ဢိင်ၼိူဝ်တပ်ႉသိုၵ်းဝႃႉပွတ်းတႂ်ႈ (ၸၢၼ်း) တင်း သိုၵ်းမၢၼ်ႈ ၶဵင်ႈၶႅင်ၵၢၼ်သိုၵ်းတေႃႇၵၼ်သေ တပ်ႉသိုၵ်းဝႃႉ ပွတ်းၼိူဝ် (ႁွင်ႇ) ၾိုၵ်းၵၢၼ်သိုၵ်း ႁၢဝ်ႈႁႅင်း။

တပ်ႉသိုၵ်းဝႃႉ မိူဝ်ႈပၢင်ပွႆးၶုၵ်းထူပ်းလွင်ႈငမ်းယဵၼ် 20 ပီ တီႈငဝ်ႈငုၼ်းပၢင်သၢင်း

လၢႆလၢႆဝၼ်းမႃးၼႆႉ ၼႂ်းၼႃႈလိၼ်ၽွင်းငမ်းတူဝ်ၵဝ်ႇဝႃႉ (ပွတ်းၼိူဝ်) ၸိုင်ႈတႆးပွတ်းႁွင်ႇ (ပွတ်းဢွၵ်ႇၶူင်း) တပ်ႉသိုၵ်းမိူင်းဝႃႉၽွမ်ႉႁူမ်ႈ (UWSA) ၾိုၵ်းၵၢၼ်သိုၵ်းမႃးႁၢဝ်ႈႁႅင်း။ ၼႂ်းၸႄႈဝဵင်းပၢင်ဝၢႆ၊ ၼႃးၽၢၼ်း၊ မိူင်းမႂ်ႇ၊ ပၢင်သၢင်းၸိူဝ်းၼႆႉ တပ်ႉသိုၵ်းဝႃႉ ႁွင်ႉဢဝ်ၵူၼ်းသိုၵ်းၶဝ်ၶဝ်ႈၾိုၵ်းၵၢၼ်သိုၵ်း၊ ၾိုၵ်းယိုဝ်းၵွင်ႈလူင်၊ ယိုဝ်းၵွင်ႈႁိူဝ်းဝိၼ်၊ ၾိုၵ်းႁေႃႈလူတ်ႉၵၢပ်ႇလဵၵ်း၊ ယိုဝ်းၵွင်ႈသႅၼ်းၸိူဝ်းမႃးမႂ်ႇ ၸိူဝ်းၼႆႉ။ ၵွင်ႈၸိူဝ်းဢၼ်ဢမ်ႇလႆႈၸႂ်ႉမႃးႁိုင်ၸိူဝ်းၼႆႉၵေႃႈ ဢဝ်ထူၵ်းဢွၵ်ႇမႃး ၾိုၵ်းယိုဝ်း၊ ၾိုၵ်းၵၢၼ်သိုၵ်း ယိုဝ်းၵွင်ႈမိူၼ်ၼင်ႇၶဝ်ႈပၢင်တိုၵ်း- ၼႆယဝ်ႉ။

လွင်ႈတၢင်း တပ်ႉသိုၵ်းဝႃႉ လႆႈၾိုၵ်းၵၢၼ်သိုၵ်းၸိူင်ႉၼႆၼႆႉ ယွၼ်ႉၼႂ်းၸိုင်ႈတႆးပွတ်းဢွၵ်ႇၶူင်း မိူၼ်ၼင်ႇ ၼႂ်းၸႄႈတွၼ်ႈတႃႈၶီႈလဵၵ်း၊ ၸႄႈတွၼ်ႈမိူင်းသၢတ်ႇ ၸွမ်းလႅၼ်လိၼ်တႆး-ထႆးၸိူဝ်းၼႆႉ တပ်ႉသိုၵ်းမိူင်းဝႃႉ ၽွမ်ႉႁူမ်ႈ (UWSA) တင်းတပ်ႉသိုၵ်း လူင်ပွင်ၸိုင်ႈမၢၼ်ႈ မီးလွင်ႈၶဵင်ႈၶႅင်ၵၢၼ်သိုၵ်းတေႃႇၵၼ် ။

ၵဵဝ်ႇၵပ်းလွင်ႈၼႆႉ ၽူႈမီးၸၼ်ႉၼႂ်းဝႃႉၵေႃႉၼိုင်ႈ လၢတ်ႈတီႈ ၸုမ်းၶၢဝ်ႇၽူႈတွႆႇႁွၵ်ႈဝႃႈ- ဢၼ်ႁဝ်းၶႃႈ ၾိုၵ်းၵၢၼ်သိုၵ်းၼႆႉ မီးမႃးလၢႆဝၼ်းယဝ်ႉ။ ၾိုၵ်းပၼ်ၵူၼ်းၸိူဝ်း ပႆႇယၢမ်ႈႁဵၼ်းသွၼ်ၵၢၼ်သိုၵ်း၊ ၾိုၵ်းၵၢၼ်သိုၵ်းမိူၼ်ၼင်ႇ ၶိုၼ်ႈယိုတ်းႁုပ်ႈတပ်ႉၽူႈၶဵၼ်၊ ၾိုၵ်းယိုဝ်းၵွင်ႈလူင် 105mm, 120mm ၸိူဝ်းၼႆႉ။ ၵူၺ်းၵႃႈ ၵွင်ႈလူင်တႄႉတႄႉၼၼ်ႉ ႁဝ်းၶႃႈဢမ်ႇလႆႈယိပ်းၼင်ႇၵဝ်ႇ၊ ၵွင်ႈတၢင်ႇသႅၼ်း ဢၼ်ႁဝ်းၶႃႈ ဢမ်ႇႁူႉၸၵ်းၵေႃႈမီး။ ဢၼ်ၾိုၵ်းၵၢၼ်သိုၵ်းၼႆႉ ပေႃးပႃးမိူဝ်ႈဝႃး မီး 4-5 ဝၼ်းယဝ်ႉ- ဝႃႈၼႆ။

တီႈပၢင်ၾိုၵ်းၵၢၼ်သိုၵ်းၼၼ်ႉ ၵႅမ်ၽူႈၵွၼ်းသိုၵ်း ၸၢဝ်ႉၸူင်းတၢင်း၊ ၽူႈၶၢၼ်ပၢၵ်ႇလႄႈ ၽူႈၵွၼ်းၵၢၼ်လုမ်း ဢူးဢွင်ႇမိၼ်ႉ (လီႇၸူးလျႄႉ) ၸိူဝ်းၼႆႉၵေႃႈၶဝ်ႈႁူမ်ႈ ၵၢၼ်ၾိုၵ်းသိုၵ်း။ မီးၵၢၼ်ဢဝ် ၵွင်ႈသွင်ႇၵႆ- (မၢၼ်ႇပျွင်းထွင်ႇၵႆ-ၸမ်) ဢၼ်ၸႂ်ႉၼႂ်းၵၢၼ်သိုၵ်း သွင်ႇတူၺ်း ထတ်းတူၺ်း ၼႂ်းၵၢၼ်ၾိုၵ်းသိုၵ်းၸိူဝ်းၼႆႉ။

ၾၢႆႇၼိုင်ႈ ၸဝ်ႈၼႃႈတီႈ ၾၢႆႇလူင်ပွင်ၸိုင်ႈမၢၼ်ႈ ဢၼ်ယူႇတီႈတႃႈၶီႈလဵၵ်းၵေႃႉၼိုင်ႈ လၢတ်ႈဝႃႈ- သိုၵ်းလူင်ပွင်ၸိုင်ႈတႄႉ ဢၼ်ၵႂႃႇတူင်ႉၼိုင် ပွတ်းလႅၼ်ၶႅၼ်ႈ ပွတ်းမိူင်းပွၵ်ႉ မိူင်းလႃးၸိူဝ်းၼႆႉ ဢမ်ႇမီးလွင်ႈတူင်ႉၼိုင်ၵၢၼ်သိုၵ်းသင်။ ၾၢႆႇတၢင်းၸၢၼ်း ႁိမ်းလႅၼ်လိၼ်ထႆးတႄႉၵေႃႈ မီးၽွင်ႈယူႇ၊ ၵွပ်ႈဝႃႈငဝ်းလၢႆးပႆႇပေႃးၼိမ်။ လွင်ႈသဵၼ်ႈတႃႈသၢႆတၢင်းၵေႃႈ ႁဝ်းၶႃႈတပ်ႉဢိုတ်းပႅတ်ႈသဵၼ်ႈတၢင်း ဢမ်ႇၸႂ်ႈ၊ မၼ်းပဵၼ်ၵူၼ်းမိူင်းဢမ်ႇႁတ်းၵႂႃႇလႄႈ ၶဝ်ဝႃႈၾၢႆႇလူင်ပွင်ၸိုင်ႈမၢၼ်ႈ ဢိုတ်းသဵၼ်ႈတၢင်းၼႆၵူၺ်း၊ ရူတ်ႉၵႃးၸိူဝ်းၼႆႉ ပေႃးၸမ်ပဵၼ်ၵေႃႈ ဢွၵ်ႇတၢင်းယူႇ- ဝႃႈၼႆ။

မိူဝ်းဝႃးဝၼ်းတီႈ 17/06/2015 ယၢမ်းၵၢင်ၶိုၼ်း 10 မူင်းၼႆႉ မီးၵႃးၵၢပ်ႇလဵၵ်းသိုၵ်းမၢၼ်ႈလၢႆလၢႆလမ်း လုၵ်ႉတႃႈၶီႈလဵၵ်း မုင်ႈၼႃႈၵႂႃႇတၢင်းမိူင်းသၢတ်ႇ၊ မီးၵႃးႁူမ်ႇလူမ်ႈၼမ်းၼႃႈၵႂႃႇဢွၼ်တၢင်း။ ၵပ်းၵၢႆႇလွင်ႈၼႆႉ ၵူၼ်းဢၼ်ႁၼ်သိုဝ်ႈၼႃႈသိုဝ်ႈတႃလၢတ်ႈဝႃႈ ၵႃးၵၢပ်ႇလဵၵ်း မီး 5 လမ်း၊ ၵူၺ်းၵႃႈ ဢၼ်ပူၼ်ႉၵႂႃႇယဝ်ႉတႄႉ မီးလၢႆလမ်းၵေႃႈဢမ်ႇႁူႉ- ဝႃႈၼႆ။

တပ်ႉသိုၵ်းဝႃႉ (UWSA) ၼႆႉ တႄႇၵိုတ်းသိုၵ်းၵၼ်တင်း ၸုမ်းသိုၵ်းလူင်ပွင်ၸိုင်ႈမၢၼ်ႈမႃး မိူဝ်ႈပီ 1989 ။ တင်ႈတႄႇၵိုတ်းသိုၵ်းမႃး တေႃႇထိုင်ယၢမ်းလဵဝ် ႁႂ်ႈပေႃးၶဵင်ႈၶႅင်ၵၢၼ်သိုၵ်း တေႃႇၵၼ်ႁၢဝ်ႈႁႅင်းသေ တေႃႇပေႃးထိုင်လွင်ႈတူၵ်းလူင်းၵိုတ်းသိုၵ်း ပေႃးလူႉၵွႆၼၼ်ႉ ပႆႇမီးမႃးသေပွၵ်ႈ။