ပႃႊတီႊငဝ်ႈငုၼ်းၻီႊမူဝ်ႊၶရေႊၸီႊ ၸိူဝ်ႉၶိူဝ်းတႆး SNLD (ပႃႊတီႊႁူဝ်သိူဝ်)၊ မိူဝ်ႈလဵဝ် လူင်းသူၼ်းတုမ် ၵူၼ်းမိူင်းၼႂ်းၸိုင်ႈတႆး ပွတ်းႁွင်ႇ၊ ပွတ်းၸၢၼ်း လၢႆလၢႆတီႈသေတႃႉ တေၶဝ်ႈပၢင်လိူၵ်ႈတင်ႈဢမ်ႇၶဝ်ႈ ယင်းပႆႇတႅပ်းတတ်း ပုတ်းၶၢတ်ႇ။

ၽူႈၼမ်းၼႂ်းၵူႈလွင်ႈလွင်ႈ ၸၢႆးၼုတ်း ၵၢဝ်ႇလၢတ်ႈၶေႃႈၵႂၢမ်း

ဝၼ်းတီႈ 18/06/2015  ၼႆႉပႃႊတီႊႁူဝ်သိူဝ် SNLD သိုပ်ႇပိုတ်ႇလုမ်းထႅင်ႈ တီႈမိူင်းၵုတ်ႈ မိူဝ်ႈၶၢဝ်းယၢမ်း 11.00 မူင်းၵၢင်ဝၼ်း ဝၢႆးတီႈမိူင်းၵုတ်ႈယဝ်ႉ သိုပ်ႇၵႂႃႇပိုတ်ႇတီႈ မိူင်းလူင် ၼႂ်းဝၼ်းလဵဝ်ၵၼ် ပိုတ်ႇၵႂႃႇသွင် တီႈ၊ မိူဝ်ႈၽုၵ်ႈသမ်ႉတေသိုပ်ႇၵႂႃႇပိုတ်ႇတီႈမိူင်းမိတ်ႈထႅင်ႈ။  ၸိူင်ႁိုဝ်ၵေႃႈလီ ပႃႊတီႊႁူဝ်သိူဝ် တေသူၼ်းတုမ်ၵူၼ်းမိူင်းသေပိုတ်ႇလုမ်းၵႂႃႇ  ပိူဝ်ႈပဵၼ်ၵၢၼ်ႁၢင်ႈႁႅၼ်းတူဝ်ႈတၢၼ်းဝႆႉ သင်ဝႃႈတၵ်းတေလႆႈၶဝ်ႈပၢင်လိူၵ်ႈတင်ႈ ဢၼ်ဢိင်လူၺ်ႈငဝ်းလၢႆး။

ၽူႈၼမ်းၼႂ်းၵူႈလွင်ႈလွင်ႈ ၸၢႆးၼုတ်း(ၸၢႆးၺုၼ်ႉလုၼ်ႇ) ပိုတ်ႇလၢတ်ႈဝႃႈ ၼႂ်းပၢင်လိူၵ်ႈတင်ႈ ပီ 2015 ၼႆႉ၊ ပႃႊတီႊႁူဝ်သိူဝ် တေၶဝ်ႈလိူၵ်ႈတင်ႈဢမ်ႇၶဝ်ႈလိူၵ်ႈၼၼ်ႉ ဢမ်ႇပႆႇတႅပ်းတတ်း၊ သင်ဝႃႈ ငဝ်းလၢႆးမၼ်းပၼ်မႃးပဵၼ်မႃးၸိူင်ႉႁိုဝ်ၵေႃႈ ပႃႊတီႊႁူဝ်သိူဝ်ႁဝ်းတိုၼ်းတၵ်းလႆႈႁၢင်ႈႁႅၼ်း တူဝ်ႈတၢၼ်းဝႆႉထႃႈၼႆယဝ်ႉ။

ႁူဝ်ပဝ်ႈၸဝ်ႈၶုၼ်ထုၼ်းဢူးလႄႈၽူႈပွင်ၵၢၼ်ၼႂ်းလုၵ်ႈၸုမ်းပႃႊတီႊႁူဝ်သိူဝ် လူင်းသူၼ်းတုမ်ၵူၼ်းမိူင်းလႄႈသိုပ်ႇပိုတ်ႇလုမ်းၵႂႃႇ၊ မိူဝ်ႈဝႃးၵေႃႈလႆႈပိုတ်ႇလုမ်းၵႂႃႇတီႈ ဝဵင်းလိူဝ်ႇ မီးၽူႈၶဝ်ႈႁူမ်ႈတင်းၼမ်  ဢိၵ်ႇပႃးတၢင်ႇပႃႊတီႊမႃးၶဝ်ႈႁူမ်ႈ။

ပူၼ်ႉမႃးမိူဝ်ႈ 13-14/06/2015 ၵေႃႈ လုမ်းပႃႊတီႊႁူဝ်သိူဝ် တီႈဝဵင်းတူၼ်ႈတီး ပိုတ်ႇပၢင်ၾိုၵ်းၾွၼ်ႉပၼ်ပၢင်သွၼ်လွင်ႈတႃႇတေတွတ်ႈၶႅပ်းၵၢင်ၸႂ်ၼႂ်းပၢင်လိူၵ်ႈတင်ႈ ဢိၵ်ႇတင်းၸီႉၸႅင်ႈသပ်းလႅင်းလၢတ်ႈၼႄ လွင်ႈပိူင်ငဝ်ႈပိုၼ်းမိူင်း 2008 ၸဵမ်ၸိူဝ်ႉၼႆ။