်းၶႄႇ 6 ၵေႃႉၼၼ်ႉၵေႃႈ မၢၼ်ႈသမ်ႉပႆႇပွႆႇပၼ်ၶိုၼ်းလႄႈ ၾၢႆႇဝႃႉဢမ်ႇႁၢၼ်ႉၸႂ်သေ ၸင်ႇပဵၼ်မႃးလွင်ႈသွင်ၾၢႆႇ ထႅမ်ႁႅင်းသိုၵ်း ၶဵင်ႈၶႅင်ၵၢၼ်သိုၵ်းတေႃႇၵၼ် ၶိုၼ်းပွၵ်ႈၼႆႉ - ၵူၼ်းၼႂ်းပိုၼ်ႉတီႈ ၼႃးၵွင်းမူးၵေႃႉၼိုင်ႈ လၢတ်ႈၼင်ႇၼႆ။