ဢိင်ၼိူဝ် ဝၼ်းၶွပ်ႈၶူပ်ႇတဵမ် 11 ပီ သေ ႁူင်းပွႆႇသဵင် MAP Radio FM 99 ဢွၵ်ႇၶေႃႈပိုၼ်ၽၢဝ်ႇ တုၵ်းယွၼ်း လူင်ပွင်ၸိုင်ႈထႆး ပၼ်ဢၼုၺၢတ်ႈ ႁႂ်ႈႁူင်းပွႆႇသဵင်မႅပ်ႇ လႆႈၶိုၼ်းပွႆႇသဵင်။

ဝၼ်းတီႈ 12 လိူၼ်ၵျႃၼ်ႊ 2015  (ၶၢဝ်းယၢမ်း 18:00-22:00 မူင်း) ႁူင်းပွႆႇသဵင် MAP Radio FM 99 လႆႈၸတ်းႁဵတ်း ပၢင်ၶွပ်ႈၶူပ်ႇ 11 ပီတဵမ်၊ ဢၼ်လႆႈၵေႃႇတင်ႈ ႁူင်းပွႆႇသဵင် MAP Radio FM 99 တီႈႁူင်းလိုဝ်ႈသဝ်း Holiday Garden (ႁေႃးလီႊၻေႊၵႃႊၻဵၼ်ႊ) ၵဵင်းမႆႇ ၸိုင်ႈထႆး ။ မီးၽူႈယႂ်ႇၵူၼ်းလူင် ၽူႈၵေႃႇတင်ႈႁူင်းပွႆႇသဵင်၊ ၽူႈၵမ်ႉၸွႆႈထႅမ်၊ ၽူႈၸတ်းလၢႆးၵၢၼ် ပီႈၼွင်ႉၽူႈထွမ်ႇ လႄႈ လၢႆမူႇလၢႆၸုမ်းၼႂ်းၵဵင်းမႆႇ မႃးၶဝ်ႈႁူမ်ႈမွၵ်ႈ 200 ပၢႆ။

ၸၢႆးသႅင်မိူင်း ႁူဝ်ၼႃႈႁူင်းပွႆႇသဵင်မႅပ်ႇ လႄႈၽူႈၼမ်းၼႂ်းၸုမ်းမႅပ်ႇ လၢတ်ႈဝႃႈ - ၼင်ႇႁိုဝ်ပီႈၼွင်ႉႁႅင်း ၵၢၼ်ႁဝ်းၶဝ် သမ်ႉပေႃးတေလႆႈႁပ်ႉၶေႃႈမုလ်း ၶၢဝ်ႇသၢရ်ၼၼ်ႉၵေႃႈ ပဵၼ်တၢင်းယိူင်းဢၢၼ်းလူင် ၸုမ်းမူလၼိထိမႅပ်ႇႁဝ်းၶႃႈယဝ်ႉ ။ ၼႂ်းၵၢၼ်ဝၢင်းၽႅၼ်ႁဝ်းၶႃႈ တွၼ်ႈၼိုင်ႈၼၼ်ႉ ပူၵ်းတင်ႈ “ ႁူင်းပွႆႇသဵင်မႅပ်ႇ ရေႊတီႊဢူဝ်ႊ” သေ ပွႆႇသဵင်ပၼ်ၾၢႆႇတႆးမႃး တီႈဝဵင်းၵဵင်းမႆႇၼႆႉၵေႃႈ ၶွပ်ႈၶူပ်ႇတဵမ် 11 ပီယဝ်ႉလႄႈ ၶမ်ႈၶိုၼ်းၼႆႉၵေႃႈ ႁဝ်းၶႃႈလႆႈၸတ်းပၼ် ဝၼ်းၵိူတ်ႇ ႁူင်းပွႆႇသဵင် မႅပ်ႇရေႊတီႊ ဢူဝ်ႊ  MAP Radio FM 99 ၶႃႈဢေႃႈ။

ၸၢႆးသႅင်မိူင်း သိုပ်ႇလၢတ်ႈထႅင်ႈဝႃႈ - ပဵၵ်ႉသမ်ႉဝႃႈ ႁူင်းပွႆႇသဵင် မႅပ်ႇႁဝ်းၶႃႈၼႆႉ ဢမ်ႇၵဵဝ်ႇၶွင်ႈတင်း ၵၢၼ်မိူင်းသေတႃႉ ၽွင်းယၢမ်းမိူဝ်ႈလဵဝ်တႄႉ ႁူမ်ႈပႃးတင်းႁူင်းပွႆႇသဵင် ၸုမ်းတူင်ႇဝူင်းၵူၼ်းၼႂ်းမိူင်း ထႆးပတ်းပိုၼ်ႉသေ  တင်ႈတႄႇပီၵၢႆမႃး ႁူင်းပွႆႇသဵင်မႅပ်ႇ ရေႊတီႊဢူဝ်ႊ ႁဝ်းၶႃႈၵေႃႈ လႆႈထုၵ်ႇလူင်ပွင်ၸိုင်ႈသိုၵ်း မိူင်းထႆး သင်ႇဢိုတ်းႁပ်းႁၢမ်ႈပွႆႇသဵင်ဝႆႉ။ ဢၼ်ၼႆႉတႄႉ တေလႆႈဝႃႈ ပီႈၼွင်ႉႁႅင်းၵၢၼ်ၶဝ် ၸိူဝ်းဢၼ်လႆႈပိုင်ႈဢိင် ၶေႃႈမုလ်းၶၢဝ်ႇသၢရ် ဢၼ်ၶိုတ်းတၼ်း တီႈႁူင်းပွႆႇသဵင် မႅပ်ႇရေႊတီႊဢူဝ်ႊ ႁဝ်းၶႃႈ လႆႈၵၢမ်ႇသဝ်ႈဝဝ်းမွင်ၵႂႃႇဢိတ်းၼိုင်ႈ - ဝႃႈၼႆ။

လိူဝ်သေၼၼ်ႉ ၸၢႆးပရၢမ်ႊ ၽူႈၵွၼ်းၸုမ်းမႅပ်ႇ ၊ ဢႃးၸၢၼ် ၽိပ်ႉၽႃး   ၸိူဝ်းၼႆႉ မွၵ်ႇလၢတ်ႈ ၶေႃႈၵႂၢမ်း။ ဢႃးၸၢၼ် ဢူးထႆးဝၼ်း ဢၼ်ပဵၼ်ၽူႈၵေႃႇတင်ႈ ႁူင်းပွႆႇသဵင် ၵေႃႈလႆႈၾၢၵ်ႇၶေႃႈၵႂၢမ်း ပၼ်ပွၼ်း ၼႂ်းဝၼ်းၶွပ်ႈၶူပ်ႇတဵမ် 11 ပီ ႁူင်းပွႆႇသဵင်မႅပ်ႇ။


ၽူႈဢၼ်ယၢမ်ႈပဵၼ် ၽူႈၸတ်းလၢႆးၵၢၼ် မိူၼ်ႇၼင်ႇ ၼၢင်းၻႃးရႃး မၼီႊသီႊဝၼ်ႊ ၊ ၸၢႆးဢွင်ႇထေး တူဝ်တႅၼ်းၽူႈထွမ်ႇလၢႆးၵၢၼ် လႄႈၽူႈၸတ်းလၢႆးၵၢၼ် ၾၢႆႇတႆး ၊ ၼၢင်းမႃးလိၼ်ႊ တူဝ်တႅၼ်း ၸုမ်းၼၢင်းယိင်း (Empower) ၊ ၼၢင်းသီလႃးဝၼ်း တူဝ်တႅၼ်းၸုမ်းၵပ်းသၢၼ် လွင်ႈၼၢင်း ယိင်းတႆး ၸိူဝ်းၼႆႉၵေႃႈ မႃးၶဝ်ႈႁူမ်ႈ မွၵ်ႇလၢတ်ႈၶေႃႈၵႂၢမ်း ပၼ်ၽွၼ်းလီႁူင်းပွႆႇသဵင်ဝႃႈ ၵၢၼ်ပွႆႇသဵင်ၼႆႉ မၼ်းပဵၼ်ၵၢၼ်သိုဝ်ႇသၢရ်ၶဝ်ႈထိုင်လႆႈ၊ မီးၽွၼ်းလီတႃႇပီႈၼွင်ႉႁႅင်းၵၢၼ် တင်းၼမ်တင်းလၢႆ ယိၼ်းၸူမ်းၶွပ်ႈၸႂ်ထိုင်ႁူင်းပွႆႇသဵင်း MAP Radio FM 99 ၼႆယဝ်ႉ။

ၼၢင်းၶမ်းဢုင်ႇ ၽူႈထွမ်ႇလၢႆးၵၢၼ်ႁူင်းပွႆႇသဵင် ဢၼ်မႃးၶဝ်ႈႁူမ်ႈပၢင်ပွႆးလၢတ်ႈဝႃႈ- လႆႈၶၢဝ်ႇငၢဝ်းၶိုတ်း တၼ်း လွင်ႈယူႇသဝ်းၵိၼ်သၢင်ႈ လွင်ႈဝတ်းဝႂ် လွင်ႈထမ်းတြႃး ၼႆယဝ်ႉ။

မၼ်းၼၢင်းယင်းလၢတ်ႈဝႃႈ- ၶႂ်ႈႁႂ်ႈႁူင်းပွႆႇသဵင်ပိုတ်ႇဝႆးဝႆး ယွၼ်ႉပိူဝ်ႈမၼ်းပဵၼ် သၢႆလႅင်းပိူင်းထွင်ႇ ပၼ်ၵူၼ်းႁဵတ်းၵၢၼ်။


ၼႂ်းပၢင်ပွႆးၼႆႉ မီးပႃးၸုမ်းႁိူဝ်းမႂ်ႇ လႄႈတၢင်းၵႃႈၸုမ်းႁႅင်းၵၢၼ်ၽွမ်ႉႁူမ်ႈ( WSA) မႃးမူၼ်ႈၸႂ်ပၼ်။

ႁူင်းပွႆႇသဵင် Mapradio FM 99.0 MHz ၼႆႉ ၵေႃႇတင်ႈမႃးမိူဝ်ႈ ဝၼ်းတီႈ 23 လိူၼ် ၾႅပ်ႊၿိဝ်ႊရီႊ 2004 ၽူႈၸတ်းလၢႆးၵၢၼ်တႄႉပဵၼ် ၸၢႆးသႅင်မိူင်း မင်းၵွၼ်း ၊ ၸၢႆးတုမ်ႇမွၵ်ႇႁၢၼ် ၊ ၼၢင်းၶမ်းဢိင်ႇ လႆႈၵႂႃႇႁူမ်ႈၸတ်းတီႈ FM 99.0 MHz ဢၼ်ဢႃးၸၢၼ်ဢူႊထႆႊဝၼ်ႊ ပဵၼ်ၸဝ်ႈၶွင်ဝႆႉ။

ထိုင်မႃး ပီ 2007 ၵေႃႈလႆႈသိုဝ်ႉဢဝ် ႁူင်းပွႆႇသဵင်သေ ပဵၼ်မႃးႁူင်းပွႆႇသဵင် Map radio ၵမ်းသိုဝ်ႈ ၸႂ်ႉတိုဝ်းၸိုဝ်ႈဝႃႈ သဵင်ထႅမ်ႁႅင်းမႂ်ႇ ၼႆတေႃႇထိုင်ယၢမ်းလဵဝ်။