ၸွမ်ႁၢၼ်ၸၢႆးယီႈ ၵၢဝ်ႇလၢတ်ႈၶေႃႈၵႂၢမ်း တီႈပၢင်ၵႅဝ်ႈ ဝၼ်းလုၵ်ႉၽိုၼ်ႉ ၸိုင်ႈတႆး ၶွပ်ႈၶူပ်ႇ 57 ပီ၊ လိူၼ်မေႊ 21 ဝၼ်း (2015) ဢၼ်ၶွင်ႊသီႊဢဝ်ၶိုၼ်း ၸိုင်ႈတႆး/ တပ်ႉသိုၵ်းၸိုင်ႈတႆး (RCSS/SSA) ၸတ်းတီႈငဝ်ႈၸိုင်ႈ လွႆတႆးလႅင်း။ တပ်ႉသိုၵ်းၸိူဝ်ႉၸၢတ်ႈ ၸိုင်ႈတႆး (SSNA) တင်း RCSS ႁူမ်ႈႁွမ်ၵၼ် တဵမ် 10 ပီ ယွၼ်ႉၵူၼ်းၼႆႉ ဢမ်ႇယွမ်းလႆႈ။

မိူဝ်ႈဝၼ်းလုၵ်ႉၽိုၼ်ႉၸိုင်ႈတႆး မေႊ 21 တီႈလွႆတႆးလႅင်း ၸတ်းပၢင်ၶုၵ်းထူပ်း ၶွပ်ႈၶူပ်ႇ 57 ပီ

မၼ်းၸဝ်ႈလၢတ်ႈဝႃႈ- ဝၼ်းမိူဝ်ႈၼႆႉ ပဵၼ်ဝၼ်းလိူၼ်မေႊ 21 ဝၼ်း၊ လိူဝ်သေပဵၼ်ဝၼ်းလုၵ်ႉၽိုၼ်ႉယဝ်ႉ ယင်းပဵၼ်ဝၼ်းဢၼ်ၶွင်ႊသီႊဢဝ်ၶိုၼ်းၸိုင်ႈတႆး (RCSS) တင်း တပ်ႉသိုၵ်းၸိူဝ်ႉၸၢတ်ႈၸိုင်ႈတႆး (SSNA) ႁူမ်ႈႁွမ်းၵၼ် မိူဝ်ႈပီ 2005 ၊ တဵမ် 10 ပီ လိူၼ်မေႊ 21 ဝၼ်းမိူဝ်ႈၼႆႉ။

တပ်ႉသိုၵ်းၸိူဝ်ႉၸၢတ်ႈၸိုင်ႈတႆး (SSNA) လုၵ်ႉတီႈလႂ်မႃး ?။ ၶွင်ႊသီႊဢဝ်ၶိုၼ်းၸိုင်ႈတႆး (RCSS) ၼႆ ၽႂ်ၵေႃႈႁူႉဝႃႈ ပဵၼ်ၸုမ်းၵဝ်ႇၵဝ်ႇ ဢၼ်မီးဝႆႉ။ တပ်ႉသိုၵ်းၸိူဝ်ႉၸၢတ်ႈၸိုင်ႈတႆး ဢၼ်ဝႃႈၼႆႉ တႅၵ်ႇဢွၵ်ႇၼႂ်း တပ်ႉသိုၵ်းမိူင်းတႆး (MTA) သေ လႆႈၵိုတ်းသိုၵ်း (ၸွမ်းလူင်ပွင်ၸိုင်ႈ ၸုမ်းသိုၵ်းမၢၼ်ႈ) ၵႂႃႇပွၵ်ႈၼိုင်ႈ၊ ၵိုတ်းသိုၵ်းလႆႈ ၶၢဝ်းတၢင်း 9 ပီ မၢၼ်ႈၵေႃႈႁႂ်ႈႁဵတ်းပဵၼ်ပီႇတုၸိတ်ႉႁိုဝ်ႁႂ်ႈဝၢင်းၵွင်ႈၵၢင်ႇ ပေႃးၶႂ်ႈလႆႈၵွင်ႈလၢႆလၢႆတႄႉ ပၼ်လႆႈယူႇ။ ၵူၺ်းၵႃႈ ႁႂ်ႈလႆႈယွမ်းဢၼ်ဝႃႈၼႆႉ ၶေႃႈယိူင်းဢၢၼ်းႁဝ်း ႁဵတ်းၵၢၼ်ၸိူဝ်ႉၶိူဝ်းလႄႈဝၢၼ်ႈမိူင်းၼႆႉ ႁဝ်းတေလႆႈယွမ်းၼႆ ဢမ်ႇပဵၼ်လႆႈ။ ၵွင်ႈႁဝ်းတႄႉ ပၼ်လၢႆလၢႆၵေႃႈ ဢမ်ႇပဵၼ်သင်၊ ႁႃၶိုၼ်းမႂ်ႇလႆႈ၊ ၵူၼ်းတႄႉဢမ်ႇယွမ်း။

ဢမ်ႇၶႂ်ႈယွမ်းၼႆသေတႃႉၵေႃႈ ၵူၼ်းသိုၵ်းႁဝ်း ဢၼ်မီးယူႇၼပ်ႉႁူဝ်ပၢၵ်ႇႁူဝ်ႁဵင်မၼ်းၼၼ်ႉ ၸိူဝ်းၵႂႃႇယွမ်းၵေႃႈ သမ်ႉမီးယူႇ။ ၵူၺ်းၵႃႈ ႁဝ်းဢၼ်မီးယူႇၸိူဝ်းၼႆႉ ဢမ်ႇၶႂ်ႈႁႂ်ႈပဵၼ်ၵူၼ်းယွမ်း၊ ၵူၼ်းယွမ်းပၼ်ၽူႈၶဵၼ်ၼႆႉ ဢမ်ႇၶႂ်ႈႁႂ်ႈမီး၊ မိူဝ်းၼႃႈမႃးၵေႃႈ ဢမ်ႇၶႂ်ႈႁႂ်ႈမီး၊ မိူဝ်ႈလဵဝ်ၵေႃႈ ဢမ်ႇၶႂ်ႈႁႂ်ႈမီး။ လၢႆမူႇလၢႆၸုမ်း ဢၼ်ၵိုတ်းသိုၵ်းႁဵတ်းလွင်ႈငမ်းယဵၼ်လႄႈသင်၊  ဢၼ်ၵိုတ်းသိုၵ်းဝႆႉလႄႈသင်၊ ပေႃးဝႃႈမၢၼ်ႈယွၼ်းၵွင်ႈမႃးၵေႃႈ ဢွၼ်ၵၼ်ယွမ်း။ ဢိင်ဢၢင်ႈဝႃႈ ငဝ်းလၢႆးမၼ်းပဵၼ်ၸိူင်ႉၼၼ် ၸိူင်ႉၼႆ။ တီႈတႄႉမၼ်း ယွၼ်ႉဢမ်ႇပိုၼ်ႉပွႆႇ လႆႈ သုၼ်ႇတူဝ်ၸဝ်ႈၵဝ်ႇ၊ ဢမ်ႇပိုၼ်ႉပွႆႇလႆႈ လွင်ႈမၢၵ်ႈမီးၸဝ်ႈၵဝ်ႇလႄႈ ၸင်ႇၵွႆႈယွမ်းပၼ်မၢၼ်ႈ။ ၸႂ်တႄႉ ၽႂ်ၵေႃႈဢမ်ႇၶႂ်ႈယွမ်း၊ ၵူၺ်းၵႃႈ ယွၼ်ႉပိူဝ်ႈၶူဝ်းၶွင်သုၼ်ႇတူဝ်မီးယူႇၼၼ်ႉ ဢမ်ႇပိုၼ်ႉပွႆႇလႆႈလႄႈ မၼ်းလႆႈပဵၼ်ၵႂႃႇ၊ လႆႈယွမ်းၵႂႃႇ။

ၵွပ်ႈပိူဝ်ႈၼၼ်လႄႈ ၶႂ်ႈၾၢင်ႉသိုၵ်းႁၢၼ် ၽူႈမီးၸၼ်ႉႁဝ်းၶဝ်တင်းသဵင်ႈ၊ ၸႂ်ႁၵ်ႉၸိူဝ်ႉၶိူဝ်းႁဝ်းၼၼ်ႉ ႁဝ်းယႃႇပေယွမ်းပႅတ်ႈသေ ၵႂႃႇၼွမ်းပၼ်ၽူႈၶဵၼ်။

တပ်ႉသိုၵ်းၸိူဝ်ႉၸၢတ်ႈၸိုင်ႈတႆး (SSNA) လႆႈထုၵ်ႇမၢၼ်ႈၶဝ်ယႃႉ/သႄႇ သေတႅၵ်ႇၵႂႃႇ။ တူဝ်ၵဝ်ၶႃႈႁဝ်းဢမ်ႇယွမ်းလႆႈသေ ၸင်ႇဢွၼ်ႁူဝ် တပ်ႉသိုၵ်းၸိူဝ်ႉၸၢတ်ႈၸိုင်ႈတႆး မႃးႁူမ်ႈၵၼ်တင်း ၶွင်ႊသီႊဢဝ်ၶိုၼ်းၸိုင်ႈတႆး (RCSS) ။ ပီၼႆႉ ၶွပ်ႈၶူပ်ႇ 10 ပီတဵမ်မိူဝ်ႈၼႆႉယဝ်ႉ၊ ပွင်ႇဝႃႈႁဝ်းမႃးႁူမ်ႈႁွမ်းၵၼ်ၼႆႉ လႆႈ 10 ပီ။ လွင်ႈၼႆႉၵေႃႈ ၶႂ်ႈႁႂ်ႈၵူၼ်းသိုၵ်းႁဝ်း ၵူၼ်းမိူင်းႁဝ်းႁူႉဝႆႉဝႃႈ သွင်တပ်ႉမႃးႁူမ်ႈႁွမ်းၵၼ်။
 
ဢၼ်ႁဝ်းဢမ်ႇယွမ်းသေ ႁဝ်းမႃးႁူမ်ႈႁွမ်းၵၼ်ၼႆႉ ႁဝ်းၽႃႈၵၢၼ်ၵိုတ်းသိုၵ်း၊ ဢၼ်ႁဝ်းၵိုတ်းသိုၵ်းတင်းမၢၼ်ႈၼၼ်ႉ ႁဝ်းဢမ်ႇၵိုတ်းယဝ်ႉ၊ ႁဝ်းတေတိုၵ်းၶိုၼ်းယဝ်ႉၼႆ မၼ်းပိုၼ်ၽၢဝ်ႇတႅၵ်ႇလႅင်းၸိူင်ႉၼၼ်။

ထႅင်ႈလွင်ႈၼိုင်ႈ ၽႃႈၵၢၼ်ငွၵ်းႁူဝ်ၸွမ်းမၢၼ်ႈ။ မိူဝ်ႈႁဝ်းၵိုတ်းသိုၵ်းၼၼ်ႉ ႁဝ်းမီးၽူႈတၢင်တူဝ် 2 ၵေႃႉ၊ ႁဝ်းၵေႃႈလႆႈၵႂႃႇၶိုၼ်ႈပၢင်ၵုမ်လူင်ၸိူဝ်ႉၸၢတ်ႈ (ၺီႇလႃႇၶၢမ်ႇ) ဢၼ်ၶဵၼ်ႇတႅမ်ႈ ပိူင်ငဝ်ႈပိုင်းမိူင်း။ ၵူၺ်းၵႃႈ ၽူႈတၢင်တူဝ်ႁဝ်းလႆႈၵႂႃႇၶိုၼ်ႈၵေႃႈ မၢၼ်ႈလိူၵ်ႈသေႁွင်ႉဢဝ်ၵူၺ်း။ မၢၼ်ႈလိူၵ်ႈႁွင်ႉၵႂႃႇႁဵတ်းသင်ၼႆ ၸႂ်ႉၵႂႃႇငွၵ်းႁူဝ်ၵူၺ်း၊ မၢၼ်ႈလၢတ်ႈၼၼ်ႉ ႁႂ်ႈႁဝ်းဢေႃႈတိၵ်းတိၵ်းသေလႄႈ ႁပ်ႉဢဝ်သဵင်ဝႃႈ ဢၼ်ၽွမ်ႉၼႆႉ ၸုမ်းၼႆႉၵေႃႈပႃးဢိူဝ်ႈ၊ ၸင်ႇဝႃႈႁဝ်းဢမ်ႇႁပ်ႉလႆႈ။ ၵွပ်ႈႁဝ်းဢမ်ႇႁပ်ႉလႆႈလႄႈ ၸင်ႇလႆႈယူႇၾၢႆႇဢၼ်ယိုဝ်းၶိုၼ်း မိူၼ်ၸိူင်ႉၼင်ႇ RCSS သေ လႆႈမႃးႁူမ်ႈႁွမ်းၵၼ်ၶိုၼ်း၊ ၼႆႉပဵၼ်ပိုၼ်းဢွၼ်ႇဢၼ်ၵႅပ်ႈၵႅပ်ႈ ဢၼ်ပွတ်းပွတ်းမၼ်း။

တပ်ႉသိုၵ်းၸိူဝ်ႉၸၢတ်ႈၸိုင်ႈတႆး လုၵ်ႉတီႈလႂ်မႃး ?၊ ႁဵတ်းႁိုဝ်လႄႈမႃးႁူမ်ႈၵၼ်၊ ၵူၼ်းသိုၵ်းတင်းၼမ်ၵေႃႈတေဢမ်ႇႁူႉ၊ ၵူၼ်းမိူင်းယိင်ႈၶႅၼ်းဢမ်ႇႁူႉယဝ်ႉ။ ၵွပ်ႈပိူဝ်ႈၼၼ်လႄႈ လႆႈလၢတ်ႈၼႄ။ ဝၼ်းမိူဝ်ႈၼႆႉ ပဵၼ်ဝၼ်းလုၵ်ႉၽိုၼ်ႉတႆးႁဝ်း၊ ၵၢၼ်လုၵ်ႉၽိုၼ်ႉတႆးႁဝ်းၼႆႉ မၼ်းပႆႇယဝ်ႉ။ ၵွပ်ႈၼၼ် ၶႂ်ႈသင်ႇၵမ်းလိုၼ်းသုတ်းဝႃႈ ၵူၼ်းမိူင်းႁဝ်း ၵူၼ်းသိုၵ်းႁဝ်း ႁႂ်ႈဢွၼ်ၵၼ်ၽွမ်ႉႁူမ်ႈၵၼ်သေယဝ်ႉ ႁႃလၢႆးတွၼ်ႈတႃႇ ႁႂ်ႈၵၢၼ်လုၵ်ႉၽိုၼ်ႉႁဝ်း ယႃႇပေႁိုင်၊ ႁႂ်ႈၸဵဝ်းထိုင်တီႈယိူင်းမၢႆ ၶႂ်ႈတိုၵ်းသူၼ်းၼင်ႇၼႆ။