လုမ်းလူင်ၾၢႆႇၵပ်းသၢၼ်ၵၢၼ်မိူင်း တီႈမိူင်းၼွင်သႄ လႆႈၸတ်းႁဵတ်းပၢင်လူၽိုၼ်လိၵ်ႈ ပဵၼ်ပွၵ်ႈၵမ်း တီႈ 1 ၊ ဢၼ်မီးႁူဝ်ၶေႃႈဝႃႈ ပုတ်ႉထသႃသၼႃ လႄႈ ဝၢၼ်ႈမိူင်း၊ ၸတ်းႁဵတ်းတီႈ မိူင်းၼွင်သႄ (ၶုၺ်ႉမိၼ်ႉ) ၸိုင်ႈမိူင်းၶႄႇ ၶႅမ်ႉလႅပ်ႈၶိုၵ်ႉတွၼ်း ၵႂႃႇ- ၼႆယဝ်ႉ။

ၼႂ်းဝၼ်းတီႈ 27/05/2015 ၶၢဝ်းယၢမ်းၵၢင်ၼႂ် 09.00 ထိုင် 17.00 မူင်း ႁူဝ်ၶမ်ႈ လုမ်းလူင်ၾၢႆႇၵပ်းသၢၼ်းၵၢၼ်မိူင်းတီႈမိူင်းၼွင်သႄ ၸွမ်းလူၺ်ႈ ၸွမ်ၸိုင်ႈမိူင်းၶႄႇ သီႊၸႅၼ်ႊၽိၼ်ႊ ႁၼ်လီယုၵ်ႇယွင်ႈ ၾၢႆႇၵၢၼ်ပုတ်ႉထသႃသၼႃသေ မိူဝ်ႈပီၵၢႆ မၼ်းၸဝ်ႈမႃးႁွတ်ႈထိုင် ၸႄႈမိူင်းယုၼ်ၼၢၼ်၊ သမ်ႉလႆႈမႃးႁၼ်ၾၢႆႇသႃသၼႃသၢမ်ၵိူင်း မိူၼ်ၼင်ႇၵိူင်းထေရဝႃတ၊ ၵိူင်းမႁႃယႃၼ၊ ၵိူင်းတိပႅတ်ႉ လႄႈမၼ်းၸဝ်ႈၶဝ်ႈၸႂ်ၶဝ်ႈၶေႃးသေတုၵ်းယွၼ်းႁႂ်ႈႁဵတ်းပၢင်ဢၢၼ်ႇလူၽိုၼ်လိၵ်ႈ သႃသၼႃလႄႈဝၢၼ်ႈမိူင်းၼႆႉမႃး။ ၼႂ်းပၢင်ဢၢၼ်ႇလူလိၵ်ႈၼႆႉ မီးၵူၼ်းလၢႆၸၢဝ်းၶိူဝ်း ၸိူဝ်းပဵၼ်ပုတ်ႉထသႃသၼႃ ၶဝ်ႈထွမ်ႇ မီး 123 ၵေႃႉ။

ၸဝ်ႈတိုၼ်းတႆး

ၽူႈဢုပ်ႇၵုမ် ၶဝ်ႈဢၢၼ်ႇလူလိၵ်ႈ မီႈ 8 ၵေႃႉ။ ၼႂ်း 8 ၵေႃႉၼၼ်ႉ တႆးမီးၸဝ်ႈတိုၼ်းတႆး(ၵႅမ်ႁူဝ်ပဝ်ႈ ငဝ်ႈငုၼ်းလူင်လုမ်းပုတ်ႉထ ၸိုင်ႈမိူင်းၶႄႇ) လႄႈၸၢႆးၶႃႊလၢၼ်းသၢမ်(ၽူႈမၢႆလူင် လုမ်းပုတ်ႉထမိူင်းၼွင်သႄ ပဵၼ်ၵူၼ်းသိပ်းသွင်ပၢၼ်းၼႃး)။ 1. ႁူဝ်ၶေႃႈ ဢၼ်ၸဝ်ႈတိုၼ်းတႆး ဢုပ်ႇၵုမ် ပဵၼ်လွင်ႈလီထေရဝႃတပုတ်ႉထၽႃသႃ ဢၼ်မီးၼႂ်းမိူင်းလၢၼ်ႉၸဝ်ႈ ၵူႈပၢၼ်ပၢၼ်။ 2. ႁူဝ်ၶေႃႈ ဢၼ်ၸၢႆးၶႃႊလၢၼ်းသၢမ် ဢုပ်ႇၵုမ်သမ်ႉ ပဵၼ်လၢႆးႁဵတ်းသၢင်ႈၼႃႈၵၢၼ် ၸၼ်ႉၸွမ်ထေရဝႃတ ဢၼ်ၸိုဝ်ႈသဵင်ယႂ်ႇၼႂ်းလူၵ်ႈ (လေႃးၵ) ။

ယိူင်းဢၢၼ်းတႄႉ 1. ၶႂ်ႈႁႂ်ႈဢဵၼ်ႁႅင်းပုတ်ႉထၽႃသႃ ၼႂ်းမိူင်းၶႄႇ တိူဝ်းၵႅၼ်ႇၶႅင်မႃး။ 2. ၶႂ်ႈႁႂ်ႈၸဝ်ႈသင်ၶလႄႈ ၽူႈပွင်ၵၢၼ်သႃသၼႃ ၵႂႃႇမႃးၶဝ်ႈဢွၵ်ႇႁၵ်ႉႁွမ် မိူင်းၸိူဝ်းပုတ်ႉထၽႃသႃ ၵူႈမိူင်းမိူင်းၼႂ်းလူၵ်ႈၼႆႉ။ 3. ၶႂ်ႈႁႂ်ႈၵူၼ်းမိူင်းႁူႉလွင်ႈလီပုတ်ႉထသႃသၼႃ ဢၼ်မီးလွင်ႈလီတေႃႇၸူဝ်ႈပၢၼ်မိူင်းၵူႈၵေႃႉလႄႈ ၶႂ်ႈႁႂ်ႈႁူႉဝႃႈပုတ်ႉထသႃသၼႃၼႆႉပဵၼ်ပေႃႈပဵၼ်မႄႈ ၾိင်ႈငႄႈမိူင်းၶႄႇ- ဝႃႈၼႆ။

ဢၼ်လႆႈၸတ်းႁဵတ်းပၢင်ဢၢၼ်ႇလူၽိုၼ်လိၵ်ႈ ပွၵ်ႈၵမ်းၼႆႉ ပဵၼ်ပွၵ်ႈၵမ်းႁႅၵ်ႈလႄႈပဵၼ်ပွၵ်ႈဢွၼ် တၢင်းသုတ်းယဝ်ႉ ပီတေမႃးၼႆႉ တေၸတ်းႁဵတ်းပၢင်ဢၢၼ်ႇလူၽိုၼ်လိၵ်ႈ ၵႂႃႇၵူႈပီပီ ဝႃႈၼႆ။